يُوحَنَّا 16
16
التلاميذ يتْعبوا
1«أَنَا قُلْت لَيْكُو كُلَّ الْكَلَامْ دَا أَشَانْ مَا تَمُرْقُوا مِنْ الدَّرِبْ الْعَدِيلْ. 2يَطُرْدُوكُو مِنْ بُيُوتْ الصَّلَاةْ. وَ يَجِي وَكِتْ وَاحِدْ أَيِّ نَادُمْ الْيَكْتُلْكُو يِفَكِّرْ هُو قَاعِدْ يَخْدِمْ لِلّٰهْ. 3يَكْرَهَوْكُو مِثِلْ دَا أَشَانْ مَا عِرْفَوْا أَبُويِ اللّٰهْ وَ مَا عِرْفَوْنِي أَنَا كُلَ. 4لَاكِنْ قُلْت لَيْكُو الْكَلَامْ دَا أَشَانْ وَكِتْ التَّعَبْ يَجِي فَوْقكُو، تِفَكُّرُوا وَ تَعَرْفُوا كَدَرْ أَنَا أَوْرَيْتكُو بَيَّهْ. وَ أَنَا مَا أَوْرَيْتكُو مِنْ الْبِدَايَةْ بِالتَّعَبْ الْيَجِيكُو أَشَانْ أَوَّلْ أَنَا قَاعِدْ مَعَاكُو.
عمل الروح القُدّوس
5«وَ هَسَّعْ أَنَا نِقَبِّلْ لِلّٰهْ الرَّسَّلَانِي وَ مَا فِي نَادُمْ مِنْكُو يَسْأَلْنِي وَ يُقُولْ: ‹إِنْتَ مَاشِي وَيْن؟› 6إِنْتُو حَزْنَانِينْ بِلْحَيْن أَشَانْ أَنَا حَجَّيْت لَيْكُو بِالْكَلَامْ دَا. 7لَاكِنْ نُقُولْ لَيْكُو الْحَقّ، يَبْقَى لَيْكُو أَخَيْر كَنْ نَمْشِي. كَنْ أَنَا مَا نَمْشِي، الْمُعَاوِنْ مَا يَجِي لَيْكُو. لَاكِنْ كَنْ أَنَا مَشَيْت خَلَاصْ، نِرَسِّلَهْ لَيْكُو. 8وَ وَكِتْ هُو يَجِي، هُو يِعَرِّفْ لِنَاسْ الدُّنْيَا ذُنُوبْهُمْ وَ يِعَرِّفْهُمْ الْحَالْ الصَّالْحَةْ وَ الْحِسَابْ. 9هُو يِعَرِّفْهُمْ الذَّنِبْ أَشَانْ مَا آمَنَوْا بَيِّ. 10هُو يِعَرِّفْهُمْ الْحَالْ الصَّالْحَةْ أَشَانْ أَنَا نَمْشِي لِأَبُويِ وَ مَا تِشِيفُونِي. 11هُو يِعَرِّفْهُمْ الْحِسَابْ أَشَانْ اللّٰهْ حَاسَبْ إِبْلِيسْ سُلْطَانْ الدُّنْيَا خَلَاصْ.
12«عِنْدِي كَلَامْ زِيَادَةْ نِدَوْر نُقُولَهْ لَيْكُو لَاكِنْ هَسَّعْ إِنْتُو مَا تَقْدَرَوْا تَحْمَلَوْه. 13وَكِتْ رُوحْ الْحَقّ يَجِيكُو، هُو يُقُودْكُو فِي الْحَقّ الْكَامِلْ. الْكَلَامْ الْيُقُولَهْ مَا جَايِ مِنَّهْ بَسْ لَاكِنْ هُو يُقُولْ كُلَّ شَيّءْ الْيَسْمَعَهْ وَ يِأَوْرِيكُو بِالشَّيّءْ اللِّسَّاعْ مَا بِقِي. 14هُو يِمَجِّدْنِي يِشِيلْ مِنْ كَلَامِي وَ يِأَوْرِيكُو بَيَّهْ. 15كُلَّ شَيّءْ هَنَا أَبُويِ هَنَايِ. وَ أَشَانْ دَا، قُلْت لَيْكُو هُو يِشِيلْ مِنْ كَلَامِي وَ يِأَوْرِيكُو بَيَّهْ. 16بَعَدْ شِيَّةْ بَسْ، مَا تِشِيفُونِي وَ بَعَدْ شِيَّةْ بَتَّانْ، تِشِيفُونِي.»
الفرْحة قريبة
17وَ وَاحِدِينْ مِنْ تَلَامِيذَهْ حَجَّوْا أَمْبَيْنَاتْهُمْ وَ قَالَوْا: «مَالَا قَالْ: ‹بَعَدْ شِيَّةْ بَسْ، مَا تِشِيفُونِي. وَ بَعَدْ شِيَّةْ بَتَّانْ، تِشِيفُونِي.› وَ مَالَا قَالْ: ‹أَشَانْ نِقَبِّلْ لِأَبُويِ.› شُنُو مَعَنَى الْكَلَامْ دَا؟» 18وَ قَالَوْا: «الْكَلَامْ ‹بَعَدْ شِيَّةْ›، دَا مَعَنَاتَهْ شُنُو؟ مَا فِهِمْنَا كَلَامَهْ.»
19وَ عِيسَى عِرِفْ كَدَرْ دَوَّرَوْا يَسْأَلَوْه. وَ سَأَلَاهُمْ وَ قَالْ: «هَلْ إِنْتُو قَاعِدِينْ تِشَّاوَرَوْا أَمْبَيْنَاتْكُو فِي كَلَامِي وَلَّا؟ هَلْ فِهِمْتُوا كَلَامِي: ‹بَعَدْ شِيَّةْ بَسْ، مَا تِشِيفُونِي وَ بَعَدْ شِيَّةْ بَتَّانْ، تِشِيفُونِي›؟ 20أَسْمَعَوْا نُقُولْ لَيْكُو الْحَقّ، إِنْتُو تَبْكُوا وَ تَحْزَنَوْا وَ نَاسْ الدُّنْيَا يَفْرَحَوْا. صَحِيحْ، إِنْتُو تَحْزَنَوْا لَاكِنْ الْفَرْحَةْ تِبَدِّلْ لَيْكُو الْحِزِنْ.
21«كَنْ مَرَةْ غَلْبَانَةْ وَ وَكْت الْوَالُودَةْ جَاءْ، هِي تَتْعَبْ تَعَبْ شَدِيدْ. وَ وَكِتْ وِلْدَتْ صَغِيرْهَا خَلَاصْ، هِي فَرْحَانَةْ وَ تَنْسَى التَّعَبْ أَشَانْ جَابَتْ نَادُمْ فِي الدُّنْيَا. 22وَ يَبْقَى لَيْكُو مِثِلْ دَا. هَسَّعْ تَتْعَبَوْا لَاكِنْ أَنَا نِقَبِّلْ بَتَّانْ نِشِيفْكُو وَ إِنْتُو تَفْرَحَوْا فَرْحَةْ شَدِيدَةْ وَ مَا فِي نَادُمْ يِشِيلْ مِنْكُو الْفَرْحَةْ دِي.
23«وَ فِي الْيَوْم الْيَجِي دَا، إِنْتُو مَا تَسْأَلَوْنِي شَيّءْ. أَسْمَعَوْا نُقُولْ لَيْكُو الْحَقّ، أَيِّ شَيّءْ التَّسْأَلَوْه مِنْ أَبُويِ بِأُسْمِي، هُو يَنْطِيكُو. 24لَحَدِّي الْيَوْم، إِنْتُو مَا سَأَلْتُوا شَيّءْ مِنْ اللّٰهْ بِأُسْمِي. أَسْأَلَوْه وَ هُو يَنْطِيكُو أَشَانْ تَفْرَحَوْا فَرْحَةْ شَدِيدَةْ.
25«أَنَا حَجَّيْت لَيْكُو بِأَمْثَالْ لَاكِنْ فِي الْوَكِتْ الْيَجِي، مَا نِحَجِّي لَيْكُو بَتَّانْ بِأَمْثَالْ لَاكِنْ نِأَوْرِيكُو بِأَبُويِ بِكَلَامْ وَاضِحْ. 26وَ فِي الْوَكِتْ الْيَجِي، تَسْأَلَوْا اللّٰهْ بِأُسْمِي. أَنَا مَا نُقُولْ كَدَرْ أَنَا نَسْأَلْ أَبُويِ فِي شَانْكُو. 27أَبُويِ ذَاتَهْ يِحِبُّكُو أَشَانْ إِنْتُو حَبَّيْتُونِي وَ آمَنْتُوا كَدَرْ أَنَا جِيتْ مِنْ اللّٰهْ. 28أَنَا جِيتْ مِنْ أَبُويِ وَ دَخَلْت فِي الدُّنْيَا. وَ هَسَّعْ نَمْرُقْ مِنْ الدُّنْيَا وَ نِقَبِّلْ لِأَبُويِ.»
29وَ تَلَامِيذَهْ قَالَوْا: «خَلَاصْ هَسَّعْ دَا حَجَّيْت بِكَلَامْ وَاضِحْ وَ مَا بِأَمْثَالْ. 30هَسَّعْ نَعَرْفُوا إِنْتَ تَعَرِفْ كُلَّ شَيّءْ وَ كَنْ نَادُمْ مَا يَسْأَلَكْ كُلَ، إِنْتَ تَعَرِفْ سُؤَالَهْ. وَ أَشَانْ دَا، أَنِحْنَ نِآمُنُوا كَدَرْ إِنْتَ جِيتْ مِنْ اللّٰهْ.»
31وَ عِيسَى رَدَّ لَيْهُمْ وَ قَالْ: «هَسَّعْ تُقُولُوا آمَنْتُوا وَلَّا؟ 32لَاكِنْ وَكِتْ وَاحِدْ يَجِي وَ هَسَّعْ الْوَكِتْ دَا جَاءْ خَلَاصْ. وَ فِي الْوَكِتْ دَا بَسْ، يِشَتُّتُوكُو أَيِّ وَاحِدْ يَمْشِي لِبَيْتَهْ. إِنْتُو تِخَلُّونِي وِحَيْدِي. لَاكِنْ بِالصَّحِيحْ، أَنَا مَا وِحَيْدِي أَشَانْ أَبُويِ قَاعِدْ مَعَايِ. 33أَنَا قُلْت لَيْكُو كُلَّ الْكَلَامْ دَا، أَشَانْ تَلْقَوْا السَّلَامْ بَيِّ أَنَا. أَكِيدْ، فِي الدُّنْيَا إِنْتُو تَتْعَبَوْا. لَاكِنْ شِدُّوا حَيْلكُو أَشَانْ أَنَا أَنَّصَرْت فِي الدُّنْيَا.»
Currently Selected:
يُوحَنَّا 16: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
