Génesis 16
16
Ismairo nasitërinsoꞌ
1Sarai co huaꞌhuanaꞌpihuë niꞌton, co Apran huiꞌnahuaninhuëꞌ. Napoaponahuëꞌ, Saraiso aꞌnara cosonanën yaꞌhuëtërin. Inaso iquipitoron. Acara itopi. 2Aꞌna tahuëri Saraisoꞌ, soꞌin itapon:
—Niꞌquëchi, Sinioro co nohuantërinhuë niꞌton, co huaꞌhuanahuëꞌ. Napoaponahuëꞌ, cosonanëhuë acoanchinquën topirahuë. Tapona inasoꞌ, huaꞌhuanaꞌpi nisápirinhuëꞌ. Huaꞌhuanpachin cari masarahuë huaꞌhuahuë pochachin nicacaso marëꞌ, itërin.
Napotohuachina, Apranta nohuantërin. 3Naporo chachin Saraisoꞌ, Acara masahuaton, soꞌin acoantërin. Nani shonca piꞌipi Canaan parti yaꞌhuapona pochin, napoapi. 4Shiarahuaton Acarasoꞌ, cayorin huachi. Inaporahuaton, huaꞌanën nocanin. Nocanaton, co yanatërinhuëꞌ. 5Naporoꞌ Sarairi Apran itapon:
—Quëma tëhuëran niꞌton, Acara nocaninco. Cari chachin acoantopiranquënhuëꞌ, iporasoꞌ huaꞌhuanaton, nocaninco huachi. Sinioro chachin inquënposona tëhuërësoꞌ anitochinpoꞌ: Quëma tëhuëmaranquën, ca aꞌna napomaraco, itërin. 6Napotohuachina, Apranisoꞌ itapon:
—Niꞌquëꞌ, cosonanënsoꞌ, natëinquënso yaꞌhuërin. Maꞌsona nohuantëransoꞌ nitëquëꞌ, itërin.
Naporo quëran huarëꞌ Saraisoꞌ, Acara paꞌpi aparisitërin. Napoaton, inaso taꞌarin huachi. 7Taꞌapirinhuëꞌ, Sinioro anquëninëni#16.7 Sinioro anquëninën topachina: Yosë chachin tapon naporin. inotëro parti quënanin. Shor iraquë iꞌsha pipirinsoꞌ yaꞌcariꞌ, quënanin. 8Quënanahuaton, natanin:
—Quëmasoꞌ Acaranquën, nohuitëranquën. Sarai cosonanënquën. ¿Intoparanta huëcaton, intopata paꞌsaran? itërin.
—Patronanëhuë Sarai itopisoꞌ taꞌananpiarahuë, tënin Acara. 9Naporoꞌ Sinioro anquëninëni, itapon:
—Naquëranchin patronanën paapantaquëꞌ. Maꞌsona camairinquënsopita, natëquëꞌ, itërin. 10Napotahuaton itaantarin:
“Ca nohuanto, huaꞌhuayátërahuë amiparinpita yaꞌhuëtarinquën.
Co pichicasohuëꞌ naꞌaponaꞌ.
11Ipora cayoransoꞌ, quëmapiaꞌhuaya huaiyaran.
Huaihuatan, Ismairo itëquëꞌ.
Co napion ancantaton naꞌnëransoꞌ,
Sinioro nataninquën niꞌton, ina nininën acotëquëꞌ.
12Mashotohuachin, tanan cahuario paꞌpi notëraya pochin nisarin.
Yaꞌipiya inimicotarin. Inantaꞌ, yaꞌipiya quëran, inimicotaponaꞌ.
Quëmopinënpitari co quëꞌyapirinahuëꞌ,
inahua notënanquë chachin yaꞌhuapon,” itërin.
13Siniorori nontërin niꞌton, Acarasoꞌ paꞌyanënquë tapon: “¿Yosë chachin nontaporahuë co chiminahuë ti?” tënin. Ina yonquiaton, iso pochin Sinioro nohuitërin: “Nicatonco, catahuarincoso Yosë,” itërin. 14Napoaton inaquë poso yaꞌhuërinsontaꞌ, “Nanpiton, niꞌsárincosoꞌ posonën,” itopi. Ina pososoꞌ, Catisë ninanoꞌ, Piriti ninanoꞌ, inapita ninanoroꞌsari ahuancanapirin. 15-16Acarasoꞌ anquëni natërahuaton, patronanënquë chachin paantarin. Tahuëri nanihuachina huairin. Apran posa shonca saota piꞌipitasoꞌ, huiꞌnin nasitarin. Nasitohuachina, Ismairo itërin.
Currently Selected:
Génesis 16: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
