ዮሃኒሳ 15

ዎዪኒያ ጊያ ቱራው ቱሙ ኣኑ ዬሱሳ

1«ታኒ ዎዪኒያ ጌቴቲያ ቱራው ቱሙ ኣኖ፤ ጎሻንቻይ ታ ኣባ። 2ታ ጊዶን ዴዒያ ኣይፊያ ኣይፌና ቱራ ማራ ኡባ ኢ ካሬ፤ ኣይፊያ ቱራ ማራ ኡባይ ካሴዋፔ ሎይ ኣይፋናዳን፥ ሄ ማራ ፄራ ኢ ጪጊዴ ጌሻና። 3ታኒ ሂንቴንቱሲ ሃዒ ኦዴዳ ቃላ ጋሱዋን፥ ሂንቴንቱ ጌሻ። 4ታ ጊዶን ዴዒቴ፤ ታኒካ ሂንቴንቱ ጊዶን ዴዓና። ዎዪኒያ ቱራ ማራይ ኣኑዋና ኢቲፔ ዴዔናን ዮፔ፥ ሄ ማራይ ባሬካ ኣይፊያ ኣይፋናው ዳንዳዬናዋዳን፥ ሂንቴንቱካ ታ ጊዶን ዴዔናን ዮፔ፥ ኣይፊያ ኣይፋናው ዳንዳዪኪታ።

5«ታኒ ዎዪኒያ ቱራው ኣኖ፤ ሂንቴንቱ ሄ ቱራ ማራቱዋ። ታ ጊዶን ዴዒያ ኡራይ፥ ታኒካ ኣ ጊዶን ዴዒያ ኡራይ፥ ዳሮ ኣይፊያ ኣይፋና፤ ኣዪሲ ጎፔ፥ ታኒ ባይናን ሂንቴሬካ ኣይኔ ኦናው ዳንዳዪኪታ። 6ታ ጊዶን ዴዔና ኡራይ ቱራ ማራዳን፥ ካሬን ዬጊና ሜሌዳዋ ሺሺዴ ታማን ዎና፥ ኢ ኤፃናዋ። 7ሂንቴንቱ ታ ጊዶን ዴዖፔ፥ ቃሲ ታ ቃላይካ ሂንቴንቱ ጊዶን ዴዖፔ፥ ሂንቴንቱ ኮዬዳዋ ኣያ ጊዲናካ ዎሲቴ፤ ሂንቴንቱ ኣካኒታ። 8ሂንቴንቱ ዳሮ ኣይፊያ ኣይፎፔኔ ቃሲ ታና ካሊያዋንታ ጊዶፔ፥ ሄዋን ታ ኣቡ ቦንቼታናዋ። 9ኣዉ ታና ሲቄዳዋዳን፥ ታኒካ ሂንቴንታ ሲቃዲ፤ ታ ሲቁዋን ዴዒቴ። 10ታኒ ታ ኣቡ ኣዛዙዋ ናጋዴ ኣ ሲቁዋን ዴዔዳዋዳን፥ ሂንቴንቱካ ታ ኣዛዙዋ ናጎፔ፥ ታ ሲቁዋን ዴዓኒታ።

11«ታ ናሼቻይ ሂንቴናና ዴዓና ማላኔ፥ ሂንቴንቱ ናሼቻይ ኩሜን ጊዳና ማላ፥ ታኒ ሃዋ ሂንቴንቱሲ ኦዳዲ። 12ታ ኣዛዙ ሃዋ፤ ታኒ ሂንቴንታ ሲቂያዋዳን፥ ሂንቴንቱካ ኢቱ ኢቱዋና ሲቄቲቴ። 13ባሬ ሼምፑዋ ባሬ ላጌው ኣዴ ኢሚያዋፔ ኣያ ሲቁ ኦሲኔካ ባዋ። 14ታኒ ሂንቴንታ ኣዛዜዳዋ ኡባ ኦፔ፥ ሂንቴንቱ ታ ላጌቱዋ።

15«ኣይሊ ባሬ ጎዳይ ኦያዋ ኤሬና ዲራው፥ ታኒ ሂንቴንታ ሃዋፔ ሲንው ኣይላቱዋ ጊኬ፤ ሺን ታኒ ሂንቴንታ ታ ላጌቱዋ ጋዲ። ኣዪሲ ጎፔ፥ ታ ኣዉዋፔ ሲሴዳ ኡባባ ታኒ ሂንቴንቱሲ ኦዳዲ። 16ታኒ ሂንቴንታ ዶሬዳዋፔ ኣቲን፥ ሂንቴንቱ ታና ዶሪቤይኪታ። ሂንቴንቱ ቢዴ ኣይፊያ ኣይፋና ማላኔ ዴዓና ማላ፥ ታኒ ሂንቴንታ ሱንዲ። ቃሲ ኣዉካ ሂንቴንቱ ታ ሱንን #15፡16 ታ ሱንን፡ ዎይ «ታና ካሊያዋንታ ጊዲያ ዲራው» ዎሴዳዋ ኡባ ኢማና። 17ታኒ ሂንቴንታ ኣዛዚያዌ ሃዋ፤ ኢቱ ኢቱዋና ሲቄቲቴ።

ዬሱሲ ሃ ኣላሚ ኢፂያዋ ኦዴዳ

18«ኣላሚ ሂንቴንታ ኢፆፔ፥ ካሴቲዴ ታና ኢፄዳዋ ኣኬኪቴ። 19ሂንቴንቱ ኣላሚያሳ ጊዴዴንቶ፥ ኣላሚ ባሬዋዳን ሂንቴንታ ሲቃና፤ ሺን ታኒ ሂንቴንታ ኣላሚያፔ ዶሬዳዋፔ ኣቲን፥ ሂንቴንቱ ኣላሚያሳ ጊዲኪታ፤ ኣላሚ ሂንቴንታ ኢፂያዌ ሃዋሳ። 20‹ኣይሊ ባሬ ጎዳፔ ዳሬና› ጋዴ ታኒ ሂንቴንቱሲ ኦዴዳዋ ሃሳዪቴ። ኡንቱንቱ ታና ዬዴርሴዳዋ ጊዶፔ፥ ሂንቴናካ ዬዴርሳና። ኡንቱንቱ ታ ቃላ ናጌዳዋ ጊዶፔ፥ ሂንቴንቱ ቃላካ ናጋናዋንታ። 21ሺን ኡንቱንቱ ታና ኪቴዳዋ ኤሬና ዲራው፥ ሃ ኡባ ታ ጋሱዋን ኡንቱንቱ ሂንቴንቱ ቦላ ኦናዋንታ። 22ታኒ ያዴ ኡንቱንቱሲ ኦዴናዋ ጊዲንቶ፥ ኡንቱንቱሲ ናጋራ ጊዴና፤ ሺን ሃዒ ኡንቱንቱ ኦያ ናጋራ ጋሶዪያዌ ባዋ። 23-24ታና ኢፂያዌ ታ ኣዉዋካ ኢፄዳ። ኦኒኔ ኦቤና ኦሱዋ ኡንቱንቱ ጊዶን ታኒ ኦቤናባ ጊዲንቶ፥ ኡንቱንቱሲ ናጋራ ጊዴናን ኣታናዋ፤ ሺን ሃዒ ኡንቱንቱ ታኒ ኦዳ ኦሱዋ ቤዒዴ፥ ታናካ ታ ኣዉዋካ ኢፄዲኖ። 25ሺን ኡንቱንቱ ሂጊያን፥ ‹ታና ጮ ኢፄዲኖ› ጌቴቲዴ ፃፌቴዳዌ ፖሌታና ማላ፥ ሃዌ ሃኔዳ። #ማዝ 35፡19፤ 69፡4

26«ሺን ኣዉዋፔ ዪያ ቱማቴ ኣያናይ ሜንያዌ ያናዋ። ታኒ ኣዉዋፔ ሂንቴንቱሲ ኣ ዬዳና፤ ቃሲ ኢ ታባ ማርካታናዋ። 27ሂንቴካ ቃሲ ካሴፔ ዶሚዴ፥ ታናና ዴዒያ ዲራው፥ ታባ ማርካታና።

Currently Selected:

ዮሃኒሳ 15: dwrENT

Highlight

Copy