Gn 34
34
Yab'xil 'ix Dina
1Ax 'ix Dina, 'ix yune 'ix Lea yet' Jacob, x'at 'ix b'eyc'oc 'a scal eb' 'ix cob'stac 'ix 'a jun lugar cha. 2Ax win Hamor win heveo syajlil chon̈b' cha, 'ay jun yunnal tzcuch Siquem. Xyiln 'och win Siquem chi 'ix cob's cha, 'ix ya'n pural win yixtn 'ix. 3Caw wal xcan snab'en win 'a 'ix, yuj cha, xpaxtin win 'a 'ix yet' schamc'ojlal. 4Xyaln win 'a smam chi 'ixtic:
—'At c'an jun cob's 'ix cha, tzin nib'j wal tzwij in b'a yet'oc, xchi winac.
5-8Wach'xam xyab' Jacob chajtlto tox x'ixtx 'ix yisl win yuj win Siquem cha, may tas xyal winac masnto xmeltzj ewin yunnal win cha, yujto 'ayb't eb' 'ilj calnelu 'a b'esan. Ax yic xc'och eb' yunnal win cha, a yic xyab'n ewin yuj tas 'ix uji, 'ix cus sc'ojl eb', xcot pax yowl eb' si'mb'il, yujto niwquil jun mul chi xb'o 'a scal eb' yunnal Israel cha, atn pax win tzcuch Jacob. A jun tic caw wal q'uixweltac, may 'aj tzb'o 'a scal eb' 'ixta'.
Ax win Hamor, smam win Siquem cha, xc'och win 'a 'aj cajn Jacob cha, yic tzpaxtin yet'oc. Ax x'aji a yet' ewin yunnal Jacob chi xpaxtin winac, xyaln 'a ewin 'ixtic:
—A ni wunnal Siquem caw wal tzcan snab'en ni 'a 'unx e yanab', yuj cha, comnoc tz'el 'a e c'ojol, tzyij sb'a 'unx yet' na. 9Tztac' eyoch quit chon̈b'oc on̈, tztac' cab' qui'n qui b'a yet' eb' eyisl tic, ax xo, tzeyij e b'a yet' eb' 'ix quisl chi 'on̈. 10Cann̈ec cajn 'a qui cal tic on̈, a lum lum tic, 'ayc' lum 'a yol e c'ab', 'a'c 'och e chon̈, mannc e lu'um, xchi win Hamor cha.
11Xyaln pax win Siquem 'ixtc 'a win Jacob smam 'ix Dina cha, yet' 'a ewin snul'j 'ix.
—Tzann̈j tas tze c'an 'ayin, 'oj wac' 'ayex. 12May yel'chi toxn̈ej chan̈ stojl 'unx 'icha sb'eyb'al eb' 'anma 'a tic, niwn pax siylab' tztac' wa'n 'ayex, cojn toto tzchaj e c'ojl tzwij in b'a yet' 'unix, xchi winac.
13Yujto tox x'ixtx 'ix Dina chi yuj win Siquem cha, yuj cha, xta'w ewin snul'j 'ix Dina chi 'a chab'satl 'a winac yet' 'a smam win cha. 14Xyaln ewin 'ixtic:
—Matz tac' ca'n canb' 'a junc winc man̈ 'ac'b'iloc circuncidar, caw q'uixwel tzon̈ 'ajcn on̈ toto 'ixta'. 15Cojn toto tzchaj e c'ojl 'icha caj an̈ tic on̈, toq'ue tzcac' 'unx 'ayex, yujto an̈ tic 'ac'b'iln̈ circuncidar on̈. Toto tzyal e c'ojl tzex 'ajx circuncidar yet' smasnil ewin winc 'ayc' 'a e cal tic, 16to 'ixta', tztac' eyi'n e b'a yet' eb' 'ix quisl tic on̈, tztac' pax qui'n qui b'a yet' eb' 'ix eyisl chi 'on̈, 'ixta to b'i'an, tztac' caj 'a e cal, sec junxn̈ej chon̈b'al tzon̈ canec. 17Palta toto matz eyiclj eya'n circuncidar e b'a, to 'ixta', tzon̈ 'el 'a tic on̈, tzqui'n pax 'unx canb' tic quet' on̈, xchi ewinac.
18Ax win Hamor yet' win yunnal cha, xchaj sc'ojl eb' 'icha xyal ewin cha. 19Yuj cha, man̈x 'ic yij 'ec' eb' tiempo, yujto caw xcan snab'en win Siquem chi 'a 'ix yisl win Jacob cha. Cojn pax win niwn yel'ch 'a scal smasnil eb' yunnal win Hamor cha. 20Wal 'a yajn̈ej, x'at win yet' smam 'a spuertail jun chon̈b' cha, 'a 'aj tzyam sb'a 'anma', syamn 'och eb' yaln 'ixtc 'a eb' winc cha:
21—A jun tzo'n̈ winc tic, caw wach' snab'en eb', yuj cha, 'oj can cajn eb' 'a qui calc tic, ax ya'n pax 'och eb' xchon̈ 'a qui chon̈b'ec tic. Caw wal niwquil lum lum 'aj tztac' yaj ewinac, tztac' qui'n qui b'a yet' eb' 'ix yisl ewinac, tztac' yi'n pax sb'a ewin yet' eb' 'ix quislec. 22Cojn b'i'an, to tznib'j ewin qui masnil an̈ec winc on̈c tic, tzca'c 'ajxc circuncidar qui b'a, 'icha sb'eyb'al ewinac. Toto 'ixta', junxn̈ej chon̈b'al tzon̈ 'ajc can yet' eb'. 23A smasnil tastc 'ay 'a eb', yet' smasnil scajb'en noc' ewinac, quic yaj smasnil, cojnto tzqui ta'wjec 'a eb', sec wach' tzcan eb' 'a qui calec, xchi win Hamor yet' win Siquem cha.
24Smasnil eb' winc 'a jun chon̈b' cha, eb' smoj s'at 'a owal, xyal sc'ojl ewin 'icha xyutj Hamor yaln yet' win Siquem cha, yuj cha, xya'n 'ajxoc circuncidar sb'a Siquem yet' smasnil eb' winc cha. 25Palta ax Simeón yet' Leví ewin yunnal Jacob, snul'j 'ix Dina, schab'jil xo cha, x'at ewin 'a jun chon̈b' cha, ya' sb'a ya'ay ewin quelmtac chi yuj circuncisión cha, a yic xc'och eb' 'a yol chon̈b' cha, syamn 'och ewin smiln cham ewin ya'ay chi smasnil yet' yespada, yujto man̈xtzac stac' scoln sb'a eb'. 26'Ix smiln cham ewin pax win Hamor yet' Siquem, xlajw cha, xyi'n 'elt ewin 'ix Dina 'a yol yatut winac, xpax eb' 'a scamplamento. 27Xc'och pax jun tzo'n̈ xo ewin yunnal win Jacob cha, tojln̈ej yec' ewin 'a yib'n̈ ewin chamnc cha, x'at yi'nc 'elt ewin smasnil tastc 'ay 'a eb' 'anma cha, 'ixta xyutj ewin ya'n spac, yujto xyixtj win Siquem 'ix yanb' ewin cha. 28Smasnil tas 'ay 'a yol chon̈b' cha yet' tas 'ay 'a b'esan, c'uxn xyij ewinac; no calnelu, no wacax yet' no b'uru. 29Xyelc'n cot ewin smasnil tas 'ay 'a yol yatut eb', xyi'n 'at ewin eb' cotc 'unin, yet' eb' 'ix 'ix smasnil. 30Yuj cha, xyaln win Jacob 'a Simeón yet' 'a Leví 'ixtic:
—Caw wal tzeyac' in chac in b'a yet' smasnil eb' 'anma cajn 'a sla'nil jun lugar tic, atn eb' cananeo yet' eb' ferezeo. 'Oj syam sb'a am eb', ax ya'n eb' owl quet'ec, tecn 'oj on̈ smilc eb' qui masnil yet' cunnalec tic, yujto jaywn̈n̈ej wal qui b'islec, xchi winac.
31Palta xta'w ewin 'ixtic:
—¿Tom 'ay sleyl tzyixtj win 'unx canb' tic on̈, tzya'n can 'och jun winc chi 'unx 'icha junc 'ix 'ajmul 'ix? xchi ewinac.
Currently Selected:
Gn 34: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
