ሉቃሳ 12

ሎዓ ማላቲያ ኢታቴፔ ናጌታና ማላ ሴራ

(ማት 10፡26፣ 27)

1ሄ ዎዲያን ጮራ ሻዓን ፓይዴቲያ ኣሳይ ኢቱ ኢቱዋ ዬና ጋካናው ሺቂ ዴዒሺን፥ ዬሱሲ ባሬና ካሊያዋንቶ ኮይሮ ኦዳናው ዶሚዴ፥ «ፓሪሳዋቱዋ ኢርሹዋፔ ናጌቲቴ፤ ሃዌካ ሎዓ ማላቲያ ኡንቱንቱ ኢሚያ ኢታ ቲሚርቲያ። #ማት 16፡6፤ ማር 8፡15 2ሺን ኣያኒኔ ካሜቴዳ ዬዉ ቆንጪያ ኬሴናን ኣቴና፤ ቃሲካ ጌሜዳ ዬዉ ኤሬቴናን ኣቴና። 3ሄዋ ዲራው ሂንቴ ማኒ ሃሳዮዌ ኡባይ፥ ጋላሲ ፖዑዋን ሲሴታናዋ፤ ሂንቴንቱ ኣሳይ ባይናሳን ሂኒ ጊሶ ጎሊያን ሃይን ሳሱኮዌ ኡባይ ቁ ጌዳ ሲሴቲያ ቆንጬሳን ኣዋጄታናዋ።

ኢቲ ፆሳ ፃላላው ያያና ቤሴ

(ማት 10፡28-31)

4«ታናዳን ኣማኒያዋንቶ፥ ታኒ ሂንቴው ያጋይ፤ ሃዒ ኣሹዋ ዎያዋንታ፥ ሄዋፔ ካላ ቃይ ኣያኔ ኦናው ዳንዳዬናዋንታ ያዮፒቴ። 5ዬዉዋን ቃሲ ሂንቴንቱ ኦሲ ያያናው ቤሲንቶ ታኒ ሂንቴንታ ኤሪሳና፤ ሄዌካ ዎዋፔ ጉዪያን ጋናሚያን ኦላናው ማታይ ዴዒያ ፆሳ ፃላላው ያዪቴ፤ ኤ፥ ኣው ያዪቴ ያጋይ።

6«ኢቼሹ ሱኒያ ካፋቱ ሳንቲሚያን ሻሜቲኪኖዬ? ሄዋንቱፔ ኢቲኖኔ ኡሳ ፆሳይ ዶጌና። 7ሺን ሃራይ ኣቶ ሂንቴንቱ ሁጲያን ዴዒያ ቢናናይ ኡባይካ ፓይዴቴዳዋ፤ ሃዋ ዲራው ያዮፒቴ፤ ሂንቴንቱ ጮራ ሱኒያ ካፋቱዋፔ ዳሪታ።

ዬሱሳን ኣማኒያዋንታኔ ኣ ኢፂያዋንታ

(ማት 10፡32፣ 33፤ 12፡32፤ 10፡19፣ 20)

8«ታኒ ሂንቴው ኦዳይ፤ ታባ ኣሳ ሲንን ማርካቲያዎ ኦሲኔ ታኒካ ኣሳ ናዓይ፥ ቃሲ ፆሳ ኪታንቻቱዋ ሲንን ማርካታና፤ 9ሺን ኣሳ ሲንን ታና ካዲያዋንታ ታኒካ ኣሳ ናዓይ፥ ቃሲ ፆሳ ኪታንቻቱዋ ሲንን ካዳና።

10«ታ ቦላ፥ ኣሳ ናዓ ቦላ፥ ቦሪያ ቃላ ሃሳዪያዌ ዴዖፔ ኣ ናቁ ኣቶ ጌቴታና፤ ሺን ጌሻ ኣያና ቦላ ቦሪያ ቃላ ሃሳዪያዌ ዴዖፔ ቃይ ኣ ናቁ ኣቶ ጌቴቴና። #ማት 12፡32፤ ማር 3፡29

11«ኣሳይ ሂንቴንታ ኣዪሁዴ ዎሲያ ጎሊያኮ፥ ጋዲያ ኣዪሲያዋንቱኮኔ ማታይ ዴዒያዋንቱ ሲን ፒርዳሲ ሺሺያ ዎዴ፥ ‹ዋጊ ዛራኔሻ? ዎይ ኣያ ጊዴ ሃሳያኔሻ?› ያጊዴ ሂርጎፒቴ፤ 12ኣያው ጎፔ፥ ሂንቴና ኣያና ጌሻይ ሂንቴንቱ ሄ ሳቲያን ሃሳያናው ቤሲያባ ታማሪሳናዋ» ያጌዳ።#ማት 10፡19-20፤ ማር 13፡11፤ ሉቅ 21፡14-15

ዱሬ ቢታኒያ ቦዛቴ ኦዲያ ሌሚሱዋ

13ኣሳ ጋርሳፔ ኢቲ ቢታኒ ዬሱሳ፥ «ታማሪሲያዎ፥ ኑ ኣቡ ሃይቂና ኑኒ ላታና ማላ ኣቴዳባ፥ ታው ጊሻና ማላ ሃያጎዶ ታ ኢሻው ኦዳ» ያጌዳ።

14ዬሱሲ ቃይ፥ «ሃ ቢታኔው፥ ሂንቴንቱ ቦላን ፒርዲያዋ ጊዳናዳኔ ሄዋ ሂንቴው ጊሻናዳን ታና ኦኔ ሱንዳዌ?» ያጌዳ።

15ጉጂዴካ ኡባቱዋ፥ «ኣሳ ሼምፑዋሲ ሻሉዋ ዱሬቴይ ዴዑዋ ኢሜና ዲራው፥ ያሬቲያዋፔኔ ዮራቲያዋፔ ናጌቲቴ፤ ዱሬቴ ኣሙዋ ኡባፔካ ሂንቴና ናጊቴ» ያጌዳ።

16ካሊዴካ ሃዋዳን ያጊ ሌሚሱዋ ኡንቱንቶ ኦዴዳ፡ «ኣው ዴዒያ ቢታይ ዳሪሲዴ ካ ሞኬዳ ኢቲ ዱሬ ቢታኒ ዴዔ። 17ሃ ቢታኒ፥ ‹ታው ታ ካ ዎናው ጊዲያ ሳዓይ ባንታዋ ዲራው ኣያ ኡዶሻ?› ያጊዴ፥ ባሬ ዎዛናን ቆፔዳ፤ 18ሃዋዳን ያጊ ማሌዳ፤ ‹ታኒ ዎታኔ ጎፔ፥ ታው ዴዒያ ዬሲያ ኮላዴ፥ ሃራ ኣኪያ ዬሲያ ሜና ያጊዴ ማሌዳ፤ ሄዋን ታ ካኔ ታው ዴዒያ ሚሻ ኡባ ዎና። 19ያታዴ ታና፥ «ኔ ካጫይ ዳሮ ሎዓ፤ ኔው ዳሮ ዎዲያሲ ጊዲያ ማፁዋ ሺሻዳ፤ ሲሚ ሼምፓዴ ማ፥ ኡሻ፥ ናሼታ» ጋና› ያጌዱ።

20«ሺን ፆሳይ ኣ፥ ‹ሃ ቦዛው፥ ሃቼ ቃማ ኔኒ ሃይቃ። ያቲና ሃ ኔኒ ሺሼዳ ማፁ ኡባይ ኦሲ ጊዳናዌ?› ያጌዳ።

21«ባሬው ቢታ ቦላን ሻሉዋ ሺሺያዌ፥ ፆሳ ሲንን ቃይ ማንቆ ጊዴዳ ኣሳይ ሃቢታኒያ ማላ» ያጌዳ።

ኡባ ዎዴ ፆሳን ኣማኔቱሳ ኮሼ

(ማት 6፡25-34)

22ሃዋፔ ካላ ዬሱሲ ባሬና ካሊያዋንታ፥ «ሃዋ ዲራው፥ ታ ሂንቴው ኦዳይ፡ ሂንቴንቱ ፓፃ ዴዓናው ኣያ ማኔ? ሂንቴንቱ ቦላሲ ኣያ ማያኔ? ያጊዴ ሂርጎፒቴ።

23«ጋሱካ፥ ሼምፑ ቁማፔ፥ ቃሲ ኣሳቴይ ማዩዋፔ ኣኔ? 24ኣኔ ቁራቱዋ ፄሊቴ፤ ኡንቱንቱ ዜሪኪኖ፤ ጫኪኪኖ፤ ኡንቱንቶ ካ ሺሺያ ሳዓይ ዎይ ዬሲ ባዋ፤ ሃኖፔ ኣቲን፥ ኡንቱንታ ፆሳይ ሚዜ፤ ሂንቴንቱ ካፋቱዋፔ ዳሮፔ ዳሪኪቴ? 25ሂንቴንቱፔ ዳሪ ቆፒዴ ዳሮ ዎዲያ ዴዓናው ዳንዳዪያዌ ኦኔ?

26«ሲሚ ሂንቴንቱ ሃ ላፋባ ኦናው ዳንዳዬናዋንታ ጊዶፔ ኣያው ሃራባው ሂርጌቲቴ? 27ጪሻቱ ዎቲ ዲጪኖንቶ ኣኔ ፄሊቴ፤ ኡንቱንቱ ኪታን ዳቡሪኪኖ፤ ፑቱዋ ሱቂኪኖ፤ ጊዶሺን ታኒ ሂንቴው ኦዲያዌ፥ ሶሎሞኔ ሄዋ ኬና ቦንቼቴዳዋ #12፡27 ሶሎሞኔ ሄዋ ኬና ቦንቼቴዳዋ፡ ኣዪሁዳ ኣሳይ ሶሎሞኔ ባሬ ዴዔዳ ላይ ኡባን ዳሮ ዱሬቴን ዴዔዳ ጊዴ ቆፒኖ። ጊዲዴ፥ ሄ ጪሻቱዋፔ ኢቱዋ ማላኔ ማዪቤና።#1ካት 10፡4-7፤ 2ኦድ 9፡3-6 28ሂንቴንቶ ላፋ ኣማኑ ዴዒያዋንቶ፥ ያቶፔ ፆሳይ ሃቼ ቤቲዴ፥ ዎንቲ ታማን ኤፃናው ኦሌቲያ፥ ዴንባን ዶሊያ ማታ ሃዋዳን ማዪዚያዋ ጊዶፔ፥ ሂንቴንታ ዎቲዴ ኡንቱንቱፔ ኣዴ ማዪዜኔ?

29«ሃዋ ዲራው፥ ‹ኣያ ማኔ? ኣያ ኡሻኔ?› ያጊዴ ኡባ ዎዴ ኮዮፒቴኔ ሂርጎፒቴ። 30ኣያው ጎፔ፥ ሃዋ ዴማናው ሃ ኣላሚያን ዴዒያ ፆሳን ኣማኔቴና ኣሳይ ሂርጌቲኖ። ሂንቴንቶ ሃዌ ኡባይ ኮሺያዋ ሳሉዋን ዴዒያ ሂንቴንቱ ኣዉ ኤሬ። 31ሄዋ ሃኒያዋ ኣጊዴ፥ ፆሳ ካዉቴ ኮዪቴ፤ ኢ ሂንቴንታ ኮሺያዋ ኡባ ኢማናዋ።

ሳዓን ባሬ ዱሬቴን ኣማኔቶዌ ሳሉዋን ዋኒ?

(ማት 6፡19-21)

32«ሂንቴንቱ ጉ ጊዲንቶኔ፥ ሳሉዋ ሂንቴንቱ ኣዉ ባሬ ካዉቴ ሂንቴንቶ ኢማናው ናሼቴዳ ዲራው ያዮፒቴ።

33«ሂንቴው ዴዒያዋ ዛሊዒዴ ማንቆ ኢሚቴ፤ ካዪሱ ሺቄናሳን፥ ቢልዓይካ ሜናሳን፥ ሳሉዋን ዉሬና ሚሻ ዳጋዪዴ፥ ኤጬና ቃርጪታቱዋ ሂንቴንቱ ሁጴው ዎቴ። 34ኣያው ጎፔ፥ ሂንቴንቱ ዎዛናይ ሂንቴ ሚሻይ ዴዒያሳን ዴዓናዋ።

ሚኖ ኦሳንቻ

35«ሂንቴ ፄሳይ ዳንጬቶዋ፥ ሂንቴ ፆምፒካ ፖዔዳዋ ጊዶ።#ማት 25፡1-13 36ሂንቴንቱካ፥ ባሬንቱ ጎዳይ ዪዴ ፔንጊያ ቆፂያ ዎዴ፥ ኤሌካ ዶያናው ቡላቻፔ ሲማና ጋካናው ናጊያ ኦሳንቻቱዋ ማላቲቴ።#ማር 13፡34-36 37ባሬንቱ ጎዳይ ሶይ ዬዳ ዎዴ ቤጎቲ ዴዒሺን ዴሚያ ሄ ኦሳንቻቱ ኣንጄቴዳዋንታ። ታኒ ቱሙዋ ጋይ፤ ኢ ኡንቱንታ፥ ‹ኡቲቴ› ጊዴ፥ ባሬ ዳንጩዋ ሚኒሲዴ ኡንቱንቶ ቁማ ኣዴ ሾባናዋ። 38ጎዳይ ሄካ ቢላሂያን ዎይ ሄካ ቢላሂያፔ ካላ ዬዳ ዎዴ፥ ቤጎቲዴ ጌንጪ ናጊዴ ቤቲያ ቆማቱ ኣንጄቴዳዋንታ። 39ሃዋ ቃይ ኤሪቴ፤ ካዪሱ ኣይ ሳቲያን ዪንቶ ጎሊያዉ ኤሪንቶ፥ ጎሊ ቦኬቲያ ዎዴ ጮዑ ጊዴ ፄሌናሺን።#ማት 24፡43፣ 44 40ኣሳ ናዓይ ቆፔና ሳቲያን ያናዋ፤ ሂንቴንቱ ጊጌቲ ናጊቴ» ያጌዳ።

41ጴፂሮሲካ «ጎዳው፥ ሃ ሌሚሱዋ ኔኒ ኦዲያዌ ኑፃላላሴ ሃራ ኡባሲካ ኢቲፔ ኦዳይ?» ያጌዳ።

42ጎዳይካ፥ «ሲሚ ኡንቱንቱ ባሬ ሶይ ኣሳው ቁማ ኢማናው ቤሲያ ሳቲያን ኢማና ማላ፥ ኣ ጎዳይ ሱንያ ኣማኔቴዳኔ ኤራንቻ ሚዚያ ቆማይ ኦኔ?» ያጌዳ። 43ጎዳይ ሲሚያ ዎዴ ሃዋዳን ኪቴቲና ዴሚያ ቆማይ ኢ ኣንጄቴዳዋ። 44ታኒ ሂንቴው ቱሙዋ ኦዳይ፤ ዴዒያ ማፁዋ ኡባ ቦላን ኣ ሱንናዋ። 45ዬዉዋን ቃሲ ሄ ቆማይ፥ «ታ ጎዳይ ኤሌ ዬና፤ ጋሚዓናዋ» ያጊ ባሬ ዎዛናን ቆፖፔኔ ኣቱማኔ ማጫ ቆማቱዋ ሾቻ ዶሞፔ፥ ቃይካ ኮዮዋዳን ሙሳኔ ኡሻ፥ ማቱሳካ ዶሞፔ፥ 46ሄ ቆማ ጎዳይ፥ ኢ ቆፔና ጋላሲኔ ሲቤና ሳቲያን ያናዋ፤ ሄ ዎዲያን ኣ ቃንፄሬዴ፥ ኣ ጊሹዋ ማዳራካ ኣማኔናዋንቱና ኢቲሳ ኡዳናዋ።

47ባሬ ጎዳ ሼኒያ ኤሪዴ ጊጌናዌኔ ኣሼኒያዳን ኪቴቴና ቆማይ፥ ኢ ኢታ ባ ቤታናዋ። 48ኤሪቤናዌ ቃይ ቤታናው ቤሲያዋ ኡዴዳዌ፥ ጉ ቤቴ። ዳሮባይ ኢሜቴዳ ኣሳ ኡባፔ፥ ኣፔ ዳሮባይ ኮዬቴ፤ ዎልቃማ ሃዳራይ ኢሜቶዋፔ፥ ኣፔ ዳሪሲዴ ኮዬቴ።

49ዬሱሲ፥ «ታኒ ዬዳዌ፥ ሃ ሳዓ ቦላ ታማ ሳናሳ፤ ሃዒካ ኤፄዴንቶ፥ ታና ኣይ ኬና ናሼቻናዌሻ። 50ታኒ ፃማቄታና ሜቱዋ ፂንቃታይ ፖሌታና ጋካናው ዋናዴ ኡንዔታይታ! #ማር 10፡38 51ሃ ሳዓ ታኒ ዬዳዌ፥ ሳሮቴ ኣሃናሳ ማላቲዬ? ሂንቴው ማላቶፖ። ታኒ ዮዌ፥ ሳሮታሲ ጊዴናን ሻካናሳፔ ኣቲን። 52ኣያው ጎፔ፥ ሃዒፔ ዶሚና ኢቲ ጎሊያን ዴዒያ ኢቼሹ ኣሳቱ ሻኬታናዋንታ፤ ሄዛቱ ላዓቱዋ ቦላ፥ ላዓቱካ ሄዛቱዋ ቦላ ዴንዲዴ ዋላቄታናዋንታ። 53ኣዉ ናዓ ቦላ፥ ናዓይካ ኣዉዋ ቦላ፥ ኣታ ናቲ ቦላ፥ ናታካ ኣቲ ቦላ፥ ቦሎታታ ናዓ ማቺ ቦላ፥ ናዓ ማቻካ ቦሎታቲ ቦላ፥ ዋላሳን ዴንዲዴ ሻኬታናዋንታ» ያጌዳ። #ሚክ 7፡6

ዎዲያ ሃኖታ ኤሩዋ

(ማት 16፡2-3)

54ቃይካ ዬሱሲ ኣሳሲ፥ «ኣዋይ ዉሊያ ባጋና ሂንቴ ሻሪያ ቤዖፔ፥ ‹ሃዒ ሃ ሳቲያን ሄኮ ዎልቃማ ኢራይ ቡካና ሃኔ› ያጊታ፤ ቱሙካ ቃይ ቡኬ። 55ዱጌ ባጋና ጫርኩ ጫርኮዴ፥ ‹ሃቼ ሻማናዋ› ያጊታ፤ ጌቴቶዋዳንካ ቃይ ሃኔ። 56ሂንቴኖ ሎዓ ማላቲያ ኢታቶ፥ ሳዓኔ ሳሉዋ ፄሊዴ፥ ሃናናዋ ኤሪታ፤ ሺን ሃ ዎዲያባ ዎቲ ኤራናው ዳንዳይኪቴ?

ሲጋቴባኔ ሞቱዋባ

(ማት 5፡25-26)

57«ዎዴ ሂንቴንቱ ፂሎ ጊዴዳ ዬዉዋ ሂንቴንቶ ኣያው ፒርዲኪቴ? 58ኔ ሞርኪያና ኢቲፔ ፒርዲያ ዳና ሲንን ሺቃናው ቦዴ፥ ቢሮ ኦጊያ ቦላ ዴዒሺን ሲጌታ ዲጋ። ሄዌ ዮፔ ኔና ጎቺዴ ፒርዲያ ዳናኮ ኣፋና፤ ዳናይካ ፖሊሴው ኣ ኢማናዋ፤ ፖሊሲ ቃሾ ጎሌን ዬጋናዋ። 59ታኒ ኔው ኦዲያዌ፥ ዉርሴ ኣጩዋ ጪጋና ጋካናው ሄዋፔ ኬሳካ» ያጌዳ።

Currently Selected:

ሉቃሳ 12: dwrENT

Highlight

Copy