Lc 19

A yab'xil win Zaqueo

1A Jesús, 'ix c'och 'a Jericó, 'ix b'eyc' 'a yol chon̈b' cha. 2Ata 'ay jun win rico, Zaqueo sb'i. Sat yaj win 'a eb' tecm 'el tumn 'a jun chon̈b' cha. 3Caw snib'j win yil Jesús chajtl yilxi, palta matz tac' yiln winac, yujto til wal 'anma oyn 'och 'a 'a yic wan sb'eyi. Ax winac yune stel winac. 4Yuj cha, xb'ab'lj winac, sc'oln win yip, 'ix q'ue win 'a sc'ab' jun te 'ayc' 'a sti b'e, sec tzyil win yec' Jesús. 5Ax yic wan yec' Jesús, xq'ue q'ueln 'a winac, 'ix yaln q'ue 'ixtic:

—Zaqueo, 'emn̈ta muc'uc, to a 'a atut 'oj woch wan ticnec, xchi 'a winac.

6'Ix yab'n win Zaqueo cha, x'emt win muc'uc, caw tzaljc'ojlal xchaj win sc'och 'a yatut. 7Ax 'ix yiln eb' 'anma jun cha, til wal tas xlaj yal eb' 'a spatquil Jesús, yujto xc'och 'a yatut jun win maysch'olnil sb'eyb'al, 'ix 'och wan ta'. 8Ax win Zaqueo cha, 'ix q'ue lin̈an, 'ix yaln 'ixtc 'a Cajlil:

—Al ticnec Mamin, jantcn̈ej tas 'ay 'ayin, spacl 'oj wutoc. 'Icha wic 'oj canoc, 'ixta 'oj wac' a eb' meb'a'. Toto 'ay eb' xlaj wixtoc, xlaj welc' stumin, chan̈ 'ejm 'oj in jel 'a eb', xchi winac.

9Yuj cha, xyaln Jesús 'ixtic:

—A ticnec, 'ix schaj eb' 'ajn̈a tic colnb'il, yujto a Zaqueo tic yel yin̈tl can Abraham. 10An 'Ochnc in 'Anmal tic, in jaw wul in sayc' eb' satncto, yic tzin coln can 'el eb', xchi Jesús.

Yab'xil lajn̈e q'uen tumin

(Mt 25.14-30)

11Yic wan yab'n eb' tas tzyal Jesús, 'ay jun 'ab'x 'ix yal 'a eb', yujto wan sc'och eb' 'a sla'nil Jerusalén. A snan eb', to 'oj yac' Dios Yajlil 'a yolyib'n̈q'uinl tic muc'uc.

12Yuj cha, 'ixtc xyutj yaln 'a eb':

—A 'a jun 'el 'ay jun winc yin̈tl can eb' niwn yel'chi. 'Ix 'at win 'a junx chon̈b' 'a najat, yic tz'at schanc win yopiso, ax yoch win yajlil 'a schon̈b' sjapxi. 13Yic mantzac 'at winac, 'ay lajn̈wan̈ eb' smoso xyawtj coti. 'Ay jun tzo'n̈ tumn 'ix ya'cn win 'a junjn eb', niwc sat q'ue'en. Jun lajnn̈ej xchaj junjn eb' yico'. 'Ix yaln win 'ixtc 'a eb': 'A'c e negocio yet' jun tzo'n̈ tumn tic, masnto tzin japxi, ax eya'n pax 'ayin, xchi win 'a eb'. Xlajwn̈ej cha, x'at winac. 14Ax eb' yit chon̈b' win cha, caw tzchichn 'och eb' 'a winac. Yuj cha, tza'n x'at chawn̈ 'oxwn̈ schecb' eb'. X'at yalnoc eb' 'ixtc 'a ewin tz'a'n yopiso winac: A wal jun winc cha, caw wal matz yal qui c'ojl tz'och win yajloc 'a qui chon̈b' chi 'on̈, xchi eb'.

15Palta an̈j 'ijnoc xyac' ewin yopiso winac. Xlajw cha, xjapx winac. 'Ix 'och win 'a yopiso cha. 'Ix yawtn cot win eb' smoso chi 'aj xlaj ya'cn q'uen tumn cha, sec tzyab' winac, jantc xo yune q'uen stumn win chi xyac' ganar junjn eb'. 16'Ix c'och jun win b'ab'l moso, 'ix yaln win 'ixtic: Patron̈, a q'uen a tumn xa'cn 'ayin, lajn̈e xo sb'isl yune xwac' ganar, xchi winac. 17Yuj cha, xyaln win 'a 'a: Wach' jun, ach tic caw wach'ch 'ayin. Wach'xam jab' xwac' 'ayach, palta tojl xotj a nab'en yet'oc, yuj cha, tic tzwa'ch opiso gobernadoral 'a lajn̈e chon̈ab', xchi win 'a 'a. 18Xlajw cha, xc'och junx win smoso win cha. 'Ix yaln win 'ixtic: Patron̈, a q'uen a tumn xa'cn 'ayin, o'e xo sb'isl yune xwac' ganar, xchi winac. 19Yuj cha, xyaln pax win 'a 'a: Wach' jun, yuj cha, tzach wa'ch gobernadoral 'a o'e chon̈ab', xchi win 'a 'a.

20Palta xc'och junx smoso win cha, 'ix yaln 'ixtc 'a winac: Patron̈, yaj q'uen a tumn tic, molb'il q'uen wuj 'a yol in payu'. 21An tic, in xiw o'oj, yujto wojtac caw ch'an ach. Yujto ach tic, toxn̈ej tza chaj eco'oc tas tzyac' ganar junc xo 'anma'. Toxn̈ej tza jach'a, palta may tas tzawej, xchi 'a winac. 22Yuj cha, xyaln pax win 'ixtc 'a 'a: Ach tic cob' moso ach, palta caw may a ch'olnil. Yuj wal jun tzo'n̈ tas xal tic, 'oj ach in b'eyc'ojloc. 'In ojc xoni ch'an in. Toxn̈ej tzin chaj wico'oc tas tzyac' ganar junc xo 'anma'. Toxn̈ej tzin jach'a, palta may tas tzwawej. 23Yuj cha, ¿tas yuj ma'ix a't q'uen majnil 'a junc xo mach, sec tzyac' ganar q'uen jac yune'? Toto 'ixta', ax in jawi, xin chan can pax q'uen yet' yune cha, xchi win 'a 'a. 24Xlajw cha, xyaln win 'ixtc 'a eb' 'ayc' yet' cha: 'Ijec 'ec' q'uen tumn chi 'a winac, tzeya'n 'a win lajn̈e sb'isl yune yico', xchi 'a eb'. 25Patron̈, a win cha, 'ayx lajn̈e yune yico', xchi eb' 'a winac. 26Palta tzwal 'ayex, a mach 'ayx yico', 'oj wach' 'ajxoc nan̈locx 'a 'a; ax mach jab' wal yico', 'oj wach' 'ijxc 'ec' jab' yic cha. 27A eb' 'ajc'ojl yajch 'ayin, eb' xnib'n ma'in 'och 'a wopiso tic, tzlaj 'at eyi' cot eb', ax yic tzjaw eb', tze miln eb' 'a wojltac tic, xchi winac, xchi Jesús.

C'ochnc Jesús 'a Jerusalén

(Mt 21.1-11; Mr 11.1-11; Jn 12.12-19)

28Xlajw yaln Jesús jun 'ab'x cha, 'ix chan pax b'e yet' eb' scuywum, yic tz'at eb' 'a Jerusalén. 29'Ix c'och eb' 'a sla'nil Betfagé yet' Betania, 'a yich lum tzaln Olivo. Ata 'ix checb't chawn̈ eb' scuywum. 30Yic mantzac 'at eb', xyaln 'a eb' 'ixtic:

—'Ixquec 'a jun aldea 'a cojltac 'at tic. Ata 'oj 'ilchjoc jun no b'uru eyu'uj, pixn cani. Mant 'a xon mach tzq'ue 'a yib'an̈. Tze jiy 'elt no', tzeyi'n cot 'ayin. 31Toto 'ay mach tzaln 'ixtc 'ayex: ¿Tas yuj tze jiy 'elt no'? toto xchi, tzeyal 'ixtc 'a 'a: To 'ay 'oj 'och no yuj Cajlilec, xe chi 'a 'a, xchi Jesús 'a eb'.

32Xlajw cha, x'at eb' scuywum cha. 'Ix 'ilchj no yuj eb' 'icha wal xyutj Jesús yaln 'a eb'. 33Ax yic wan sjiyn 'elt eb' no', 'ix c'och eb' yajl no', 'ix yaln eb' 'ixtic:

—¿Tas yuj tze jiy 'elt no'? xchi eb'.

34—To 'ay 'oj 'och no yuj Cajlilec, xchi eb'.

35Xlajw cha, xyi'n cot eb' no 'a Jesús. 'Ix ya'n q'ue eb' junjn spichl 'a yib'n̈ no', sec tzq'ue Jesús 'a yib'an̈. 36Ax yic wan sb'eyi, 'ix laj slich'nc 'ejm eb' 'anma spichl 'a yojltac 'a yol b'e 'aj tzb'ey cha. 37A yic wan sc'och eb' 'a 'aj tzpichlj can 'ejm jun b'e yic tzaln Olivo cha, ax eb' scuywum, c'uxn xlaj 'awj chan̈ eb' yuj tzaljc'ojlal. Xlaj yalnc eb' wach' paxti 'a Dios yuj jun tzo'n̈ milagro xyil eb'. 38Xlaj yalnc eb' 'ixtic:

—¡Calc wach' paxti 'a qui Reylec checb'il cot yuj Cajlil! Caw 'ay junc'ojlal 'a satcha'an̈, caw niwn yel'ch qui Diosalec ta', xchi eb'.

39Palta 'ay jun tzo'n̈ ewin fariseo 'a scal eb' 'anma cha, 'ix yaln ewin 'ixtc 'a Jesús:

—Mamin, ¿tas yuj matz a tench wan eb' a cuywum tic? xchi ewin 'a 'a.

40Yuj cha, xyaln Jesús 'ixtic:

—Tzwal 'ayex, toto sictac tz'aj eb', toto man̈x 'a mach tz'awji, ax jun tzo'n̈ q'uen q'uen tic 'oj 'awjc cha'an̈, xchi 'a ewinac.

41Ax yic wan sc'och Jesús 'a sla'nil Jerusalén, xyiln 'at jun chon̈b' cha. 'Ix 'oc' yu'uj. 42'Ix yaln 'ixtic: A wal 'a jun c'u tic ex 'aj chon̈ab', octom wal xnachj 'el eyu'uj, chajtl tzeyutj e chan sjunc'ojlal Dios. Palta a ticnec, man̈xtzac stac' snachj 'el eyu'uj, yujto c'ub'b'ilx 'el 'ayex. 43Yuj cha, 'ay wal jun tiempoal 'oj jawoc, ax eb' 'ajc'ojl yajch 'a jun chon̈b' tic, 'oj yoych eb' scol-lal. Ax yoch oyn eb' yac' owl yet'oc. 44C'uxn 'oj smac' 'ejm lan̈chjoc eb' jun chon̈b' tic 'a sat lu'um. Ax smilx cham eb' 'anma yuj eb'. A q'uen q'uen tusb'il 'och 'a jun tzo'n̈ n̈a 'a jun chon̈b' tic, toxn man̈x 'a junc 'oj can 'a yib'n̈ yit q'uenal cha. 'Ixta 'oj 'ajcni, yujto a 'a jun tiempoal tic, 'ix snib'j Dios tzch'ox swach'c'ojlal 'ayex, palta matz nachj 'el eyu'uj, xchi Jesús.

Eb' pechb'il 'elt 'a yatut Dios

(Mt 21.12-17; Mr 11.15-19; Jn 2.13-22)

45Xlajw cha, x'och Jesús 'a yamq'uil yatut Dios, spechn 'elt eb' tzchon̈wji, yet' eb' tzmanwj ta'. 46'Ix yaln 'a eb' 'ixtic:

—Yaljnac can Dios 'ixtc 'a Ch'an̈ U'un̈: A watut yicn̈ej lesl yaji, xchi. Palta ax xo tic, 'icha junc n̈aq'uen 'aj tzc'ub'j 'el sb'a eb' 'elc'um, 'ixta xeyutej, xchi 'a eb'.

47Junjn c'u, 'ix c'och'c Jesús cuywjoc 'a yamq'uil yatut Dios cha. Ax ewin sat ya'mal 'och sti eb' israel 'a Dios, yet' ewin cuywjum 'a ley yic Moisés, yet' ewin yajl chon̈b' cha, 'ix sayn ewin tas tzyutj smilni. 48Palta ma'ix nachj yuj ewinac, tas tzyutj eb', yujto 'aych sc'ojl smasnil 'anma yab'xni 'a 'a.

Currently Selected:

Lc 19: CSS

Highlight

Copy