ሉቃሳ 18

ማንቆ ጊዴዳ ኣምዓቲባኔ ማካላንቻ ዳናባ

1ዬሱሲ ባሬና ካሊያውንቶ፥ ሳሌቴናን ኡባ ጋላሲ ዎሳናዳን ሌሚሱዋን ኦዴዳ። 2ኢካ፥ «ኢቲ ካታማን ፆሳው ያዬናዌ፥ ኣሳካ ቦንቼና ኢቲ ዳናይ ዴዔ። 3ሄ ካታማን ኣምዔ ሚሺራታ ዴዓው። ኢዛካ ሄ ዳናኮ ያዴ፥ ‹ታ ሞርኬዉኔ ታው ዴዒያ ዬዉዋ ፒርዳ› ያጋዱ።

4«ዳሮ ዎዲያን ኢዚው ፒርዴናን ኢፄዳ። ሺን ባሬ ዎዛናን ቆፒዴ፥ ‹ታኒ፥ ኡባ ፆሳው ያያና ዮፔካ፥ ኣሳካ ቃይ ቦንቻና ዮፔ፥ 5ሃ ኣምዔ ሚሺራታ ታና ላባንያ ዲራዉኔ ኡባ ዎዴ ታኮ ያዴ ታና ዳቡርሴና ማላ፥ ታኒ ኢዚው ፒርዳና› ጌዳ።

6«ሄ ማካላንቻ ዳናይ ጎዋ ኣኬኪቴ። 7ፆሳይ ጋላሲኔ ቃማ ባሬንታ ማዳና ማላ፥ ዳንዳያን ኣኮ ዋሲያ ዶሬታዋንቱሲ ፒርዴኔዬ? ኢ ኡንቱንቶ ኤሌካ ዛሬኔ? 8ታኒ ሂንቴንቶ ያጋይ፤ ኡንቱንቶ ኤሌሊ ፒርዳና፤ ሺን ኣሳ ናዓይ ዪያ ዎዴ ሃ ቢታን ኣማኑዋ ዴማኔሻ?» ያጌዳ።

ኦቶሬቲያ ፓሪሳዊያኔ ባሬና ካዉሺሴዳ ቃራፃ ቃንፂያ ቢታኒያ

9ባሬንታ ጌሻ ጊዴ ኣማኔቲያዋንቶኔ ሃራ ኡባ ዳሪ ካያዋንቶ፥ ዬሱሲ ሃ ሌሚሱዋ ኦዴዳ፡ 10«ላዑ ኣሳቱ ዎሳናው ጌሻ ጎሊያ #18፡10 ዎሳናው ጌሻ ጎሊያ፡ ኣዪሁዳ ኣሳይ ኡባ ዎዴ ጌሻ ጎሊያን ዎንታ ጉራኒኔ ጋላሳ ዎሲኖ። ጌሌዲኖ። ሄዋንቱፔ ኢቱ ፓሪሳዊያ፤ ኢቱ ቃይ ቃራፃ ቃንፂያዋ። 11ፓሪሳዊ ዴንዲ ኤቂዴ ባሬ ዎዛናን ዎሲዴ፥ ‹ፆሳው፥ ታኒ ሃራ ኣሳዳን፡ ቦንቂያዋንቱዳን፥ ማካሊያዋንቱዳን፥ ዎሹሚያዋንቱዳን፥ ዎይ ሃዋዳን ቃራፃ ሺሼና ዲራው ኔና ጋላታይ። 12ሳሚንታን ላዑ ካላ ፆማይ፤ ታኒ ዴሚያ ኡባፔ ታሙ ኩሺያፔ ኢቱዋ ኢማይ› ያጌዳ።

13«ሺን ቃራፂያ ቢታኒ ሃኩዋን ኤቂዴ፥ ባሬ ኣይፊያን ፑዴ ሳሉዋ ቁ ጊዴ ፄላናዉካ ኮዪቤና። ሺን ባሬ ቲራ ባቂዴ፥ ‹ፆሳው፥ ታኒ ናጋራንቻ፤ ታና ማራ› ያጌዳ። 14ታኒ ሂንቴንቶ ኦዲያዌ ኣዬ ጎፔ፥ ካሴ ቢታኒያፔ ኣዴ ሃ ቢታኒ ፂሎ ጊዲዴ ባሬ ጎሌ ሲሜዳ፤ ባሬና ቁ ኦያ ኡባይ ካዉሻና፤ ባሬና ቃይ ካዉሺሲያ ኡራይ ቁ ጋና» ያጌዳ።

ዬሱሲ ጉ ናና ኣንጄዳ

(ማት 19፡13-15፤ ማር 10፡13-16)

15ዬሱሲ ባሬ ኩሺያ ዎዴ ኣንጃና ማላ ኣሳይ ጉ ናና ኣኪዴ ኣኮ ዬዲኖ። ኣ ካሊያዋንቱካ ቤዒዴ፥ ኣሳ ኣሄና ማላ ጌዲኖ። 16ዬሱሲ ቃሲ ጉ ናና ባሬኮ ፄሲዴ፥ «ጉ ናናይ ታኮ ያና ማላ ኣጊቴ፥ ዲጎፒቴ፤ ፆሳ ካዉቴይ ሃዋንቱ ማላሳ። 17ታኒ ሂንቴንቶ ቱሙዋ ኦዳይ፤ ፆሳ ካዉቴ ጉ ናዓዳን ኣኬናዋንቱ ኡባይ ሄ ካዉቴ ሙሌካ ጌሌና» ያጌዳ።

18ዪሁዳ ቢታ ሞዲያዋንቱፔ ኢቱ፥ «ሎዖ ታማሪሲያዎ፥ ታኒ ሜና ዴዑዋ ላታናው ኣያ ኦናው ቤሲ?» ያጊዴ ዬሱሳ ኦቼዳ። 19ዬሱሲካ ኣው፥ «ኣያው ታና ሎዖ፥ ያጋይ? ኢቲ ፆሳፔ ኣቲን፥ ሎዑ ኦኒኔ ባዋ፤ 20ፆሳ ኣዛዛቱዋ፥ ‹ዎሹሞፓ፥ ዎፓ፥ ዉዖፓ፥ ዎርዱዋ ማርካቶፓ፥ ኔ ኣባኔ ኔ ዳዮ ቦንቻ ያጊያዋ ኤራ› » ያጊዴ ዛሬዳ። 21ቢታኒ ዛሪዴ፥ «ሃዋ ኡባ፥ ናዓቴፔ ዶማዴ ናጋዲ» ያጌዳ።

22ዬሱሲካ ሃዋ ሲሲዴ፥ «ኢቲባይ ኔኒ ቢሮን ኦናኒ ኣቶዌ ዴዔ፤ ሄዌኔካ፥ ኔው ዴዒያዋ ኡባ ዛሊዓዴ ማንቃቶ ኢማ፤ ሃዋ ኦፔ ሳሉዋንካ ኔኒ ዱሬታና፤ ሄዋፔ ጉዬ ታ ጌዱዋ ካላ» ያጌዳ። 23ሄ ቢታኒ ቃሲ ሄዋ ሲሲዴ ዳሮ ዱሬ ጊዶ ዲራው ዳሮ ካዮቴዳ።

24ዬሱሲካ ሃ ቢታኒ ዳሮ ካዮቶዋ ቤዒዴ፥ «ዱሬ ኣሳይ ፆሳ ካዉቴ ጌላናው ዎቲ ሜታንዴሻ! 25ዱሬ ኣሳይ ፆሳ ካዉቴ ጌላናዋፔ ጋሉ ማርፒያ ፆዒያና ኣናዌ ማታቴ» ያጌዳ። 26ሄዋ ሲሴዳ ኣሳይ፥ «ሲሚ ኦኒ ኣታናው ዳንዳዪ?» ያጌዲኖ።

27ኢካ ቃይ ዛሪዴ፥ «ኣሳው ዳንዳዬቴናዌ ፆሳው ዳንዳዬቴ» ያጌዳ። 28ጴፂሮሲ ዛሪዴ፥ «ሲሚ ኑኒ ኑሲ ዴዒያ ኡባ ኣጊዴ ኔና ካሌዶ» ያጌዳ። 29ኢካ፥ «ቱሙዋ ጋይ፥ ፆሳ ካዉቴ ዲራው ባሬ ጎሊያ፥ ዎይ ባሬና ዬላዋንታ፥ ዎይ ባሬ ማቺያ፥ ዎይ ባሬ ናና፥ ዎይ ኢሻቱዋ ኣጌዳዌ፥ 30ሃዎዲያን ዳሮ ዳኩዋ፥ ሲን ዪያ ካዉቴኒካ ሜና ዴዑዋ ኣኬናዌ ኦኒኔ ባዋ» ያጌዳ።

ዬሱሲ ባሬ ሃይቁዋባ ሄዜንዋ ኦዴዳ

(ማት 20፡17-19፤ ማር 10፡32-34)

31ዬሱሲካ ታማኔ ላዑ ባሬና ካሊያዋንታ ባሬኮ ፄሲዴ፥ «ሲሚ ዬሩሳላሜ ባና፤ ኣሳ ናዓባይካ ናባቱ ማፃፋን ፃፌቴዳባይ ኡባይ ያኒ ፖሌታና። 32ኣዪሁዴ ጊዴናዋንቶ ኣ ኣ ኢማና፥ ቂሊጫና፥ ዳሮ ሜቶና፥ ኣ ቦላን ጩቻና፤ 33ሾጮዋፔ ጉዪያን ዎና፥ ሄዜንያ ጋላሲ ኢ ዴንዳና» ያጌዳ።

34ኡንቱንቱካ ሃ ዬዉዋፔ ኣያኔ ኣኬኪቤይኪኖ፤ ሃዪቁካ ኡንቱንቶ ኣኬኬቲቤና ዲራው ኢ ሃሳዮባካ ኤሪቤይኪኖ። 35ዬሱሲ ኢያርኮኮ ማቴዳ ዎዲያን፥ ኢቲ ቆቃ ቢታኒ ዎሲዴ ኦጊያ ጋፃን ኡቴዳ። 36ጮራ ኣሳይ ኣያዋ ሲሲዴ፥ «ሃዌ ኣዬሻ?» ያጊ ኦቼዳ። 37ኣሳይካ ኣው፥ «ናዚሬቲያ ዬሱሲ ሃዋና ኣዴ ዴዔ» ያጊ ዛሬዲኖ።

38ኢካ፥ «ዳዊቴ ናዓ ዬሱሳ፥ ታና ማራሪኪ» ጊዴ ዋሴዳ። 39ኣፔ ሲንና ቢዴ ዴዒያዋንቱካ፥ ጮዑ ጋናዳን ሃንቄቴዲኖ። ኢ ቃይ፥ «ዳዊቴ ናዓው፥ ታና ማራሪኪ» ጊዴ ዳሪ ዋሴዳ።

40ዬሱሲካ ኤቂዴ፥ ባሬኮ ኣሃናዳን ኣሳው ኦዴዳ። 41ዬሱሳኮ ኢ ማቶ ዎዲያን፥ ዬሱሲ፥ «ታኒ ኔው ኣያ ኦናዳን ኮያይ?» ያጊዴ ኣ ኦቼዳ።

ኢካ ዛሪዴ፥ «ጎዳው፥ ፄላናው ኮያይ» ጌዳ።

42ዬሱሲካ፥ «ፄላ፥ ኔ ኣማኑ ኔና ፓዳ» ያጌዳ። 43ሄ ዎዲያንካ ፄሊ ኣጌዳ፤ ፆሳካ ቦንቺዴ ኣ ጌዱዋ ካሌዳ።

ኣሳይ ኡባይ ቢታኒያ ፄሊዴ፥ ፆሳ ጋላቴዲኖ።

Currently Selected:

ሉቃሳ 18: dwrENT

Highlight

Copy