Lugu 14
14
Jeju aji njerɔko̰ gə ndɔ-kwa-rɔ
1Jeju andə aw mee kəi lə mbai lə Parisiḛje kára bèe gə ndɔ-kwa-rɔ mba sɔ səa né ndá Parisiḛje d’unda kəm dee lér-lér gée’g. 2Aa oo, dəw kára gə́ rɔko̰ mee-ti rəa lé si naŋg nea̰’g. 3Jeju un ta dəji njéteggin godnduje gə Parisiḛje pana: See kɔr rɔko̰ rɔ dəwje’g gə ndɔ-kwa-rɔ lé see to né gə́ kəm ra əsé to né gə́ kəm ra el wa.
4Deḛ d’aar dɔ na̰’d gə ta dee mudu. Yen ŋga Jeju ula jia ɔrɔ ne rɔ njerɔko̰ ar rəa to kari ɓa ulá aree ɔd aw ɓəi. 5Tɔɓəi yeḛ ula dee pana: See na̰ ɓa mbuna sí’g, ɓó lé ŋgonee əsé bɔ maŋg ləa oso bwa-mán’g ndá see yeḛ a kɔree gə́ lé gən ya gə ndɔ-kwa-rɔ el wa#Mat 12.11.
6Deḛ d’oo loo teḛ ta dee kila keneŋ el nja saar.
Nḛ́dooje gə́ wɔji dɔ koso kul lé
7Yeḛ un gosota nee ula deḛ gə́ ɓar dee ɓar nésɔ mbata yeḛ oo to gə́ deḛ nar loo-si gə mba sí keneŋ kédé lé pana: 8Loo gə́ ɓari ɓar nésɔ loo naḭ kunda dené kəi-ŋgaw’g ndá wa loo-si loo gə́ kédé el nà banelə dəw kára mbuna deḛ gə́ ɓar dee ɓar nésɔ lé yeḛ gə́ ur dɔi’g aw keneŋ, 9ɓa yeḛ gə́ njeɓar sí ɓar nésɔ lé a ree keneŋ ndá a kulai pana: Ya̰ loo gə́ nee ar dəw gə́ nee. Bèe ɓa i a kḭ gə rɔkul kaw loo-si gə́ gir dee’g gogo. 10Nɛ loo gə́ ɓari ɓar nésɔ ndá wa loo-si rudu loo’g. Bèe ɓa loo gə́ yeḛ gə́ njeɓari ɓar nésɔ lé ree ndá a kulai pana: Kuramarm, al gə́ kédé nee. Yee ɓa to kula gə́ yeḛ ula rɔnduba dɔi’g no̰ deḛ lai gə́ d’isi səi loo-nésɔ’g lé ya#GtK 25.6-7. 11Mbata nana ɓa gə́ unda dəa gə́ tar ndá d’a karee ula dəa ya, nɛ nana ɓa gə́ ula dəa lé ndá d’a karee unda dəa gə́ tar tɔ#Mat 23.12, Lug 18.14.
12Tɔɓəi Jeju ula yeḛ gə́ njeɓaree ɓar nésɔ lé pana: Loo gə́ i ɓar-ɓar nésɔ dan kàrá əsé gə loondul’g lé ndá maji kari ɓar baokuraje ləi el ləm, əsé ŋgakɔḭje el ləm, əsé njénojije ləi el ləma, əsé njé gə́ to bao marije el ləm tɔ, nà banelə d’a tel ɓari ɓar nésɔ godə maree’g ləi ya ɓəi tɔ. 13Nɛ loo gə́ i ra naḭ lé ndá maji kari ɓar njéndooje ləm, gə njé gə́ dəb rɔ dee wəi wɔ-wɔ ləm, gə njémədje ləma, gə njékəmtɔje ləm tɔ. 14Yen ɓa rɔi a leli ne ɓəi mbata deḛje neelé d’askəm kwa səi noji godə maree’g el, nɛ ndɔ gə́ njémeekarabasurje d’a teḛ bwa-yoo’g ɓa d’a kwa səi noji godə maree’g ɓəi.
Gosɔta gə́ wɔji dɔ muru-gad lé
Mat 22.1-10
15Dəw kára mbuna deḛ gə́ d’isi səa ta nésɔ’g lé loo gə́ yeḛ oo tapa Jeju lé ndá ulá pana: Yeḛ gə́ si ta ka-nésɔ mee ɓeeko̰’g lə Ala lé ndá rəa a lelee yaa̰.
16Jeju tel ilá keneŋ pana: Dəw kára bèe ɓar dee ɓar nésɔ gə́ loondul’g, ɓar dəwje bula. 17Loo gə́ kàree as mba̰ ndá yeḛ ula kura ləa mba karee aw ɓar dee ula dee pana: Reeje mbata nésɔ to naŋg jəb-jəb mba̰, 18Nɛ deḛ lai tɔ ta lə dee nəg-nəg. Yeḛ gə́ kára pana: Ma m’ndogo loo-ndɔ ndá m’isi m’aw tar gə́ keneŋ gə mba koo, bèe ndá ila məəi dɔm’g po̰ ɓa. 19Tɔɓəi yeḛ gə́ raŋg pana: Ma m’ndogo bɔ maŋgje joo-joo loo mi ndá m’isi m’aw gə mba naa dee koo, bèe ndá ila məəi dɔm’g po̰ ɓa. 20Yeḛ gə́ raŋg pana: M’taa dené sigi ɓəi ndá ma m’askəm kaw ne el gə mbəa. 21Kura lé tel ndaji taree lai ar ɓéeje. Yen ŋga mee njekəi lé ḭ səa pu aree ula kura ləa lé pana: Ɔd rad gə tɔgi aw ndaa-looje’g gə mba̰-rəwje gə́ mee ɓee’g, ɓar njéndooje ləm, gə njé gə́ dəb rɔ dee wəi wɔ-wɔ lé ləm, gə njékəmtɔje ləma, gə njémədje ləm tɔ, ree sə dee rɔm’g nee. 22Kura lé ula ɓéeje pana: Mbai, né gə́ i un ne ndui am lé m’ra mba̰, nɛ ges loo nai bura ɓəi. 23Yen ŋga mbai lé ula kura ləa lé pana: Aw gə rəw gə́ mee kag’dje ləm, gə kila-rəwje gə́ teḛ mee ndɔje’g lé ləm tɔ ndá deḛ lai gə́ i a kiŋga dee keneŋ lé ɔs dee ree sə dee gə mba kar dee rusu mee kəi ləm njḭ-njḭ ɓa. 24Mbata ma m’ula sí təsərə, deḛ gə́ m’ɓar dee ɓar nésɔ kédé gə́ mbad lé dəw kára kara mbuna dee’g a naa nésɔ neelé təa’g njagm el nja saar.
Néje gə́ kəm ra mba to ne njekwakila Jeju lé
Mat 10.37-38
25Boo-dəwje bula digi-digi d’orè rəw gə Jeju na̰’d. Ndá yeḛ kel gée ula dee pana: 26Ɓó lé nana ɓa gə́ ree rɔm’g ɓa yeḛ oo bɔbeeje gə kea̰je gə dené ləa gə ŋganeeje gə ŋgakea̰je gə́ diŋgam gə njé gə́ dené gə rəa-yeḛ nja kara oo dee gə́ né gə́ to kḛji el ndá yeḛ a kaskəm to njekwakilam el tɔ#Mat 10.37. 27Tɔɓəi nana ɓa gə́ un kag-dəs ləa un ne rəw goom’g el ndá yeḛ askəm to njekwakilam el tɔ#Mat 10.38, 16.24, Mar 8.34, Lug 9.23. 28See na̰ ɓa mbuna sí’g loo gə́ a gə ra kəi gə́ duu dɔ loo ndá see a rəm si naŋg gə mba tura goo laree gə́ a kudu keneŋ koo see a kaskəm rəa tɔlee bém ya wa, 29nà banelə loo gə́ yeḛ tum gin kəi gə mba ra mba̰ ɓa lar rəa na tas aree oo loo rəa tɔlee bém el ndá dəwje d’a kogee pana: 30Dəw neelé tum gin kəi gə mba ra, nɛ lé dumee təs. 31Esé see mbai gə́ ra ɓa ɓó lé yeḛ a gə tuga rɔ gə mba kaw rɔ gə mbai maree ndá see yeḛ a rəm si naŋg gə mba kwa dɔ gɔl rəa koo, see yeḛ a kaskəm kaw gə njérɔje tɔl-dɔg-loo-dɔg ɓa mba rɔ ne gə maree gə́ si ree gə njérɔje gə́ d’as tɔl-dɔg-loo-rɔ-joo lé el wa. 32Ɓó lé yeḛ as el ndá loo gə́ mbai maree nai əw ɓəi lé ndá yeḛ a kula njékaḭkulaje rəa’g mba kar dee d’ɔm ta lə dee na̰’d. 33Togə́bè ɓa nana ɓa mbuna sí’g gə́ uba néje ləa lai ya̰ el ndá yeḛ askəm to njekwakilam el tɔ.
Kad gə́ rii el lé
Mat 5.13, Mar 9.50
34Kad lé to né gə́ maji ya, nɛ ɓó lé kad lé tel to dədələ ndá ŋga see ɗi ɓa d’a ra ne karee tel rii gogo ɓəi wa. 35Lée d’ɔm dɔ naŋg’d loo kára ba ndá naŋgee a majel ləm, əsé dɔ ɓiri-ɓisi’g kara majel ləm tɔ, nɛ d’a kunda gə mee loo pə-pə ɓa. Nana ɓa gə́ mbia to gən ndá maji karee ur mbia oo ne ta nee ya.
Currently Selected:
Lugu 14: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
