تكوين 34
34
العُنُف الشَكِيم سوّاه لدِينَة
1يَوْم وَاحِدْ، دِينَةْ بِنَيَّةْ يَعْقُوبْ اللَّيْئَةْ وِلْدَتْهَا لَيَّهْ مَرَقَتْ مَشَتْ تُزُورْ بَنَاتْ الْبَلَدْ. 2وَ شَكِيمْ وِلَيْد حَمُورْ شَيْخ بَلَدْ الْحِوِّيِّينْ شَافَاهَا. وَ هُو خَطَفْهَا وَ لِعِبْ مَعَاهَا وَ تَلَّفْ شَرَفْهَا. 3وَ قَلْبَهْ عَلَّقْ فَوْق دِينَةْ بِنَيَّةْ يَعْقُوبْ. وَ هُو حَبَّاهَا وَ فَتَّشْ طَرِيقَةْ الْهِي تَقْبَلْ بَيْهَا كَلَامَهْ. 4وَ شَكِيمْ قَالْ لِأَبُوهْ حَمُورْ: «آخُدْ لَيِّ الْبِنَيَّةْ دِي أَشَانْ تَبْقَى مَرْتِي.»
5وَ يَعْقُوبْ سِمِعْ كَدَرْ شَكِيمْ تَلَّفْ شَرَفْ دِينَةْ بِنَيِّتَهْ. وَ لَاكِنْ أَوْلَادَهْ قَاعِدِينْ فِي الْخَلَاءْ يَسْرَحَوْا بِبَهَايْمَهْ. أَشَانْ دَا، يَعْقُوبْ سَكَتْ سَاكِتْ لَحَدِّي يَجُوا.
طهّروا ناس أبو شَكِيم
6وَ حَمُورْ أَبُو شَكِيمْ مَشَى لِيَعْقُوبْ أَشَانْ يِحَجِّي لَيَّهْ. 7وَ وَكِتْ أَوْلَادْ يَعْقُوبْ سِمْعَوْا بِالشَّيّءْ الْكَانْ دَا، جَوْا مِنْ الْخَلَاءْ وَ زَعْلَانِينْ زَعَلْ شَدِيدْ. أَشَانْ شَكِيمْ سَوَّى فِعِلْ شَيْن فِي قَبِيلَةْ إِسْرَائِيلْ وَكِتْ خَطَفْهَا وَ تَلَّفْ شَرَفْهَا لِبِنَيَّةْ يَعْقُوبْ. وَ الشَّيّءْ دَا، مَا وَاجِبْ يُكُونْ أَبَداً.
8وَ حَمُورْ حَجَّى لَيْهُمْ وَ قَالْ: «وِلَيْدِي شَكِيمْ، قَلْبَهْ عَلَّقْ فِي بِنْتُكُو. مِنْ فَضُلْكُو، أَنْطُوهَا لَيَّهْ لِتَبْقَى مَرْتَهْ. 9وَ إِنْتُو تَقْدَرَوْا تِنَاسُبُونَا، نَاخُدُوا مِنْ بَنَاتْكُو وَ تَاخُدُوا مِنْ بَنَاتْنَا. 10وَ تَسْكُنُوا مَعَانَا. وَ الْبَلَدْ قَاعِدَةْ مَفْتُوحَةْ لَيْكُو. تَاجُرُوا وَ أَكْسَبَوْا فَوْقهَا أَرْض لِنُفُوسْكُو.» 11وَ شَكِيمْ ذَاتَهْ قَالْ لِيَعْقُوبْ أَبُو دِينَةْ وَ أَخْوَانْهَا: «أَرْضَوْا لَيِّ وَ أَنَا نَنْطِيكُو أَيِّ شَيّءْ التَّطُلْبُوهْ مِنِّي. 12وَ خُطُّوا فَوْقِي الْمَالْ التِّدَوْرُوهْ وَ هَدِيَّةْ كَتِيرَةْ وَ أَنَا نَنْطِيكُو كُلَّ شَيّءْ التِّدَوْرُوهْ. لَاكِنْ نِدَوْر الْبِنَيَّةْ دِي تَبْقَى مَرْتِي.»
13وَ أَوْلَادْ يَعْقُوبْ رَدَّوْا بِنَجَاضَةْ لِشَكِيمْ وَ حَمُورْ أَبُوهْ أَشَانْ شَكِيمْ تَلَّفْ شَرَفْ أَخُتْهُمْ دِينَةْ 14وَ قَالَوْا لَيْهُمْ: «الشَّيّءْ دَا، مَا مُمْكِنْ لَيْنَا. مَا نَقْدَرَوْا نَنْطُوا أَخُتْنَا لِرَاجِلْ مَا مُطَهَّرْ أَشَانْ دَا عَيْب لَيْنَا. 15أَنِحْنَ نِقَصُّدُوا لَيْكُو إِلَّا فِي حَالَةْ وَاحِدَةْ بَسْ. تَبْقَوْا مِثِلْنَا، طَهُّرُوا أَيِّ دَكَرْ مِنْكُو. 16وَ بَيْدَا خَلَاصْ، إِنْتُو تَقْدَرَوْا تَاخُدُوا مِنْ بَنَاتْنَا وَ أَنِحْنَ كُلَ نَاخُدُوا مِنْ بَنَاتْكُو. وَ كُلِّنَا نَبْقَوْا شَعَبْ وَاحِدْ. 17وَ لَاكِنْ كَنْ أَبَيْتُوا مَا تِطَهُّرُوا، أَنِحْنَ نِشِيلُوا أَخُتْنَا وَ نَمْشُوا.»
18وَ شَكِيمْ وَ أَبُوهْ حَمُورْ قَصَّدَوْا بِالْكَلَامْ دَا. 19وَ شَكِيمْ طَبَّقْ عَجَلَةْ كَيْ بَسْ الْكَلَامْ الْهُمَّنْ دَوَّرَوْه أَشَانْ بِرِيدْهَا مَرَّةْ وَاحِدْ لِدِينَةْ بِنَيَّةْ يَعْقُوبْ. وَ شَكِيمْ هُو مُحْتَرَمْ مِنْ كُلَّ نَاسْ بَيْت أَبُوهْ. 20وَ حَمُورْ مَعَ وِلَيْدَهْ شَكِيمْ مَشَوْا فِي خَشُمْ بَابْ حِلِّتْهُمْ، الْبَكَانْ النَّاسْ يِلِمُّوا فَوْقَهْ.
وَ حَجَّوْا لِنَاسْ الْحِلَّةْ 21وَ قَالَوْا لَيْهُمْ: «النَّاسْ دَوْل مَا عِنْدُهُمْ أَيِّ كَلَامْ مَعَانَا. خَلِّي يَقْعُدُوا فِي الْبَلَدْ وَ يِتَاجُرُوا وَ دِي هِي الْبَلَدْ وَسِيعَةْ لَيْهُمْ. وَ أَنِحْنَ نَاخُدُوا بَنَاتْهُمْ وَ هُمَّنْ كُلَ يَاخُدُوا بَنَاتْنَا. 22وَ لَاكِنْ هُمَّنْ يِقَصُّدُوا يَقْعُدُوا مَعَانَا وَ نَبْقَوْا قَبِيلَةْ وَاحِدَةْ، إِلَّا كَنْ أَنِحْنَ نِطَهُّرُوا كُلَّ دَكَرْ مِنِّنَا مِثِلْ هُمَّنْ ذَاتْهُمْ مُطَهَّرِينْ. 23وَ كَنْ أَنِحْنَ قَصَّدْنَا بِالشَّيّءْ الْهُمَّنْ طَلَبَوْه مِنِّنَا، هُمَّنْ يَجُوا يَسْكُنُوا مَعَانَا. وَ بَيْدَا، بَهَايِمْهُمْ وَ مَالْهُمْ وَ كُلَّ شَيّءْ الْعِنْدُهُمْ مَا يَبْقَوْا هَنَانَا وَلَّا؟»
24وَ كُلَّ النَّاسْ الْمَشَوْا فِي خَشُمْ بَابْ الْحِلَّةْ، قَصَّدَوْا بِكَلَامْ حَمُورْ وَ وِلَيْدَهْ شَكِيمْ. وَ خَلَاصْ، كُلَّ الدُّكُورْ الْمَشَوْا فِي خَشُمْ بَابْ الْحِلَّةْ طَهَّرَوْهُمْ.
شِمْعُون و لَاوِي شالوا التار
25وَ بَعَدْ تَلَاتَةْ يَوْم، وَكِتْ الرُّجَالْ لِسَّاعْ مَا بِرَوْا مِنْ الطَّهُورَةْ دِي، أَوْلَادْ يَعْقُوبْ شِمْعُونْ وَ لَاوِي أَخْوَانْ دِينَةْ شَالَوْا سُيُوفْهُمْ. وَ دَخَلَوْا الْحِلَّةْ بَلَا خَوْف وَ كَتَلَوْا كُلَّ الدُّكُورْ. 26وَ كَتَلَوْا حَمُورْ وَ وِلَيْدَهْ شَكِيمْ كُلَ بِسَيْف وَ دَخَلَوْا فِي بَيْت شَكِيمْ وَ شَالَوْا أَخُتْهُمْ وَ مَشَوْا. 27وَ أَوْلَادْ يَعْقُوبْ الْآخَرِينْ كَتَلَوْا الْمَجْرُوحِينْ وَ كَسَبَوْا الْحِلَّةْ أَشَانْ شَرَفْ أَخُتْهُمْ دِينَةْ تِلِفْ. 28وَ شَالَوْا كُلَّ غَنَمْ الْحِوِّيِّينْ وَ بَقَرْهُمْ وَ حَمِيرْهُمْ وَ كُلَّ مَالْهُمْ الْفِي لُبّ الْحِلَّةْ وَ الْفِي الْخَلَاءْ. 29وَ كَسَبَوْا كُلَّ مَالْهُمْ وَ كُلَّ عِيَالْهُمْ وَ كُلَّ عَوِينْهُمْ وَ شَالَوْا كُلَّ شَيّءْ الْفِي بُيُوتْهُمْ.
30وَ بَعَدْ دَا، يَعْقُوبْ قَالْ لِعِيَالَهْ شِمْعُونْ وَ لَاوِي: «إِنْتُو زَرَعْتُوا لَيِّ مَشَاكِلْ! وَ بِسَبَبْكُو إِنْتُو، الْكَنْعَانِيِّينْ وَ الْفِرِزِّيِّينْ نَاسْ الْبَلَدْ يَكْرَهَوْنِي! عِنْدِي رُجَالْ شِيَّةْ بَسْ. وَ كَنْ هُمَّنْ لَمَّوْا فَوْقِي وَ هَجَمَوْنِي، يِدَمُّرُونِي أَنَا وَ نَاسْ بَيْتِي.» 31لَاكِنْ هُمَّنْ رَدَّوْا لَيَّهْ وَ قَالَوْا: «هُو مَا جَعَلْ أَخُتْنَا زَنَّايَةْ وَلَّا؟»
Currently Selected:
تكوين 34: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
