Zɛnɛse 13
13
Eberaŋ da La dí díŋaa kɔ̀lɛ
1Nya ƃe Eberaŋ da ŋɔnɛnîi é pɛ́lɛ gɔ̃liŋ ma da La-ni dí kùla Ize lɔii su dí lí Keena lɔii kwára-pere. 2Eberaŋ è kɛ̀ a dɔɔ a taa-tulɛ, sɛŋ-káne da gôo. 3Nya ƃe é kùla ǹɔii kwára-pere é lí Bɛtɛ ƃɛ́i ŋɔsua kɔlɔ seɣe pɛrɛi è kɛ̀ naa a maa-ŋuŋ Bɛtɛ da Eea dí loai, 4ƃɛ́i è Ɣâla-teƃele tɔ̀ɔ naa a maa-ŋuŋ. Nàa ƃé Eberaŋ è Yâwɛɛ láa tòli naa a maa ŋuŋ.
5La nyii da Eberaŋ dí lìi, ƃála-ŋa dí kɛ̀ ǹyêei máŋ da taa-tulɛ é pɛ́lɛ sua kɔlɔ seɣe pɛrɛ-ŋa dîa. 6Ǹɔii fé kɛ́ ní a gɛ́tɛ a gɛɛ dífeerɛ dí sée ma. Kpɛ́ni fêi, díkɔ̃liŋ è kɛ̀ a dámaa a sɛŋ dífa pɔ̂ri seêi kwaa tɔnɔ ma. 7Laa-saa è tòo Eberaŋ ŋɔtaa-tulɛ mɛi-kaa-ƃelai loai da La ŋɔŋai. (Tãi tí ma Keena-ŋai da Pɛriza-ŋai dí kɛ̀ ǹɔii tí su.)
8Nya ƃe Eberaŋ è mò La ma ǹyɛɛi, “Laa-saa fé kɛ̀ kwa yá kúloai da kútaa-tulɛ mɛi-kaa-ƃelai, kpɛ́ni fêi, kúkaa a núu tɔnɔ. 9Kɛrɛ̂i ǹɔii kélee káa íŋɛi túɛ? Kú kúŋaa kɔ́lɛ. Ƃà lì kɔɔ-yee mɛi-pere, ŋa pâi liî laa-mii-yee mɛi-pere. Ƃà lì laa-mii-yee mɛi-pere, ŋa pâi liî kɔɔ-yee mɛi-pere.”
10Nya ƃe La è ŋuŋ mu sìɣe é gáa a gɛɛ Zɔdiŋ Ya-leei kɔlɛ mâ gwaa kélee yɔɔ̂i. Nàa è kɛ̀ yɛ̂ɛ Yâwɛɛ ŋɔsûai su, nàa kɛ́ ƃò ŋɔ́nɔ yɛ̂ɛ Ize lɔii su, Zoa-pere. (Nyíŋi è kɛ̀ Yâwɛɛ é lɛ́ɛ pâi Sodɔŋ da Gomora taa-ŋai su karâi.) 11Nya ƃe La è Zɔdiŋ Ya-leei kɔlɛ mâ gwaa kélee sìɣe. È lì vóloi kulâi-pere. Dí nâa díŋaa kɔ̂lɛ. 12Eberaŋ è sèe Keena lɔii su, La é sée ǹyái kɔlɛ ma taa-lee-ŋai sáma, é lí a ŋɔsua kɔlɔ seɣe pɛrɛi Sodɔŋ. 13Ǹyaŋ Sodɔŋ-ƃelai dí kɛ̀ a ŋwana-lɔɔ-ƃela. Dí ƃò ŋɔnɔ a sɔnyɔ̂ŋ-ƃela Yâwɛɛ ŋɛ́i.
Eberaŋ è lì Iburɔŋ
14Tãi Eberaŋ da La dí díŋaa kɔ̀lɛ lai, Yâwɛɛ è mò Eberaŋ ma ǹyɛɛi, “Íŋuŋ mu síɣe í ƃɛ́i káa íkaa naai, ǹɔii ŋûa-pere da ǹɔii kwára-pere, vóloi kulâi-pere da vóloi liî-pere. 15Ǹɔii kélee kpɔ́ ƃa gâai, ŋa pâi dɛ̂ɛi kápɔ ká ísuui kélee wɔlɔ-wɔlɔ da wɔlɔ-wɔlɔ. 16Ŋa pâi ísuui tâmai yɛ̂ɛ ŋãyai gáa ǹɔii mai a gɛɛ à kɛ̀ núu à pɔ̂ri ŋãyai lônoi ǹɔii ma, gɛ̀ ní da pâi ísuui lônoi. 17Ímu síɣe í sía ǹɔii gwaa kélee, kpɛ́ni fêi, ŋa pâi dɛ̂ɛi ípɔ.” 18Nya ƃe Eberaŋ è ŋɔsua kɔ̂lɔ seɣe pɛrɛi sîɣe é pá é sée Mamera wuru maa waa-ŋai mu, nyii-ŋai díkaa Iburɔŋ. Nàa ƃe è Ɣâla-teƃele tɔ̀ɔ naa Yâwɛɛ mɛni ma.
Currently Selected:
Zɛnɛse 13: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
