Lc 20

A yopiso Jesús

(Mt 21.23-27; Mr 11.27-33)

1'Ay jun c'u 'ix cuywj Jesús 'a eb' 'anma 'a yamq'uil yatut Dios, 'ix yaln 'el wach' 'ab'x yic colnb'il 'a scal eb'. Ax ewin sat ya'mal 'och sti eb' israel 'a Dios, yet' ewin cuywjum 'a ley yic Moisés, yet' ewin 'ichmtac winc 'ay yopiso, 'ix c'och ewin 'a 'a, 2'ix yaln ewin 'ixtic:

—Al 'ayn̈ on̈ tas opiso, yuj cha, tza comn b'on jun tzo'n̈ tic. ¿Mach wal 'a'jnac opiso tic? xchi ewin 'a 'a.

3—An xo tic, 'oj in c'anb'c pax jun tas 'ayex, alc 'ayin. 4¿Mach 'a'jnac yopiso win Juan, yic ya'n bautisar win eb' 'anma'? ¿Dios am x'a'ni, mto 'anma'? xchi 'a ewinac.

5Yuj cha, 'ix syamn 'och ewin sten sb'a yuj jun tzo'n̈ xyal cha, xlaj yal-lanc ewin 'ixtic: ¿Tas wal tzcutjec caln 'a 'a? Toto tzcalec, to a Dios 'a'jnac yopiso win Juan cha, to 'ixta', 'oj yal am 'ixtc 'ayn̈ec: ¿Tas yuj ma'ix eya'ch 'a e cojl jun? 'oj schic 'ayn̈ec. 6Palta toto tzcalec to yicn̈ej 'anma yopiso winac, caw 'oj cot yowl eb' 'anma smasnil, ax on̈ sjuln cham eb' yet' q'uen q'ue'en. Yujto a win Juan cha, caw schecb' Dios snan eb' smasnil, xchi ewinac. 7Yuj cha, xyaln ewinac, to man̈ yojcoc eb' mach 'a'jnac yopiso win Juan cha. 8'Ix yaln pax Jesús 'ixtc 'a ewinac:

—To 'ixta', ma'oj wal pax 'ayex, mach 'a'jnac wopiso in b'on jun tzo'n̈ tic, xchi.

Yab'xil eb' munljum maysch'olnil snab'en

(Mt 21.33-44; Mr 12.1-11)

9Xlajw cha, xyaln Jesús jun 'ab'x tic 'a eb' 'anma 'ayc' ta':

—'Ay jun winc 'ix 'awn jun tzo'n̈ uva#Lc 20.9 'Ilt nota 'a Mateo 21.33. 'a slu'um. Xlajw yawn can winac, 'ix ya'n can win slum chi majnil yet' te 'awb'ente 'a jun tzo'n̈ eb' munljum winac. Xlajw cha, x'at win 'a junx lugar, najtl x'aj cajn win ta'. 10Ax yic xjaw stiempoal sch'inx 'el te uva cha, 'ix checn 'at win 'aj lum chi jun schecab'. X'at cob' sc'annc yu'm lum yet' te 'awb'ente cha. Palta ton̈j xit' scha ma'xoc sb'a, xpechx paxi, toxn may xon jac yu'm lum lum chi xyi'aj. 11Yuj cha, schecn pax 'at win 'aj lum chi junx schecab'. Palta ton̈j xit' scha ma'xoc pax sb'a. Caw maysch'olnil xyutj sb'a ewin 'a 'a, xpechx paxi. May jac tas xyi'aj. 12Xlajw cha, schecn 'at win junx schecab', ax xc'och 'a ewinac, caw xlajw yuj ewinac, spechn meltzjoc ewinac.

13Yuj cha, xyaln win 'aj lum chi 'ixtic: ¿Tasm 'oj 'aj ticnec? Tic 'oj in checb't jun wunnal xajn wuj tic. Tecn 'oj xiw eb' yu'uj, xchi cob' winac. 14Ax xyiln 'at ewinac, wan sc'och win 'unnab'il cha, 'ix smol aln ewin 'ixtic: 'In to a win 'unnab'il tic tzjawi. Q'uinloc 'oj cham smam winac, ax win 'oj 'ica'anc can lu'um. Qui milc chamoc, sec a 'ayn̈ec 'oj can lu'um, xchi ewinac. 15Yuj cha, xlajwn̈ej sc'ochi, syamn cot ewinac, sto'n 'el ewin 'a sti 'el lu'um, ata smil ewinac.

Yuj cha, tzin c'anb'j 'ayex: ¿Tas 'oj yutc win ewin munljum chi tze na'a? 16A win 'aj lum chi 'oj 'atoc, ax 'at ya'nc lajwc win ewinac, ax ya'n can pax win slum chi majnil 'a jun tzo'n̈ xo, xchi Jesús 'a eb'.

Xlajw yab'n eb' jun tzo'n̈ cha, 'ix yaln eb' 'ixtic:

—¡'Ay, comnoc man̈ 'ichcta tz'aji!, xchi eb'.

17Palta x'och q'ueln Jesús 'a eb', 'ix yaln 'ixtic:

—¿Tas tzyal 'el'ch jun tzo'n̈ tz'ib'b'il can 'a Ch'an̈ Un̈ tze na'a, 'a 'aj tzyal 'ixtic?

A q'uen q'uen 'ix spatquilj can 'el eb' b'om n̈a, atn q'uen 'ix wach' 'ajx 'och yopiso, xchi 'a Ch'an̈.

18Tzann̈j mach tzmac' 'ejm sb'a 'a yib'n̈ junc q'ue'en, caw choc' tz'aj swecchji. Ax junc mach tz'em junc q'uen 'a yib'an̈, caw choc' tz'aj yuj q'ue'en, xchi Jesús 'a eb'.

19Ax ewin sat ya'mal 'och sti eb' israel 'a Dios, yet' ewin cuywjum 'a ley yic Moisés, 'ix snib'j ewin to tzyam Jesús muc'uc. Yujto xnachj 'el yuj ewinac, to a 'a ewin xyal jun 'ab'x cha. Palta xiw ewin yuj eb' 'anma'.

Q'uen tumn tzc'anx 'el yuj eb' yajal

(Mt 22.15-22; Mr 12.13-17)

20Yuj cha, schecn 'at ewin jaywn̈ schecab', x'at smaclnoc eb' yila', checl to matz 'och smul. Ax 'ix c'och eb', caw tojl xcob' yutc eb' snab'en yila'. 'Ix cob' slocnc eb' sc'umoc, sec toq'ue 'ay tas tzyac' palta yalni, sec tz'at ya'ch eb' 'a yol sc'ab' win yajal. 21Yuj cha, xcob' stz'acnc eb' yal 'ixtc 'a 'a:

—Mamin, cojc on̈ tojl tzotj alni, tojl a cuywj paxi. May junc mach 'aj tzach xiwi, yujto lajnn̈ej yel'ch junjn mach 'a a sat. Cojc pax on̈, a jun b'eyb'al tznib'j Dios a tzac' cuyxoc 'a yel. 22Yuj cha, tzqui c'anb'j 'aych on̈, a jun tzo'n̈ tumn tzc'anx 'el 'ayn̈ yuj win yajl 'a Roma, ¿'aym sleyl tzcac'a, mto ma'ay? xchi eb' 'a 'a.

23Palta yojc Jesús to maysch'olnil wan snan eb' 'a spatic. Yuj cha, xyaln 'ixtc 'a eb': ¿Tas yuj tzin eyac' prowal?

24—Ch'oxc wil junc tumin. ¿Mach yechl jun tic, mach sb'i pax jun tz'ib'b'il 'och tic? xchi 'a eb'.

—Atn yechl win yajl 'a Roma, yet' sb'i tic, xchi eb'.

25—A tas yic xon win yajl cha, 'a'c 'a winac, palta a tas yic xon Dios yaji, 'a'c 'a 'a, xchi 'a eb'.

26Toxn ma'ix yac' ganar eb' yoch spaltail 'a sat eb' 'anma yuj tas tzyala. Caw 'ix sat sc'ojl eb', sictac xoj x'aj eb'.

A eb' tzalni to may pitzwel

(Mt 22.23-33; Mr 12.18-27)

27Xlajw cha, 'ay jun tzo'n̈ ewin saduceo xjaw 'a Jesús. Atn ewin tzalni to ma'oj pitzwc pax eb' chamnac. Yuj cha, xyaln ewin 'ixtc 'a 'a:

28Ach qui Cuymal on̈, a win Moisés tz'ib'jnac can 'ixtic: Q'uinloc 'ay junc winc tzchami, tzcan yistzil, palta may junc yunnal tz'elcni. To 'ixta', ax junc yu'tac, yowlal a tz'i'n can pax 'ix 'ix cha, sec wach' ax yic tz'alj yunnal junc win cha, 'icha to yunnal win xcham cha. 'Ixta yaj yaln can win Moisés. 29A 'a jun 'el, 'ay ucwn̈ winc 'e'nc 'a qui cal on̈, yu'tacn̈ej sb'a eb'. A win b'ab'l winac, a 'ijnac jun 'ix. Palta xlajw cha, scham winac, may junc yunnal win 'elnc cani. 30Ax win schab'il, ax win x'i'n can pax 'ix. [Palta xcham pax junx win cha, may pax junc yunnal win x'elcni.] 31Xlajw cha, xyi'n pax win yoxl chi 'ix. An̈jtona', 'ixta 'e'nc ewin yucwn̈il 'a 'ix. C'uxn xcham ewin smasnil. May wal junc ewin 'elnc can yunnal yet' 'ix. 32Ax 'ix 'ix cha, slajb' xoj chamnc 'ix. 33A to 'oj pitzwc pax eb' chamnac, ¿mach wal junc win 'ay yistl 'ix? Yujto 'ic'b'il ewin yucwn̈il yuj 'ix, xchi ewinac.

34Yuj cha, xyaln Jesús 'ixtc 'a ewin saduceo cha:

—A 'a yolyib'n̈q'uinl tic, tzyij sb'a eb' winc yet' eb' 'ix 'ix.

35Palta a eb' 'oj pitzwc pax 'a scal eb' chamnac, eb' smoj 'oj 'a'jc 'a jun tiempoal 'oj jawc cha, man̈x 'oj laj yi'lac sb'a eb' 'anma ta'. 36Yujto a 'a jun tiempoal cha, man̈x b'a'n̈ 'oj cham eb'. Lajn 'oj 'aj eb' yet' eb' ángel. Caw yunnal xoj Dios eb', yujto 'oj 'ajxc pitzwc pax eb'. 37A Moisés, ya'jnac 'ojcaxc 'eli, chajtlto 'oj pitzwc pax eb' chamnac, yic stz'ib'n yab'xil yic stz'a te q'ui'ix. Ata yaljnac can Dios 'ixtic: An ton tic, sDiosal in Abraham, Isaac, yet' pax Jacob, xchi. 38Yuj cha, wach'xam chamnc ewinac, palta cojtac to man̈toc satnc 'el ewin 'a jun 'ejmn̈ej, yujto yaljnac, to sDiosal ewin yaji. A 'a sat Dios, pitznn̈ej eb' 'anma smasnil, xchi Jesús.

39Yuj cha, 'ay jun tzo'n̈ ewin cuywjum 'a ley yic Moisés 'ix aln 'ixtc 'a 'a:

—Yel ton tzal Mamin, xchi ewinac.

40Man̈x 'a mach 'ix ste'wtzej sb'a sc'anb'n junc xo tas 'a 'a.

A Cristo, Yunnal Dios

(Mt 22.41-46; Mr 12.35-37)

41'Ix yaln Jesús 'a eb' 'ayc' chi ta 'ixtic:

—¿Tas yuj 'ay eb' tzaln 'ixtic? A Cristo, yin̈tln̈ej David, xchi eb'. 42Palta a David a aljnac can 'ixtc 'a ch'an̈ Salmos:

A Dios Cajlil a aljnac 'a Wajlil 'ixtic: 'Emn̈ wocn 'a in wach' c'ab',

43masnto 'oj can eb' 'ajc'ojl yajch 'aych 'a yaln̈ wu'uj, xchi Dios 'a Wajlil, xchi David.

44'Ixta yutjnac David yalni, chajtlto a Cristo, Yajl yaj 'a 'a. Yuj cha, ¿tom yin̈tln̈ej David chi yaji? xchi Jesús 'a eb'.

A smul eb' cuywjum 'a ley yic Moisés

(Mt 23.1-36; Mr 12.38-40; Lc 11.37-54)

45A yic wanto yab'xni eb' 'anma smasnil, 'ix yaln 'ixtc 'a eb' scuywum cha: 46Tzeyil wal e b'a, sec ma'oj e juw yuj sb'eyb'al ewin cuywjum 'a ley yic Moisés. Yujto caw tzalj ewin yet' jun tzo'n̈ sjucn pichl tzb'eyc' yet'oc. Tznib'n ewin tzlaj yic' 'ejm sb'a eb' 'anma 'a 'a, yic tz'ec' ewin 'a plas. Tznib'n pax ewin tzlaj 'em wocn 'a yet'l eb' niwn yel'ch 'a yol capiya. Yet' 'a yic tzo'ch jun tzo'n̈ niwc wa'el, tznib'j wal ewin tz'em wocn 'a 'ajtil caw wach'. 47Tzyij 'ec' eb' yatut eb' 'ix 'ix chamnc yichmil. Ax yic tzleslwi eb', caw najt tzyutj eb' yoc slesal, sec tzna eb' 'anma', to may smul eb'. Palta a wal ewin cha, yel xo wal niwn yailal 'oj jawc 'a yib'n̈ ewinac, xchi Jesús.

Currently Selected:

Lc 20: CSS

Highlight

Copy