Lucas 4

Ri k'amb'al upa ri Jesús

(Mt. 4:1-11; Mr. 1:12-13)

1Ek'u ri Jesús xel b'i che ri luwar re ri nimaya' Jordán yey lik k'o ri Ruxlab'ixel ri Dios ruk'. Xk'am k'u b'i ruma ri Ruxlab'ixel ri Dios pa jun luwar katz'intz'otik. 2Xk'oji' chila' cuarenta q'ij y xk'am upa ruma ritzel winaq. Yey chupa taq wa' wa q'ij na jinta k'o xutijo. Chuk'isb'al k'u re ri cuarenta q'ij, lik xnumik.

3Ek'uchiri', ritzel winaq jewa' xub'i'ij che:

—We qatzij at Uk'ajol ri Dios, chat-taqan che cha' wa'b'aj ku'an wa —xcha che.

4Ri Jesús xuk'ul uwach:

—Jewa' tz'ib'ital kan chupa Rutzij Upixab' ri Dios:

Na xew ta ruma ri wa e k'as ri tikawex;

ma e k'aslik ruma taq ronoje rub'i'im ri Dios Dt. 8:3

—xcha'.

5Ek'uchiri', ritzel winaq xuk'am b'i ri Jesús chutza'm jun nimalaj juyub' y xa pa joq'otaj xuk'ut k'u chwach, ronoje ri taqanik ka'an puwi taq ri tinamit che ruwachulew 6y jewa' xub'i'ij che:

—Ronoje wa kawilo ruk' ronoje ruchomalil taq wa', kanya paq'ab', ma ya'tal kan panuq'ab' ri'in yey panuq'ab' k'o wi china che kuaj kanya wi. 7Kanya k'u ronoje wa' paq'ab' ri'at we kaxukub'a' awib' chinuwach y kaloq'nimaj nuq'ij —xcha che.

8Ri Jesús xuk'ul uwach:

—Chatela chinuwach Satanás, ma jewa' tz'ib'ital kan chupa Rutzij Upixab' ri Dios:

Lik chaloq'nimaj uq'ij ri Dios Qajawxel

y xew Rire chanimaj uq'ij Dt. 6:13

—xcha'.

9Tek'uchiri', ritzel xuk'am b'i ri Jesús chupa ri tinamit Jerusalem k'a chikaj che ruwi ri Rocho Dios y jewa' xub'i'ij che:

—We qatzij at Uk'ajol ri Dios, chak'aqa b'i awib' k'a chu'lew 10yey na jinta k'o kak'ulumaj, ma jewa' tz'ib'ital kan chupa Rutzij Upixab' ri Dios:

Ri Dios keb'utaq lo ru ángeles awuk' cha' katkichajij.

11Katkichap k'u ruk' ri kiq'ab'

cha' na ka'chiqa ta rawaqan che juna ab'aj Sal. 91:11-12

—xcha'.

12Ri Jesús xuk'ul uwach:

—Jewa' tz'ib'ital kan chupa Rutzij Upixab' ri Dios:

Mak'am upa ri Dios Qajawxel Dt. 6:16

—xcha'.

13Echiri' ritzel winaq na xuriq ta chik su'anik kuk'am upa ri Jesús, xel chiri' y xroye'ej na k'u ri' jampala' kuk'am tanchi upa.

Ri Jesús kujeq kak'utun chwi rutaqanik ri Dios

(Mt. 4:12-17; Mr. 1:14-15)

14Ek'uchiri', ri Jesús xe'ek tanchi Galilea y lik k'o ruchuq'ab' ri Ruxlab'ixel ri Dios ruk'. Y xe'ek utzijoxik puwi Rire pa taq tinamit y pa taq raldeas re Galilea. 15Kak'utun k'u pa taq sinagogas y konoje ri ketaw re lik kakiyak uq'ij.

Ri Jesús kopon pa ri tinamit Nazaret

(Mt. 13:53-58; Mr. 6:1-6)

16Xopon k'u ri Jesús chupa ri tinamit Nazaret pa xk'iy wi. Y chupa ri q'ij re uxlanib'al xok chupa ri sinagoga jela' pacha' xex ku'an wi. Xtak'i' k'u ri' cha' karajilaj Rutzij Upixab' ri Dios. 17Y xya' che Rire ri jub'otaj wuj#4:17 “Jub'otaj wuj”: Kil “rollo” pa vocabulario. re ri q'alajisanel Isaías. Y echiri' xujaq upa, xuriq pa kub'i'ij wi:

18Ri Ruxlab'ixel ri Dios Qajawxel k'o panuwi',

ma inucha'om loq cha' ko'lnuya'a ri Utzilaj Tzij chike ri nib'a'ib'.

Inutaqom loq cha' kamb'ochi'ij kik'u'x ri lik e k'o pa b'is,

ko'lnutzijoj keleb'al lo ke ri e k'o chi presoyil,

keb'enutzu'nisaj ri e potz',

keb'enuwesaj lo pa k'ax ri lik kitijom k'axk'olil,

19y ko'lnutzijoj ruq'ijol ri k'utub'al re ri rutzil uk'u'x ri Dios Qajawxel. Is. 61:1-2

20Ek'uchiri' xuk'is rajilaxik Rutzij Upixab' ri Dios, xub'oto y xuya tanchi che ri aj chak re ri sinagoga, y xtz'uyi' chikiwach ri e k'o chiri'. Y konoje lik kakitzutza' pan uwach. 21Ek'uchiri', xub'i'ij chike:

«Wa' wa xinwajilaj che Ruch'a'tem ri Dios, waq'ij xujeq b'i rilik chiwach alaq» xcha'.

22Konoje ri xetaw re, kakiyak uq'ij y lik kaminaq kanima' che ri chomilaj uch'a'tem, jewa' kakib'i'ij: «¿Na e ta neb'a uk'ajol ri José wa'?» kecha'.

23Y ri Jesús xub'i'ij chike:

«Laj ne kab'i'ij alaq chwe: “Kunanel, chakunaj awib' chawib'il awib'. Cha'ana k'u ri' chupa wa tinamit taq ri k'utub'al re ruchuq'ab' ri Dios jela' pacha' ri qatom xa'an chila' Capernaúm” kacha alaq chwe.»

24Y xub'i'ij tanchi wa':

«Paqatzij wi kamb'i'ij che alaq: Na jinta juna q'alajisanel kak'ul chi utz chupa rutinamit. 25Paqatzij wi kamb'i'ij che alaq: Rojertan lik e k'i rixoqib' e malka'nib' e k'o chupa ri tinamit Israel chwach ri q'alajisanel Elías echiri' na xu'an ta jab' oxib' junab' ruk' nik'aj y xpe k'u ri jun unimal numik chupa ronoje wa tinamit.#1 R. 17:1 26Na ruk' ta k'u ri', ri Dios na xutaq tub'i ri Elías ruk' junoq chike wa malka'nib' aj Israel; ma e xutaq b'i ruk' jun ixoq malka'n aj Sarepta,#4:26 Ri tinamit Sarepta na re ta Israel. jun tinamit k'o chunaqaj ri tinamit Sidón. 27Yey ojertan lik e k'i ri k'o ri yab'il lepra chike echiri' ri q'alajisanel Eliseo k'o chupa ri tinamit Israel. Na ruk' ta k'u ri', na jinta junoq chike xkunutajik, ma xew xkunutaj ri Naamán, ri jun aj Siria»#2 R. 5:1-14 xcha'.

28Echiri' xkita wa', konoje ri e k'o chupa ri sinagoga lik xpe koyowal. 29Xeyaktaj k'ut y xkesaj lo ri Jesús pa ri tinamit y xkik'am b'i k'a chutza'm jun nimalaj juyub' cha' kakik'aq b'i pa siwan. 30No'j ri Jesús xa xik'ow chikixo'l y xe'ek.

Ri Jesús kukunaj jun achi k'o puq'ab' jun itzelilaj uxlab'ixel

(Mr. 1:21-28)

31Ri Jesús xopon chupa ri tinamit Capernaúm re Galilea y xujeq kak'utun chikiwach ri winaq chupa taq ri q'ij re uxlanib'al. 32Y konoje lik kakam kanima' che, ma ruma ruk'utunik kaq'alajinik lik k'o uwach.

33K'o k'u chiri' chupa ri sinagoga jun achi k'o puq'ab' jun itzelilaj uxlab'ixel, yey wa' lik ko xch'awik, jewa' xub'i'ij:

34—Jesús, lal aj Nazaret, ¿su'chak ko'lmina ib' la quk'? ¿Lal kami petinaq ri' re ko'lsacha la qawach? Ri'in weta'am lal chinoq, rilal lal ri Santo K'ajolaxel re ri Dios —xcha'.

35Ek'u ri Jesús xuq'atej, jewa' xub'i'ij che:

—¡Match'a't chik! Chatelub'i che la'chi —xcha'.

Ewi ri itzel uxlab'ixel xuk'aq rachi pulew chikixo'l ri winaq y xel b'i ruk'. Yey na jinta k'ax xu'an kan che.

36Y konoje ri winaq lik kakam kanima' che y jewa' kakib'i'ij chikiwach: «¿Sa' chi ch'a'temal wa'? Ma lik k'o puq'ab' keb'utaq b'i ri itzelilaj uxlab'ixel. Keb'utaq b'i ruk' ruchuq'ab' y keb'el b'i» kecha'.

37Che ronoje taq ri luwar k'o lo xa naqaj, xe'ek utzijoxik janipa taq ri ku'an ri Jesús.

Ri Jesús kukunaj ruchu-uji' ri Pedro

(Mt. 8:14-15; Mr. 1:29-31)

38Ek'uchiri' xel b'i ri Jesús chupa ri sinagoga, xopon chirocho ri Simón.#4:38 Wa jun achi Simón, e Pedro rutijo'n ri Jesús. Mr. 3:16; Mt. 10:2 Y ruchu-uji' ri Simón lik kaqopow pa aq'. Xkitz'onoj k'u che ri Jesús cha' kukunaj kanoq. 39Ek'u ri Jesús xyuxi' puwi', xuq'atej ri aq' chirij y jela' xik'ow ri aq' chirij. Na jampatana xyaktaj rixoq y xujeqo keb'unimaj.

Ri Jesús keb'ukunaj uk'iyal yewa'ib'

(Mt. 8:16-17; Mr. 1:32-34)

40Chutzaqib'al q'ij konoje ri k'o kiyewa' ruma uk'iyal uwach yab'il xekik'am lo ruk' ri Jesús. Rire xuya ruq'ab' pakiwi' chikijujunal y xeb'ukunaj. 41Jenela' xeb'el b'i itzelilaj uxlab'ixel chike uk'iyal winaq. Echiri' keb'el b'i, kesik'inik, jewa' kakib'i'ij: «¡Rilal lal Ruk'ajol ri Dios!» kecha'. No'j ri Jesús xeb'uq'atej y na xuya ta luwar chike kech'awik, ma rike keta'am chik Rire e Ucha'o'n lo ri Dios.

Ri Jesús katzijon pa taq ri luwar re Galilea

(Mr. 1:35-39)

42Echiri' xsaqirik, ri Jesús xel b'i chupa ri tinamit y xe'ek chupa jun luwar katz'intz'otik. Y ri winaq xe'kitzukuj. Ek'uchiri' xeb'opon k'a pa la k'o wi, xkaj kakiq'atej cha' na keb'uya ta kanoq.

43No'j Rire jewa' xub'i'ij chike: «Lik chirajawaxik kin'ek pa taq tinamit re kantzijoj ri Utzilaj Tzij re rutaqanik ri Dios chike ri tikawex k'amaja' kakita wa', ma ruma wa' intaqom loq» xcha'.

44Xe'ek k'u che utzijoxik ri Utzilaj Tzij pa taq ri sinagogas re Galilea.

Currently Selected:

Lucas 4: acrN

Highlight

Copy