Geenesis 18
18
Pueyaso sequesacari Abraham Saraari seetanujuanaa neyanu muetunutaniya
1Pasanaataja cuno nuhuaji, Pueyasoori Abrahamcua muetaquiaari Mamre jiyanishano nacuhuajinia. Abrahamri jiyacari na suhuortu tohuateyaji cajiriquiaa panacari juucua. 2Na mausacari, saaja jiuujianaraca canuu niquirii na taquijiria nujuatiuyanoori. Abrahamri maja na niishiniu quiriquiaa niquiriatu cuno pojorijinijinioori Pueyasojuanaa quiriquiaa. Abrahamri ritia sanequiaari nojoriicua. Nojoriicuara mojoquetareeri. Jiyocuara na nanishacari na jiniji rupueteree jiyocuaari. 3Naa cuno pueya sequereeri:
—Cua camarnunaa, cua tojiriucuara quenaaja, maja ritia cua shocotunuujua. 4Niaa jaara paniri, niaara sequereeraj mohuaca cuaara patasaaria niaara nia niohuaca nia shiniajatajara. Niocua na nuhuaji rupaquijia nio naanacari shinishiqui samaaterohua. 5Cucua nia tiuquiniuucua niya cua quijiajiniani niaara patareeraj casaa nia miaquesocoriquiano, nia cuaqueya nia cumaquitiajara niiquiji nia quiaaquishacarijia. Niocua miaquenu nuhuaji panaatia quiaari cutara.
Cuno pojoriiri naa Abraham riucuaree:
—Maniniacuaja, canaa sashiriiriaquij.
6Abrahamri na suhuortujiniaaco tiuquiquii. Naa neco Sara sequereeri:
—¡Ritia quia miiri pan veinte kilo cashojua maniniujiniji! Quiocua ritia na majeetejorenoj.
7Na nuhuaji, Abrahamri na seesano juyacaacua neteyaree. Maninia macujuashi, socua querasapiquia saquiriojoree na mosocoriquianoori. Nera pueraquena pueyano na seeratareeri. Cuno pueyanoori na majeetejoreea ritia, nocua tiuquinio pueya na mianuutesocoriquiano. 8Abrahamri maja saaja juunu shu na mianuutenu quirii cuno pueya. Juunu quitiaaca cumanijiasano nojori nujuaatiriijaariuhuaj. Naajuhuaj, juunu quitiaaca nojori raatojoreejaariuhuaj. Abrahamjanaari nocua tiuquinio pueya nujuanuriquiaa nojori na mianuutesacari naana cari.
9Cuno pojori miaquenu nuhuaji, naa Abraham nequesotatureeri:
—¿Teeteja quia niquio Sarani?
Abrahamri cuno pojori sequeree:
—Niya suhuortujiniaaco quiyano.
10Niquiriyatu cuno jiuujianaraca pueyanojinijinioori naa Abraham sequeree:
—Tamonu marijiaara cua tacatesacariuhua, janiyari tariucua mueyaraca riuriatanutaniuhua quia niquio Sarani.
Saraari jiyacari Abraham nijiniji suhuortu tohuateyaji tojiriquiaa puetunu cuno pueyano sequesanojuanaa neyaca Abraham. 11Jiyacaritij, Abrahamri tariucua jiyanohua saaquiano quiriquiaa, neco Sarajuhuaj. Motaja na quiniuucua, Saraari maja tari na naatiyojonu quijia. 12Saraari cunora moniriquiaa. Sanaa sorequequeeri naa na niishiriojosacari: “¿Janiyatucua taa muetutasurejaarani motajaniqui? Cua niyacaari tojetaarucuajanaa saaquianojuhuaj.”
13Jiyacaritij, Camarnuuri naa nequesotaree Abrahamtej:
—¿Casaa quia niquio Sara sorequetareeni? ¿Saaja cua sequesano cuaracashitiyateeruhuari? 14¿Casaateeri jiyajeneta Pueyasorani? Tamonu marijiara quiocua cua tiuquishacariuhua, janiyari tariucua mueyaraca riuriatanutaniuhua Sarani.
15Naa Sara tojishacari Camarnu sequesanotej, shiriiquiriiri. Cunora juucua na sorequenujiniji seetareeri. Naa sequereeri:
—¿Janiyatee sorequereejaarani? Maja cua sorequenuni.
Camarnuuri saa na riucuareejaa:
—Janiyacuajaari niishiyani quiaacuajaari sorequeree.
16Jiyacaritij, cuno jiuujianraca pueyari Sodoma tiacajiniara naquerejonuuriquiaa. Naacuatej, nojoriiri miaquenu nuhuaji, sanetarohua. Sodoma tiacajiniara quiojiyareeri. Abrahamri rupaquijia nojori nuhuaji sacuaquiaari. Nucuama nojori jatarucuaari.
Sequeja pohuatasano
(Geen 18.17–19.3)
[Cuno jiuujianaraca pueyajinijinioni, niquiriyatu nojorijinijinioori Pueyasojuanaa quiriquiaa, caapiqui na seyanio. Pueyasoori coteenu nocuaji pueratequiaari na seya Sodoma tiacajiniara, Lot nojori numootenura nocuaji. Pueyaso seyari cuno tenacarijia tiuquishii Sodoma tiacajinia. Lotri jiyacari cajiriquiaa Sodoma tiacajiniara tiuquitiaja sohuaca tohuateyaji. Sodoma tiaca shocuaari saitia matacosano quijia, jiyaconajatej. Lot jaara niquiquiaari Pueyaso seya cuno tiacajinia tiuquitiaano, nojuajaari na tiacora na masuuquiaari na tiajinia nojori maquenura.]
Currently Selected:
Geenesis 18: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
