Nuumero 14
14
Israel pueya ruuretasacari Camarnujuanaa
1Naacuatej, puetunu Israel pueyajanaari sapueree. Puetunu cuno niucuajanaa sariyocuatureejaariuhuaj. Nujuquenuucua juhuaquetureeri. 2Jiyacaritij, puetunu cuno pueyajanaari sacuaraatia riushujiutiaturee Moisees, Aaroonjaajanio. Nojoriiri naa pocooreequij: “Casaama tari pa cusojuanuucanunij, Egipto jiyajiniaja pa quishacarijia, cariiquia jiyacumaji pa nishacari maaraja. 3¿Casaacua Pueyaso puetacanu pajaniya nio jiyajiniajaarani pa paraa na miaquejotenura pajaniya, pa niquiocohua pa niquiohuataja quioosaanura seyara, naatejaaratej? ¡Egipto jiyajinia pa riujiuuriohua juhuari!”
4Tama nojorijiaarijia jiyacari naa sequetooreequij: “Niquiriyatu pajaniyajinijinio pa camarnurano pa jiyaterej. Nojuajacua Egiptojiniohuara pa riujiuutiarohua.”
5Puetunu tii narta pueya niquiarajani, Moiseesri tarajanu Aaroonta jiyocuara jacamaturee narta pueya nojori pueretunuucua. Na jiniji rupueteturee jiyocuaari. 6Josuee, Caleb saniniuujia, teyonu pojoritiucuaja jiya manujunuucua quiojoquiaarini, nojoriiri jiyanohua na taraajenuta tama nojori cushiquiya toquejaaja sureeree. Naa na toque sureetureeri, sacuaraatia narta pueya rimiaaquenu nojori tojiniuucua. 7Naacuatej, nojoriiri naa sequeturee puetunu narta Israel pueyajanaatej:
—¿Casaa nia taacanuutaajaaranij? Noo jiya canaa na manujunuucua quiacanutej, cuno jiyari tojetaarucuajanaa jiya maniniu. 8Pueyaso jaara pa naacure cuno jiyajiniji pa miaquejonura pa paraa, jaara pa naacure cuno jiyajinia pa tiuquitianurajuhuaj, Pueyasojuanaari socua pa jiyarano pa niquitionutaniyaquinioj. Cuno jiyacuajaari tojetaarucuajanaa jiya maniniu. Puetunu miasanojanaari tii morijia maninia. 9¿Pueyanaa, casaara Pueyaso nia ruuretaajaarani? Majaari cuno jiyajinia quijiaca taucuaca pueretunujuhuaj. Tuma quiriquiano na jiyaninioj. Pajaniyajanaacuajaari nojori puecariquianoni. Cuno taucuacaari cojuanaaju, nocuaji tacunaajujaariuhuaj. Pajaniya cutaraari pa naacuriquiano pa Pueyaso jiitiaani. ¡Naacuatej, maja puereconu!
10Tojiyashijiaca narta pueya quiniuucua, nojoriiri saaja saitia jacunu panirii Josuee, Calebjaajanio. Jiyacaritij, Pueyaso shacantuuca cumaacaari Pueyaso secojojua suhuortujinia niquishaaree. Puetunu Israel pueyajanaari na niquiquiaari. 11Pueyasoori jiyacari naa Moisees sequereequij:
—¿Taacari nio pueya tarinitianutaniya naa sacuaraatia na samiritiatunu janiyarinij? ¿Taacari na tarnitiatunutaniya cucuaji na taacanuutunuurinij? Janiyaquiiri najuhuana cua cumaacata nocuaji jiuujiatesano casaa miijiono nojoririani. 12Naacuatej, janiyari nojoriicua jiyaronutaniya pacunujujua cusonuni. Cuaara cuno cusonu puequetatuura maja nojori tiuquitianura nojoririano cua niquitionu panishano jiyajinia, na camaruhua nojori quiniuria. Quiocuajinio caneno pueya saniniuujia Moiseesna, janiya cutaraari nojori canijiariquiano jiyanohuani. Nojori cutaraari socua nio pueyajiniji cumaacaraca quiriquiano, na paraa miaquejojuaca cutarajuhuaj.
13Moiseesri jiyacari saaja naa Pueyaso riucuaree:
—Tama quiajaniyajacuajaruhuate nio pueya jaatiano quia cumaacata Egipto jiyajinijiti. Quiarijia saniniuujia, Egiptojinia quijiaca taucuaca jaara nio niishiri taa quiarijia nio pueya quia puecoonu paniyacuajanij, nojoriiri quia rerequeteriquiano. 14Nojoricua Canaan jiyajinia quijia taucuaca caminiujiuri quia pueya quia puecoonujiniji. Canaa paraa taucuacacuajaari tari niishiya quiajaniyajanaa canaa Pueyasoniqui, quiajaniyajanaacuajaari nio quia pueya cojiyacuaja. Cuno taucuacaari niishiyajuhuaj, quiaanaari pueyano jiriquioquiaa catecaji quia pocoojonura nata. Cuno taucuacaari niishiyajuhuaj, quiaari pueyaracaanu canaa caco tiuuquiaa juhua cohuaja najacaja. Nojoriiri niishiyajuhuaj, juuca canaa quia puetasacari quiaari cohuaja najacara jataquiaa. Niucua saniniuujia, quiaari maniria jataquiaa canaa quia cuhuatanura. 15Naacuatej Pueyasonaa, quiaa jaara quiarijia pueture puecoonu nio quia pueyaniqui, tamonu jiyacajinia quijiaca taucuaca, quia cumaacata quia miijiosanojiniji niishijiacaari naa sequeturiquianotej: 16“Pueyasoqui maja na naata tiuquinitianu quiquianu na pueya Canaan jiyajinia, seetanujuanaa na sequesano cuno na pueya na niquitiosocoriquianotej. Naacua niya nio cariiquia jiyajinia nojori puecoorucuaari.” 17Naacuatej Pueyasonaa, quiarijia quia cumaaca quia pueya quia niquitiri. Quiaacuajaari naa canaa sequenotej. 18Tama quiajaniyajacuajaari canaa sequeno, quiaari ritia juayaquijia. Quia paniniuuri pueetaaquijia. Quiaari puetunu sesa miiniujianaa jiyanoojia, quia ruutetajacajuhuaj. Quiaari sesa miijia saniitioriquiano cutara. Quiaari pueya miijiosano sacuaraatia tiuutiariquiano nio pojoriicua: necohuacua, na jiuhueacua, na jiuhuea niquiohuacua, na jiuhuea jiuhueacuajaajanio. 19Quia paniniucuajaari tojetaarucuajanaa puequeyaquijia. Naacuatej Pueyasonaa, sacuaraatia nio quia pueya miishano quia jiyanoori. Egipto jiyajiniji canaa quia jaatianujiniji, quiaacuajaari tari pueyaracaanu canaa rejeretarucuaa cariiquia jiyacumaji canaa nishacari niyara.
Pueyaso saniitiosacari na Israel pueya
20Pueyasoori naa Moisees riucuaree:
—Maniniacuaja, janiyari puetunu nojorijianaa jiyanooniutianiyani taa nojoriicuara quia maseree janiyacuajani. 21Saniniuujia, nio nia niishiri cutara: seetanujuanaa quijiajuhuanaja cua quiniuucua, naajuhuaj, shacantuuca cua cumaaca quiniuucua puetunu jiyajiniajanaa, majaari cua sapojonu. 22Naacuatej, noo pojori, Egipto jiyajinia cua cumaacata cua miijiosano niquitiuniotej, cariiquia jiyajiniajuhuajj, noo pojorijuhuaj cariiquia jiyacumaji pa nishacari cua pacutejotuquiaari nojoriicuara cua najiquititiuniotej, noo pojorijuhuaj nojoriria cua sequesano samiritiatuno saajatej, 23puetunu nojorijianaari nojoririano cua niquitiosocoriquiano jiya niquitiuyaquiriquiano. Janiyacuajaari tariucuacaanu nia supuetanaa sequenoni, cuno jiyacuajaari niaarano cua niquitiosocoriquiano cua sequesano. Naacuatej, puetunu cua ruuretajacajanaari maja quenaaja na niquitiuniu quiniutianiya cuno jiya.
29Naacuatej, noo pueya, teyonu pojoritiucuaja tariucua veinte marijia shocotejonuni, nojori sesacacuajaari tariucua nequesoreetujinia naajiotasano quiya. Puetunu cuno pojorijianaacuajaari sacuaraatia rimiaaquecono cucuara. Puetunu nojorijianaari cariiquia jiyajiniaja nojori camarucuneetasacari cusonuuriquiano. Nojoriiri naa moquecoriquiano cariiquia jiyajiniatej. Naacuatej, noo pojori na sesaca tari naajiotasaaquiaari nequesoreetujiniatej, puetunu nojorijianaari cusonuuriquiano sacuaraatia nojori rimiaaquenuucua cucuara. Nojoriiri naa jamojosaariquiano tiquiyocua nio cariiquia jiyajinia. 30Caleb cutaraari Josueeta cuno jiyajinia tiuquitiariquiano. Niajaniya saniniuujia cua riushujiutianuujuacanaa, janiyari nia niquitionu paninio juucua cuno jiyani, na camaruhua nia quiniuria. Saniniuujia, niquiriyatu niajaniyajinijinioori maja quenaaja cuno jiyajinia tiuquiriquiano. 35Janiyajanaacuajaari Pueyasoni, janiyari naacua seetanujuanaa sequeyaquij: Janiyari quiarijia naa nia miiniutianiyani cua tojitiaashijiaca pueyanaa. Niaari cucuara coquetoorucuaa mariyataa jatiqui nia ruuretatunura janiya. Naacuatej, niojuanaari nia quiniu. Niaari nio cariiquia jiyajiniaja puequeriquiano.
Na paraa shocotasacari Israel pueya
39Moisees jaara naa Pueyaso sequesano caminiujiuquiaari narta Israel pueyaratej, puetunu cuno pueyajanaari jiyanohua taraajecoquiaari. 40Jaara juhuaquequiaari, puetunu Israel pueyajanaari tariquiicuaji sanetaquiaari. Nojoriiri jiyaconaja tuhuananuhuacua tacataquiaari. Jiyacari naa sequetureeri:
—¡Paacuaja tari niya quiyani! Pueyaso niquitiosocoriquiano jiyajinia pa tiuquitiarej. Paa juhuari sesa miiriucueaacuaranij.
41Moiseesri juucua naa tari narta pueya sequeree juucuatej:
—¿Casaara Pueyaso sequesano nia tojiyaquiyajaaranij? Naa nia miiniu paniniuniquitij, cunoori maja maninia. 42Maja najuhuana cuno jiyajinia nia tiuquitianura shiiniuquiuniu, pueyanaa. Pueyaso maja tari na cojiniu niajaniya. ¡Niaa cocuaatia miyacujua! Nia paraacua nia shoori miaquejonu saniya.
44Rejetejaca nojori quiniuucua, nojoriiri saaja cuno jiyaconaja tuhuananuhua quiajaacua tacataquiaari. Saniniuujia, Pueyaso quijia cojee cutaraari maja tari pootiosaariquiano quiriquiaa na cajitiasaquiji. Moiseesri nojori quishaquiji poyaquiriquiano quiriquiaajuhuaj. 45Jiyacaritij, cuno jiyajinijinio camaruhua taucuaca Amalecitani, Cananeocuacanio, nojoriiri Israel pueyacua sanetaquiaari nojori na miaquejonura. Cuno taucuacaari Israel pueya neteyotatuquiaari. Jiyacari Israel pueya miaquejotureeri. Hormaa jiyanishano tiacajinia nojori jatatuqueeri.
Currently Selected:
Nuumero 14: arl
Highlight
Share
Copy
Want to have your highlights saved across all your devices? Sign up or sign in
© 1986, 2008, Wycliffe Bible Translators, Inc. All rights reserved.