Gn 35
35
Ya'jnac Dios syaxilal 'a yib'n̈ Jacob
1Xlajw cha, 'ix yaln Dios 'a Jacob 'ixtic: 'Eln̈ 'a tic, tzach 'atcn 'a Bet-el, ata tza b'o junc yet'l xajmb'al 'ayn an Dios in tic, yujto ata xin ch'ox in b'a 'ayach, yic wan a 'at 'elc 'a ni o'tac Esaú, xchi. 2Yuj cha, xyaln win Jacob 'ixtc 'a eb' yunnal yet' 'a eb' yisil, yet' 'a smasnil eb' 'ayc' yet'oc:
—'Ijec 'el smasnil jun tzo'n̈ yechl comn dios 'ayc' 'a e cal tic, tzlajw cha, tzex 'achni, tze jeln e pichl e masnil. 3Coyc mu'c 'a Bet-el, ata 'oj in b'o junc yet'l xajmb'al yuj yi'mb'ilc chan̈ sb'i Dios, atn jun colwjnac wet'oc yic 'ayn 'och wal 'a somc'ojlal, xcolwj pax wet' 'aj in laj 'eq'ui, xchi winac.
4'Ixta wal xyutj eb' ya'n jun tzo'n̈ sdiosal chi 'a Jacob yet' jun tzo'n̈ q'uen yumchiquin, ax Jacob 'ix mucn can 'ejm smasnil 'a yich jun te mach' 'ayc' 'a sla'nil Siquem cha. 5A yic x'elt eb' 'a jun lugar cha, a Dios x'a'n xiwc'ojlal 'a yib'n̈ smasnil eb' chon̈b' 'ayc' 'a stz'ey eb' cha, yuj cha, may eb' 'anma xpechn eb'.
6A win Jacob yet' smasnil eb' 'anma ajun yet'oc, 'ix c'och eb' 'a jun lugar tzcuch Luz 'a yol yic Canaán, atn pax jun lugar chi Bet-el sb'i. 7Ata sb'o win jun yet'l xajmb'al, xya'n sb'ic jun lugar chi El-bet-el,#Gn 35.7 El-bet-el tzyal 'el'chi "sDiosal Bet-el". yujto a yic x'at 'elc 'a yu'tac, ata xch'oxjnac sb'a Dios 'a 'a. 8Ata xcham pax 'ix Débora, 'ix xq'uib'tzan 'ix Rebeca. Xlajw cha, smucn can 'ejm eb' sniwnal 'ix 'a yich jun te ma'ach', 'a stz'ey Bet-el, ax win Jacob x'a'n sb'ic jun lugar chi Te mach' yic cusc'ojlal, xchi.
9A yic xmeltzj win Jacob 'a Padan-aram, xch'oxn sb'a Dios jun 'ejm xo 'a 'a, xyaln Dios wach' paxti 'a yib'n̈ winac. 10'Ix yaln 'ixtic:
Ach tic tza cuch Jacob, palta ticnec man̈x 'ichcta 'oj a b'i'oc, a ticnec tza cuchcn Israel, xchi Dios 'a Jacob.
Yic xlajw sjeln can Dios sb'i Jacob, 11xyaln 'a 'ixtic:
An ton Dios in, tztac' wuj smasnil, til wal 'oj 'ajl onnal, til wal pax 'oj 'aj en̈til. A 'aych 'oj pitzwc 'elt jun niwquil nacion̈, axta 'oj 'elx jun tzo'n̈ xo nacion̈, a 'a scal en̈tl cha, ata 'oj 'eltoc eb' rey.
12A lum lum 'ix wac' 'a Abraham yet' 'a Isaac, tzwac' pax lum 'aych ach tic. Ax wa'n pax lum 'a eb' en̈til, xchi Dios 'a 'a.
13'Ix 'atx can Dios 'a 'aj xpaxtin yet' Jacob cha. 14Xlajw cha, sayn win jun q'uen q'uen c'atn xoj, slin̈n can chan̈ win q'uen 'a 'aj xpaxtin yet' Dios cha, secn can 'ejm win aceite yet' yal uva 'a yib'n̈ q'ue'en, yuj siylab'il 'a Dios. 15Xya'n can win sb'ic jun lugar chi Bet-el, yujto ata xpaxtin Dios yet'oc.
Schamlil 'ix Raquel
16Xlajw cha, xyactn can eb' jun lugar Bet-el cha, 'ix cotx eb'. 'Ayt wal sjaw eb' 'a Efrata, 'ix 'alj junx yune 'ix Raquel, yel xo wal yet' yailal x'aj yalj jun 'unn cha. 17A yic 'aych 'ix 'a somc'ojlal yab'n syail, ax 'ix wetz'wjum cha, xyaln 'ix 'ixtic: Man̈ ach xiwoc, tox 'ix 'alj junx a winc 'unin, xchi 'ix. 18Palta yic wan xo xcham 'ix, jab'xoj tz'el-l yalni, xya'n 'ix sb'ic can jun 'unn chi Benoni;#Gn 35.18 Benoni, tzyal 'el'chi "wune x'a'n in cusc'ojlal", palta Benjamín tzyal 'el'chi "wunnal yic in wach' c'ab' ", mto "wunnal tzch'oxn 'el wip". palta ax win Jacob, Benjamín xyac' win sb'ioc.
19'Ixta wal x'aj scham 'ix Raquel, xmucx can 'ix 'a yol b'e yic Efrata, atn jun lugar chi Belén sb'i ticnec. 20Sb'on chan̈ win Jacob jun munamento 'a yib'n̈ 'aj xmucx can 'ix, atn jun chi tzch'oxn 'aj mucb'il 'ix Raquel cha, checlto yaj jun chi ticnec.
21Xcotx win Israel 'a yojltac, ax yic xjapx win 'a yojltac cot jun torre yic Edar, ata sb'o chan̈ win scamplamento. 22A yic cajn 'ec' eb' 'a jun lugar cha, ax win Rubén win yunnal Israel cha, xway win yet' 'ix Bilha, 'ix schab'l 'istzil smam cha, palta xyab' sb'a win mamb'il chi yuj tas sb'o winac.
Eb' yunnal win Jacob
(1 Cr 2.1-2)
Lajchwan̈ ewin yunnal win Jacob. 23A eb' yunnal Jacob yet' 'ix Lea atn eb' tic, Rubén win b'ab'l winac, Simeón, Leví, Judá, Isacar yet' Zabulón. 24A pax yunnal win yet' 'ix Raquel, atn José yet' Benjamín. 25Ax pax eb' yunnal win yet' 'ix Bilha, 'ix ya'mal servil 'ix Raquel, atn win Dan yet' Neftalí. 26A pax ewin yic 'ix Zilpa, 'ix ya'mal servil 'ix Lea, atn Gad yet' Aser. Atn eb' yunnal win Jacob tic 'aljnac 'a Padan-aram.
Xchamlil win Isaac
27'Ix 'at win Jacob 'at yil smam, atn win Isaac, cajn win 'a lum Mamre, 'a chon̈b' Arba, tzcuch pax Hebrón. Ata 'e'nc cajn Abraham yet' Isaac. 28'Ayx 180 ab'il sq'uinl win Isaac yic 'ix chami. 29Caw 'ichm winc xo winac yic xcham cha. Ax Jacob yet' Esaú ewin yunnal, a eb' xmucni.
Currently Selected:
Gn 35: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
