Exodo 26
26
Pueyaso Secojojua suhuortujiniji pohuatasano
1Cua quiquiora quia jeenucuatajara lino quia tacoretare. Quiaari tariucua tacoretasano shiyorohua toqueyara. Cuno toqueya cuaara quiiria diez toqueya tucuaqueya, cua quiquiojinia tunujusocoriquiano tii jaasucoriquiano. Quiocua sereretuqueyara na shiyore, maninia na niquishaanura: nenetiuhuata, neeriuhuatajuhuaj, jiyanohua naatiuhuatanio. Cuno toqueya quia shitiasacari, quiocua nocua nujuatejore cua seya nesuhuaraca naaquiyajuhuaj.
7Naajuhuaj, quia shiyore once toqueya cabra cajacajiniji. Cunoori cua quiquio caco teetejosocoriquiano. 8Puetunu nio shiyosano toqueyajanaa cuaara quiyaquiiria rimiajatuqueya. Cuno toqueya cuaara quiiria trece metro socua na cajiniocua na tucuaqueya. Na cajiniocua shanacusano cuaara jiitiaara querajaa metro. 9Naajuhuaj, cinco toqueya jatiqui quia quiare. Quiaari nitiootaca cusupuereequinioj. Quiocua naa cusupuere nitiootaca socua seisjuhuaj. Saniniuujia quiocua cuno sexto toque mariquiore cuno cua quiquio jiuucuaji miishiquioriquianoni. 10Naajuhuaj, quiocua cuno toque casaca cuhuocojore cincuenta cuhuococua. Quiaari naa cuhuocojonu pacuterohua cureeno toque nacatu. Suhuortura quia tunujusano naacuneetooseequiaa maniniacua. 11Naa quia miiniu nuhuajitij, quiocua broncejiniji shipinishano casaa tasucutejorohuajuhuaj quia cuhuocojosanojiniji quia tunujusocoriquiano toqueya nacatucua quia coqueetejotajara. Naacuatej, cuno toquecua juhua niquiquijia teere cua quiquio caco.
14Cua quiquio caco mishiquiotajara quia cusupuere borreecohua shoqueya naatuucara jatanishano. Naajuhuaj, quiocua juusucua shoqueya maniniu cusupuere na caco teetesocoriquiano maninia na niquitiajara.
15Acacia jiyanishano naana quia jiaqueerejuhuaj cua quiquio jeecatajara. Maninia jacananeecacua quiri, maja shuutiuniiquia. 24Cua quiquiorano quia suhuorosacari quiocua cuno naana neeca rupuetootere maninia. Majaari rimiajatara na rupojonu. Jaara rupojosaare, maninia naacuneetooseequiaa cumaati na saacora. Maja mijiriqui. 30Naacuatej, cua quiquiorano quia suhuorore maninia taa quia niquitishaacanu Sinaii tuhuananujiniji quia quishacaricuajani.
31Cua Quishaquijianaa mishiquiotajara quia shitiarejuhuaj tacoretasano neeriuhua, nenetiuhua, naatiuhue, lino jiyanishano jiyasocua tacoretasanojaajanio. Cuno toque quia shitiasacari, quiocua nocua nujuatejore juhua cua seya niquishano nesuhuaracaja. 32Na nuhuaji quiocua na tunure orojiniji tasucotejosano casaajiniji cuno cuatro acaciajiniji quejasano nujuatejosanojiniji. Cuno acaciajiniji nujuatejosano cuaara orota mishiquiojosano quiiria. Cuno na nujuataja cuaara quiiria saaja platajiniji miishano casaa. 33Cuno quia shitiasano toque cua Quishaquijianaa quia mishiquiotajaranoni, cuno quia tunure quia tasucotejosanojiniji. Naa quia tununu nuhuaji quia shitiasano toquetej, quiocua na tamajiria niatarohua cua quijia cojee. Cuno toqueni, cunoori tojetaarucuajanaa jiyanohua pueresaqui quiquiojiniji niaacuaji ritiariquiano. Cunoori cua quijiacuaja. 34Na nuhuaji quiocua cuno cojee mishiquiorohua na tiootiutia cua Quishaquijianaajinia. 35Quiocua toqueta quia mishiquionucua tacoji niatare pan niojojua miaqueja, pananu muetasamaji miaquetajaacuara. Naajuhuaj, quiocua pananu muetasamaji muenecaacuara niatare samari noshiquiojua, pan niojojua tacoji.
Currently Selected:
Exodo 26: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
