ማቶሳ 10

ዬሱሲ ኪቴዳ ታማኔ ላዑ ኣሳቱዋባ

(ማር 3፡13-19፤ ሉቅ 6፡12-16)

1ዬሱሲ ባሬ ታማኔ ላዑ ካሊያዋንታ ፄሲዴ፥ ኡንቱንቱ ኢታ ኣያና ኬሳና ማላ፥ ቃሲ ሃርጊያ ኡባኔ ሳኩዋ ኡባ ፓና ማላ፥ ኡንቱንቶ ማታ ኢሜዳ። 2ዬሱሲ ኪቴዳ ታማኔ ላዓቱዋ ሱንይ፥ ኮይሮዌ ጴፂሮሳ ጌቴቲያ ሲሞናኔ ኣ ኢሻ ኢንዲራሳ፥ ዛቢዲዮሳ ናና፥ ያዪቆባኔ ዮሃኒሳ፥ 3ፒሊጶሳ፥ ባርታላሞሳ፥ ቶማሳ፥ ቃራፃ ኣኪያ ማቶሳ፥ ኢልፒዮሳ ናዓ ያዪቆባኔ ታዶሳ፤ 4ባሬ ጋዴው ቃሬቲያ ሲሞናኔ ዬሱሳ ኣ ኢሜዳ ኣስቆሮቱ ዪሁዳ።

ዬሱሲ ኪቴዳ ታማኔ ላዓቱ ታማሪሳናው ኪቴቴዲኖ

(ማር 6፡7-13፤ ሉቅ 9፡1-6)

5ዬሱሲ ሃ ታማኔ ላዓቱዋ ሃዋዳን ያጊዴ ኪቴዳ፤ «ኣዪሁዳ ጊዴና ኣሳ ጋዲያ ቦፒቴ፤ ቃሲ ሳማራቱዋ ካታማካ ጌሎፒቴ፤ 6ሄዋ ዲራ ባዬዳ ዶርሳኮ፥ ኢስራዔሊያ ኣሳኮ 7ቢዴ፥ ‹ሳሉዋ ካዉቴይ ማቴዳ› ያጊዴ ኦዲቴ። #ሉቅ 10፡4-12 8ሃርጋንቻቱዋ ፓቴ፤ ኣኃ ሃይቁዋፔ ዴንቴ፤ ኦሉ ኦይቄዳዋንታ ፓቴ፤ ኢታ ኣያናቱዋካ ኬሲቴ። ሂንቴንቱ ጮ ኣኬዲታ፤ ጮ ኢሚቴ። 9ዎርቃ ዎይ ቢራ ዎይ ሳንቲሚያ ሂንቴንቱ ኪሲያን ኦይቆፒቴ፤ 10ዎይ ኦጌው ቃርጪቲያ፥ ዎይ ላዔያ ማዩዋ፥ ዎይ ጫማ ዎይ ፃምዓ ኦይቆፒቴ። ኣዪሲ ጎፔ፥ ኦሳንቻው ኮሺያባይ ቁማ። #1ቆር 9፡14፤ 1ፂም 5፡18

11«ሂንቴንቱ ጌሊያ ካታማን ዎይ ቄሪ ካታማ ኡባን ሂንቴና ሞካናው ናሼቲያዌ ኦኔንቶ ኣኬካን ፆሞሲቴ፤ ሂንቴንቱ ሄዋፔ ኬሳና ጋካናው፥ ሄዋን ኡቲቴ። 12ቃሲ ጎሌ ጌሊዴ ሳሮቲቴ። 13ሄ ጎሌን ዴዒያ ኣሳይ ሂንቴና ሞኮፔ፥ ሂንቴንቱ ሳሮቴዳ ሳሮታይ ኡንቱንታ ጋኮ። ሺን ኡንቱንቱ ሂንቴና ሞኬናን ኢፆፔ፥ ሂንቴንቱ ሳሮቴዳ ሳሮታይ ሂንቴው ጉዬ ሲሞ። 14ቃሲ ኢቲ ኢቲ ጎሊ ዎይ ካታማይ ሂንቴና ሞኬናን ዎይ ሂንቴንቱ ኦዲያዋ ሲሴናን ኢፆፔ፥ ሄ ጎሌፔ ዎይ ሄ ካታማፔ ኬሲዴ፥ ሂንቴንቱ ጌዲያፔ ባና ሾጪቴ። 15ታኒ ሂንቴው ቱሙዋ ኦዳይ፤ ፆሳይ ፒርዲያ ጋላሲ ሄ ካታማ ኣሳፔ፥ ሶዶማ ካታማ ኣሳዉኔ ጋሞራ ካታማ ኣሳው ፒርዳ ካዉሺሳና። #ማት 11፡24፤ ዶም 19፡24-28

ጎዳይ ያናፔ ካሴቲዴ፥ ዬዴርሱኔ ሜቱ ሃናና

(ማር 13፡9-13፤ ሉቅ 21፡12-17)

16«ቤዒቴ! ታኒ ሂንቴና ዶርሳ ዋላቱዋ ጊዶ ዬዲያዋዳን ዬዳይ። ሄዋ ዲራው፥ ሾሻዳን ጪንጫ ጊዲቴ፤ ቃሲ ሃራጲያዳን፥ ኣሺኬ ጊዲቴ። 17ሺን ኣሳፔ ናጌቲቴ። ኣዪሲ ጎፔ፥ ኣሳይ ሂንቴና ፒርዳ ጎሌው ኣዴ ኢማና፤ ቃሲ ባሬ ኣዪሁዳ ዎሳ ጎሌቱዋኒካ ሂንቴና ሊሱዋን ፔዳና። #ማር 13፡9-11፤ ሉቅ 12፡11-12፤ 21፡12-15 18ጋዲያ ኣዪሲያዋንቱ ሲንኒኔ ካታቱዋ ሲንን ታ ዲራው ሂንቴንቱ ኤቂዴ፥ ኡንቱንቱሲኔ ኣዪሁዳ ጊዴና ኣሳ ሲንን ታው ማርካ ጊዳኒታ። 19ሺን ኡንቱንቱ ሂንቴና ፒርዳው ኣያ ዎዴ፥ ሂንቴንቱ ሃሳያናባ ሄ ሳቲያን ፆሳይ ሂንቴው ኢሚያ ዲራው፥ ሂንቴንቱ ጋናባዉኔ ዎይ ዋጊዴ ሃሳያኔንቶኔ ሂርጎፒቴ። 20ኣዪሲ ጎፔ፥ ሂንቴንቱን ኣቂዴ ሃሳዪያዌ ሂንቴንቱ ኣዉዋ ጌሻ ኣያናፔ ኣቲን፥ ሃሳዪያዋንቱ ሂንቴንታ ጊዲኪታ።

21«ኢሻይ ባሬ ኢሻ፥ ኣዉ ባሬ ናዓ ቦላ ዴንዳና፤ ናናይ ባሬንቱ ኣቲኔ ኣዉዋ ቦላ ዴንዲዴ፥ ኡንቱንታ ዎሳና። 22ቃሲ ኣሳይ ኡባይ ሂንቴንታ ታ ሱን ዲራው ኢፃና፤ ሺን ዉርሴይ ጋካናው ጌንጪያዌ ኣታናዋ። 23ኡንቱንቱ ሂንቴና ኢቲ ካታማፔ ዬዴርሶፔ፥ ሃራ ካታማ ቢቴ። ኣዪሲ ጎፔ፥ ታኒ ሂንቴው ቱሙዋ ጋይ፤ ታኒ፥ ኣሳ ናዓይ፥ ያና ጋካናው፥ ሂንቴንቱ ሂንቴ ኦሱዋ ኢስራዔሊያ ካታማ ኡባን ኦዴ ዉርሲኪታ።

24«ታማሪያዌ ባሬና ታማሪሲያዋፔ ዳሬና፤ ቆማይካ ባሬ ጎዳፔ ዳሬና። 25ታማሪያዌ ባሬና ታማሪሲያዋ ኬና ጊዲያዌ፥ ቆማይካ ባሬ ጎዳ ኬና ጊዲያዌ ኣው ጊዳና፤ ኡንቱንቱ ጎሌ ጎዳ ቢዔል-ዜቡላ ጊዴ ፄሶፔ፥ ኣ ጎሌ ኣሳ ዋጊ ፄሳኔሻ!

ኦሲ ያያናው ቤሲንቶ

(ሉቅ 12፡2-7)

26«ሲሚ ኣሳሲ ያዮፒቴ፤ ኣዪሲ ጎፔ፥ ጌን ዎዳባይ ቆንጪያ ኬሴናን ኣቴና፤ ቆሴዳባይካ ኤሬቴናን ኣቴና። 27ታኒ ሂንቴንቶ ማኒ ኦዲያባ ፖዑዋን ሃሳዪቴ፤ ሂንቴው ሃይን ሳሱኪዴ ኦዴዳዋ፥ ቃ ሳን ኣዋዪቴ። 28ኣሹዋ ዎያዋንቶ ያዮፒቴ፤ ኡንቱንቱ፥ ሼምፑዋ ዎናው ዳንዳይኪኖ። ሺን ሼምፑዋኔ ኣሹዋ ጋናሚያን ዪሳናው ዳንዳዪያ ፆሳሲ ያዪቴ። 29ላዑ ሱኒያ ካፋቱ ሳንቲሚያን ዛሊዔቲኪኖ? ሂንቴንቱ ኣዉዋ ሼኒያ ጊዳና ዮፔ፥ ሄ ሱኒያ ካፋቱዋፔ ኢቲናካ ሳዓን ዎዴ ባዩኩ። 30ሺን ሃራይ ኣቶ፥ ሂንቴንቱ ሁጲያን ዴዒያ ቢናናይ ኡባይካ ፓይዱዋን ዴዔ። 31ሲሚ ያዮፒቴ፤ ዳሮ ሱኒያ ካፋቱዋፔ ሂንቴንቱ ኣታ።

ኪሪስቶሳባ ማርካታናው ቤሴ

(ሉቅ 12፡8-9)

32«ሄዋ ዲራው፥ ኣሳ ሲንን ታባ ማርካቲያ ኦሲ ጊዶፔኔ፥ ታኒካ ሳሉዋን ዴዒያ ታ ኣቡ ሲንን ማርካታና፤ 33ሺን ኣሳ ሲንን ታና ካዲያ ኦናኔ ታኒካ ቃሲ ሳሉዋን ዴዒያ ታ ኣቡ ሲንን ኣ ካዳና። #2ፂም 2፡12

34«ታኒ ሳዓሲ ሳሮቴ ኣሃናው ዬዳዋ ሂንቴሲ ማላቶፖ፤ ታኒ ቶራ ኣሃናው ዬዳዋፔ ኣቲን፥ ሳሮቴ ኣሃናው ያቤይኬ። 35ኣዪሲ ጎፔ፥ ታኒ ናዓ ኣ ኣቡፔ፥ ናቶ ኢዚ ዳዪፔ፥ ናዓ ማቻቶካ ኢዚ ቦሎታቲፔ ሻካናው ያዲ፤ #ሚክ 7፡6 36ኣሳሲ ሞርኬቱ ኣ ጎሌ ኣሳቱዋ ጊዳናዋንታ።

37«ባሬ ኣባ ዎይ ባሬ ዳዮ ታፔ ኣዴ ሲቂያዌ ታዋ ጊዳናው ቤሴና፤ ባሬ ኣቱማ ናዓ ዎይ ባሬ ማጫ ናቶ ታፔ ኣዴ ሲቂያዌ ታዋ ጊዳናው ቤሴና። 38ባሬ ማስቃሊያ ቶኪዴ፥ ታ ጌዱዋ ካሌናዌ ታዋ ጊዳናው ቤሴና። 39ባሬ ሼምፑዋ ኣሺያዌ ባዪዛናዋ፤ ሺን ታ ዲራው ባሬ ሼምፑዋ ባዪዚያዌ ኣሻናዋ።

40«ሂንቴንታ ሞኪያዌ ታና ሞኬ፤ ቃሲ ታና ሞኪያዌ ታና ኪቴዳዋ ሞኬ። 41ናቢያ፥ ናቢያ ሱንን ሞኪያዌ፥ ናቢያ ጋቲያ ኣናና ጊሼታናዋ፤ ቃሲ ፂሉዋ፥ ፂሉዋ ሱንን ሞኪያዌ፥ ፂሉዋ ጋቲያ ኣናና ጊሼታናዋ። 42ኦኒኔ ሃ ታና ካሊያዋንቱፔ ጉፂያ ኢቶ፥ ሃራይ ኣቶ ቡሊያ ሃ ፃላላ ኡሻናው ኢሞፔካ፥ ታኒ ሂንቴንቶ ቱሙዋ ጋይ፤ ኢ ባሬ ጋቲያ ኣካና» ያጌዳ።

Currently Selected:

ማቶሳ 10: dwrENT

Highlight

Copy