ሉቃሳ 4

ዬሱሳው ሺቄዳ ፃላሂያ ፓጪያ

(4፡1-13፤ ማት 4፡1-11፤ ማር 1፡12፣ 13)

1ዬሱሲ ጌሻ ኣያናን ኩሚዴ ዮርዳኖሳ ሻፋፔ ሲሜዳ፤ ኣያናን ሜላ ሳዓ ካሌሴቲዴ ቤዳ። 2ሄዋን ኦይታሙ ጋላሳ ዳቢሎሳን ፓጬቴዳ። ሄ ጋላሳቱዋን ኣያኔ ሚቤና ዲራው ዉርሴ ፖሉዋ ሄራን ኢ ኮሻቴዳ።

3ዳቢሎሲካ፥ «ኔኒ ፆሳ ናዓ ጊዶፔ ሃ ሹቻ፥ ‹ኡኪ ጊዳ› ጋዴ ኣዛዛ» ያጌዳ።

4ዬሱሲካ፥ « ‹ኣሳይ ፆሳ ቃላ ኡባፔ ኣቲን ኡኪ ፃላላን ዴዔና› ጌቴቲ ፆሳ ቃላን ፃፌቴዳ» ያጊ ዛሬዳ። #ዛር 8፡3

5ዳቢሎሲካ ቃ ጊዴዳ ዴሪያ ዬሱሳ ኬሲዴ ኣላሚያ ካዉቴ ኡባ ሊጶ ኣይፊ ሲማናው ቤሴዳ። 6ዳቢሎሲካ፥ «ሃ ካዉቴ ማታይኔ ቦንቹ ኡባይ ታው ኢሜቴዳ። ታኒ ታ ዶሲያ ኦሲኔ ኢማና፤ ኔዉካ ኢማና። 7ሄዋ ጊዲያ ዲራው፥ ኔ ታ ሲንን ታው ጎዪኖፔ ሃ ኡባይ ኔሳ ጊዳናዋ» ያጌዳ።

8ዬሱሲካ ዛሪዴ፥ « ‹ጎዳ ፆሳው ጎዪና፥ ኣ ፃላላ ጎዳያ› ጌቴቲ ፆሳ ቃላን ፃፌቴዳ» ያጌዳ።

9-11ዳቢሎሲካ ዬሱሳ ዬሩሳላሜ ኣፊዴ ጌሻ ጎሊያ ሁጲያ ኬሲዴ፥

« ‹ፆሳይ ኔና ናጋና ማላ

ኪታንቻቱዋ ኪታናዋ፥

ኡንቱንቱካ ኔ ጌዲ ሹቻን ቤቴና ማላ

ባሬንቱ ኩሺያን ኔና ዴንናዋንታ›

ያጌቲዴ ጌሻ ማፃፋን ፃፌቴዳ፤

ኣኔ ኔኒ ፆሳ ናዓ ጊዶፔ

ሃዋፔ ዱጌ ኔና ኦላ» #ማዝ 91፡11-12

ያጌዳ።

12ዬሱሲካ ዛሪዴ፥ « ‹ኔ ጎዳ ፆሳ ፓጮፓ› ጌቴቴዳ» ያጌዳ።

13ዳቢሎሲካ ፓጪያ ኡባ ዉርሶዋፔ ጉዬ ጉ ዎዴው ዬሱሳፔ ሻኬቴዳ።

ዬሱሲ ጋሊላን ኦሱዋ ዶሜዳ

(ማት 4፡12-17፤ ማር 1፡14፣ 15)

14ዬሱሲካ ኣያና ዎልቃን ጋሊላ ጋዲያ ሲሜዳ። ኣ ዋሪካ ዩሹዋን ዴዒያ ኡባ ጋኬዳ። 15ዬሱሲካ ኣዪሁዳቱዋ ዎሳ ጎሊያን ታማሪሲዴ ኣሳን ኡባን ጋላቴቴዳ።

ናዚሬቴን ዬሱሳ ኢፄዲኖ

(ማት 13፡53-58፤ ማር 6፡1-6)

16ኢ ባሬ ዲጮ ካታማ ናዚሬቴ ዬዳ፤ ካሴ ኦያዋዳንካ ሳምባታ ጋላሲ ኣዪሁዳቱዋ ዎሳ ጎሌ ጌሊዴ ናባባናው ዴንዲዴ ኤቄዳ። 17-19ናቢያ ኢሲያሳን ፃፌቲዴ ፃፄቴዳ ማፃፋ ኣው ኢሜዲኖ። ሄ ማፃፋ ቢሊዴ፡

«ታኒ ሂዬሳቱዋሲ ሚሺራቹዋ ኦዳናው

ኦኬቴዳ ዲራው ጎዳ ኣያናይ ታ ቦላን ዴዔ።

ቃሼቴዳዋንቱሲ ቢሌ፥

ቆቃቱዋሲ ፄላና ማላ ኦዳናው፥

ቃይካ ናቄቴዳዋንታ ናቁዋፔ

ኬሳና ማላ ዶሴቴዳ ጎዳ ላይ

ኦዳና ማላ፥ ታና ኪቴዳ»

ጌቴቲ ፃፌቴዳሳ ዴሜዳ። #ኢሳ 61፡1-2

20ማፃፋካ ፃፂዴ ኣዪሁዳቱዋ ዎሳ ጎሊያን ኦያዎ ኢሚዴ ኡቴዳ። ኣዪሁዳቱዋ ዎሳ ጎሊያን ዴዒያ ኣሳይ ኡባይ ኣ ጫዲ ፄሌዳ። 21ዬሱሲካ፥ «ሃቼ ሂንቴው ናባቤቲና ሂንቴንቱ ሲሴዳ ቃላይ ፖሌቴዳ» ያጌዳ።

22ኡባይ ኣው ማርካቴዲኖ። ኣ ዶናፔ ኬሲያ ኣ ኬካቴ ቃላፔ ዴንዴዳዋን ማላሌቲዴ፥ «ሃዌ ዮሴፎ ናዓ ጊዴኔ?» ጌዲኖ።

23ዬሱሲካ ሲ ባንታን ሃ ሌሚሱዋን፥ «ሂንቴንቱ ታው ‹ሊያ ጎዳው፥ ኔ ሁጲያ ፓ፥ ኔኒ ቂፊሪናሆማን ኦና ኑ ሲሶዋ ኡባ ሃ ኔ ካታማኒካ ቃሲ ኦ› ያጊዴ ኦዲታ» ያጌዳ። 24ቃሲካ፥ «ቱሙዋ ያጋይ፥ ናቢ ባሬ ዬሌቶ ጋዲያን ጋማካ ቦንቼቴና። #ዮህ 4፡44

25«ዬዉዋን ቃሲ ቱሙዋ ኦዳይ፡ ኤላሳ ዎዲያን ሄዙ ላይኔ ኡሱፑን ኣጌና ኢራይ ቡኬናን ኢፂና ሳዓ ኡባን ዎልቃማ ኮሻይ ጌሌዳ ዎዴ፥ ኢስራዔሌን ጮራ ኣምዓቱ ዴዒኖ። #1ካት 17፡1 26ኤላሲካ ሲዶና ጋዲያን ዴዒያ ሴራፍታ ሄራ ኢቲ ኣምዓቲኮ ኪቴቴዳፔ ኣቲን ኦኮኔ ኪቴቲ ቤና። #1ካት 17፡8-16 27ናቢያ ኤልሳዓ ዎዲያንካ ኢስራዔሊያን ጮራ ኦሉዋ ሃርጊያን #4፡27 ኦሉዋ ሃርጊያ፡ ፆሳ ቃላይ ታማሪሴቲያ ዎዲያ ኡባን፥ «ኦሉዋ» ጊያ ቃላይ ጋልባ ቦላን ሳኪያ ሳኩዋ ኡባሲ ኣኬቲያዋ። ኦይቄቴዳዋንቱ ዴዒኖ፤ ሶሪያ ቢታን ዴዒያ ኒዒማኔፔ ኣቲን ኡንቱንቱፔ ኦኒኔ ፓፂ ቤና» ያጌዳ። #2ካት 5፡1-14

28ኣዪሁዳቱዋ ዎሳ ጎሊያን ዴዒያዋንቱ ኡባቱ ሃዋ ሲሲዴ ዳሪሲዴ ሃንቄቴዲኖ። 29ኡንቱንቱ ዴንዲዴ ዬሱሳ ካታማፔ ጋፃ ኬሲዴ ዱጌ ኦላናው ካታማይ ኬፄቴዳ ዴሪያ ሁጲያ ኣፌዲኖ። 30ሺን ዬሱሲ ኡንቱንቱ ጊዱዋና ኣዴ ቤዳ።

ኢታ ኣያናይ ኦይቄዳ ቢታኒያ

(4፡31-37፤ ማር 1፡21-28)

31ሄዋፔ ጉዪያን ዬሱሲ ጋሊላ ጋዲያን ዴዒያ ቂፊሪናሆማ ካታማ ቤዳ። ሳምባታ ጋላሳንካ ኣሳ ታማሪሴዳ። 32ኢ ታማሪሲያ ቲሚርቲ ማታን ጊዲያ ዲራው ሲሴዳ ኣሳይ ኡባይ ማላሌቴዲኖ። #ማት 7፡28፣ 29

33ኣዪሁዳቱዋ ዎሳ ጎሊያን ኢታ ኣያናይ ኦይቄዳ ቢታኒ ዴዔ፤ ባሬ ኮሻ ቁ ኡዲ ዋሲዴ፥ 34«ሃያ ጎዶ ኣጋሪኪ ናዚሬቲያ ዬሱሳ፤ ኑሲ ኔናና ኣይ ኢቲፔቴይ ዴዒ? ኑና ባዪዛናው ያዲ? ኔኒ ኦኔንቶ ኤራዲ፤ ኔኒ ፆሳ ኣዉ ኪቴዳ ጌሻ ጊዲኪ!» ያጌዳ።

35ዬሱሲካ፥ «ጮዑ ጋ፥ ኣፔካ ኬሳ» ያጊ ሴሬዳ። ኢታ ኣያናይ ቢታኒያ ኡንቱንቱ ጊዱዋን ኩንዲሲዴ ኣይኔ ቆሄናን ኣፔ ኬሴዳ።

36ኣሳይ ኡባይ ማላሌቲዴ ኢቱ ኢቶ፥ «ሃዌ ኣያ ቃሌ? ባሬው ዴዒያ ማታኒኔ ዎልቃን ኢታ ኣያናቱዋ ሴሬ፤ ቃሲ ኢታ ኣያናይካ ኬሴ» ያጊዴ ሃሳዬዲኖ። 37ኣ ዋሪካ ሄ ዩሹዋን ዴዒያ ጋዲያ ኡባ ጋኬዳ።

ዬሱሲ ጮራ ሃርጋንቻ ኣሳ ፓዳ

(ማት 8፡14-17፤ ማር 1፡29-34)

38ዬሱሲ ኣዪሁዳቱዋ ዎሳ ጎሊያፔ ዴንዲዴ ሲሞና ጎሊያ ጌሌዳ፥ ሲሞና ቦሎታታ ዎልቃማ ቆፁዋ ሃርጊያን ሃርጌታዴ ጊሴዳዉኒው ዬሱሲ ኢዞ ፓናዳን ኣሳይ ኣ ዎሴዳ። 39ኢ ማታን ኤቂዴ ቆፁዋ ሃርጊያ ሴሪና፥ ሃርጊ ዬዲሼዳ፤ ሄዎዲያንካ ዴንዳዴ ኡንቱንቶ ኪቴታዱ።

40ኣዋይ ዉሎ ዎዲያን ዱማ ዱማ ሃርጊያን ኦይቄቴዳ ሃርጋንቻቱዋ ኡባ ኣኮ ኣሄዲኖ፤ ኢካ ኢቱዋ ኢቱዋ ቦላ ባሬ ኩሺያ ዎዴ ፓዳ። 41ኢታ ኣያናቱካ፥ «ኔኒ ኪሪስቶሳ ፆሳ ናዓ» ያጊ ዋሲዴ ጮራ ኣሳፔ ኬሴዲኖ። ኢ ኪሪስቶሳ ጊዶዋ ኡንቱንቱ ኤሬዳ ዲራው ሃሳዬና ማላ ዲጌዳ።

ዬሱሲ ጋሊላን ታማሪሴዳ

(ማት 4፡23-25፤ ማር 1፡35-39)

42ሳዓይ ዎንቶ ዎዴ ኣሳይ ባይናሳ ቤዳ፤ ኣሳይ ኡባይ ኣ ኮዪዴ ኢ ዴዒያሳ ዬዲኖ። ባሬንቱፔ ሻኬቲ ቤናዳን ዲጋናው ኮዬዲኖ። 43ኢ ቃይ፥ «ሂኒ ሃራ ካታማቱዋሲ ባዴ ፆሳ ካዉቴ ሚሺራቹዋ ቃላ ኦዳናው ኮሼ፤ ታኒ ኪቴቴዳዌ ሃዋ ዲራሳ» ያጌዳ።

44ጋሊላን ዴዒያ ኣዪሁዳቱዋ ዎሳ ጎሌን ቃላ ታማሪሲዴ ጋሚዔዳ።

Currently Selected:

ሉቃሳ 4: dwrENT

Highlight

Copy