ዮሃኒሳ 5

ዬሱሲ ጉንዳ ቢታኒያ ዳጋቲ ኡቴዳ ሃ ማታን ፓዳ

1ሄዋፔ ጉዪያን፥ ዬሱሲ ኣዪሁዳቱ ቦንቺያ ባላው ዬሩሳላሜ ቤዳ። 2ዬሩሳላሜን ዶርሳ ፔንጊያ ማታን ኢብራዪስፄ ቃላን ቤቴሳይዳ ጌቴቲያ ዳጋቲ ኡቴዳ ሃይ ዴዔ፤ ሄ ዳጋቲ ኡቴዳ ሃ ዩዪ ኣዳ ኢቼሹ ካሻይ ዴዔ። 3ሄዋን ጮራ ሃርጋንቻቱ፥ ቆቃቱ፥ ዎባቱኔ ሲሌዳዋንቱ ጊሴዲኖ። [ሃይ ቃፂያዋ ናጊኖ። 4ኣዪሲ ጎፔ፥ ኢቲ ኢቲ ጌዴ ጎዳ ኪታንቻይ ሄ ዳጋቴዳ ሃኮ ጌሊዴ፥ ሃ ቃ፤ ሃይ ቃፄዳዋፔ ጉዪያን፥ ኮይሮ ጌሌዳ ኡራይ ባሬና ኦይቄዳ ኣይ ሃርጊያፔካ ፓፄ።] #5፡3ብ-4 ሃ ፓይዱ ኢቲ ቤኒ ኮይሮቲዴ ፃፌቴዳ ጌሻ ማፃፋቱዋን ባዋ። 5ሄዋን ሃታማኔ ሆስፑን ላይ ሳኬቴዳ ኢቲ ቢታኒ ዴዔ። 6ሄ ቢታኒ ሄዋን ጊሴዳዋ ዬሱሲ ቤዒዴ፥ ዳሮ ዎዲያ ሳኬቴዳዋካ ኤሪዴ ቢታኒያ፥ «ፓፃናው ኮያይ?» ያጌዳ።

7ሳኬቲያ ቢታኒ ዛሪዴ፥ «ጎዳው፥ ሃይ ቃፂያ ዎዴ፥ ታና ሃን ዬጊያ ኣሳይ ዬዳ፤ ታኒ ጌላና ሃኒያ ዎዴ፥ ሃራ ኡራይ ታፔ ካሴቲዴ ጌሊ ኣጌ» ያጌዳ።

8ዬሱሲ ኣ፥ «ዴንዳ ኤቃ፤ ኔኒ ጊሶዋ ቶካዴ ባ» ያጌዳ። 9ቢታኒ ኤሌካ ፓፂ ኣጌዳ፤ ባሬ ጊሱዋ ቶኪዴ ቤዳ።

ሄዌ ሃኔዳዌ ሳምባታ ጋላሳና። 10ሄዋ ዲራው፥ ኣዪሁዳቱ ፓፄዳ ቢታኒያ፥ «ሃቼ ሳዓይ ሳምባታ፤ ኔኒ ኔ ጊሱዋ ቶካ ቢያዌ ዎጋ ጊዴና» ያጌዲኖ። #ናህ 13፡19፤ ኤርም 17፡21

11ሺን ቢታኒ፥ «ታና ፓዳዌ፥ ‹ኔ ጊሱዋ ቶካዴ ባ› ያጌዳ» ጊዴ ኡንቱንቱሲ ዛሬዳ።

12ኡንቱንቱ ኣ፥ «ኔና፥ ‹ኔ ጊሱዋ ቶካዴ ባ› ጌዳዌ ኢ ኦኔ?» ጊዴ ኦቼዲኖ።

13ሺን ሄዋን ጮራ ኣሳይ ዴዒያ ዲራዉኔ፥ ዬሱሲካ ጌሜቴዳ ዲራው፥ ቢታኒ ባሬና ፓዳዌ ኦኔንቶ ኤሬና። 14ዬሱሲ ጉዬፔ ሄ ቢታኒያ ጌሻ ጎሊያን ዴሚዴ፥ «ቤዓ፥ ኔኒ ሃዒ ፓፃዳ፤ ሃዋፔካ ኢታባይ ኔና ጋኬና ማላ፥ ላዔን ናጋራ ኦፓ» ያጌዳ። 15ሄዋፔ ጉዪያን፥ ቢታኒ ቢዴ፥ ባሬና ፓዳዌ ዬሱሳ ጊዲያዋ ኣዪሁዳ ኣሳ ካፓቶ ኦዴዳ።

16ዬሱሲ ሃዋ ሳምባታን ኦዳ ዲራው፥ ኡንቱንቱ ዬሱሳ ዬዴሳን ዋዪሱዋ ዶሜዲኖ። 17ዬሱሲ ዛሪዴ ኡንቱንቱሲ፥ «ታ ኣቡ ኡባ ዎዴ ኦ፤ ታኒካ ኦናው ቤሴ» ያጌዳ።

18ሄዋ ዲራው፥ ዬሱሲ ሳምባታ ጋላሳ ቦንቼና ዲራ ፃላላሳ ጊዴናን፥ ባሬና ፆሳና ቃራዪዴ፥ «ፆሳይ ታ ኣባ» ጌዳ ዲራው፥ ኣዪሁዳ ኣሳ ካፓቱ ኣ ዎናው ካሴዋፔ ሚኒሲዴ ኮዪኖ።

ፆሳ ናዓ ማታ

19ዬሱሲ ዛሪዴ ኡንቱንቱሲ፥ «ታኒ ሂንቴንቱሲ ቱሙዋ ኦዳይ፤ ናዓይ ባሬካ ኣይኔ ኦና። ኢ ባሬ ኣቡ ኦሺን ቤዒያዋ ፃላላ ኦ፤ ኣዉ ኦያዋ ናዓይካ ኦ። 20ኣዪሲ ጎፔ፥ ኣዉ ባሬ ናዓ ሲቄ፤ ቃሲ ኢ ኦያ ኦሱዋ ኡባባ ባሬ ናዓ ቤሴ። ኡባ ሂንቴንቱ ማላሌታና ጋካናው፥ ኢ ሃዋፔ ኣያ ኦሱዋካ ባሬ ናዓ ቤሳናዋ። 21ጋሱኔ፥ ኣዉ ሃይቄዳዋንታ ሃይቁዋፔ ዴንዴ ሼምፑዋና ዎያዋዳን፥ ናዓይካ ቃሲ ባሬ ኮዮዋንታ ሼምፑዋና ዎ። 22-23ኣሳይ ኡባይ ኣዉዋ ቦንቺያዋዳን፥ ናዓካ ቦንቻና ማላ፥ ኣዉ ፒርዳ ኡባ ናዓው ኢሜዳዋፔ ኣቲን፥ ኢ ኦናኔ ፒርዴና፤ ናዓ ቦንቼና ኡራይ፥ ኣ ኪቴዳ ኣዉዋካ ቦንቼና።

24«ታኒ ሂንቴንቱሲ ቱሙዋ ኦዳይ፤ ታ ቃላ ሲሲያዎኔ ታና ኪቴዳዋን ኣማኒያዎ ሜና ዴዑ ዴዔ። ሃይቁዋፔ ዴዖ ኢ ፒኔዳዋፔ ኣቲን፥ ፒርዴቴና። 25ታኒ ሂንቴንቱሲ ቱሙዋ ኦዳይ፤ ሃይቄዳ ኣሳይ ፆሳ ናዓ ኮሻ ሲሲያ ዎዲ ያናዋ፤ ሄዌኔካ ሃዓ። ሄ ኮሻ ሲሲያዋንቱ ሼምፑዋና ዴዓና። 26ኣዪሲ ጎፔ፥ ኣዎ ዴዑዋ ኢሚያ ዎልቃይ ዴዒያዋዳን፥ ዴዑዋ ኢሚያ ሄ ዎልቃ ባሬ ናዓዉካ ኢሜዳ። 27ፆሳ ኣዉ ባሬ ናዓው ፒርዲያ ማታ ኢሜዳ፤ ኣዪሲ ጎፔ፥ ናዓይ ኣሳ ናዓ።

28«ሃዋን ማላሌቶፒቴ፤ ኣዪሲ ጎፔ፥ ዱፉዋን ዴዒያዋንቱ ኣ ኮሻ ሲሲያ ዎዲ ዬ። 29ሲሲዴ ኡንቱንቱ ዱፉዋፔ ጋፃ ኬሳና፤ ሎዖባ ኦዳዋንቱ ዴዑዋን ዴዓናው ዴንዳና፤ ቃሲ ኢታባ ኦዳዋንቱ ፒርዴታናው ዴንዳናዋንታ። #ዳን 12፡2

ዬሱሳሲ ማርካቴዳ ኣሳቱዋ

30«ታኒ ታፔ ኣይኔ ኦናው ዳንዳዪኬ፤ ፆሳይ ታው ኦዴዳዋዳን ፒርዳይ። ታ ፒርዳይ ቱማ፤ ኣዪሲ ጎፔ፥ ታኒ ታና ኪቴዳዋ ሼኒያ ፖሊያዋፔ ኣቲን፥ ታኒ ዶሲያዋ ኦኬ።

31«ታኒ ታ ሁጴው ታባ ማርካቶፔ፥ ታ ማርካቴይ ቱማ ጊዴና። 32ታባ ማርካቲያዌ ሃራይ ዴዔ፤ ኢ ታባ ማርካቲያዌ ቱማ ጊዲያዋ ታኒ ኤራይ።

33«ሂንቴንቱ ዮሃኒሳኮ ኣሳ ኪቲና፥ ኢ ኡንቱንቶ ቱሙዋ ማርካቴዳ። 34ታኒ ሄዋ ሂንቴንታ ኣቲኖ ጋዴ ጊያዋፔ ኣቲን፥ ኣሳ ማርካቴይ ታው ኮሺና ጊዴና። 35ዮሃኒሲ ሙቃዳዳን፥ ኤፄዳኔ ፖዒሴዳ፤ ሂንቴንቱካ ኣማሬዳ ዎዲያ ኣ ፖዑዋን ናሼታናው ኮዬዲታ።

36«ሺን ታው ዮሃኒሳዋፔ ኣያ ማርካቴይ ዴዔ፤ ኣዪሲ ጎፔ፥ ታኒ ዉርሳናው ታ ኣቡ ታው ኢሜዳ ኪታይ፥ ሃ ታኒ ኦያዌ፥ ኢ ታና ኪቴዳዋ ጊዲያዋ ማርካቴ።

37«ቃሲ ታና ኪቴዳ ታ ኣቡ ባሬ ሁጴው ታባ ማርካቴ። ሂንቴንቱ ኣ ኮሻ ኣይኔ ሲሲቤይኪታ፤ ኣ ማላካ ቤዒቤይኪታ። 38ኢ ኪቴዳዋ ኣማኔና ዲራው፥ ኣ ቃላይ ሂንቴንቱ ዎዛናን ባዋ።

39«ፆሳ ማፃፋቱዋፔ ሜና ዴዑዋ ዴሚያዋ ሂንቴው ማላቲና፥ ኡንቱንታ ቢዲታ፤ ኡንቱንቱካ ታባ ማርካቲያዋንታ። 40ሺን ዴዑዋ ዴማናው ታኮ ዪያዋ ሂንቴንቱ ኮዪኪታ።

41«ታኒ ኣሳፔ ቦንቹዋ ኮዪኬ። 42ሺን ታኒ ሂንቴንቱ ዎዛናን ፆሳ ሲቁ ባይናዋ ኤራይ። 43ታኒ ታ ኣቡ ሱንን ያዲ፤ ሺን ታና ኣኪቤይኪታ። ሺን ሃራ ኣሳይ ባሬ ሱንን ዪያ ዎዴ፥ ኣ ኣኪታ። 44ሂንቴንቱ ኢቱ ኢቱዋ ቦንቺታ፤ ሺን ኢቲ ፆሳፔ ዪያ ቦንቹዋ ኮዪኪታ። ያቲና፥ ዋኒዴ ኣማናናው ዳንዳዪቴ?

45«ታኒ ታ ኣቡ ሲንን ሂንቴንታ ሞቲያዋ ሂንቴው ማላቶፖ፤ ሂንቴንታ ሞቲያዌ፥ ሂንቴ ሂዶታ ዎያ ሙሳ። 46ሂንቴንቱ ሙሳ ኣማኔዳባ ጊዲንቶ፥ ታናካ ኣማናኒታ፤ ኣዪሲ ጎፔ፥ ታባ ፃፌዳዌ ኣ። 47ሺን ሂንቴንቱ ኢ ፃፌዳዋ ኣማኔናን ኢፆፔ፥ ታኒ ጊያዋ ዎቲ ኣማናኒቴ?» ያጌዳ።

Currently Selected:

ዮሃኒሳ 5: dwrENT

Highlight

Copy