لُوقا 21
21
الأرْملة المِسْكينة
1وَ عِيسَى رَفَعْ رَاسَهْ وَ شَافْ سِيَادْ الْمَالْ الْقَاعِدِينْ يُصُبُّوا قُرُسْ فِي صَنْدُوقْ بَيْت اللّٰهْ. 2وَ شَافْ أَرْمَلَةْ وَاحِدَةْ مِسْكِينَةْ. وَ هِي خَطَّتْ فِي الصَّنْدُوقْ رِيَالَيْن بَسْ. 3وَ عِيسَى قَالْ: «نُقُولْ لَيْكُو الْحَقّ، الْأَرْمَلَةْ الْمِسْكِينَةْ دِي خَطَّتْ فِي الصَّنْدُوقْ زِيَادَةْ مِنْ كُلَّ النَّاسْ الْآخَرِينْ دَوْل. 4أَشَانْ كُلُّهُمْ أَنْطَوْا لِلّٰهْ الزَّايِدْ مِنْ مَالْهُمْ لَاكِنْ هِي مِسْكِينَةْ وَ أَنْطَتْ كُلَّ شَيّءْ التِّعِيشْ بَيَّهْ.»
علامات كُمالة الدُنْيا
5وَ نَاسْ وَاحِدِينْ قَاعِدِينْ يِحَجُّوا بِسَمَاحْ هَنَا بَيْت اللّٰهْ وَ حُجَارَهْ السَّمْحِينْ وَ كُلَّ شَيّءْ النَّاسْ أَنْطَوْه لِلْبُنَى. وَ عِيسَى قَالْ: 6«كُلَّ الْبُيُوتْ التِّشِيفُوهُمْ دَوْل، يَجِي وَكِتْ وَاحِدْ مَا يِخَلُّوا حَجَرْ يَقْعُدْ فَوْق حَجَرْ. يَرْمُوهُمْ كُلُّهُمْ.»
7وَ سَأَلَوْه وَ قَالَوْا: «يَا سَيِّدْنَا، دَا يَبْقَى مَتَى؟ وَ شُنُو الْعَلَامَةْ التِّوَصِّفْنَا كَدَرْ دَا قَرِيبْ؟» 8وَ قَالْ لَيْهُمْ: «خُطُّوا بَالْكُو وَ مَا تِخَلُّوا نَادُمْ يُغُشُّكُو. أَشَانْ نَاسْ كَتِيرِينْ يَجُوا بِأُسْمِي وَ يِحَجُّوا بِنُفُوسْهُمْ وَ يُقُولُوا: ‹أَنَا بَسْ الْمَسِيحْ!› وَلَّا بُقُولُوا: ‹الْوَكِتْ تَمَّ!› النَّاسْ دَوْل، مَا تِتَابُعُوهُمْ. 9وَ وَكِتْ تَسْمَعَوْا خَبَرْ هَنَا حُرُوبْ وَ تَمَرُّدْ، مَا تَخَافَوْا أَشَانْ دَا وَاجِبْ يُكُونْ قُبَّالْ. لَاكِنْ الْكُمَالَةْ مَا تَجِي عَجَلَةْ.»
10وَ قَالْ لَيْهُمْ: «نَاسْ هَنَا بَلَدْ وَاحِدَةْ يَهْجُمُوا نَاسْ هَنَا بَلَدْ آخَرَةْ وَ مَمْلَكَةْ تَهْجِمْ مَمْلَكَةْ آخَرَةْ. 11وَ فِي دِيَارْ كَتِيرِينْ يُكُونْ زِلْزَالْ وَ فِي آخَرِينْ جُوعْ شَدِيدْ وَ وَبَاءْ. وَ عَلَامَاتْ كُبَارْ يِنْشَافَوْا فِي السَّمَاءْ الْيِخَوُّفُوا النَّاسْ مَرَّةْ وَاحِدْ.
12«وَ لَاكِنْ قُبَّالْ الْأَشْيَاءْ دَوْل مَا يَبْقَوْا، إِنْتُو يَكُرْبُوكُو وَ يِعَذُّبُوكُو. وَ يِسَلُّمُوكُو لِمَسَائِيلْ بُيُوتْ الصَّلَاةْ وَ يَزْقُلُوكُو فِي السِّجِنْ. يِوَدُّوكُو بَكَانْ الْمُلُوكْ وَ الْحُكَّامْ فِي شَانْ إِنْتُو نَاسِي. 13وَ بَيْدَا تَلْقَوْا فُرْصَةْ لِتَشْهَدَوْا لَيِّ. 14أَشَانْ دَا، ثَبُّتُوا أَفْكَارْكُو أَشَانْ مَا تِهِمُّوا فِي كِكَّيْف تُرُدُّوا لَيْهُمْ. 15أَشَانْ أَنَا نَنْطِيكُو الْكَلَامْ وَ الْفِكِرْ الْوَاجِبْ. وَ النَّاسْ الْيِآذُوكُو مَا يَقْدَرَوْا يَحْمَلَوْا كَلَامْكُو وَلَّا يُرُدُّوا لَيْكُو. 16وَ الْيِسَلُّمُوكُو لِلْكُبَارَاتْ هُمَّنْ وَالْدَيْنكُو وَ أَخْوَانْكُو وَ مِنْ قَبِيلِتْكُو وَ رُفْقَانْكُو. وَ وَاحِدِينْ مِنْكُو يَكْتُلُوهُمْ. 17وَ فِي شَانْ أُسْمِي، كُلَّ النَّاسْ يَكْرَهَوْكُو. 18لَاكِنْ صُوفَايْ وَاحِدَةْ مِنْ رَاسْكُو مَا تِوَدِّرْ. 19أَقْعُدُوا ثَابْتِينْ فِي التَّعَبْ دَا وَ مِثِلْ دَا تِنَجُّوا نُفُوسْكُو.
20«وَ يَوْم وَاحِدْ، عَسْكَرْ كَتِيرِينْ يَجُوا يِحَوُّقُوا مَدِينَةْ الْقُدُسْ. وَ وَكِتْ تِشِيفُوهُمْ، تَعَرْفُوا كَدَرْ خَرَابْهَا قَرِيبْ. 21وَ فِي الْبَكَانْ دَا، خَلِّي النَّاسْ الْقَاعِدِينْ فِي دَارْ الْيَهُودِيَّةْ يِعَرُّدُوا فِي الْحُجَارْ. وَ خَلِّي النَّاسْ الْفِي الْمَدِينَةْ يَمُرْقُوا مِنْهَا وَ خَلِّي النَّاسْ الْفِي الْكَدَادَةْ مَا يَدْخُلُوا فِي الْمَدِينَةْ. 22أَشَانْ فِي الْوَكِتْ دَا، اللّٰهْ يِعَاقِبْ شَعَبَهْ وَ كُلَّ الْكَلَامْ الْأَوَّلْ الْأَنْبِيَاء كَتَبَوْه فَوْقهُمْ يِتِمّ. 23وَ يَبْقَى قَاسِي بِلْحَيْن لِلْعَوِينْ الْغَلْبَانَاتْ وَ الْيِرَضِّعَنْ. وَ الضِّيقَةْ تَبْقَى شَدِيدَةْ فِي كُلَّ الْبَلَدْ دِي أَشَانْ غَضَبْ اللّٰهْ يَنْزِلْ فِي الشَّعَبْ دَا. 24يُمُوتُوا بِالْسَّيْف وَ يِوَدُّوهُمْ مَسَاجِينْ فِي أُسْط كُلَّ الْأُمَمْ. وَ نَاسْ الْأُمَمْ يَمُلْكُوا مَدِينَةْ الْقُدُسْ وَ يِفَجُّقُوهَا لَحَدِّي وَكِتْهُمْ يِكَمِّلْ.
جيّة المسيح التانية
25«وَ النَّاسْ يِشِيفُوا عَلَامَاتْ فِي الْحَرَّايْ وَ الْقَمَرْ وَ النُّجُومْ. وَ فِي الْأَرْض، الْأُمَمْ يِبَرْجُلُوا وَ يَخَافَوْا مِنْ حِسّ الْبَحَرْ وَ حَرَكَتَهْ. 26وَ النَّاسْ يَقَعَوْا مِنْ الْخَوْف وَ يَخَافَوْا مِنْ الشَّيّءْ الْجَايِ فِي الدُّنْيَا أَشَانْ قُوَّاتْ السَّمَاوَاتْ ذَاتْهُمْ يِنْهَزَّوْا. 27وَ فِي الْوَكِتْ دَاكْ، يِشِيفُوا إِبْن الْإِنْسَانْ جَايِ فِي سَحَابْ السَّمَاءْ بِقُدْرَةْ عَظِيمَةْ وَ مَجِيدَةْ.#21:27 الكلام دا تلقوه في دَنْيال 7:13. 28وَ وَكِتْ الْأَشْيَاءْ دَوْل يَبْدَوْا، شِدُّوا حَيْلكُو وَ أَرْفَعَوْا رُوسَيْكُو فَوْق أَشَانْ يَوْم نَجَاتْكُو قَرَّبْ.»
علامة شدرة التين
29وَ عِيسَى حَجَّى لَيْهُمْ بِمَثَلْ وَ قَالْ: «فَكُّرُوا فِي شَدَرْ التِّينْ وَ فِي كُلَّ الشَّدَرْ. 30وَكِتْ الشَّدَرْ يِسَوِّي وَرَقْ، تِشِيفُوهْ وَ تَعَرْفُوا الْوَكِتْ الْيَلْدَ فَوْقَهْ قَرَّبْ خَلَاصْ. 31وَ سَوَا سَوَا مِثِلْ دَا، أَعَرْفُوا كَدَرْ مَمْلَكَةْ اللّٰهْ قَرَّبَتْ وَكِتْ تِشِيفُوا الْعَلَامَاتْ الْأَوْرَيْتكُو بَيْهُمْ دَوْل. 32وَ نُقُولْ لَيْكُو الْحَقّ، نَاسْ هَنَا الْوَكِتْ دَا مَا يِكَمُّلُوا قُبَّالْ كُلَّ الْكَلَامْ دَا مَا يِتِمّ. 33السَّمَاءْ وَ الْأَرْض يَبْقَوْا مَا فِيهُمْ وَ لَاكِنْ كَلَامِي يَقْعُدْ دَايْماً.
34«خُطُّوا بَالْكُو فِي نُفُوسْكُو. أَشَانْ كَنْ تِخَلُّوا قُلُوبْكُو يِنْشَغْلُوا بِالسَّفَاهَةْ وَ السَّكَرْ وَ كَنْ تِنْشَغْلُوا بِهُمُومْ الدُّنْيَا، الْيَوْم دَا يَجِي فَجْأَةً 35وَ يَبْقَى لَيْكُو مِثِلْ شَرَكْ. أَكِيدْ، الْيَوْم دَا يَجِي فِي كُلَّ النَّاسْ الْفِي كُلَّ الْأَرْض. 36أَبْقَوْا دَايْماً وَاعِيِّينْ وَ أَسْأَلَوْا قُدْرَةْ مِنْ اللّٰهْ أَشَانْ تَنْجَوْا مِنْ كُلَّ الْأَشْيَاءْ الْيَبْقَوْا دَوْل وَ فِي الأَخِيرْ تَقِيفُوا قِدَّامْ إِبْن الْإِنْسَانْ.»
37وَ كُلَّ يَوْم، عِيسَى قَاعِدْ يِعَلِّمْ النَّاسْ فِي بَيْت اللّٰهْ. وَ فِي الْمَغْرِبْ، هُو مَرَقْ مِنْ الْمَدِينَةْ وَ رَقَدْ فِي الْبَكَانْ الْأُسْمَهْ جَبَلْ الزَّيْتُونْ. 38وَ كُلَّ يَوْم، النَّاسْ يِبَكُّرُوا وَ يَمْشُوا فِي بَيْت اللّٰهْ أَشَانْ يَسْمَعَوْا كَلَامَهْ.
Currently Selected:
لُوقا 21: ع.د.ت19
Highlight
Share
Copy
Want to have your highlights saved across all your devices? Sign up or sign in
La Bible en arabe tchadien © Alliance biblique du Tchad, 2019
