تكوين 19
19
فسالة ناس سَدُوم
1وَكِتْ الْمَلَائِكَةْ الْإِتْنَيْن وَصَّلَوْا فِي سَدُومْ بِعَشِيَّةْ، لُوطْ قَاعِدْ فِي خَشُمْ بَابْ الْمَدِينَةْ. وَ وَكِتْ شَافَاهُمْ، قَمَّ لَاقَاهُمْ وَ سَجَدْ قِدَّامْهُمْ. 2وَ قَالْ: «مَرْحَبْ بَيْكُو! أَلْفَضَّلَوْا فِي بَيْت عَبْدُكُو أَشَانْ تِغَسُّلُوا رِجْلَيْكُو وَ تُنُومُوا وَ أَمْبَاكِرْ فَجُرْ، تَمْشُوا.» وَ هُمَّنْ قَالَوْا: «لَا. نُنُومُوا بَرَّا هِنِي فِي النَّقَعَةْ دِي.»
3وَ لَاكِنْ لُوطْ مَا خَلَّاهُمْ وَ عَصَرَاهُمْ لَحَدِّي وَدَّاهُمْ بَيْتَهْ وَ سَوَّى لَيْهُمْ أَكِلْ وَ خُبْزَةْ بَلَا تَوَّارَةْ وَ هُمَّنْ أَكَلَوْا.
4وَ لِسَّاعْ مَا نَامَوْا كَيْ بَسْ، كُلَّ الرُّجَالْ هَنَا مَدِينَةْ سَدُومْ مِنْ صُبْيَانْهُمْ لَحَدِّي شِيَّابْهُمْ جَوْا وَ حَوَّقَوْا الْبَيْت. 5وَ نَادَوْا لُوطْ وَ قَالَوْا لَيَّهْ: «وَيْن الرُّجَالْ الدَّخَلَوْا فِي بَيْتَكْ؟ أَمْرُقْهُمْ لَيْنَا عَجَلَةْ أَشَانْ نَرُقْدُوا مَعَاهُمْ!»
6وَ لُوطْ مَرَقْ لَيْهُمْ وَ سَدَّ الْبَابْ وَرَايَهْ 7وَ قَالْ لَيْهُمْ: «يَا أَخْوَانِي، أَنَا نَشْحَدْكُو مَا تِسَوُّوا لَيْهُمْ شَيّءْ فَسِلْ. 8دَاهُو عِنْدِي بَنَاتْ إِتْنَيْن لِسَّاعْهِنْ مَا شَافَنْ رُجَالْ. نَمْرُقْهِنْ لَيْكُو بَرَّا وَ سَوُّوا فَوْقهِنْ أَيِّ شَيّءْ التِّدَوْرُوهْ. لَاكِنْ الرُّجَالْ الْإِتْنَيْن دَوْل، مَا تِسَوُّوا لَيْهُمْ شَيّءْ فَسِلْ أَشَانْ هُمَّنْ ضِيفَانِي وَ وَاجِبْ أَنَا نَحْمِيهُمْ.» 9وَ لَاكِنْ هُمَّنْ رَدَّوْا لِلُوطْ وَ قَالَوْا: «كِسّ مِنْ هِنِي! إِنْتَ وَاحِدْ وَ أَجْنَبِي وَ تِدَوْر تَحْكِمْنَا وَلَّا؟ أَقِيفْ! نِسَوُّوا لَيْك شَيّءْ فَسِلْ زِيَادَةْ مِنْ هَنَاهُمْ!»
وَ خَلَاصْ، لَزَّوْا لُوطْ بِقُدْرَةْ وَ دَوَّرَوْا يِكَسُّرُوا الْبَابْ. 10وَ لَاكِنْ الْمَلَائِكَةْ الْإِتْنَيْن جَبَدَوْا لُوطْ دَاخَلْ وَ سَدَّوْا الْبَابْ فَوْقهُمْ. 11وَ طَوَّالِي الْمَلَائِكَةْ ضَرَبَوْا كُلَّ النَّاسْ الْقَاعِدِينْ فِي خَشُمْ الْبَابْ بِالْعَمَى مِنْ كُبَارْهُمْ لَحَدِّي دُقَاقْهُمْ. وَ بَيْدَا، هُمَّنْ مَا قِدْرَوْا لِقَوْا الْبَابْ.
اللّه نجّى لُوط و عايِلْته
12وَ الْمَلَائِكَةْ قَالَوْا لِلُوطْ: «عِنْدَكْ يَاتُو فِي الْحِلَّةْ دِي؟ كَنْ عِنْدَكْ نُسْبَانْ وَ أَوْلَادْ وَ بَنَاتْ وَ نَاسْ آخَرِينْ الْقَرِيبِينْ لَيْك كُلَ، أَمْرُقْهُمْ مِنْ هِنِي! 13أَنِحْنَ نِدَمُّرُوا الْبَكَانْ دَا أَشَانْ اللّٰهْ سِمِعْ الشَّكْوَةْ ضِدّ نَاسْ الْمَدِينَةْ دِي بِسَبَبْ فِعِلْهُمْ الشَّيْن. وَ اللّٰهْ رَسَّلَانَا لِنِدَمُّرُوهَا.»
14وَ لُوطْ مَشَى لِقِي نُسْبَانَهْ الْيِدَوْرُوا يَاخُدُوا بَنَاتَهْ وَ قَالْ لَيْهُمْ: «يَلَّا! قُمُّوا أَمُرْقُوا مِنْ هِنِي! أَشَانْ اللّٰهْ يِدَوْر يِدَمِّرْ الْمَدِينَةْ دِي.» لَاكِنْ هُمَّنْ شَافَوْا كَلَامَهْ مِثِلْ لِعِبْ سَاكِتْ.
15وَ بِفَجُرْ بَدْرِي، الْمَلَائِكَةْ عَصَرَوْا لُوطْ وَ قَالَوْا لَيَّهْ: «قُمّ! أَمْرُقْ عَجَلَةْ! شِيلْ مَرْتَكْ وَ بَنَاتَكْ الْإِتْنَيْن الْقَاعِدِينْ هِنِي أَشَانْ مَا تُمُوتُوا بِسَبَبْ عِقَابْ الْمَدِينَةْ دِي!» 16وَ لَاكِنْ لُوطْ أَلأَخَّرْ فِي الْمَرِقِينْ وَ الْمَلَائِكَةْ كَرَبَوْهُمْ مِنْ إِيدَيْهُمْ، هُو وَ مَرْتَهْ وَ بَنَاتَهْ وَ مَرَقَوْهُمْ بَرَّا مِنْ الْمَدِينَةْ أَشَانْ اللّٰهْ دَوَّرْ يِنَجِّيهُمْ.
17وَكِتْ مَرَقَوْهُمْ بَرَّا مِنْ الْمَدِينَةْ دِي، وَاحِدْ مِنْ الْمَلَائِكَةْ قَالْ لِلُوطْ: «كَنْ تِدَوْر تِنَجِّي نَفْسَكْ، أَجْرِي! مَا تِنْلَفِتْ وَرَاكْ وَ مَا تَقِيفْ فِي الْوَادِي. أَمْشِي فِي الْحَجَرْ أَشَانْ مَا تُمُوتْ.»
18وَ لُوطْ قَالْ: «لَا، يَا رَبّ، دَا مَا مُمْكِنْ! 19يَا رَبّ، لِقِيتْ مِنَّكْ الرِّضَى وَ الرَّحْمَةْ الْكَبِيرَةْ أَشَانْ نَجَّيْت حَيَاتِي. لَاكِنْ مَا نَقْدَرْ نَجْرِي لَحَدِّي الْحَجَرْ دَاكْ. كَنْ الدَّمَارْ دَا لِحِقْنِي فِي الدَّرِبْ، أَنَا نُمُوتْ! 20شِيفْ! الْحِلَّةْ دِي قَرِيبْ لَيِّ وَ نَقْدَرْ نَوْصَلْهَا عَجَلَةْ وَ هِي حِلَّةْ صَغَيْرَةْ بَسْ. وَ خَلِّينِي نَمْشِي فَوْقهَا. هِي حِلَّةْ صَغَيْرَةْ وَ نِنَجِّي نَفْسِي.»
21وَ الْمَلَكْ قَالْ لَيَّهْ: «أَنَا سِمِعْت كَلَامَكْ، مَا نِدَمِّرْ الْحِلَّةْ الْإِنْتَ حَجَّيْت بَيْهَا. 22أَجْرِي عَجَلَةْ! أَمْشِي فِي الْحِلَّةْ دِي. أَنَا مَا نَقْدَرْ نِسَوِّي شَيّءْ قُبَّالْ إِنْتَ مَا تَوْصَلْ فَوْقهَا.» فِي شَانْ دَا بَسْ، سَمَّوْا الْحِلَّةْ دِي صُوغَرْ (مَعَنَاتَهْ صَغَيْرَةْ).
اللّه دمّر سَدُوم و عَمُورَة
23وَكِتْ لُوطْ وَصَّلْ فِي صُوغَرْ، الْحَرَّايْ دَهَابْهَا قَاعِدَةْ تَطْلَعْ. 24وَ فِي الْوَكِتْ دَا، اللّٰهْ نَزَّلْ مِنْ السَّمَاءْ كِبْرِيتْ وَ مَطَرَةْ هَنَا نَارْ شَدِيدَةْ فِي سَدُومْ وَ عَمُورَةْ. 25وَ اللّٰهْ دَمَّرْ الْمُدُنْ دَوْل وَ كُلَّ الْمَنْطَقَةْ وَ الْحِلَّالْ وَ سُكَّانْهُمْ وَ كُلَّ نَبَاتَاتْ الْأَرْض. 26وَ مَرِةْ لُوطْ أَنْلَفَتَتْ لِتِشِيفْ وَرَاهَا وَ طَوَّالِي يِبْسَتْ بِقَتْ مِلِحْ وَ وَاقْفَةْ بِطُولْهَا مِثِلْ الدُّولِيَةْ.
27وَ أَمْبَاكِرْ بِفَجُرْ، إِبْرَاهِيمْ مَشَى فِي الْبَكَانْ الْأَوَّلْ وَقَفْ فَوْقَهْ قِدَّامْ اللّٰهْ. 28وَ وَجَّهْ عَلَيْ سَدُومْ وَ عَمُورَةْ وَ عَلَيْ كُلَّ الْحِلَّالْ الْقَاعِدِينْ جَنْبُهُمْ وَ شَافْ دُخَّانْ أَزْرَقْ كُرُمْ طَالِعْ مِنْ الْأَرْض مِثِلْ دُخَّانْ هَنَا حَرِيقَةْ. 29وَ بِمِثِلْ دَا، الرَّبّ دَمَّرْ مُدُنْ الْمَنْطَقَةْ اللُّوطْ سَكَنْ فَوْقهُمْ. وَ لَاكِنْ هُو فَكَّرْ لِإِبْرَاهِيمْ وَ مَرَقْ لُوطْ مِنْ الدَّمَارْ.
عمل بنات لُوط
30وَ بَعَدْ كُلَّ الشَّيّءْ دَا، لُوطْ خَافْ مَا يَسْكُنْ فِي صُوغَرْ وَ مَشَى مَعَ بَنَاتَهْ الْإِتْنَيْن فِي الْحَجَرْ وَ سَكَنْ فِي كَرْكُورْ. 31وَ يَوْم وَاحِدْ، بِنَيِّتَهْ الْكَبِيرَةْ قَالَتْ لِأَخُتْهَا الصَّغَيْرَةْ: «أَبُونَا بِقِي شَايِبْ وَ مَا فِي رُجَالْ فِي الْبَلَدْ دِي الْيَجُوا يَاخُدُونَا مِثِلْ فِي عَادَةْ كُلَّ نَاسْ الْأَرْض. 32تَعَالِي، نِسَكُّرُوا أَبُونَا بِخَمَرْ وَ نَرُقْدُوا مَعَايَهْ أَشَانْ نِجِيبُوا لَيَّهْ ذُرِّيَّةْ.»
33وَ فِي اللَّيْلَةْ دِي، سَكَّرَنْ أَبُوهِنْ بِخَمَرْ وَ الْكَبِيرَةْ مَشَتْ رَقَدَتْ مَعَايَهْ وَ لَاكِنْ أَبُوهَا مَا عِرِفْ وَكِتْ هِي رَقَدَتْ مَعَايَهْ وَ وَكِتْ هِي قَمَّتْ.
34وَ أَمْبَاكِرْ، الْكَبِيرَةْ قَالَتْ لِأَخُتْهَا: «أَلْبَارَحْ أَنَا رَقَدْت مَعَ أَبُونَا. وَ اللَّيْلَةْ كُلَ، خَلِّي نِسَكُّرُوهْ وَ أَمْشِي أَرُقْدِي مَعَايَهْ أَشَانْ نِجِيبُوا لَيَّهْ ذُرِّيَّةْ.» 35وَ فِي اللَّيْلَةْ دِي، سَكَّرَنْ أَبُوهِنْ وَ الصَّغَيْرَةْ مَشَتْ رَقَدَتْ مَعَايَهْ وَ لَاكِنْ أَبُوهَا مَا عِرِفْ وَكِتْ هِي رَقَدَتْ مَعَايَهْ وَ وَكِتْ هِي قَمَّتْ. 36وَ بَنَاتْ لُوطْ الْإِتْنَيْن حِمْلَنْ.
37وَ الْكَبِيرَةْ وِلْدَتْ وَ جَابَتْ وِلَيْد وَ سَمَّتَهْ مُوَابْ. وَ هُو بَسْ جِدّ هَنَا الْمُوَابِيِّينْ الْقَاعِدِينْ لَحَدِّي الْيَوْم. 38وَ الصَّغَيْرَةْ كُلَ وِلْدَتْ وَ جَابَتْ وِلَيْد وَ سَمَّتَهْ بَنْعَمِّي. وَ هُو بَسْ جِدّ هَنَا بَنِي عَمُّونْ الْقَاعِدِينْ لَحَدِّي الْيَوْم.
Currently Selected:
تكوين 19: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
