لُوقا 7

إيمان هنا كبير العسْكر

1وَ بَعَدْ عِيسَى قَالْ كُلَّ الْكَلَامْ دَا لِلنَّاسْ، هُو مَشَى فِي حِلَّةْ كَفَرْ نَاحُومْ. 2وَ فِي نَادُمْ أَجْنَبِي هِنَاكْ وَ هُو كَبِيرْ عَسْكَرْ الرَّوْمَانِيِّينْ وَ هُو عِنْدَهْ عَبِدْ وَاحِدْ مَرْضَانْ قَرِيبْ يُمُوتْ. وَ كَبِيرْ الْعَسْكَرْ يِرِيدَهْ لِعَبْدَهْ بِلْحَيْن. 3وَ وَكِتْ سِمِعْ خَبَرْ هَنَا عِيسَى، هُو رَسَّلْ لَيَّهْ نَاسْ مِنْ شُيُوخْ الْيَهُودْ أَشَانْ يَطُلْبُوا مِنَّهْ يَجِي يَشْفِي عَبْدَهْ. 4وَ مَشَوْا لِعِيسَى وَ شَحَدَوْه بِلْحَيْن وَ قَالَوْا: «الْأَجْنَبِي دَا، عِنْدَهْ حَقّ تِسَوِّي لَيَّهْ الشَّيّءْ الطَّلَبَهْ مِنَّكْ. 5أَشَانْ هُو يِحِبّ شَعَبْنَا وَ بَنَى لَيْنَا بَيْت الصَّلَاةْ.»

6وَ عِيسَى مَشَى مَعَاهُمْ. وَ وَكِتْ هُو قَرَّبْ لِلْبَيْت، الْعَسْكَرِي رَسَّلْ لَيَّهْ رُفْقَانَهْ أَشَانْ يِحَجُّوا لَيَّهْ. وَ قَالَوْا: «يَا سَيِّدْنَا، أَنْجَمَّ مَا تِتَعِّبْ نَفْسَكْ. أَنَا مَا عِنْدِي حَقّ لِتَدْخُلْ فِي بَيْتِي. 7أَشَانْ دَا بَسْ، أَنَا ذَاتِي خِجِلْت وَ مَا مَشَيْت لَيْك. وَ لَاكِنْ قُولْ كِلْمَةْ وَاحِدَةْ بَسْ وَ خَدَّامِي يَلْقَى الْعَافَيْ. 8أَشَانْ أَنَا كُلَ عِنْدِي كَبِيرْ مِنْ فَوْق لَيِّ النِّطَبِّقْ أَمْرَهْ. وَ أَنَا كُلَ مَسْؤُولْ فِي نَاسْ التِّحِتْ مِنِّي الْيِطَبُّقُوا أَمْرِي. وَ كَنْ نُقُولْ لِوَاحِدْ ‹أَمْشِي›، هُو يَمْشِي. وَ كَنْ نُقُولْ لِنَادُمْ آخَرْ ‹تَعَالْ›، هُو يَجِي. وَ كَنْ نُقُولْ لِعَبْدِي ‹سَوِّي كَيْ›، هُو يِسَوِّيهْ.»

9وَ وَكِتْ عِيسَى سِمِعْ كَلَامَهْ، هُو أَلْعَجَّبْ بِلْحَيْن وَ أَنْلَفَتْ لِلنَّاسْ الْجَايِينْ وَرَايَهْ وَ قَالْ: «نُقُولْ لَيْكُو مَا لِقِيتْ نَادُمْ وَاحِدْ مِنْ بَنِي إِسْرَائِيلْ الْعِنْدَهْ إِيمَانْ شَدِيدْ مِثِلْ إِيمَانْ النَّادُمْ دَا!»

10وَ خَلَاصْ وَكِتْ الْمُرَسَّلِينْ قَبَّلَوْا فِي الْبَيْت، شَافَوْا الْعَبِدْ لِقِي الْعَافَيْ.

المسيح قوّم صبي ميِّت

11وَ بَعَدَيْن عِيسَى مَشَى لِحِلَّةْ وَاحِدَةْ أُسُمْهَا نَايِنْ. وَ تَلَامِيذَهْ مَعَايَهْ وَ نَاسْ كَتِيرِينْ مَاشِينْ وَرَايَهْ. 12وَ وَكِتْ قَرَّبْ لِبَابْ الْحِلَّةْ، هُو شَافْ نَادُمْ مَيِّتْ وَ النَّاسْ مَاشِينْ يَدْفُنُوهْ. وَ الْمَيِّتْ هُو وِلَيْد وَاحِدْ فِي أَمَّهْ وَ هِي مَرَةْ أَرْمَلَةْ. وَ نَاسْ كَتِيرِينْ مِنْ الْحِلَّةْ مَاشِينْ مَعَاهَا. 13وَ وَكِتْ الرَّبّ عِيسَى شَافَاهَا، قَلْبَهْ حَنَّ لَيْهَا وَ قَالْ: «مَا تَبْكِي.»

14وَ مَشَى لِلْمَيِّتْ وَ لِمِسْ الْبَرَنْقَالْ وَ النَّاسْ الشَّايْلِينَهْ وَقَفَوْا. وَ عِيسَى قَالْ: «يَا وِلَيْدِي، نُقُولْ لَيْك قُمّ!» 15وَ الْمَيِّتْ قَمَّ وَ حَجَّى. وَ عِيسَى أَنْطَاهْ لِأَمَّهْ. 16وَ الْخَوْف دَخَلْ لِكُلَّ النَّاسْ وَ هُمَّنْ مَجَّدَوْا اللّٰهْ وَ قَالَوْا: «نَبِي كَبِيرْ جَاءْ فِي أُسُطْنَا! اللّٰهْ بَيَّنْ قُدُرْتَهْ لِشَعَبَهْ!»

17وَ فِي كُلَّ دَارْ الْيَهُودِيَّةْ وَ فِي كُلَّ الْبُلْدَانْ الْمُجَاوِرِينْ، النَّاسْ سِمْعَوْا خَبَرْ هَنَا الشَّيّءْ الْعِيسَى سَوَّاهْ.

سُؤال يَحْيَى

18وَ تَلَامِيذ يَحْيَى مَشَوْا لِسَيِّدْهُمْ وَ أَوْرَوْه بِكُلَّ شَيّءْ الْعِيسَى قَاعِدْ يِسَوِّيهْ. 19وَ يَحْيَى نَادَى تَلَامِيذ إِتْنَيْن وَ رَسَّلَاهُمْ لِلرَّبّ عِيسَى أَشَانْ يُقُولُوا لَيَّهْ: «إِنْتَ بَسْ النَّادُمْ الْيَجِي وَلَّا وَاجِبْ نَرْجَوْا نَادُمْ آخَرْ بَتَّانْ؟»

20وَ مَشَوْا لِعِيسَى وَ قَالَوْا: «يَحْيَى الْمُغَطِّسْ رَسَّلَانَا أَشَانْ نَسْأَلَوْك ‹إِنْتَ بَسْ النَّادُمْ الْيَجِي وَلَّا وَاجِبْ نَرْجَوْا نَادُمْ آخَرْ بَتَّانْ؟›»

21وَ فِي الْوَكِتْ دَا بَسْ، عِيسَى شَفَى نَاسْ كَتِيرِينْ مِنْ الْمَرْضَانِينْ وَ التَّعْبَانِينْ وَ الْمُشَوْطِنِينْ. وَ فَتَّحْ عُيُونْ عَمْيَانِينْ كَتِيرِينْ. 22وَ عِيسَى رَدَّ لَيْهُمْ وَ قَالْ: «أَمْشُوا وَ أَوْرُوا يَحْيَى بِكُلَّ شَيّءْ الشِّفْتُوهْ وَ سِمِعْتُوهْ. الْعَمْيَانِينْ قَاعِدِينْ يِشِيفُوا وَ الْعُرُجْ يُرُوغُوا وَ الْعِنْدُهُمْ جِدَامْ يَلْقَوْا الْعَافَيْ وَ الطَّرْشَانِينْ يَسْمَعَوْا وَ الْمَيْتِينْ يَبْعَثَوْا وَ الْمَسَاكِينْ قَاعِدِينْ يَسْمَعَوْا الْبِشَارَةْ. 23وَ مَبْرُوكْ لِلنَّادُمْ الْمَا يِخَلِّي إِيمَانَهْ بَيِّ.»

كلام المسيح في يَحْيَى

24وَ وَكِتْ مُرَسَّلِينْ يَحْيَى مَاشِينْ، عِيسَى بَدَا يِحَجِّي فِي يَحْيَى لِلنَّاسْ الْقَاعِدِينْ مَعَايَهْ وَ قَالْ: «وَكِتْ يَحْيَى قَاعِدْ فِي الْكَدَادَةْ، إِنْتُو مَرَقْتُوا لَيَّهْ. وَ دَوَّرْتُوا تِشِيفُوا شُنُو؟ دَوَّرْتُوا تِشِيفُوا عَقَيْقَايْ بَسْ الرِّيحْ تِهِزَّهَا وَلَّا؟ 25كَنْ مَا كَيْ، دَوَّرْتُوا تِشِيفُوا شُنُو؟ نَادُمْ لَابِسْ خُلْقَانْ سَمْحِينْ وَلَّا؟ لَا. أَشَانْ النَّاسْ اللَّابْسِينْ خُلْقَانْ سَمْحِينْ وَ الْعَايْشِينْ فِي بَكَانْ حَلُو قَاعِدِينْ فِي قُصُورْ الْمُلُوكْ. 26زَيْن. مَرَقْتُوا أَشَانْ تِشِيفُوا شُنُو؟ أَشَانْ تِشِيفُوا نَبِي؟ أَيْوَى، وَ نُقُولْ لَيْكُو شِفْتُوا نَادُمْ أَكْبَرْ مِنْ نَبِي. 27دَا بَسْ هُو الْبِسَبَبَهْ الْكِتَابْ يُقُولْ: <دَاهُو نِرَسِّلْ رَسُولِي قِدَّامَكْ وَ هُو يِعَدِّلْ لَيْك الدَّرِبْ.>#7‏:27 الكلام دا تلقوه في مَلاخِـي 3‏:1. 28وَ نُقُولْ لَيْكُو مَا فِي نَادُمْ مَوْلُودْ مِنْ مَرَةْ أَكْبَرْ مِنْ يَحْيَى الْمُغَطِّسْ. وَ لَاكِنْ النَّادُمْ الصَّغَيَّرْ فِي مَمْلَكَةْ اللّٰهْ أَكْبَرْ مِنَّهْ.

29«وَ كُلَّ النَّاسْ سِمْعَوْا كَلَامْ يَحْيَى وَ مَعَاهُمْ نَاسْ الْجَمَارِكْ كُلَ. وَ تَابَوْا مِنْ ذُنُوبْهُمْ وَ خَلَّوْا يَحْيَى يِغَطِّسْهُمْ وَ مِثِلْ دَا، أَكَّدَوْا كَدَرْ فِكِرْ اللّٰهْ عَدِيلْ. 30وَ لَاكِنْ الْفَرِيزِيِّينْ وَ عُلَمَاءْ التَّوْرَاةْ أَبَوْا مَا خَلَّوْا يَحْيَى يِغَطِّسْهُمْ. وَ بِمِثِلْ دَا، مَا قِبْلَوْا النِّيَّةْ الْاللّٰهْ عِنْدَهْ لَيْهُمْ.

31«وَ نُقُولْ شُنُو فِي النَّاسْ هَنَا الْوَكِتْ الْحَالِي دَا؟ بِشَابُهُوا شُنُو؟ هُمَّنْ مِثِلْ عِيَالْ دُقَاقْ لَامِّينْ فِي الدَّوْر وَ يِنَادُوا رُفْقَانْهُمْ وَ يُقُولُوا: 32‹أَنِحْنَ ضَرَبْنَا لَيْكُو الصُّفَّارَةْ لَاكِنْ إِنْتُو مَا لِعِبْتُوا. أَنِحْنَ غَنَّيْنَا غِنَيْ هَنَا الْمَوْت لَاكِنْ إِنْتُو مَا بَكَيْتُوا.› 33أَشَانْ يَحْيَى الْمُغَطِّسْ جَاءْ لَيْكُو وَ هُو مَا يَاكُلْ أَكِلْ وَ مَا بَشْرَبْ خَمَرْ وَ قُلْتُوا هُو مُشَوْطِنْ. 34وَ بَعَدَيْن أَنَا، إِبْن الْإِنْسَانْ، جِيتْ لَيْكُو وَ أَنَا نَاكُلْ وَ نَشْرَبْ وَ تُقُولُوا: ‹هُو أَكَّالْ وَ سَكَّارِي وَ بِقِي رَفِيقْ لِنَاسْ الْجَمَارِكْ وَ الْمُذْنِبِينْ.› 35لَاكِنْ حِكْمَةْ اللّٰهْ الصَّحِيحَةْ تِنْشَافْ فِي عَمَلْ كُلَّ النَّاسْ الْيِتَابُعُوهَا.»

المُذْنِبة و الفَرِيزِي

36وَ نَادُمْ وَاحِدْ مِنْ الْفَرِيزِيِّينْ عَزَمْ عِيسَى يَاكُلْ مَعَايَهْ. وَ عِيسَى دَخَلْ فِي بَيْت الْفَرِيزِي وَ أَنْتَكَى. 37وَ فِي مَرَةْ وَاحِدَةْ مُذْنِبَةْ مَعْرُوفَةْ فِي الْحِلَّةْ. وَ وَكِتْ هِي سِمْعَتْ كَدَرْ عِيسَى عَزَمَوْه فِي بَيْت الْفَرِيزِي، هِي قَمَّتْ شَالَتْ مَاعُونْ هَنَا حَجَرْ مَلَانْ عِطِرْ وَ مَشَتْ لَيَّهْ. 38وَ وَقَفَتْ وَرَاءْ عِيسَى جَنْب رِجِلَيْنَهْ. وَ هِي قَاعِدَةْ تَبْكِي وَ بَدَتْ تِبِلّ رِجِلَيْنَهْ بِدُمُوعْهَا وَ تُقُشُّهُمْ بِشَعَرْهَا. وَ قَاعِدَةْ تِحِبّ رِجِلَيْنَهْ وَ تَمْسَحْ فَوْقهُمْ الْعِطِرْ.

39وَ الْفَرِيزِي الْعَزَمَهْ فِي بَيْتَهْ شَافْ الشَّيّءْ الْهِي قَاعِدَةْ تِسَوِّيهْ وَ فِي قَلْبَهْ قَالْ: كَنْ صَحِيحْ النَّادُمْ دَا نَبِي، أَكِيدْ هُو يَعَرِفْ الْمَرَةْ الْقَاعِدَةْ تِلَمِّسَهْ دِي يَاتِي وَ يَعَرِفْ حَالْهَا الشَّيْنَةْ أَشَانْ هِي مُذْنِبَةْ. 40وَ عِيسَى رَدَّ لَيَّهْ وَ قَالْ: «يَا سِمْعَانْ. نِدَوْر نُقُولْ لَيْك كَلَامْ وَاحِدْ.» وَ الْفَرِيزِي رَدَّ لَيَّهْ وَ قَالْ: «نَعَمْ، يَا مُعَلِّمْ. أَلْفَضَّلْ. حَجِّي!»

41وَ عِيسَى قَالْ: «يَوْم مِنْ الْأَيَّامْ، فِي نَادُمْ وَاحِدْ الْيِدَيِّنْ النَّاسْ وَ عِنْدَهْ دَيْن فَوْق نَاسَيْن. وَ الْوَاحِدْ دَيْنَهْ 500 دِينَارْ وَ التَّانِي دَيْنَهْ 50 دِينَارْ. 42مَا قِدْرَوْا يِكَفُّوهْ لَيَّهْ. وَ خَلَاصْ هُو سَامَحَاهُمْ مَرَّةْ وَاحِدْ. وَ نَسْأَلَكْ يَاتُو مِنْ النَّاسَيْن دَوْل يِحِبَّهْ بِزِيَادَةْ؟» 43وَ سِمْعَانْ رَدَّ لَيَّهْ وَ قَالْ: «فِي فِكْرِي أَنَا، نُقُولْ النَّادُمْ السَّامَحَوْا لَيَّهْ الدَّيْن الْكَتِيرْ يِحِبَّهْ بِزِيَادَةْ.» وَ عِيسَى قَالْ: «فِكْرَكْ صَحِيحْ.»

44وَ عِيسَى أَنْلَفَتْ لِلْمَرَةْ وَ حَجَّى لِسِمْعَانْ وَ قَالْ: «الْمَرَةْ دِي شِفْتَهَا وَلَّا؟ أَنَا دَخَلْت فِي بَيْتَكْ وَ إِنْتَ مَا أَنْطَيْتنِي أَلْمِي أَشَانْ نِغَسِّلْ رِجِلَيْنِي لَاكِنْ هِي بَلَّتْ رِجِلَيْنِي بِدُمُوعْهَا وَ قَشَّتْهُمْ بِشَعَرْهَا. 45وَ إِنْتَ مَا سَلَّمْتِنِي بِحُبّ وَ لَاكِنْ مِنْ أَنَا دَخَلْت فِي بَيْتَكْ هِي قَاعِدَةْ تِحِبّ رِجِلَيْنِي. 46وَ إِنْتَ مَا أَنْطَيْتنِي دِهِنْ أَشَانْ نَمْسَحْ بَيَّهْ رَاسِي لَاكِنْ هِي مَسَحَتْ عِطِرْ فِي رِجِلَيْنِي. 47وَ نُقُولْ لَيْك، دَا يِوَصِّفْ كَدَرْ ذُنُوبْهَا الْكَتِيرِينْ سَامَحَوْهُمْ لَيْهَا. وَ أَشَانْ دَا، هِي تِحِبّ كَتِيرْ. لَاكِنْ النَّادُمْ السَّامَحَوْا لَيَّهْ شِيَّةْ، يِحِبّ شِيَّةْ.»

48وَ عِيسَى قَالْ لَيْهَا: «أَكِيدْ ذُنُوبْكِ أَنْغَفَرَوْا.» 49وَ النَّاسْ الْقَاعِدِينْ يَاكُلُوا مَعَايَهْ قَمَّوْا يُقُولُوا أَمْبَيْنَاتْهُمْ: «هَايْ! دَا يَاتُو الْيِسَامِحْ الْمُذْنِبِينْ»؟ 50وَ عِيسَى حَجَّى لِلْمَرَةْ بَتَّانْ وَ قَالْ: «بِسَبَبْ إِيمَانْكِ نِجِيتِ. أَمْشِي بِسَلَامْ.»

Currently Selected:

لُوقا 7: ع.د.ت19

Highlight

Copy