Geenesis 37
37
Joseejiniji pohuatasano
1Jacobri Canaan jiyajinia jateequiaari quiniuriajuhuaj, tee na shipininio jateequiaari quiniu rupaquijiacuajani. 2Nioori Jacob niquiohuajiniji pohuatasano.
Josee jaara tariucua diecisiete marijia shocotejonu quiquiaari, nojuajaari jaarajaaja tapueyocuacata cojuaja na que seya borreecohua. Cuno tapueyocuacaari na que niquiocohua Bilha Zilpa niquiohua quijia. Mashaja Josee saniniuujia, nojuajaari na queecua tacatejohua na que na pohuatanura sesa tapueyocuaca miijiosanojiniji.
3Israelri socua panijia neyanu Josee tamasaca necohuajiniji. Naa Josee panijiaari tariucua saaquiano na quishacari nera necocua ranuucua neyanuniyojua. Naacuatej, Israelri neyanu Joseera shitiatequiaari toque maniniu. 4Tapueyocuaca niatanuucua na queeri socua panijia Josee puetunu nojorijinijijanaa, tapueyocuacaari naacua jiyanohua na juaatiujia noojiajinia. Majaari na niquitiuniu paniniu quijianoj. Majaari juhua coteenujua tari na saruhuatatunu quijia Josee.
5Tamacari Joseeri na maquenujiniji pohuataquiaari tapueyocuaca. 6Joseeri naa sequequiaari tapueyocuacatej:
—Sanajooriniaa, cua maquenujiniji nia pohuatareeraj. 7Cua maquenujinia, puetunu pajaniyajanaari cuhuariquiajinia poonijionuuriquiaani. Paari na nujuatacosaquijia trigo coqueetejoriquiaa pa morojotasocoriquianoni. Naa pa morojotanu nuhuaji trigotej, cua casaari sanetaquee. Jiyacojiria nujuatariquiaari. Nia morojotanucuaca saniniuujia, nujuataano cua mortanucua shocua rerequeeseeri. Jiyacari cua mortanucua trigoocuara nanitiacoreeri.
Nojuajaari naa socua jiyacatojoquiaari tapueyocuaca juaatiniu nocuaratej.
8Tapueyocuaca tojishacari naa Josee pohuatasanotej, naa na sequetureeri:
—Naa quia pohuatanuucua mosaatia quia maquiyojonujinijitij, ¿quiaateeri canaa sequenu paniyaruhua quiaari canaa camarnu quiriquiano? ¿Quiaari quia cumaaca canaa tojitiriquianojuhuaj? Maja maquiyojorunaa, quiaa najuhuana mosaatia pocuaaquij.
Tapueyocuacaari socua juaaquiaari Josee, naa na maquenujiniji nojori na pohuatanuucuatej.
9Cuno nuhuaji Joseeri socua maquiyojoquiaari. Tapueyocuaca na pohuatareejaariuhuaj. Naa nojori sequereeri:
—Sanajooriniaa, janiyari socua maquiyojorohuacuaa pananuni, racajuhuaj, once riyajaajanio. Nojoriiri cucuara cua tacoji jiyacuara jacamaturiquiaa na saruhuatanura janiya nojori camarnu cua quiniuucua.
10Josee jaara naa na maquiyojonujiniji pohuataquiaari na quetej, tapueyocuacajaajanio, na queeri na juaarii. Naa na sequereeri:
—Naa quia maquiyojonuucuaniquitij, ¿Casaa canaa quia sequenu paniyarinitioj? Quia nucua, quia tapueyocuaca, janiyajuhuaj, ¿canaateeri quiocuara jacamaturiquianoni canaa saruhuatanura quiajaniya canaa camarnu quia quiniuucua?
11Tapueyocuacaari naacua tamajaaja sequetooquiaari na jiaatianutatej, “¿Joseeteeri taquiya pa camarnu quiriquianoni?” Na que Israel saniniuujia, nojuajaari jiyanohua niishiriojojua naa neyanu maquiyojonuucuatej.
12Tamonu juuca, Josee tapueyocuacaari Siquem tiacajinia jiyataquiaari na que seya borreecohua, tii nojori na mianuutenura jiyasocua. 13Na nuhuaji, saaquiano Israelri neyanu Josee sequequiaari:
—Quiyanunaa, quia tapueyocuacaari quiarijia cua seya jiitiaa Siquem tiacajinia. Nojori quia niquiquioo, casaa na miiquioyajanojoni.
Joseeri naa na que riucuareequij:
—Taaquiriirinij nojori niquiniuucua quianutaniyacuajanijia, cua quenaa.
14Israelri Josee sequeree:
—Ritia quia quiaare quia tapueyocuaca niquiniuucua, cua seyajaajanio, taa nojori quiyani. Quiocua ritia tacatemohua cua pohuatanuucua nojorijiniji.
Israelri neyanu Josee jiyaroquiaari Hebroon tiaca jamatujiniji, Siquem tiacajiniara tapueyocuacaacua. 15Joseeri Siquemjinia tiuquishii. Tapueyocuaca na pajesacari, netecuariquiaari. Saa shaaja. Tamonu pueyanoori na naacuquiaari. Naa na nequesotareeri:
—¿Casaa quia pajeyani, quiaa nocua neteyocuaani?
Joseeri na riucuaree:
16—Cua tapueyocuaca pajeyanijia. ¿Majatee quia niquiniu quiriiquinioj tee cua que seya na jiitiatiuyani?
17Cuno pueyanoori Josee sequeree:
—Niya quitiuriquiaano. Tamaqui na seya jiyatatiuyareenohuaj. Sequeturiquiaaruhuatijia, “Dotaan tiacajinia pa quiaarej.”
Joseeri tapueyocuaca nuhuajiquiaari. Nojori riuriatasee Dotaan tiaca shuriucueari. 18Tapueyocuacaari tucuacaanuji nojoriicua niyano na niquitiurii. Na catecanoyaquishacarijia, tapueyocuacaari tama sequetooquiaarijiaaja nojoriiri na monutaniya. 19Tama nojorijiaarijia naa sequetooquiaari:
—Nia niquiri, mosaatia maquiyojoru cumaji pocua neteyani. 20Miji, moseeca seque pa more. Pocua pa mosano jatarohua raamani. Pocua na nuhuaji pa que pohuatasuhuani sarequi Josee sarucuaa. Naa pa miiniu nuhuajitij, pocua moseeca maquiyojosano shanacurohuani ¿seetanujuanaa tohuatenutaniyatejanojoni?
21Nojori saaquiano Rubeen jaara tojiquiaari naa tapueyocuaca pocoyanotej, nojuajaari juucua Joseecuaji tacunu paniriquiaa. Cunora naa tapueyocuaca sequereeri:
—¿Casaara na moshiyajanojoni? 22Majaari puereeta nanaca shootetunuujua. Maja naa miitiuniutij. Nareja nia saniitiore cutara. Nia quiarenoj. Niocua nio tariucuacaanu mohuacara jiuuriaa joojuaa raama na jatare nio cariiquia jiyajinia caneyani. Majaari na motunu cutara.
Nojori saaquiano Rubeenri naa sequequiaari tapueyocuacatej, tarajanuucuaji na tacusacari juucua. Rubeenri paniriquiaa tarajanuniyojua riujiuuniuhuara juhuajaniya na queecua.
23Joseeri tapueyocuacaacua tiuquishii. Jiyacaritij, nojoriiri na tucuaque toque jocuaturee. 24Tarajanu quiatureeri. Raama na jatatureeri. Cuno raari tariucuacaanu mohuaca quiquio quijia. Jiyacari namitia joojuaa quiriquiaari. 25Naa tarajanu na miitiuniu nuhuajitij, cajitiuriohuari. Juhuajaniya miaquenuurohuari. Rubenri jiyacari tapueyocuacaacuaji rupatequiaari tamaquiria rupaquijia.
Jiyacaritij, nojoriiri pueya niquirii nojoriiquiumia quiaano Galaad jiyajinijinio. Camellohuaracaari quiriquiaa. Cuno pueyari Ismaelcuajinio caneno pueya quiriquiaa. Cuno pojoriiri Egipto jiyajiniara quiariquiaa cumaneecara nojori niquitiojonura tii nojori casami. Camellohuari cuno nojori casami canujuhuatanuuriquiaa. Cuno casamiiri quiquiaari shanohua jaanutaja, balsamojuhuaj, mirrajaajanio. 26Jiyacaritij, Judaa jiyanishanoori naa sequeree tapueyocuacatej:
—¡Sanajooriniaa! ¿Paateeri maninia miiniutianiyajaarani, paa jaara tama pa tarajanujaaja moreni? Paa jaara na moreni, paari saaja naa sacuaraatia pa miishanojiniji seetanutaniya saajaaraniuhuaj. Maja maninia naatej. 27¿Paatucua taa more pa tarajanucuarani? Nareja pa cumaneecara pa niquitiore juhuari cuno Ismaelcuajinio caneno taucuaca, Egipto jiyajiniara quiojiyani. Paatucua taa tacaretarecuara tama pa tarajanujuaaja monuni.
Naa Judaa sequesacari tapueyocuacatej, nojoriiri naa maninia na niishiriojosano timitiaturee. 28Naacuatej, na casami niquitiojonuucua quiojiyano Egipto jiyajinia taucuaca jaara quiamaquiaari nojoriquiumia, tapueyocuacaari Josee jaatiuquiaari raamaji. Nojoriiri jiyacari tarajanu niquitioturee cuno taucuaca. Na tarajanu sami maseturee platajiniji shipinishano veinte cumaneecaari. Joseeri naa rishaaquiaari Egipto jiyajiniaratej.
29Na nuhuaji saniniuujia, Rubeen jaara tacatequiaariuhua, tii na niquiniuria tarajanu Josee, majaari tari na riuriatanu quiquiaari. Naacuatej, Rubeenri quera na macaaniutia na toque sureeree. 30Naa na miiniu nuhuajitij tapueyocuacaacua neteyarohuari. Naa nojori sequesuhuari:
—¿Taa mashaja miirii raamajiirini, juhua shaaquiriuhuatej? ¿Casaa cua miyacuaani?
31Jiyacaritij, tapueyocuacaari Josee tucuaque toque ritiurii. Nocua shiijiotaturee na motusano cabra niquiojua nanacaari. 32Naa na miitiuniu nuhuajitij, na queecua cuno toque jiyarotatureeri. Naa na rupaa jiyaroturee na queecuaari: “Canaa quenaa, nio toque quia niquishuriniaja. Canaa pa seya miaquenuujua cuhuariquiajinia na riuriatareeni. ¿Majatee quia niyanu Josee toqueni?”
33Saaquiano Jacob jaara niishiquiaari neyanu toque, naa sequereeri:
—¡Taaquiriirinij, quiyanu toquecuaaquiniatejaj! Nacujiniaaco quijia casaaqui quiyanu sarucuaa. Sesaacaquiiri na miaquesocoriquiano quiyanu sureeree.
34Jiyacaritij, Jacobri quera neyanuucua na macaaniutia na cushishano toque sureeree. Na nuhuaji na taraajenucujutaja toque cushiriohuari. Nojuajaari pueyaracaanu neyanuucua nujuquejoquiaari. 35Necohua, necojorijaajanio, nojoriiri juucua na que sanaajojua. Jacobri saaja ruuretaquiaari necohua, majaari na paniniu quijia necohua cajitiniuria noojia. Naacuatej, Jacobri naa sequequiaari necohuatej:
—Nareja cua niquitiuri. Tama sariyocojiya quiyanuucuajaajanijia.
Jacob nujuquejosacari, nojuajaaja naa sohuarejotajatej: “Janiyari pueyaracaanu quiyanuucua sariyocojoriquiano juhuanani, janiya cuaara na coqueseejaatijia cua shaajesacari.”
Currently Selected:
Geenesis 37: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.
