لُوقا 17
17
الإيمان و الواجِبات
1وَ عِيسَى حَجَّى لِتَلَامِيذَهْ وَ قَالْ: «لَابُدَّ أَشْيَاءْ وَاحِدِينْ يَبْقَوْا وَ بِسَبَبْهُمْ نَاسْ وَاحِدِينْ يَمُرْقُوا مِنْ الدَّرِبْ. وَ لَاكِنْ الْعَذَابْ يَرْجَى النَّادُمْ الْيِسَبِّبْ الْأَشْيَاءْ دَوْل. 2أَيْوَى، كَنْ نَادُمْ يِتَلِّفْ إِيمَانْ هَنَا وَاحِدْ مِنْ الْمُؤمِنِينْ الدُّقَاقْ دَوْل، الْعَذَابْ الْيَرْجَاهْ يَبْقَى شَدِيدْ لَحَدِّي أَخَيْر لَيَّهْ كَنْ رَبَطَوْا مُرْحَاكَةْ فِي رَقَبَتَهْ وَ زَقَلَوْه فِي لُبّ الْبَحَرْ. 3أَشَانْ دَا، خُطُّوا بَالْكُو فِي نُفُوسْكُو.
«كَنْ أَخُوكْ خِطِي، أَهَرْجَهْ. وَ كَنْ هُو نِدِمْ فِي الشَّيّءْ السَّوَّاهْ، سَامِحَهْ. 4كَنْ فِي الْيَوْم الْوَاحِدْ هُو يَخْطَا فَوْقَكْ سَبْعَةْ مَرَّاتْ وَ يِقَبِّلْ لَيْك سَبْعَةْ مَرَّاتْ وَ يُقُولْ: ‹أَنَا تُبْت مِنْ الْخَطَا دَا›، وَاجِبْ تِسَامِحَهْ.»
5وَ الرُّسُلْ حَجَّوْا لِلرَّبّ عِيسَى وَ قَالَوْا: «زِيدْ لَيْنَا الْإِيمَانْ.» 6وَ الرَّبّ عِيسَى قَالْ: «كَنْ إِيمَانْكُو صَغَيَّرْ مِثِلْ حَبَّةْ الْكِرَيْب كُلَ، تَقْدَرَوْا تَامُرُوا الشَّدَرَةْ الْكَبِيرَةْ دِي وَ تُقُولُوا: ‹قُمِّي مِنْ هِنِي وَ مَقِّنِي نَفِسْكِ فِي الْبَحَرْ› وَ هِي تَسْمَعْ كَلَامْكُو.
7«أَيِّ نَادُمْ مِنْكُو يِسَوِّي شُنُو كَنْ عِنْدَهْ عَبِدْ الْقَاعِدْ يَحْرِتْ لَيَّهْ وَلَّا يَسْرَحْ؟ وَكِتْ عَبْدَهْ يِقَبِّلْ مِنْ الْكَدَادَةْ، هَلْ سِيدَهْ يُقُولْ: ‹تَعَالْ آكُلْ مَعَايِ›؟ 8لَا، مَا كَيْ. يُقُولْ: ‹غَيَّرْ خَلَقَكْ وَ جَهِّزْ لَيِّ الْعَشَاءْ. وَ أَخْدِمْ لَيِّ لَحَدِّي نَاكُلْ وَ نَشْرَبْ. وَ بَعَدْ دَا بَسْ، إِنْتَ كُلَ تَاكُلْ وَ تَشْرَبْ.› 9هَلْ هُو يَشْكُرْ عَبْدَهْ فِي شَانْ هُو سَوَّى الْخِدْمَةْ الْأَمَرَهْ بَيْهَا وَلَّا؟ لَا. 10وَ نَفْس الشَّيّءْ إِنْتُو كُلَ. وَكِتْ سَوَّيْتُوا كُلَّ شَيّءْ الْاللّٰهْ أَمَرَاكُو بَيَّهْ، وَاجِبْ تُقُولُوا: ‹أَنِحْنَ عَبِيدْ بَسْ وَ مَا سَوَّيْنَا زِيَادَةْ مِنْ الْخِدْمَةْ الْوَاجِبْ نِسَوُّوهَا.›»
الناس العشرة العِنْدُهم جِدام
11وَ وَكِتْ عِيسَى مُسَافِرْ لِمَدِينَةْ الْقُدُسْ، هُو فَاتْ بِالْحُدُودْ الْبَيْن دَارْ السَّامِرَةْ وَ دَارْ الْجَلِيلْ. 12وَ دَخَلْ فِي حِلَّةْ وَاحِدَةْ وَ عَشَرَةْ رُجَالْ الْعِنْدُهُمْ جِدَامْ قَابَلَوْه. وَ هُمَّنْ وَقَفَوْا بَعِيدْ مِنَّهْ شِيَّةْ. 13وَ صَرَخَوْا لَيَّهْ وَ قَالَوْا: «يَا عِيسَى! يَا سَيِّدْنَا! أَرْحَمْنَا.» 14وَ عِيسَى شَافَاهُمْ وَ قَالْ: «أَمْشُوا وَصُّفُوا نُفُوسْكُو لِرَاجِلْ الدِّينْ.»
وَ مَشَوْا. وَ وَكِتْ هُمَّنْ فِي الدَّرِبْ، لِقَوْا الْعَافَيْ وَ بِقَوْا طَاهِرِينْ. 15وَ وَكِتْ وَاحِدْ مِنْهُمْ عِرِفْ كَدَرْ هُو لِقِي الْعَافَيْ، قَبَّلْ لِعِيسَى وَ قَمَّ يَشْكُرْ اللّٰهْ بِحِسّ عَالِي. 16وَ سَجَدْ قِدَّامْ عِيسَى وَ شَكَرَهْ. وَ النَّادُمْ الْقَبَّلْ دَا، هُو سَامِرِي. 17وَ عِيسَى قَالْ: «النَّاسْ اللِّقَوْا الْعَافَيْ مَا عَشَرَةْ وَلَّا؟ وَيْن التِّسْعَةْ؟ 18مَا فِي نَادُمْ آخَرْ الْيِدَوْر يَشْكُرْ اللّٰهْ، إِلَّا الْأَجْنَبِي دَا وَلَّا؟» 19وَ قَالْ لِلسَّامِرِي: «قُمّ فَوْق وَ أَمْشِي فِي دَرْبَكْ. لِقِيتْ الْعَافَيْ بِسَبَبْ إِيمَانَكْ.»
جيّة مملكة اللّه
20وَ يَوْم وَاحِدْ، الْفَرِيزِيِّينْ سَأَلَوْا عِيسَى فِي جَيَّةْ مَمْلَكَةْ اللّٰهْ. وَ هُو رَدَّ لَيْهُمْ وَ قَالْ: «مَمْلَكَةْ اللّٰهْ مَا تَجِي بِعَلَامَاتْ التِّشِيفُوهُمْ. 21وَ النَّاسْ مَا يُقُولُوا: ‹شِيفُوا، هِي قَمَّتْ هِنِي› وَلَّا ‹هِي هِنَاكْ›. نُقُولْ لَيْكُو مَمْلَكَةْ اللّٰهْ قَاعِدَةْ أَمْبَيْنَاتْكُو خَلَاصْ.»
22وَ عِيسَى حَجَّى لِتَلَامِيذَهْ وَ قَالْ: «يَجِي وَكِتْ تَبْقَوْا قَرْمَانِينْ لِتِشِيفُوا يَوْم وَاحِدْ مِنْ أَيَّامْ إِبْن الْإِنْسَانْ وَ لَاكِنْ مَا تِشِيفُوهْ. 23وَ يُقُولُوا لَيْكُو: ‹شِيفُوا هُو هِنِي› وَلَّا ‹شِيفُوا هُو هِنَاكْ› لَاكِنْ مَا تَمْشُوا مَعَاهُمْ. مَا تِتَابُعُوهُمْ. 24أَكِيدْ الْبَرَّاقَةْ تَبْرُقْ فِي السَّمَاءْ مِنْ النُّصّ الْوَاحِدْ وَ تِنْشَافْ لَحَدِّي فِي النُّصّ الْآخَرْ وَ جَيَّةْ إِبْن الْإِنْسَانْ كُلَ تَبْقَى مِثِلْ دَا وَكِتْ يِقَبِّلْ. 25لَاكِنْ أَوَّلْ مُقَدَّرْ لِإِبْن الْإِنْسَانْ يَتْعَبْ تَعَبْ شَدِيدْ وَ النَّاسْ الْفِي وَكِتْنَا دَا يَابَوْه.
26«وَ حَالَةْ النَّاسْ فِي يَوْم جَيَّةْ إِبْن الْإِنْسَانْ تَبْقَى سَوَا سَوَا مِثِلْ حَالَةْ النَّاسْ فِي زَمَنْ نُوحْ. 27هُمَّنْ قَاعِدِينْ يَاكُلُوا وَ يَشَرْبَوْا وَ الرُّجَالْ يَاخُدُوا عَوِينْ وَ الْعَوِينْ يَاخُدَنْ رُجَالْ لَحَدِّي الْيَوْم النُّوحْ دَخَلْ فِي السَّفِينَةْ.#17:27 نُوحْ دَخَلْ فِي السَّفِينَةْ: التاريخ دا تلقوه في تكوين 6–7. وَ خَلَاصْ الْأَلْمِي جَاءْ وَ أَكَلْ كُلَّ النَّاسْ.
28«وَ بِقِي مِثِلْ دَا فِي زَمَنْ لُوطْ كُلَ. النَّاسْ قَاعِدِينْ يَاكُلُوا وَ يَشَرْبَوْا وَ يِبِيعُوا وَ يَشْرُوا وَ يِمَقُّنُوا شَدَرْ وَ يَبْنُوا بُيُوتْ. 29لَاكِنْ يَوْم اللُّوطْ مَرَقْ مِنْ حِلَّةْ سَدُومْ، اللّٰهْ نَزَّلْ فَوْقهُمْ نَارْ وَ كِبْرِيتْ وَ دَمَّرَاهُمْ مَرَّةْ وَاحِدْ.#17:29 اللّٰهْ نَزَّلْ نَارْ فِي سَدُومْ: التاريخ دا تلقوه في تكوين 19. 30وَ يَبْقَى مِثِلْ دَا وَكِتْ اللّٰهْ يِبَيِّنْ إِبْن الْإِنْسَانْ.
31«فِي الْيَوْم دَا، أَيِّ نَادُمْ الْقَاعِدْ يِنْجَمَّ فِي رَاسْ بَيْتَهْ وَ خُمَامَهْ دَاخَلْ فِي الْبَيْت، خَلِّي يَجْرِي، مَا يِدَلِّي يِشِيلَهْ. وَ بَتَّانْ أَيِّ نَادُمْ الْيَخْدِمْ فِي الزَّرَعْ، خَلِّي يَجْرِي، مَا يِقَبِّلْ بَيْتَهْ. 32فَكُّرُوا فِي مَرِةْ لُوطْ.#17:32 مَرِةْ لُوطْ: هي جرت من دمار حِلّة سَدُوم و لاكن شقْلبت لتِشيف الحِلّة و طوّالي يبْست بِقت مِلِح. التاريخ دا تلقوه في تكوين 19:26. 33أَيِّ نَادُمْ الْيِفَتِّشْ يِنَجِّي نَفْسَهْ، يِوَدِّرْهَا. لَاكِنْ النَّادُمْ الْمَا يِفَكِّرْ فِي نَفْسَهْ، يَنْجَى. 34نُقُولْ لَيْكُو كَدَرْ فِي اللَّيْلَةْ دِيكْ، فِي نَاسَيْن فِي سَرِيرْ وَاحِدْ، الْوَاحِدْ يِنْرَفِعْ وَ الْآخَرْ مَا يِنْرَفِعْ. 35وَ فِي عَوِينْ إِتْنَيْن قَاعِدَاتْ سَوَا يَرْحَكَنْ غَلَّةْ، الْوَاحِدَةْ تِنْرَفِعْ وَ الْآخَرَةْ مَا تِنْرَفِعْ. 36وَ فِي رُجَالْ إِتْنَيْن قَاعِدِينْ يَخْدُمُوا فِي نَفْس الزَّرَعْ، الْوَاحِدْ يِنْرَفِعْ وَ الْآخَرْ مَا يِنْرَفِعْ.»
37وَ تَلَامِيذَهْ سَأَلَوْه وَ قَالَوْا: «يَا سَيِّدْنَا، دَا يَبْقَى وَيْن؟» وَ رَدَّ لَيْهُمْ وَ قَالْ: «الرِّمَّةْ تِنَادِي الصُّقُورَةْ.»
Currently Selected:
لُوقا 17: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
