Lc 22

Eb' aljnac tas tzyutj eb' syamn Jesús

(Mt 26.1-5,14-16; Mr 14.1-2,10-11; Jn 11.45-53)

1Wan sjapx stiempoal q'uin̈ yic snanb'il cot yel eb' israel 'a libre, yic tzwan eb' 'ixm pan may yich. 2Ax ewin sat ya'mal 'och sti eb' israel 'a Dios, yet' ewin cuywjum 'a ley yic Moisés, 'ix sayn ewin tas 'oj yutc smiln Jesús 'a c'ultaq'uil, yujto tzxiw ewin yuj eb' 'anma'.

3'Ay jun win Judas tzcuch pax win Queriot, yitb'eym sb'a win yet' eb' yuxlchwan̈ xo schecb' Jesús, palta a win Satanás x'och 'a winac. 4Yuj cha, x'at win 'at sc'umc ewin sat ya'mal 'och sti eb' israel 'a Dios, yet' eb' yajl yaj 'a yatut Dios. 'Ix smol aln yet' ewinac, tas 'oj yutc win ya'n 'och Jesús 'a yol sc'ab' eb'. 5Yuj cha, xcaw tzalj ewinac, 'ix ya'n ewin strato yet' win Judas cha, chajtlto 'oj yac' ewin tumn 'a 'a. 6'Ix schan sc'ojl win tas xyal ewinac. Sayn win tas 'oj yutc ya'n 'och 'a yol sc'ab' ewin 'a c'ultaquil.

A Cena yic Cajlil

(Mt 26.17-29; Mr 14.12-25; Jn 13.21-30; 1 Co 11.23-26)

7Ax yic xc'och sc'ul swan eb' 'ixm pan may yich, yic tzmiln eb' no quelm calnelu yic tznan cot eb' yel 'a libre, 8'ix yaln Jesús 'ixtc 'a Pedro yet' 'a Juan:

—'Ixquec, 'at b'oc tas tzqui c'ux 'a jun q'uin̈ tic, xchi 'a eb'.

9—¿'Ajtil tza nib'j tzqui b'o 'on̈? xchi eb' 'a 'a.

10—A yic 'oj e c'och 'a yol chon̈ab', 'ay jun win 'oj 'ilchjoc eyu'uj. Wan scuchn 'at win jun ch'ub' a 'a yatut. Tzex 'och tza'n yu'uj, masnto 'oj e c'och yet' win 'a 'aj 'oj c'ochoc. 11Ax eyaln 'ixtc 'a win 'ajn̈a cha: 'Ixtc xyutj qui Cuymal yaln on̈: ¿'Aj 'ay jun cuarto 'aj 'oj in wa yet' eb' in cuywum, yic tzqui nan cot q'uin̈ yic yelt eb' quit israelal 'a libre? xchi, xe chi 'a winac. 12Ax win 'oj ch'oxnc jun cuarto 'ayx 'a cha'an̈, lista xo yaji. Ata tze b'o tas 'oj qui c'uxec, xchi Jesús 'a eb'.

13Xlajw cha, x'at eb'. Yic xc'och eb', xyiln eb' caw x'el'ch wal 'icha xyal Jesús. Yuj cha, ata 'ix sb'o eb' tas sc'ux 'a q'uin̈ cha.

14Ax yic xc'och hora, 'ix c'och Jesús yet' eb' scuywum, 'ix 'och oyn eb' 'a te mexa wa'oc. 15Xlajw cha, xyaln Jesús 'ixtc 'a eb':

—Toxn tzin nib'j xon wa in b'a eyet' 'a jun q'uin̈ tic yic mantzac in chami. 16Yuj cha, tzwal 'ayex, man̈x b'a'n̈ 'oj in wa 'a jun q'uin̈ tic, masnto 'oj 'el'choc 'a yic wan ya'n Dios Yajlil, xchi 'a eb'.

17Xlajw cha, xyi'n chan̈ jun vaso, 'ix ya'n yuj diosal 'a Dios yu'uj, 'ix yaln pax 'ixtc 'a eb':

—Chajec jun tic, mol 'u'jec. 18Yujto tzwal 'ayex, man̈x b'a'n̈ 'oj wuc' yal uva tic, masnto 'a yic wan ya'n Dios Yajlil, xchi 'a eb'.

19Xlajw cha, xyi'n chan̈ jun pan. 'Ix ya'n yuj diosal 'a Dios yu'uj. 'Ix ch'iyn 'ec' 'a eb'. 'Ix yaln 'a eb' 'ixtic:

—A jun tic, atn in niwnal tic 'oj 'ajxoc eyu'uj, Wajec. Tze b'o jun tic, yic tzin e nan coti, xchi.

20Xlajw swa eb', 'ixta xyutj pax jun vaso. 'Ix yaln 'ixtc 'a eb':

—A tas 'ay 'a yol jun vaso tic, sch'oxnb'il jun yac' trato Dios. Yuj in chiq'uil, 'oj 'el'choc, yujto 'oj 'elcn eyu'uj. 21Palta a win 'oj wa'n 'och 'a yol sc'ab' chamel, 'aych win 'a te mexa tic wet'oc. 22An 'Ochnc in 'Anmal tic, yowlal 'oj in paxi, 'icha xon yaj sb'ocni. Palta a wal jun 'oj wa'n 'och 'a yol sc'ab' chamel, caw 'oltac wal 'oj 'ajoc, xchi 'a eb'.

23Yuj cha, xlaj sc'anb'nlan eb' yuj mach wal junc 'oj 'a'nc 'och 'a yol sc'ab' chaml cha.

Mach junc yel xo niwn yel'chi

24Xlajw cha, xlaj stenc sb'a eb' scuywum Jesús, mach junc yel xo niwn yel'ch 'a eb', yujto a snan junjn eb', to niwn yel'ch eb'. 25Palta xyaln Jesús 'a eb' 'ixtic: A eb' rey 'a junjn nacion̈, caw yajl yaj eb'. Yet' pax eb' yajal, wach' eb' yaln eb' 'anma'. 26Ax xo tic, man̈ eyutc e b'a 'icha eb' yajl cha. Toto 'ayx niwn eyel'ch 'a e cal, yowlal caw tzeyij 'ejm e b'a, 'icha junc mach may yel'chi. An̈jtona', toto 'ayx yajl eyaji, yowlal tzeya'ch e b'a mosoal. 27Q'uinloc tz'och junc wa'el. ¿Mach junc yel xo niwn yel'ch tze na'a? ¿Am jun wocn 'ejm wa'oc, mto a junc tz'a'w servil? Atn jun tz'ajx servil chi caw niwn yel'chi. Palta 'in an tic, 'ayn 'och mosoal 'a e cal ex wa'n servil.

28Ax tic, xe te'wtzej e b'a eyec' wet'oc, yic xlaj jawc jun tzo'n̈ prowal 'a wib'an̈. 29Yuj cha, 'oj ex wa'ch yajlil, 'icha in 'aj woch yajlil yuj qui Mam Dios. 30'Oj stac' e wa wet' 'a jun in mexa 'aj 'ayn 'och yajlil cha. An̈jtona', 'oj eyem wocn 'a junjn e despacho, ax eya'n yajlil 'a lajchw macn̈ eb' quit israelal, xchi Jesús 'a eb' scuywum cha.

Yaljnac Jesús to tzyij 'el Pedro 'a yib'an̈

(Mt 26.31-35; Mr 14.27-31; Jn 13.36-38)

31'Ix yaln Cajlil 'ixtic:

—Simón, 'ab'i, a win Satanás, caw 'ix sc'an win spermiso 'a Dios, yujto tznib'j win tzex yac' prowal 'icha tz'aj 'ixm trigo tzchayxi.#Lc 22.31 A yic " 'icha to tzex chayx 'icha tz'aj schayx 'ixm trigo," tzyal 'el'chi to a win diablo tzya'lj ex yi'n 'at 'a maysch'olnil. 32Palta caw in tew 'a Dios o'oj, sec matz ej 'el a c'ojl 'a 'a. Ach tic, a yic 'oj meltzj paxt a nab'en 'ayn jun 'ejm xo, tzac' ste'nal eb' o'tac, xchi 'a 'a.

33Yuj cha, xyaln Simón chi 'ixtc 'a 'a:

—Mamin, caw b'ecn in c'ojl woch 'a preso et'oc, toxn̈ej 'oj in cham et'oc, xchi 'a 'a.

34—Pedro, tzwal 'ayach, yic mantzac 'oc' no 'ajtzo 'a jun 'ac'wl tic, 'ox 'ejm 'oj e'l 'a eb'an̈, chajtlto man̈ in ojcoc, xchi 'a 'a.

'Oj 'el'choc tas tzyal Ch'an̈ U'un̈

35'Ix yaln Jesús 'a eb' scuywum 'ixtic:

—Tze na coti, yic in checn ex 'at 'a jun 'el, may e pa, e cartel, yet' e xan̈b' eyijnac 'ati. ¿Tom 'ay tas ya'jnac palta 'ayx ta'? xchi 'a eb'.

'Ix ta'w eb' 'ixtc 'a 'a:

—Ma'ay, caw may tas, xchi eb'.

36Xlajw cha, xyaln pax 'ixtc 'a eb':

—Ax ticnec, machx 'ay e pa, e cartel tzeyij 'at eyet'oc. Machx pax may eyespada, tze chon̈l e chumpa, tze mann junc eyico', sec wach' tze col e b'a yet'oc. 37Yujto tzwal 'ayex, yowlal 'oj 'el'choc tas tz'ib'b'il can 'a Ch'an̈ U'un̈, yic tzyaln 'ixtic: 'Icha tz'ajx 'och 'a yib'n̈ eb' maysch'olnil sb'eyb'al, 'ixta x'ajx 'och 'a yib'n̈ jun xo, xchi 'a Ch'an̈. Jantcn̈ej wab'xil tz'ib'b'il can 'a Ch'an̈, yowlal 'oj 'el'choc, xchi Jesús 'a eb'.

38Yuj cha, xyaln eb' scuywum chi 'ixtc 'a 'a:

—Mamin, yaj chab' espada tic, xchi eb' 'a 'a.

—Colb'il cha, xchi 'a eb'.

Leslwnac Jesús 'a Getsemaní

(Mt 26.36-46; Mr 14.32-42)

39Xlajw cha, x'elt Jesús 'a yol n̈a. 'Ix 'at 'a tzaln Olivo 'icha xon sley. Ax eb' scuywum, x'och tza'n eb' yu'uj. 40A yic xc'och ta', 'ix yaln 'a eb' 'ixtic:

—Leslwan̈ec, sec toq'ue ma'oj eyajx prowal, xchi 'a eb'.

41Xlajw cha, 'ix sb'esn 'el sb'a 'a eb'. 'Icha snajtil tz'at junc q'uen tzjulx 'ati, 'ixta x'ati. Ata x'em cuman, 'ix leslwi. 42'Ix yaln 'ixtic:

—Mamin, toto tz'el 'a a c'ojol, tzej 'ec' jun yailal tic 'a wib'an̈, palta man̈oc 'icha tzin nib'ej, a cab' wal 'icha tza nib'ej, xchi.

43[Xlajwn̈ej cha, xcot jun ángel 'a satcha'an̈, xwul ya'nc ste'nal. 44Caw wal x'och pitz'n cuslal 'a spixan, yuj cha, caw yelc'ojlal xleslwi. Til wal x'el yalil, 'icha yem niwc tz'uj, 'ixta x'aj yel schic'l yaliloc, x'em 'a sat lu'um.]

45Ax yic xlajw sleswi, 'ix q'ue wa'an, 'ix meltzj pax 'a eb' scuywum cha. Ax xc'och 'a eb', xyilni wayn̈c eb'. 'Ix 'ocht wayn̈ax eb' yuj cusc'ojlal.

46Yuj cha, xyaln 'ixtc 'a eb':

—¿Tas yuj tzex wayi? Q'uen̈ec wa'an. Leslwan̈ec, sec toq'ue ma'oj eyajx prowal, xchi 'a eb'.

Yamchjnac Jesús

(Mt 26.47-56; Mr 14.43-50; Jn 18.2-11)

47Wanto yaln Jesús 'a eb', ax eb' 'anma', til wal eb' xc'och ta'. Ax win Judas, atn win yit cuywumal sb'a yet' eb' uxlchwa'an̈, 'ix b'ab'l c'och win yuj eb'. 'Ix c'och win mu'c 'a Jesús, stz'ub'n 'elt win sti'. 48Ax Jesús, 'ix yaln 'ixtc 'a winac:

—Judas, ¿tom 'ixtc tzin otj in a'n 'och 'a yol sc'ab' eb' 'ajc'ojl yajch 'ayn an 'Ochnc in 'Anmal tic, yuj cha, xa tz'ub'n in ti tic? xchi 'a winac.

49Ax eb' ajun yet' Jesús cha, 'ix yiln eb' tas wan sjaw 'a yib'an̈. Yuj cha, 'ix sc'anb'n eb' 'a 'ixtic:

—Mamin, ¿tzam stac' qui tzu'n eb' yet' qui espada on̈? xchi eb' 'a 'a.

50Yajn̈j wal cha, 'ay jun scuywum cha, 'ix stzu'n 'el schicn jun smoso win sat ya'mal 'och sti eb' israel 'a Dios 'a swach'. 51Palta xyaln Jesús 'ixtc 'a eb' scuywum cha:

—'Actjec, man̈ e b'o jun chi 'ixta', xchi 'a eb'.

Xlajw cha, xya'n 'at sc'ab' 'a schicn winac, 'ix 'ochx can yu'uj. 52A ewin sat ya'mal 'och sti eb' israel 'a Dios, yet' ewin yajl yaj 'a yatut Dios, yet' ewin 'ichmtac winc 'ay yopiso, a ewin xc'och yamnoc Jesús. Yuj cha, xyaln 'a ewin 'ixtic:

—¿Tas waj tzeyila? ¿Tom 'elc'm in, yuj cha, tzex jaw yet' eyespada yet' e te 'ayin? 53'Aynn̈ej 'ec' eyet' 'a yatut Dios 'a junjn c'u, palta ma'in eyama. Palta atn yorail tic e b'on 'icha tze nib'ej, yujto a win 'aj q'uic'q'uinl 'aych eyet'oc, xchi 'a ewinac.

Yijnac 'el Pedro 'a yib'an̈

(Mt 26.57-58,69-75; Mr 14.53-54,66-72; Jn 18.12-18,25-27)

54Xlajw cha, x'och yamnjoc ewin 'a Jesús. 'Ix yi'n 'at ewin 'a yatut win sat ya'mal 'och sti eb' israel 'a Dios. Ax Pedro najt tza'n s'at yu'uj. 55Ata xya'ch ewin jun c'ac' 'a yamq'uil sti n̈a, x'och oyn ewin 'a 'a, 'ix 'em wocn ewinac. Ax Pedro, 'ix c'ochi, x'em wocn 'a scal ewinac. 56Palta 'ay jun 'ix ya'mal servil ewinac, xyiln 'och 'ix Pedro chi muc'uc, yic wocn 'ejm yet' ewinac, 'ix yaln 'ix 'ixtic:

—A win tic, junn̈j 'e'nc yet' Jesús, xchi 'ix.

57Ax Pedro, xyi'n 'el 'a yib'an̈, xyaln 'ixtic:

—Ach 'ix, man̈ wojcoc jun tzal cha, xchi 'a 'ix.

58Jun 'ipn̈ej cha, 'ix 'och q'ueln junx win 'a 'a, 'ix yalni:

—Ach tic, etb'eym a b'a yet' eb', xchi win 'a 'a.

—Ma'ay, caw man̈ witb'eymoc in b'a yet' eb', xchi 'a winac.

59'Ayn̈j am nant junc hora yaln jun cha, 'ay junx yelc'ojlal xaln 'ixtic:

—A win tic, wal yel junn̈j 'e'nc win yet' Jesús, yujto yit 'aj Galileail sb'a win yet' eb', xchi winac.

60—Ma'ay, caw man̈ wojcoc jun tzal cha, xchi 'a winac.

—Wanto yaln jun cha, x'oc' no 'ajtzo'. 61Ax Cajlil, 'ix sutmj 'at q'ueln 'a Pedro cha. Yuj cha, 'ix snan cot tas 'ix yal Jesús 'a 'a, yic yaln 'ixtic: Yic mantzac 'oc' no 'ajtzo 'a jun 'ac'wl tic, 'ox 'ejm 'oj e'l 'a eb'an̈, chajtlto man̈ in ojcoc, xchi 'a 'a. 62Yuj cha, 'ix yi'n 'elt sb'a Pedro 'a scal eb'. Caw 'ix 'oc' wal si'mb'il.

B'uchb'il Jesús yuj ewinac

(Mt 26.67-68; Mr 14.65)

63Ax ewin tan̈wjnac Jesús, xb'uchwj ewin 'a 'a, sma'n ewinac. 64'Ix smacn ewin sat, xlaj spawn poj ewin sti'. Xlajw cha, 'ix tz'acn ewin yal 'ixtc 'a 'a:

—Al 'ayn̈ on̈, mach tzach ma'n tzab'i, xchi ewin 'a 'a.

65Man̈ jantcoc tas xyal ewinac, sb'uchn ewinac.

C'ochnc Jesús 'a ewin sat yajal

(Mt 26.59-66; Mr 14.55-64; Jn 18.19-24)

66Ax yic wan sacb'i, syamn sb'a eb' 'ichmtac winc 'ay yopiso 'a scal eb' israel, yet' eb' sat ya'mal 'och sti eb' 'anma 'a Dios, yet' eb' cuywjum 'a ley yic Moisés. Xlajw cha, 'ix 'ijx 'at Jesús 'a yojltac ewin sat yajl cha. Ata sc'anb'j eb' 'ixtc 'a 'a:

67—Al 'ayn̈ on̈, ¿tom yel Cristo ach? xchi eb' 'a 'a.

—Nab'an̈ej tzwal 'ayex, ma'oj e cha eyab' 'ayin. 68An̈jtona', toto 'ay tas 'oj in c'anb'c 'ayex, ¿tom 'oj e pac 'ayin? [¿Tom 'oj in eya'l 'a libre?] 69Palta an tic 'Ochnc in 'Anma'il, a ticnec 'oj in c'och wocn 'a swach' c'ab' Dios, atn jun caw niwn spoder, xchi 'a eb'.

70—¿Tom Yunnalch Dios jun? xchi eb' 'a 'a.

—An ton tic, Yunnaln ton Dios 'icha tzeyal tic, xchi 'a eb'.

71—Man̈x yowlalc tzjaw eb' testigo. 'In xcab'c tas xyala, xchi ewinac.

Currently Selected:

Lc 22: CSS

Highlight

Copy