Geenesis 11
11
Pueyaso cushitiosacari pueya rupaa
1Noee nuhuaji, pueyari jiyanohua canequiaari. Jiyacaritij, puetunu mijiria quijiaca pueyajanaari saaja niquiriyatu rupaa pocuajaca quijia. 2Nojori pacusacari jiya pajamaji tamaquiria, Sinar jiyanishano jiyajinia riuriatatuquiaari puereetuuca maninia jamatuuri. Puetunu pueyajanaari tii cutequiaari. 3Jiyacaritij, tama nojorijaarijia naa sequetooquiaaritij:
—Mara saariatuu pa majeetejore pa quiquiorano pa tiojotajara.— Naacuatej cuno pueyari nojori majeetejosano saariatuuta tiojoquiaari. Majaari na tiojotunu quiquiaari saitia. Pueya jiitiaaquiniuucua rupueeca casaa, naacuatej nojoriiri roshi tuujutaja na majeetejotusano saariatuu na rupojotujuara. Cuno roshiiri na cajitiajajiniji taquirioosano quijia. 4Na nuhuaji, tama nojorijiaarijia naa numootejotooquiaaritij:
—Pa tiacara pa tiojore. Pocua na nuhuaji noojiajinia juhua naajiu querejura nujuariquiano poonijiorohuani. Pocua jiyanohua jiyaconajara na tacanirinioj. Jiya cajiniocua tohuariquiimiaari. Na nuhuaji, pocuajinio caneriquiano pueyari naa pa poonijiosano na niquitiushacari jiuujiatecoriquiano. Naacuatej, paa jaara naa miirini, majaari tari pa niyaquejonu quiniutianiya tiquiyocua puetunu jiyajiniajanaa.
5Jiyacaritij, Pueyasoori cuno pueyapueecua rosequiaari. Pueya tiaca niquishiiri. Tiaca jiuujiajinia juhua naajiu quereju cuno pueya nujuatesano niquishiijaariuhuaj, teyano nojori poonijionuuriquiaacuajani. 6Pueyaso niquiniuucua naa mariyataa jatiqui cuno pueya poonijionuunutej, tama nojuajaarijia naa noojiajinia niishiriojoree:
—¿Taa cua miyacuaani? Nio pueyapueeri queraatia pueya quijia, niquiriyatu rupaa pocuajacajaariuhuaj. Nojoriiri cunora coteerucuaa puereetuuca nojori quiquiora tiojonu. Juhua naajiu quereju tiaca jiuujiajinia nujuariquiano poonijiotiuyajaariuhuaj. Janiyacuajaari niishiyani, cuno pojoriiri maja na cartetunu quiniutianiya nojori poonijiosano, cuaara na tucuatatuurajaatijia. 7Cuno pueyapueecua pa rosetaarequij. Pocua nojori rupaa cushitioseeni, majaari quenaaja narta pueyano niishiniuria casaa narta pueyano sequeyanoj.
8Pueyasoori naacua cuno pueya niyacaquiaari puetunu tiquiyocua nio jiyacajiniajanaa. Naa cuno pueyapue cushitiiniuucuatej, majaari tari na tucuatatunu quiquiaari nojori quiquiorano nojori poonijiosano juucua. 9Pueyasoori cuno jiya jamatujinia naa cuno pueya rupaa cushitioquiaari. Naacuatej, cuno tiacaari Babelta jiyaniquishaaquiaari. Cuno jiyajiniji Pueyasoori pueya niyacaquiaari puetunu jiyacajiniajanaa.
Secaja pohuatasano Teerah niquiohuajiniji
(Geen 11.27-32)
[Sem niquiohuacuajinio caneno quijiaari Teerah. Nioori Teerah niquiohua sesaca: Abram, Nacor, Haraannio. Haraanri niyanuraca quijia cutara. Nojuajaari Lot quijia. Abram saniniuujia, nojuajaari Sarai riquiaari necora. Nacor jiyanishanoori tarajanu Haraan niyatu riquiaari necorajuhuaj. Na sesaari Milca quijia. Abram niquio Sarai saniniuujia, nojuajaari niyajaru quijiaaja. Jiyacaritij saaquiano Teerahri na quijia Caldeo jiyajiniji pacuquiaari juucua Canaan jiyajiniara. Abramri na queta quiaquiaarijuhuaj, neco Saraijaajanio. Teerah jinianu Lotri nojoritia quiriquiaajuhuaj. Nojoriiri nuu cajiniocua tiuquishiiquiaari Haraan jiyanishano tiacajinia. Nojoriiri tii quishii. Saaquiano Teerahri tii shaajeseequiaari.]
Currently Selected:
Geenesis 11: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
