ማርቆሳ 8

ዬሱሲ ኦይዱ ሻዓ ኣሳ ሚዜዳ

(ማት 15፡32-39)

1ሄዎዴ፥ ጮራ ኣሳይ ቃሲ ዬሱሳኮ ሺቄዳ፤ ኣሳው ሚያባይ ዪና፥ ዬሱሲ ባሬና ካሊያዋንታ ባሬኮ ፄሲዴ፥ 2«ሃ ጮራ ኣሳይ ታናና ሄዙ ጋላሳይ ጋካናው ጋሚዒዴ፥ ሚያባ ኣይኔ ዴሚቤና ዲራው፥ ታኒ ኡንቱንቶ ቃሬታይ። 3ታኒ ኡንቱንታ ኮሻና ሶይ ዬዶፔ፥ ቢዴ ኦጊያን ዳቡሪዴ ኩንዳና፤ ኣዪሲ ጎፔ፥ ኢቱ ኢቱ ሃኮሳፔ ዬዳ» ያጌዳ።

4ኣ ካሊያዋንቱ ዛሪዴ፥ «ሃ ኣሳይ ባዪና ሳን ሃ ኣሳ ኡባ ሚዛናው ጊዲያ ቁማ ዴማናው ዳንዳዪያዌ ኦኔ?» ያጌዲኖ።

5ዬሱሲ ኡንቱንታ፥ «ሂንቴንቶ ኣፑን ዳቡ ዴዒ?» ያጊዴ ኦቼዳ።

ኡንቱንቱ፥ «ላፑ ዳቡ ዴዔ» ያጌዲኖ።

6ዬሱሲ ኣሳ፥ «ሳዓን ኡቲቴ» ያጊዴ ኣዛዜዳ፤ ቃሲ ላፑ ዳቡዋ ኣኪዴ፥ ፆሳ ጋላቴዳ፤ ሄ ዳቡዋ ሜንዴ፥ ኣሳው ጊሻና ማላ፥ ባሬና ካሊያዋንቶ ኢሜዳ። ዬሱሳ ካሊያዋንቱ ሄ ጮራ ኣሳሲ ጊሼዲኖ። 7ኡንቱንቶ ቃሲካ ኣማሬዳ ሱፓ ሞሌቱ ዴዒኖ፤ ዬሱሲ ሄዋንቶካ ፆሳ ጋላቲዴ፥ ኣሳው ጊሻና ማላ፥ ባሬና ካሊያዋንታ ኣዛዜዳ። 8ኣሳይ ኡባይ ሚዴ ካሊና ኣቴዳ ዶካይ ላፑ ዛምቤሊያ ኩሜዳዋ ኣ ካሊያዋንቱ ዴንዲኖ። 9ቁማ ሜዳ ኣሳይ ኦይዱ ሻዓ ጊዳና፤ ሄዋፔ ጉዪያን፥ ዬሱሲ ኣሳ ዬዴዳ። 10ኢ ቃሲ ባሬና ካሊያዋንቱና ኤሌካ ዎንጊሪያን ጌሊዴ፥ ዳልማኑታ #8፡10 ዳልማኑታ፡ ሃዌ ኤሬቴና ሳዓ። ጊያ ጋዲያ ቤዳ።

ፓሪሳዋቱ ባሬንቶ ማላታይ ኦሴታና ማላ ኦቼዲኖ

(ማት 16፡1-4)

11ፓሪሳዋቱ ዪዴ፥ ዬሱሳና ፓሉማ ዶሜዲኖ።

ዬሱሳ ፓጫናው ኮዪዴ፥ ሳሉዋፔ ማላታ ባሬንታ ቤሳና ማላ ኦቼዲኖ። 12ዬሱሲ ዳሪሲ ቶኪ ሼምፒዴ፥ «ሃ ዎዲያ ኣሳይ ኣዪሲ ማላታ ኮዪ? ታኒ ሂንቴንቶ ቱሙዋ ኦዳይ፤ ሃ ዎዲያ ኣሳው ማላታይ ኡባካ ኢሜቴና» ያጌዳ። 13ቃሲ ኡንቱንታ ሄዋን ኣጊዴ፥ ዛሪ ዎንጊሪያን ጌሊዴ፥ ኣባፔ ሄፊን ፒኔዳ።

ፓሪሳዋቱዋ ኢርሹዋኔ ሄሮዲሳ ኢርሹዋ

(ማት 16፡5-12)

14ዬሱሳ ካሊያዋንቱ ቁማ ኣፋናዋ ዶጌዲኖ፤ ኡንቱንቶ ዎንጊሪያ ጊዶን ኢቲ ኡኪፔ ሃራይ ባዋ። 15ዬሱሲ ኡንቱንታ፥ «ሂንቴንታ ኤሪቴ፤ ፓርሳዋቱዋ ኢርሹዋፔኔ ሄሮዲሳ #8፡15 ሄሮዲሳ፡ ሃዌ ሄሮዲሴ ኣንቲጳሳ ጌቴቲያ ዎጋ ሄሮዲሳ ጌቴቲያዋ ናዓ። ኢርሹዋፔ ናጌቲቴ» ያጊዴ ኣዛዜዳ።

16ኡንቱንቱ ባሬንቱ ጊዶን፥ «ኢ ሃዋ ጊያዌ ኑሲ ቁማይ ባይና ዲራሳ» ያጊዴ ሃሳያ ዶሜዲኖ።

17ዬሱሲ ኡንቱንቱ ጊያዋ ኤሪዴ፥ «ሂንቴንቶ ዳቡ ባዪናዋ ኣዪሲ ሃሳዪቴ? ሃዒ ጋካናው ሂንቴው ጌሌኔ? ዎይ ኣኬኪኪቴ? ሂንቴ ዎዛናይ ጆሌዴ? 18ሂንቴንቶ ኣይፊ ዴዔ፤ ቤዒኪቴ? ቃሲ ሃይይ ዴዔ፤ ሲስኪቴ? ሂንቴንቶ ሃሳዬቴኔ? #ኤርም 5፡21፤ ሂዝ 12፡2፤ ማር 4፡12 19ታኒ ኢቼሹ ዳቡዋ ኢቼሹ ሻዓ ኣሳው ሜን ኢሜዳ ዎዴ፥ ኣፑን ዛምቤሊያ ኩሜዳ ዶካ ዴንዲቴ?» ያጌዳ።

ኡንቱንቱ፥ «ታማኔ ላዑ ዛምቤሊያ ኩሜዳ ዶካ ዴንዶ» ያጌዲኖ።

20«ታኒ ቃሲካ ላፑ ዳቡዋ ኦይዱ ሻዓ ኣሳው ሜንዴ ኢሜዳ ዎዴ፥ ኣፑን ዛምቤሊያ ኩሜዳ ዶካ ዴንዲቴ?» ያጌዳ።

ኡንቱንቱ፥ «ላፑ ዛምቤሊያ ኩሜዳ ዶካ ዴንዶ» ያጌዲኖ።

21ኢ ቃሲ፥ «ሃዒካ ኣኬኪቤይኪቴ?» ያጌዳ።

ዬሱሲ ቤቴሳይዳን ኢቲ ቆቃ ፓዳ

22ዬሱሲኔ ኣ ካሊያዋንቱ ቤቴሳይዳ ጊያ ካታማ ቤዲኖ፤ ኣሳቱ ቆቃ ቢታኒያ ዬሱሳኮ ኣሂዴ፥ ሄ ቢታኒያ ቦቻና ማላ፥ ኣ ዎሴዲኖ። 23ዬሱሲ ቆቃ ቢታኒያ ኩሺያ ኦይቂዴ፥ ሄራፔ ጋፃ ኬሴዳ፤ ኣ ኣይፊያን ጩቺዴ፥ ባሬ ኩሺያ ኣ ቦላ ዎዴ፥ «ኔው ኣዬንቶ ቤቲ?» ያጊዴ ኦቼዳ።

24ቢታኒ ቂዴ፥ «ታኒ ኣሳ ቤዓይ፤ ሺን ኣሳይ ሃሜቲዴ፥ ሚ ማላቴ» ያጌዳ።

25ሄዋፔ ጉዪያን፥ ዬሱሲ ሺሬቲዴ ቢታኒያ ኣይፊያን ባሬ ኩሺያ ዎዳ። ኣ ኣይፊ ፓፄዳ፤ ቢታኒካ ሎይ ፄሌዳ፤ ቃሲ ኡባባካ ጌሺዴ ቤዔዳ። 26ዬሱሲ ቢታኒያ፥ «ሄራ ጌሎፓ» ያጊ ኣ ሶይ ዬዴዳ።

ጴፂሮሳ ኣማኑዋኔ ኣ ማርካቴ

(ማት 16፡13-20፤ ሉቅ 9፡18-21)

27ዬሱሲ ባሬና ካሊያዋንቱና ቂሳሪያ ፒሊጶሳ ዴዒያ ቄሪ ሄራቱዋ ቤዳ፤ ኢ ቢሺን ኦጊያን ዬሱሲ፥ «ታና ኣሳይ ኦና ጊ?» ያጊዴ ባሬና ካሊያዋንታ ኦቼዳ።

28ኣ ካሊያዋንቱ፥ «ኢቲ ኢቲ ኣሳይ ኔና፥ ‹ፃማቂያ ዮሃኒሳ› ጌ፤ ሃራንቱ፥ ‹ኤላሳ› ጊኖ፤ ቃሲ ሃራንቱ፥ ‹ናባቱዋፔ ኢቱዋ› ጊኖ» ያጌዲኖ።

29ዬሱሲ ኡንቱንታ፥ «ሂንቴሺ ታና ኦና ጊቴ?» ያጊዴ ኦቼዳ።

ጴፂሮሲ፥ «ኔኒ ዶሬቴዳ ኪሪስቶሳ» ያጊዴ ዛሬዳ።

30ዬሱሲ፥ «ታባ ኦሲኔ ኦዶፒቴ» ያጊዴ ኡንቱንታ ኣዛዜዳ።

ዬሱሲ ባሬና ጋካና ሜቱዋባኔ ዋዪያባ ኮይሩዋ ሃሳዬ

(ማት 16፡21-28፤ ሉቅ 9፡22-27)

31ዬሱሲ ባሬና ካሊያዋንታ፥ «ታኒ፥ ኣሳ ናዓይ፥ ዳሪ ዋዬታናው ቤሴ፤ ጪማቱ፥ ቄሳቱዋ ካፓቱኔ ሂጊያ ታማርሲያዋንቱ ታና ኢፃናው ቤሴ፤ ኡንቱንቱ ታና ዎናዉኔ ታኒ ሄዜንያ ጋላሳፔ ጉዪያን፥ ሃይቁዋፔ ዴንዳናው ቤሴ» ያጊዴ ታማሪሱዋ ዶሜዳ። 32ሄዋ ኢ ኡንቱንቶ ጌሺዴ ኦዴዳ፤ ጴፂሮሲ ኣ ኢቲ ባጋ ዛሪዴ፥ ዞሬታ ዶሜዳ።

33ሺን ዬሱሲ ጉዬ ሲሚዴ፥ ባሬና ካሊያዋንታ ፄሊዴ ጴፂሮሳ፥ «ሃ ሴፃናው፥ ኪቻ ታ ማታፔ! ኔን ኣሳይ ቆፒያዋ ቆፓሳፔ ኣቲን፥ ፆሳይ ቆፒያዋ ጊዴና» ያጌዳ።

ዬሱሳ ካሉሳይ ኦቺያ ጋቲያ

(ማት 10፡38-39፤ 16፡24-28፤ ሉቅ 9፡23-27፤ 14፡26-27)

34ዬሱሲ ጮራ ኣሳኔ ባሬና ካሊያዋንታ ባሬኮ ፄሲዴ፥ «ታና ካላና ኮዪያ ኡራይ ዴዖፔ፥ ባሬና ካዶ፤ ያቲዴ ባሬ ማስቃሊያ ቶኪዴ፥ ታና ካሎ። 35ኣዪሲ ጎፔ፥ ባሬ ሼምፑዋ #8፡35 ሼምፑዋ፡ ግሪኪያ ቃላን ኢዛዋ ዎይ ኣሳ ሼምፑዋ ጌቴቲ ቢሌቴዳ። ኣሻና ኮዪያ ኡራይ ባዪዛናዋ፤ ሺን ታ ዲራዉኔ ዎንጋላ ሚሺራቹዋ ዲራው ባሬ ሼምፑዋ ባዪዚያ ኡራይ ኣሻናዋ። 36ኢቲ ኡራይ ሳዓን ዴዒያ ኡባባ ባሬው ሺሺዴ፥ ባሬ ሼምፑዋ ባዪዞፔ፥ ኣ ኣያ ማዳኔ? 37ኢቲ ኡራይ ባሬ ሼምፑዋ ዎዛናው ኣያ ኢማና ዳንዳዪ? 38ፆሳ ኣማኔና ሃ ናጋራንቻ ዬሌታ ዎዲያን፥ ኢቲ ኡራይ ታናኒኔ ታ ቃላን ዬላቶፔ፥ ታኒካ፥ ኣሳ ናዓይ፥ ቃሲ ታ ኣዉዋ ቦንቹዋን ጌሻ ኪታንቻቱዋና ዪያ ዎዴካ፥ ኣኒ ዬላታና» ያጌዳ።

Currently Selected:

ማርቆሳ 8: dwrENT

Highlight

Copy