أعمال الرُسُل 10

رُؤية كَرْنِيلِي

1وَ فِي حِلَّةْ قَيْصَرِيَّةْ، فِيَّهْ نَادُمْ وَاحِدْ أُسْمَهْ كَرْنِيلِي. هُو عَسْكَرِي رَوْمَانِي وَ كَبِيرْ فِي 100 عَسْكَرْ مِنْ الْفِرْقَةْ الْإِيطَالِيَّةْ. 2هُو نَادُمْ تَقِي وَ هُو وَ كُلَّ نَاسْ بَيْتَهْ خَايْفِينْ مِنْ اللّٰهْ. هُو يَنْطِي صَدَقَةْ كَتِيرْ لِلْمَسَاكِينْ وَ دَايْماً قَاعِدْ يَسْأَلْ اللّٰهْ.

3وَ يَوْم وَاحِدْ مِثِلْ السَّاعَةْ تَلَاتَةْ بَعَدْ الضُّهُرْ، رُؤْيَةْ جَاتْ لِكَرْنِيلِي. وَ فِي الرُّؤْيَةْ دِي، هُو شَافْ وَاحِدْ مِنْ مَلَائِكَةْ اللّٰهْ جَايِ لَيَّهْ فِي بَيْتَهْ. وَ الْمَلَكْ كَلَّمْ لَيَّهْ وَ قَالْ: «يَا كَرْنِيلِي!» 4وَ وَكِتْ شَافْ الْمَلَكْ، هُو خَافْ بِلْحَيْن وَ سَأَلَهْ وَ قَالْ: «شُنُو، يَا سَيِّدْنَا؟» وَ الْمَلَكْ رَدَّ لَيَّهْ وَ قَالْ: «اللّٰهْ قِبِلْ صَلَاوَاتَكْ وَ الصَّدَقَةْ الْأَنْطَيْتهَا. وَ هُو جَاهِزْ لِيُرُدّ لَيْك. 5وَ هَسَّعْ بَسْ رَسِّلْ رُجَالْ فِي حِلَّةْ يَافَا أَشَانْ يِنَادُوا سِمْعَانْ الْبِنَادُوهْ بُطْرُسْ أَشَانْ يَجِي لَيْك. 6هُو ضَيْف هَنَا سِمْعَانْ الدَّبَّاغِي الْبَيْتَهْ جَنْب الْبَحَرْ.»

7وَ وَكِتْ الْمَلَكْ الْكَلَّمْ لَيَّهْ فَاتْ، كَرْنِيلِي نَادَى خَدَّامِينْ إِتْنَيْن وَ نَادَى نَادُمْ تَقِي مِنْ الْعَسْكَرْ الْقَاعِدِينْ دَايْماً مَعَايَهْ. 8وَ أَوْرَاهُمْ بِالشَّيّءْ الْبِقِي وَ رَسَّلَاهُمْ لِيَافَا.

رُؤية بُطْرُس

9وَ أَمْبَاكِرْ بِضُهُرْ وَكِتْ الرُّجَالْ التَّلَاتَةْ دَوْل مَاشِينْ فِي الدَّرِبْ قَرَّبَوْا لِحِلَّةْ يَافَا، بُطْرُسْ طَلَعْ فِي رَاسْ الْبَيْت أَشَانْ يِصَلِّي. 10وَ جُوعْ شَدِيدْ سَوَّاهْ وَ دَوَّرْ يَاكُلْ. وَ وَكِتْ قَاعِدِينْ يِجَهُّزُوا لَيَّهْ أَكِلْ، شَيّءْ مِثِلْ رُؤْيَةْ جَاءْ لَيَّهْ.

11وَ فِي الرُّؤْيَةْ دِي، شَافْ السَّمَاءْ فَاتِحْ وَ شَيّءْ مِثِلْ قِطْعَةْ كَبِيرَةْ مَفْلُولَةْ وَ مَكْرُوبَةْ مِنْ جَوَانِبْهَا الْأَرْبَعَةْ نَازْلَةْ فِي الْأَرْض. 12وَ الْقِطْعَةْ دِي مَلَانَةْ بِكُلَّ نَفَرْ الْحَيْوَانَاتْ الْفِي الْأَرْض وَ الزَّوَاحِفْ وَ الطُّيُورْ. 13وَ بُطْرُسْ سِمِعْ حِسّ قَاعِدْ يِنَادِيهْ وَ يُقُولْ: «يَا بُطْرُسْ، قُمّ! أَدْبَحْ وَ آكُلْ!» 14وَ لَاكِنْ بُطْرُسْ رَدَّ لَيَّهْ وَ قَالْ: «لَا، يَا رَبِّي! أَبَداً مَا أَكَلْت شَيّءْ حَرَامْ وَ لَا شَيّءْ نِجِسْ.» 15وَ الْحِسّ كَلَّمْ لَيَّهْ بَتَّانْ وَ قَالْ: «الشَّيّءْ الْاللّٰهْ طَهَّرَهْ، مَا تُقُولْ نِجِسْ.» 16وَ الشَّيّءْ دَا بِقِي تَلَاتَةْ مَرَّاتْ وَ طَوَّالِي الْقِطْعَةْ أَنْرَفَعَتْ فِي السَّمَاءْ.

17وَ بُطْرُسْ أَلْعَجَّبْ وَ بَدَا يَسْأَلْ فِي نَفْسَهْ شُنُو مَعَنَى الرُّؤْيَةْ الشَّافَاهَا. وَ فِي الْوَكِتْ دَا بَسْ، الرُّجَالْ الْكَرْنِيلِي رَسَّلَاهُمْ لِقَوْا بَيْت سِمْعَانْ الدَّبَّاغِي وَ جَوْا وَقَفَوْا فِي خَشُمْ الْبَيْت. 18وَ قَاعِدِينْ يَسْأَلَوْا نَاسْ الْبَيْت وَ يُقُولُوا: «سِمْعَانْ الْيِنَادُوهْ بُطْرُسْ دَا، هُو ضَيْف فِي بَكَانْكُو وَلَّا؟»

19وَكِتْ بُطْرُسْ قَاعِدْ يِفَكِّرْ فِي مَعَنَى الرُّؤْيَةْ دِي بَسْ، الرُّوحْ الْقُدُّوسْ كَلَّمْ لَيَّهْ وَ قَالْ: «أَسْمَعْ، فِي تَلَاتَةْ رُجَالْ قَاعِدِينْ فِي خَشُمْ الْبَيْت. يَسْأَلَوْا مِنَّكْ. 20دَلِّي تِحِتْ وَ لَاقِيهُمْ وَ أَمْشِي مَعَاهُمْ وَ مَا تِشَكِّكْ فَوْقهُمْ. أَنَا بَسْ رَسَّلْتُهُمْ لَيْك.»

21وَ أَدَّلَّ تِحِتْ وَ مَشَى لَيْهُمْ وَ قَالْ: «أَنَا بَسْ النَّادُمْ التِّدَوْرُوهْ. جِيتُوا لِشُنُو؟» 22وَ رَدَّوْا لَيَّهْ وَ قَالَوْا: «كَرْنِيلِي رَسَّلَانَا. وَ كَرْنِيلِي دَا هُو كَبِيرْ عَسْكَرْ وَ رَاجِلْ صَالِحْ وَ خَايِفْ مِنْ اللّٰهْ. وَ كُلَّ الْيَهُودْ يَشْهَدَوْا لَيَّهْ هُو نَادُمْ عَدِيلْ. وَ وَاحِدْ مِنْ مَلَائِكَةْ اللّٰهْ جَاءْ لَيَّهْ وَ قَالْ وَاجِبْ كَرْنِيلِي يِنَادِيكْ تَمْشِي بَيْتَهْ أَشَانْ يَسْمَعْ كَلَامَكْ.»

23وَ بُطْرُسْ ضَيَّفَاهُمْ وَ رَقَدَوْا فِي الْبَيْت. وَ بِفَجُرْ، بُطْرُسْ قَمَّ وَ مَشَى مَعَاهُمْ. وَ وَاحِدِينْ مِنْ الْأَخْوَانْ مِنْ يَافَا كُلَ مَشَوْا مَعَ بُطْرُسْ.

بُطْرُس في بيت كَرْنِيلِي

24وَ أَمْبَاكِرْ، وِصْلَوْا فِي قَيْصَرِيَّةْ وَ كَرْنِيلِي قَاعِدْ يَرْجَاهُمْ مَعَ أَخْوَانَهْ وَ رُفْقَانَهْ الْمَرَّةْ وَاحِدْ. 25وَ وَكِتْ بُطْرُسْ قَاعِدْ يَدْخُلْ فِي الْبَيْت، كَرْنِيلِي قَابَلَهْ وَ سَجَدْ لَيَّهْ. 26وَ بُطْرُسْ رَفَعَهْ وَ قَالْ: «قُمّ فَوْق! أَنَا إِنْسَانْ مِثْلَكْ إِنْتَ بَسْ.»

27وَ بُطْرُسْ دَخَلْ فِي الْبَيْت وَ قَاعِدْ يِحَجِّي مَعَايَهْ وَ مَشَى دَاخَلْ وَ لِقِي نَاسْ كَتِيرِينْ لَامِّينْ. 28وَ قَالْ لَيْهُمْ: «إِنْتُو تَعَرْفُوا فِي دِينْ الْيَهُودْ حَرَامْ لِيَهُودِي يِلِمّ مَعَ نَادُمْ مَا يَهُودِي. وَ لَا يِسَلِّمَهْ فِي بَيْتَهْ كُلَ. وَ لَاكِنْ اللّٰهْ أَوْرَانِي مَا وَاجِبْ نُقُولْ أَيِّ نَادُمْ نِجِسْ وَلَّا مَا طَاهِرْ بِسَبَبْ قَبِيلْتَهْ. 29وَ أَشَانْ دَا، وَكِتْ نَادَيْتُونِي، أَنَا مَا قُلْت كَلَامْ وَ جِيتْ لَيْكُو. وَ هَسَّعْ أَوْرُونِي نَادَيْتُونِي لِشُنُو؟»

30وَ كَرْنِيلِي رَدَّ لَيَّهْ وَ قَالْ: «عِنْدِنَا أَرْبَعَةْ يَوْم، السَّاعَةْ مِثِلْ الْوَكِتْ دَا، أَنَا فِي بَيْتِي وَ قَاعِدْ نِصَلِّي صَلَاةْ هَنَا السَّاعَةْ تَلَاتَةْ. وَ فَجْأَةً، رَاجِلْ لَابِسْ خَلَقْ أَبْيَضْ مِثِلْ الْبَرَّاقَةْ بَانْ قِدَّامِي. 31وَ قَالْ لَيِّ: ‹يَا كَرْنِيلِي، اللّٰهْ سِمِعْ صَلَاوَاتَكْ وَ فَكَّرْ فِي الصَّدَقَةْ الْإِنْتَ أَنْطَيْتهَا. 32وَ هَسَّعْ رَسِّلْ رُجَالْ فِي يَافَا أَشَانْ يِنَادُوا سِمْعَانْ الْبِنَادُوهْ بُطْرُسْ أَشَانْ يَجِي لَيْك. هُو ضَيْف هَنَا سِمْعَانْ الدَّبَّاغِي الْبَيْتَهْ جَنْب الْبَحَرْ.› 33وَ طَوَّالِي، أَنَا رَسَّلْتُهُمْ أَشَانْ يِنَادُوكْ وَ شُكْراً بِجَيْتَكْ. وَ خَلَاصْ، كُلِّنَا قَاعِدِينْ هِنِي قِدَّامْ اللّٰهْ أَشَانْ نَسْمَعَوْا كُلَّ الْكَلَامْ الْاللّٰهْ أَمَرَكْ بَيَّهْ.»

34وَ بُطْرُسْ قَمَّ يِكَلِّمْ لَيْهُمْ وَ قَالْ: «خَلَاصْ دَهَابَ أَنَا فِهِمْت كَدَرْ صَحِيحْ كَيْ، اللّٰهْ مَا يِشِيفْ قَبِيلَةْ وَاحِدَةْ أَخَيْر مِنْ قَبَايِلْ آخَرِينْ. 35وَ اللّٰهْ يَقْبَلْ نَادُمْ مِنْ أَيِّ قَبِيلَةْ كَنْ يَخَافْ مِنَّهْ وَ عَمَلَهْ صَالِحْ. 36وَ أَكِيدْ، اللّٰهْ رَسَّلْ لِبَنِي إِسْرَائِيلْ بِشَارَةْ السَّلَامْ الْيَنْطِيهَا بِعِيسَى الْمَسِيحْ، رَبّ هَنَا كُلَّ النَّاسْ. 37وَ إِنْتُو تَعَرْفُوا كُلَّ شَيّءْ الْبِقِي فِي دَارْ الْيَهُودِيَّةْ. الشَّيّءْ الْبِقِي دَا بَدَا فِي دَارْ الْجَلِيلْ بَعَدْ يَحْيَى نَادَى النَّاسْ أَشَانْ يِغَطِّسْهُمْ. 38وَ تَعَرْفُوا كَدَرْ اللّٰهْ نَزَّلْ الرُّوحْ الْقُدُّوسْ فِي عِيسَى الْمِنْ النَّاصِرَةْ وَ دَرَّجَهْ مَسِيحْ وَ أَنْطَاهْ قُدْرَةْ. وَ عِيسَى سَوَّى الْخَيْر فِي أَيِّ بَكَانْ وَ شَفَى كُلَّ النَّاسْ الْإِبْلِيسْ عَذَّبَاهُمْ أَشَانْ اللّٰهْ كَانْ مَعَايَهْ.

39«وَ أَنِحْنَ شُهُودْ فِي كُلَّ شَيّءْ الْعِيسَى سَوَّاهْ فِي دَارْ الْيَهُودْ وَ فِي مَدِينَةْ الْقُدُسْ. وَ خَلَاصْ، عَلَّقَوْه فِي الصَّلِيبْ وَ كَتَلَوْه. 40وَ بَعَدْ تَلَاتَةْ يَوْم، اللّٰهْ قَوَّمَهْ مِنْ الْمَوْت وَ بَيَّنَهْ لِلنَّاسْ. 41وَ لَاكِنْ مَا بَيَّنَهْ لِكُلَّ النَّاسْ، إِلَّا لِلشُّهُودْ الْهُو عَزَلَاهُمْ مِنْ أَوَّلْ. وَ دَا لَيْنَا أَنِحْنَ الْأَكَلْنَا وَ شِرِبْنَا مَعَايَهْ بَعَدْ هُو بَعَثْ مِنْ أُسْط الْمَيْتِينْ. 42وَ عِيسَى أَمَرَانَا أَشَانْ نِبَلُّغُوا الْبِشَارَةْ لِلشَّعَبْ وَ نَشْهَدَوْا لَيَّهْ وَ نُقُولُوا عِيسَى بَسْ النَّادُمْ الْاللّٰهْ جَعَلَهْ لِيِحَاسِبْ النَّاسْ الْحَيِّينْ وَ الْمَيْتِينْ. 43وَ كُلَّ الْأَنْبِيَاء يَشْهَدَوْا لِعِيسَى وَ يُقُولُوا أَيِّ نَادُمْ الْيِآمِنْ بَيَّهْ، يَلْقَى غُفْرَانْ الذُّنُوبْ بِأُسْمَهْ.»

44وَ وَكِتْ بُطْرُسْ لِسَّاعْ قَاعِدْ يِكَلِّمْ لَيْهُمْ كَيْ بَسْ، الرُّوحْ الْقُدُّوسْ نَزَلْ فِي كُلَّ النَّاسْ الْقَاعِدِينْ يَسْمَعَوْا كَلَامَهْ. 45وَ الْمُؤمِنِينْ الْمِنْ الْيَهُودْ الْجَوْا مَعَ بُطْرُسْ أَلْعَجَّبَوْا مَرَّةْ وَاحِدْ أَشَانْ شَافَوْا اللّٰهْ أَنْطَى الرُّوحْ الْقُدُّوسْ لِلنَّاسْ الْمَا يَهُودْ كُلَ. 46وَ سِمْعَوْهُمْ وَ هُمَّنْ قَاعِدِينْ يِكَلُّمُوا بِلُغَّاتْ آخَرِينْ وَ يَحْمُدُوا اللّٰهْ بِفَرْحَةْ. وَ بُطْرُسْ قَالْ: 47«فِي نَادُمْ يَدْحَرْنَا مِنْ الْأَلْمِي أَشَانْ مَا نِغَطُّسُوا النَّاسْ دَوْل وَلَّا؟ اللّٰهْ أَنْطَاهُمْ هُمَّنْ الرُّوحْ الْقُدُّوسْ مِثِلْ أَنْطَاهْ لَيْنَا.»

48وَ بُطْرُسْ أَمَرَاهُمْ لِأَخْوَانَهْ أَشَانْ يِغَطُّسُوهُمْ بِأُسُمْ عِيسَى الْمَسِيحْ. وَ بَعَدْ غَطَّسَوْهُمْ خَلَاصْ، كَرْنِيلِي وَ أَخْوَانَهْ طَلَبَوْا مِنْ بُطْرُسْ يَقْعُدْ مَعَاهُمْ أَيَّامْ.

Currently Selected:

أعمال الرُسُل 10: ع.د.ت19

Highlight

Copy