لُوقا 19
19
المسيح و زَكَّا
1وَ عِيسَى دَخَلْ فِي حِلَّةْ أَرِيحَا وَ قَاعِدْ يُشُقَّهَا. 2وَ فِي نَادُمْ وَاحِدْ أُسْمَهْ زَكَّا. وَ هُو كَبِيرْ هَنَا نَاسْ الْجَمَارِكْ وَ هُو غَنِيْ بِلْحَيْن. 3وَ هُو دَوَّرْ يِشِيفْ عِيسَى لَاكِنْ مَا قِدِرْ أَشَانْ عِيسَى قَاعِدْ فِي أُسُطْ نَاسْ كَتِيرِينْ وَ زَكَّا نَادُمْ قِصَيِّرْ. 4وَ أَشَانْ دَا، هُو جَرَى قِدَّامْ فِي الدَّرِبْ الْعِيسَى مَاشِي فَوْقَهْ وَ رِكِبْ فَوْق فِي جِمَّيْزَايْ أَشَانْ يِشِيفْ عِيسَى وَكِتْ هُو يَلْحَقْ الْبَكَانْ دَا. 5وَ عِيسَى جَاءْ فِي الْبَكَانْ دَا وَ رَفَعْ رَاسَهْ وَ حَجَّى لِزَكَّا وَ قَالْ: «يَا زَكَّا، يَلَّا عَجَلَةْ دَلِّي تِحِتْ. الْيَوْم وَاجِبْ نِضَّيَّفْ فِي بَيْتَكْ.»
6وَ عَجَلَةْ كَيْ هُو دَلَّى وَ فَضَّلَهْ لِعِيسَى فِي بَيْتَهْ بِفَرَحْ. 7وَ كُلَّ النَّاسْ الشَّافَوْا الشَّيّءْ الْبِقِي دَا، بِقَوْا زَعْلَانِينْ وَ حَجَّوْا أَمْبَيْنَاتْهُمْ وَ قَالَوْا: «هَايْ! هُو مَشَى بِقِي ضَيْف هَنَا نَادُمْ مُذْنِبْ.»
8وَ زَكَّا قَمَّ فَوْق وَ قَالْ لِلرَّبّ عِيسَى: «يَا سَيِّدْنَا، نَنْطِي نُصّ مَالِي لِلْمَسَاكِينْ. وَ كَنْ شِلْت شَيّءْ مِنْ أَيِّ نَادُمْ بِظُلُمْ، نِقَبِّلَهْ لَيَّهْ أَرْبَعَةْ مَرَّاتْ.» 9وَ عِيسَى رَدَّ وَ قَالْ: «خَلَاصْ، الْيَوْم النَّجَاةْ جَاتْ فِي الْبَيْت دَا أَشَانْ زَكَّا كُلَ مِنْ عِيَالْ إِبْرَاهِيمْ. 10وَ أَنَا إِبْن الْإِنْسَانْ جِيتْ أَشَانْ نِفَتِّشْ الْمُوَدِّرِينْ وَ نِنَجِّيهُمْ.»
مَثَل الملك و خدّامينه
11وَ النَّاسْ قَاعِدِينْ يَسْمَعَوْا كَلَامْ عِيسَى. وَ فِي فِكِرْهُمْ، مَمْلَكَةْ اللّٰهْ تِدَوْر تِبِينْ عَجَلَةْ أَشَانْ هُو قَرِيبْ يَلْحَقْ مَدِينَةْ الْقُدُسْ. وَ أَشَانْ دَا، هُو حَجَّى لَيْهُمْ بِمَثَلْ. 12وَ قَالْ: «يَوْم مِنْ الْأَيَّامْ، فِي نَادُمْ وَاحِدْ مِنْ عِيَالْ الْمُلُوكْ سَافَرْ فِي بَكَانْ بَعِيدْ أَشَانْ هِنَاكْ يِدَرُّجُوهْ مَلِكْ وَ يِقَبِّلْ يَحْكِمْ بَلَدَهْ. 13وَ قُبَّالْ مَا يِسَافِرْ، هُو نَادَى عَشَرَةْ مِنْ عَبِيدَهْ وَ أَنْطَى لِأَيِّ وَاحِدْ جِنَيْه هَنَا دَهَبْ. وَ قَالْ لَيْهُمْ: ‹تَاجُرُوا بَيَّهْ لَحَدِّي نِقَبِّلْ.› 14وَ شَعَبْ بَلَدَهْ كِرْهَوْه وَ رَسَّلَوْا وَرَايَهْ مُمَثِّلِينْ أَشَانْ يُقُولُوا: ‹مَا نِدَوْرُوا النَّادُمْ دَا يَبْقَى فَوْقنَا مَلِكْ.›
15«وَ بَعَدْ دَرَّجَوْه مَلِكْ، قَبَّلْ بَلَدَهْ وَ نَادَى عَبِيدَهْ الْأَنْطَاهُمْ الْقُرُسْ أَشَانْ يَجُوا لَيَّهْ. وَ دَوَّرْ يَعَرِفْ كَمْ رِبْحَوْا لَيَّهْ فِي التِّجَارَةْ. 16وَ الْأَوَّلْ جَاءْ قِدَّامَهْ وَ قَالْ: ‹يَا الْمَلِكْ، الْجِنَيْه الْأَنْطَيْتَهْ لَيِّ، أَنَا كِسِبْت بَيَّهْ 10 جِنَيْه.› 17وَ الْمَلِكْ قَالْ لَيَّهْ: ‹دَا سَمَحْ. إِنْتَ عَبِدْ عَدِيلْ. أَوَّلْ أَنَا أَنْطَيْتَكْ مَسْؤُولِيَّةْ شِيَّةْ وَ إِنْتَ بِقِيتْ أَمِينْ. وَ أَشَانْ دَا، نَنْطِيكْ مَسْؤُولِيَّةْ فِي 10 حِلَّةْ.›
18«وَ الْعَبِدْ التَّانِي جَاءْ لَيَّهْ وَ قَالْ: ‹يَا الْمَلِكْ، الْجِنَيْه الْأَنْطَيْتَهْ لَيِّ، أَنَا كِسِبْت بَيَّهْ 5 جِنَيْه.› 19وَ الْمَلِكْ قَالْ: ‹نُخُطَّكْ فِي 5 حِلَّةْ.›
20«وَ عَبِدْ آخَرْ جَاءْ وَ قَالْ: ‹يَا الْمَلِكْ، دَاهُو جِنَيْه هَنَاكْ. أَنَا حَفَضْتَهْ وَ لَبَّدْتَهْ فِي مِنْدِيلْ. 21أَنَا خُفْت مِنَّكْ أَشَانْ إِنْتَ نَادُمْ قَوِي. إِنْتَ تِشِيلْ الْخُمَامْ النَّادُمْ آخَرْ خَطَّاهْ وَ تَقْطَعْ الْغَلَّةْ الْمَا تَيْرَبْتَهَا.› 22وَ الْمَلِكْ قَالْ لَيَّهْ: ‹نِحَاسِبَكْ حَسَبْ الْكَلَامْ الْإِنْتَ قُلْتَهْ. إِنْتَ عَبِدْ فَسِلْ. عِرِفْت كَدَرْ أَنَا نَادُمْ قَوِي وَ نِشِيلْ الْخُمَامْ النَّادُمْ آخَرْ خَطَّاهْ وَ نَقْطَعْ الْغَلَّةْ الْمَا تَيْرَبْتَهَا. 23وَ كَنْ أَنَا مِثِلْ دَا، مَالَا مَا خَطَّيْت قُرْسِي فِي الْبَنْكِ؟ وَ مِثِلْ دَا، وَكِتْ نِقَبِّلْ فِي الْبَلَدْ نِشِيلَهْ بِفَايْدِتَهْ.›
24«وَ قَالْ لِلنَّاسْ الْمَعَايَهْ: ‹شِيلُوا مِنَّهْ الْجِنَيْه وَ أَنْطُوهْ لِلْعَبِدْ الْعِنْدَهْ 10.› 25وَ قَالَوْا لَيَّهْ: ‹يَا الْمَلِكْ، هُو عِنْدَهْ 10 خَلَاصْ!› 26وَ الْمَلِكْ قَالْ: ‹نُقُولْ لَيْكُو يَنْطُوا لِلنَّادُمْ الْعِنْدَهْ. وَ لَاكِنْ النَّادُمْ الْمَا عِنْدَهْ، الشِّيَّةْ الْعِنْدَهْ كُلَ يِشِيلُوهْ مِنَّهْ. 27وَ خَلَاصْ، وَيْن عُدْوَانِي دَوْل الْمَا دَوَّرَوْا أَنَا نَبْقَى فَوْقهُمْ مَلِكْ؟ جِيبُوهُمْ هِنِي وَ أَكْتُلُوهُمْ قِدَّامِي!›»
28وَ وَكِتْ عِيسَى كَمَّلْ الْكَلَامْ دَا، هُو مَشَى قِدَّامْ فِي دَرِبْ مَدِينَةْ الْقُدُسْ.
دخول المسيح في المدينة
29وَ عِيسَى قَرَّبْ لِحِلَّالْ بَيْت فَاجِي وَ بَيْت عَنْيَا فِي الْبَكَانْ الْأُسْمَهْ جَبَلْ الزَّيْتُونْ. وَ عِيسَى رَسَّلْ قِدَّامَهْ تَلَامِيذ إِتْنَيْن. 30وَ قَالْ لَيْهُمْ: «أَمْشُوا فِي الْحِلَّةْ الْقِدَّامْنَا دِي. وَ فِي خَشُمْ الْحِلَّةْ تَلْقَوْا دَحَشْ مَرْبُوطْ. وَ نَادُمْ لِسَّاعْ مَا رِكِبْ فَوْقَهْ. حِلُّوهْ وَ جِيبُوهْ لَيِّ هِنِي. 31وَ كَنْ نَادُمْ يَسْأَلْكُو وَ يُقُولْ: ‹مَالَا تِحِلُّوا الدَّحَشْ؟› قُولُوا لَيَّهْ: ‹الرَّبّ يِدَوْرَهْ.›»
32وَ التَّلَامِيذ الرَّسَّلَوْهُمْ مَشَوْا لِقَوْا الدَّحَشْ مِثِلْ هُو أَوْرَاهُمْ بَيَّهْ. 33وَ وَكِتْ قَاعِدِينْ يِحِلُّوهْ، سِيَادَهْ سَأَلَوْهُمْ وَ قَالَوْا: «مَالَا تِحِلُّوا الدَّحَشْ؟» 34وَ رَدَّوْا لَيْهُمْ وَ قَالَوْا: «الرَّبّ يِدَوْرَهْ.» 35وَ جَابَوْه لِعِيسَى. وَ فَرَّشَوْا خُلْقَانْهُمْ فِي الدَّحَشْ وَ رَكَّبَوْا عِيسَى فَوْقَهْ.
36وَ خَلَاصْ هُو قَمَّ مَاشِي رَاكِبْ فِي الدَّحَشْ وَ النَّاسْ فَرَّشَوْا خُلْقَانْهُمْ فِي الدَّرِبْ قِدَّامَهْ. 37وَ قَرَّبْ لِلْمَدِينَةْ بِالدَّرِبْ النَّازِلْ مِنْ جَبَلْ الزَّيْتُونْ وَ كُلَّ تَلَامِيذَهْ بَدَوْا يَفْرَحَوْا وَ يَشْكُرُوا اللّٰهْ بِحِسّ عَالِي فِي شَانْ كُلَّ الْعَجَايِبْ الْكُبَارْ الشَّافَوْهُمْ. 38وَ قَالَوْا:
«<مَبْرُوكْ لِلْمَلِكْ
الْجَايِ بِأُسُمْ اللّٰهْ!>#19:38 الكلام دا تلقوه في زَبُور 118:26.
سَلَامْ فِي السَّمَاءْ
وَ مَجُّدُوا اللّٰهْ فِي الْعَالِي!»
39وَ فَرِيزِيِّينْ وَاحِدِينْ فِي أُسْط النَّاسْ حَجَّوْا لَيَّهْ وَ قَالَوْا: «يَا السَّيِّدْ، سَكِّتْ تَلَامِيذَكْ!» 40وَ عِيسَى رَدَّ لَيْهُمْ وَ قَالْ: «نُقُولْ لَيْكُو كَنْ النَّاسْ دَوْل سَكَتَوْا كُلَ، الْحُجَارْ يِعِيطُوا بِنَفْس الْكَلَامْ.»
عِيسَى حِزِن لمدينة القدس
41وَ عِيسَى قَرَّبْ لِلْمَدِينَةْ وَ شَافَاهَا وَ بَكَى فِي شَانْهَا. 42وَ قَالْ: «أَنَا نِتْمَنَّى الْيَوْم إِنْتِ تَعَرْفِي الشَّيّءْ الْيِجِيبْ لَيْكِ السَّلَامْ لَاكِنْ لَحَدِّي هَسَّعْ، مَا فِهِمْتِيهْ. 43وَكِتْ وَاحِدْ يَجِي لَيْكِ وَ عَسْكَرْ عَدُوكِ يَجُوا وَ يَنْكُتُوا خَنَادِقْهُمْ وَ يِحَوُّقُوكِ وَ يِسِدُّوا كُلَّ دُرُوبْكِ. 44وَ يِدَمُّرُوكِ مَعَ نَاسْكِ الْفِي لُبِّكِ. وَ مَا يِخَلُّوا حَجَرْ يَقْعُدْ فَوْق حَجَرْ. وَ دَا يَبْقَى أَشَانْ إِنْتِ مَا عِرِفْتِ الْوَكِتْ الْاللّٰهْ جَاءْ فَوْقَهْ لِيِنَجِّيكِ.»
المسيح طرد التُجّار
45وَ عِيسَى دَخَلْ فِي فَضَايَةْ بَيْت اللّٰهْ وَ قَمَّ يَطْرُدْ مِنْهَا التُّجَّارْ الْيِسَاوُقُوا فَوْقهَا. 46وَ قَالْ لَيْهُمْ: «اللّٰهْ قَالْ فِي الْكِتَابْ: <بَيْتِي يِسَمُّوهْ بَيْت الصَّلَاةْ.>#19:46 الكلام دا تلقوه في إشَعْيا 56:7. وَ لَاكِنْ إِنْتُو <سَوَّيْتُوهْ بَيْت السَّرَارِيقْ!>»#19:46 الكلام دا تلقوه في إرْمِيا 7:11.
47وَ كُلَّ يَوْم عِيسَى يِعَلِّمْ النَّاسْ فِي فَضَايَةْ بَيْت اللّٰهْ. وَ كُبَارَاتْ رُجَالْ الدِّينْ وَ الْعُلَمَاءْ وَ كُبَارَاتْ النَّاسْ دَوَّرَوْا فُرْصَةْ أَشَانْ يَكْتُلُوهْ. 48لَاكِنْ فُرْصَةْ مَا لِقَوْهَا أَشَانْ كُلَّ الشَّعَبْ قَاعِدِينْ مَعَايَهْ وَ يَسْمَعَوْا كَلَامَهْ بِنِيَّةْ وَاحِدَةْ.
Currently Selected:
لُوقا 19: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
