تكوين 48
48
يَعْقُوب يبارِك أوْلاد يُوسُف
1وَ بَعَدْ دَا، جَوْا خَبَّرَوْا يُوسُفْ وَ قَالَوْا لَيَّهْ أَبُوهْ مَرْضَانْ بِلْحَيْن. وَ خَلَاصْ، هُو قَمَّ مَشَى لَيَّهْ مَعَ عِيَالَهْ الْإِتْنَيْن مَنَسَّى وَ أَفْرَايِمْ. 2وَكِتْ خَبَّرَوْا يَعْقُوبْ وَ قَالَوْا وِلَيْدَهْ يُوسُفْ جَاءْ يُزُورَهْ دَا، هُو عَصَرْ قَلْبَهْ وَ قَمَّ قَعَدْ بِحَيْلَهْ.
3وَ قَالْ لِيُوسُفْ: «زَمَانْ، اللّٰهْ الْقَادِرْ بَانْ لَيِّ فِي حِلَّةْ لُوزْ فِي بَلَدْ كَنْعَانْ وَ بَارَكَانِي. 4وَ قَالْ لَيِّ: ‹دَاهُو أَنَا نِسَوِّيكْ تَلْدَ عِيَالْ وَ تَبْقَوْا كَتِيرِينْ أَشَانْ إِنْتَ تَبْقَى جِدّ هَنَا عَايِلَةْ كَبِيرَةْ. وَ بَعَدَكْ، نَنْطِي بَلَدْ كَنْعَانْ لِذُرِّيّتَكْ مِثِلْ وَرَثَةْ إِلَى الْأَبَدْ.› 5وَ مِنْ الْيَوْم، عِيَالَكْ أَفْرَايِمْ وَ مَنَسَّى، الْوِلْدَوْهُمْ لَيْك فِي مَصِرْ قُبَّالْ أَنَا مَا نَجِي لَيْك، هُمَّنْ يَبْقَوْا عِيَالِي. وَ يَبْقَوْا مِثِلْ عِيَالِي رَأُوبِينْ وَ شِمْعُونْ. 6وَ لَاكِنْ عِيَالْ الْوِلْدَوْهُمْ لَيْك بَعَدْهُمْ، يَبْقَوْا عِيَالَكْ إِنْتَ. وَ هُمَّنْ يَلْقَوْا وَرَثَتْهُمْ مِنْ تُرَابْ أَخْوَانْهُمْ أَفْرَايِمْ وَ مَنَسَّى.
7«وَ وَكِتْ أَنَا مُقَبِّلْ مِنْ فَدَّانْ أَرَامْ، أَمَّكْ رَاحِيلْ مَاتَتْ فِي إِيدَيْنِي فِي دَرِبْ بَلَدْ كَنْعَانْ قَرِيبْ لِحِلَّةْ أَفْرَاتَةْ. وَ فِي الْبَكَانْ دَا، أَنَا دَفَنْتَهَا فِي دَرِبْ حِلَّةْ أَفْرَاتَةْ الْبِنَادُوهَا الْيَوْم بَيْت لَحَمْ.»
8وَ فِي الْبَكَانْ دَا بَسْ، يَعْقُوبْ شَافْ عِيَالْ يُوسُفْ وَ قَالْ: «دَوْل يَاتُمَّنْ؟» 9وَ يُوسُفْ قَالْ لَيَّهْ: «دَوْل عِيَالِي، الرَّبّ أَنْطَاهُمْ لَيِّ فِي مَصِرْ.» وَ يَعْقُوبْ قَالْ: «جِيبْهُمْ لَيِّ قَرِيبْ أَشَانْ نِبَارِكْهُمْ.»
10وَ يَعْقُوبْ شَوْفَهْ ضِعِفْ مِنْ الْكُبُرْ مَا يَقْدَرْ يِشِيفْ عَدِيلْ. وَ يُوسُفْ جَابْ عِيَالَهْ قَرِيبْ لِأَبُوهْ وَ يَعْقُوبْ قَمَّ حَضَنَاهُمْ وَ حَبَّاهُمْ وَ قَالْ لِيُوسُفْ: 11«أَوَّلْ أَنَا حَسَبْت بَتَّانْ كَيْ مَا نِشِيفْ وِجْهَكْ. وَ خَلَاصْ بِإِذِنْ الرَّبّ، أَنَا شِفْتَكْ وَ شِفْت عِيَالَكْ كُلَ!»
12وَ خَلَاصْ، يُوسُفْ رَفَعْ عِيَالَهْ مِنْ رِجِلَيْن أَبُوهْ وَ سَجَدْ قِدَّامَهْ. 13وَ قَمَّ شَالْ عِيَالَهْ الْإِتْنَيْن. لِأَفْرَايِمْ كَرَبَهْ بِإِيدَهْ الزَّيْنَةْ وَ لِمَنَسَّى كَرَبَهْ بِإِيدَهْ الْإِسْرَةْ. وَ أَفْرَايِمْ قَاعِدْ لِيَعْقُوبْ بِإِيدَهْ الْإِسْرَةْ وَ مَنَسَّى قَاعِدْ لَيَّهْ بِإِيدَهْ الزَّيْنَةْ. وَ يُوسُفْ جَابَاهُمْ قَرِيبْ لِجِدُّهُمْ. 14وَ يَعْقُوبْ خَالَفْ إِيدَيْنَهْ وَ خَطَّ إِيدَهْ الزَّيْنَةْ فِي رَاسْ أَفْرَايِمْ الصَّغَيَّرْ وَ خَطَّ إِيدَهْ الْإِسْرَةْ فِي رَاسْ مَنَسَّى الْكَبِيرْ. وَ هُو سَوَّى الشَّيّءْ دَا بِرَايْه.
15وَ بَارَكْ يُوسُفْ وَ قَالْ:
«يَا رَبّ،
إِلٰـهْ أَبَّهَاتِي إِبْرَاهِيمْ وَ إِسْحَاقْ
التَّابَعَوْا دَرْبَكْ!
يَا رَبّ، إِنْتَ رَاعِيِّ فِي كُلَّ مُدَّةْ حَيَاتِي
لَحَدِّي الْيَوْم!
16يَا اللّٰهْ النَّجَّيْتنِي
مِنْ كُلَّ شَيّءْ فَسِلْ!
نَطْلُبْ مِنَّكْ تِبَارِكْ الْعِيَالْ دَوْل
أَشَانْ بَيْهُمْ هُمَّنْ،
أُسْمِي يَقْعُدْ دَايْماً
مِثِلْ أُسُمْ أَبَّهَاتِي إِبْرَاهِيمْ وَ إِسْحَاقْ.
وَ خَلِّي عِيَالْهُمْ يِزِيدُوا
وَ يَبْقَوْا كَتِيرِينْ فِي كُلَّ الْأَرْض.»
17وَ لَاكِنْ يُوسُفْ مَا بِقِي لَيَّهْ حَلُو وَكِتْ شَافْ أَبُوهْ خَطَّ إِيدَهْ الزَّيْنَةْ فِي رَاسْ أَفْرَايِمْ. وَ هُو قَمَّ كَرَبْ إِيدْ أَبُوهْ لِيِحَوِّلْهَا مِنْ رَاسْ أَفْرَايِمْ وَ يُخُطَّهَا فِي رَاسْ مَنَسَّى. 18وَ يُوسُفْ قَالْ لِأَبُوهْ: «يَا أَبُويِ، مَا مِثِلْ دَا! أَشَانْ مَنَسَّى بَسْ الْبِكِرْ! خُطّ إِيدَكْ الزَّيْنَةْ فِي رَاسَهْ!»
19وَ أَبُوهْ أَبَى وَ قَالْ: «أَنَا نَعَرْفَهْ، يَا وِلَيْدِي، أَنَا نَعَرْفَهْ. هُو كُلَ يَبْقَى كَبِيرْ وَ عِيَالَهْ كُلَ يَبْقَوْا قَبِيلَةْ كَبِيرَةْ. وَ لَاكِنْ أَفْرَايِمْ أَخُوهْ الصَّغَيَّرْ يَبْقَى كَبِيرْ مِنَّهْ وَ ذُرِّيّتَهْ تَبْقَى أُمَّةْ كَبِيرَةْ مِنْ أُمَّةْ مَنَسَّى.» 20وَ فِي الْيَوْم دَا، يَعْقُوبْ بَارَكَاهُمْ وَ قَالْ: «بَنِي إِسْرَائِيلْ يِبَارُكُوا بِأُسُمْكُو وَ يُقُولُوا أَمْبَيْنَاتْهُمْ: ‹اللّٰهْ يِبَارِكَكْ مِثِلْ أَفْرَايِمْ وَ مَنَسَّى!›» وَ بِمِثِلْ دَا، يَعْقُوبْ قَدَّمْ أَفْرَايِمْ فِي مَنَسَّى.
21وَ قَالْ لِيُوسُفْ: «قَرِيبْ أَنَا نُمُوتْ لَاكِنْ الرَّبّ يُكُونْ مَعَاكُو وَ يِقَبِّلْكُو فِي بَلَدْ أَبَّهَاتْكُو. 22وَ أَنَا نَنْطِيكْ تُرَابْ زِيَادَةْ مِنْ هَنَا أَخْوَانَكْ. نَنْطِيكْ تُرَابْ شَكِيمْ الْأَنَا شِلْتَهْ مِنْ الْأَمُورِيِّينْ بِسَيْفِي وَ نُبَّالِي.»
Currently Selected:
تكوين 48: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
