Lucas 17

Ri q'atb'al tzij re ri Dios k'o pakiwi ri kakimin jun chik pa mak

(Mt. 18:6-7, 21-22; Mr. 9:42)

1Ri Jesús xub'i'ij chike rutijo'n:

«Che ruwachulew lik k'o tzaqib'al pa mak, pero ¡lik toq'o' k'u uwach ri kumin junoq chik chupa ri na utz taj, ma e kape ri q'atb'al tzij re ri Dios puwi'! 2Ma e ne más utz kuya ri katzayab'ax b'i puqul juna nimalaj ka' re ke'em y kak'aq k'u b'i chupa ri mar, chwa ri kumin junoq pacha' wa ch'uti'q#17:2 “Ch'uti'q”: Wa' e kach'a't pakiwi ri na jinta kichuq'ab', na jinta kiwach o ri k'ak' xkub'i' kik'u'x ruk' ri Jesús. chupa ri na utz taj.

Pixab'anik puwi ri kuyb'al mak

3»Lik chiwila k'u iwib' ri'ix. Ma we juna awatz-achaq' ku'an ri na utz taj chawe, chach'a'b'ej upa. Y we xutzelej utzij chawach, chakuyu umak. 4Tob' ne ku'an ri na utz taj chawe wuqub' laj chupa ri jun q'ij y wuqub' laj kolu'tzelej utzij chawach, chakuyu umak» xcha ri Jesús.

5Ek'uchiri' xkib'i'ij ri kab'lajuj e utaqo'n che:

—Nimarisaj la ri kub'ulib'al qak'u'x —xecha'.

6Y ri Qanimajawal Jesucristo jewa' xub'i'ij chike:

—We ta ri kub'ulib'al ik'u'x kak'iyik jela' pacha' kak'iy rija' re moxtasa, utz ne ri' kib'i'ij che wa jun che': “Chumich'a b'i rib' wara y chutika rib' chupa ri mar,” y e ku'ana' —xcha'.

Mi'an nim che iwib' ruma kixchakun pa ruchak ri Dios

7Ek'u ri Jesús xub'i'ij:

«We e la' junoq chiwe k'o juna raj chak kachakun pa ab'ixb'al o keb'uchajij chikop, yey echiri' katzelej lo pa juyub', ¿kib'i'ij nawi che: “Chatokoq, chat-tz'ula chwa ri mexa”? 8¡Na e ta ki'ano! Ri kib'i'ij che e wa': “Chajeqa uyijb'axik ri wa'im y chayijb'a' awib' cha' kaya lo ri nuwa chwa ri mexa. Ek'uchiri' in wo'qinaq chi ri'in, k'a tek'uchiri' katwa' ri'at” kixcha'. 9¿Kutioxij nawi ri patrón che ri raj chak ruma xu'an ri xutaq che? Na kutioxij taj.

10Jek'ula' ri'ix, echiri' i'anom chi ronoje ri ixtaqom che u'anik ruma ri Dios, jewa' chib'i'ij: “Ri'oj xa oj mokom, na taqal ta ko chiqe kayak qaq'ij ma xew qa'anom ri ub'i'im ri Dios chiqe” kixcha'.»

Na e ta k'i ri ketioxin che ri Qaqaw

11Echiri' ri Jesús k'o chi b'e re ke'ek Jerusalem, katajin rik'owik pa ri b'e, ri kujach upa ri luwar re Samaria ruk' ri luwar re Galilea. 12Echiri' katajin rokik chupa jun aldea, lajuj achijab' k'o ri yab'il lepra chike xeb'el lo che uk'ulik yey chinimanaj xetak'i' wi lo che ri Jesús.#17:12 Jewa' xki'ano ma chupa ri Tzij Pixab' kub'i'ij na utz taj kaqib' junoq k'o lepra che ruk' junoq na jinta wa yab'il che. 13Xkijeq k'u kesik'in che, jewa' kakib'i'ij:

—¡Jesús, lal tijonel, choj-juch' ka'n ko che'la! —kecha'.

14Ek'uchiri' xeril pan ri Jesús, jewa' xub'i'ij chike:

—Oj alaq, je'k'utu ib' alaq chikiwach raj chakunel pa Rocho Dios#17:14 Ri Tzij Pixab' re ri Moisés kub'i'ij we junoq na jinta chi lepra che, chirajawaxik kuk'utu rib' chwach jun aj chakunel pa Rocho Dios cha' rire kub'i'ij we utz chik ke'k'ola chikixo'l ri ratz-uchaq'. Lv. 14:1-32 —xcha chike.

Xeb'ek k'ut, y echiri' ketajin chi b'e, xekunutaj che ri kiyab'il.

15K'o k'u jun chike, echiri' xrilo kunutajinaq chik, xtzelej loq y xujeqo kasik'inik, lik kuyak uq'ij ri Dios. 16Xuxukub'a' k'u rib' xe'raqan uq'ab' ri Jesús, xuqasaj rupalaj k'a chu'lew y lik katioxin chwach, yey wa' wa'chi aj Samaria.

17Ek'u ri Jesús jewa' xub'i'ij:

—¿Na e ta neb'a lajuj ri xekunutajik? Yey ri b'elejeb' chik, ¿pa e k'o wi? 18¿Su'chak na xetzelej ta lo rike cha' kakiyak uq'ij ri Dios? Ma xew xtzelej lo wa jun achi yey rire na aj tane Israel —xcha'.

19Xub'i'ij k'u che rachi:

—Chatyaktajoq y chamaja b'i ab'e. Ma ruma ri kub'ulib'al ak'u'x wuk', xatkolob'etaj che ri yab'il —xcha'.

Ruk'unib'al Ralaxel Chikixo'l Tikawex

(Mt. 24:23-28, 36-41)

20Ri fariseos xkitz'onoj che ri Jesús:

—¿Jampala' kak'un rutaqanik ri Dios che ruwachulew? —xecha'.

Y ri Jesús xuk'ul uwach:

—Ri jeqeb'al rutaqanik ri Dios na jinta k'utub'al re kilitajik. 21Na jinta ne junoq kub'i'ij: “¡Ri' k'o wara!” o “¡Le' k'olik!” Ma tape alaq: Rutaqanik ri Dios k'o chi chixo'l alaq —xcha chike.

22Ek'uchiri' ri Jesús xub'i'ij tanchi chike rutijo'n:

«Kopon k'u ri q'ij echiri' lik kiwaj kiwil tob' ne xa juna q'ij che ruq'ijol Ralaxel Chikixo'l Tikawex echiri' kataqan che ruwachulew; pero na kiwil taj. 23Ku'ana k'u ri' e k'o kakib'i'ij chiwe: “¡Ri' k'o wara!” o “¡Le' k'olik!” Pero ri'ix mix'ek, na keb'iternab'ej ta nenare'. 24Ma echiri' kak'un Ralaxel Chikixo'l Tikawex, konoje kakil ruk'unib'al jela' pacha' ku'ano echiri' kayok' ka'n ruxe' kaj y ruwonib'al wa' kuwonisaj ronoje.

25Pero lik k'u chirajawaxik nab'e na kutij ri k'ax y lik kak'aq b'i uq'ij kuma ri winaq re waq'ij ora.

26»Ma jela' pacha' ri xu'an chupa taq ri q'ij re ri Noé, jela' ku'ana pa ruk'unib'al Ralaxel Chikixo'l Tikawex. 27Ma konoje ri winaq kakitij kiwa, kakitij kiya', kek'uli'ik y kekiya ri kalk'o'al pa k'ulanikil. Ek'u ketajin ri' che u'anikil, echiri' xopon ruq'ijol xok b'i ri Noé chupa ri nimalaj barco; k'a tek'uchiri' xpe ri unimal jab' y jela' xusach kiwach konoje.

28Jek'uri'la' xu'an ojertan chupa taq ri q'ij re ri Lot: taq ri winaq kakitij kiwa, kakitij kiya', keloq'owik, kek'ayinik, ketiko'najik y kakiyak kocho. 29Yey chupa k'u ri q'ij echiri' xel b'i ri Lot chupa ri tinamit Sodoma, xpe lo aq' chikaj kajinow ruk' azufre#Gn. 19:24-25; Ap. 14:10 y xekam konoje ri e k'o chupa ri tinamit. 30Jek'uri'la' ku'ana pa ruq'ijol echiri' kaq'alajin uwach Ralaxel Chikixo'l Tikawex, ma taq ri winaq na kakoy'ej ta ruk'unib'al.

31»Chupa k'u ri' la q'ij, china ri k'o lo chwi ri rocho, maqaj lo che uk'amik ub'itaq re pa ja; y china ri k'o pa juyub', matzelej lo pa ri tinamit. 32K'una chik'u'x ri'ix sa' ri xuk'ulumaj ri rixoqil ri Lot.#Gn. 19:26 33China ri lik kutij ri' che na kuya ta ranima' ruk'aslem, ri' e kujam ri chomilaj uk'aslemal chwach ri Dios; no'j china ri kuya ranima' ruk'aslem wuma ri'in, ri' e kuriq ri chomilaj uk'aslemal chwach ri Dios.

34»Paqatzij wi kamb'i'ij chiwe: Chupa la' la'q'ab' k'o ku'ana wi e k'o ka'ib'oq kewar junam; jun kak'am b'i y ri jun chik kaya'i' kanoq. 35O laj e k'o ka'ib' ixoqib' junam keke'nik; jun kak'am b'i y ri jun chik kaya'i' kanoq. 36Pa e k'o wi ka'ib'oq chwa juyub'; jun kak'am b'i y ri jun chik kaya'i' kanoq» xcha ri Jesús.

37Ek'uchiri' rutijo'n xkik'ul uwach, jewa' xkib'i'ij che:

—Qajawal, ¿pachawi ku'ana wi wa'? —xecha'.

Y ri Jesús xub'i'ij chike:

—Lik kaq'alajinik pa ku'ana wi, jela' pacha' kaq'alajinik pa k'o wi juna kaminaq, ma puwi wa' kakimol wi kib' taq ri k'uch#17:37 Wa k'amb'al na'oj e ke'elawi ruk'unib'al ri Qanimajawal lik kaq'alajinik, ma konoje ri winaq kakil wa'. Lc. 17:24 —xcha'.

Currently Selected:

Lucas 17: acrN

Highlight

Copy