Génesis 22
22
Yosëri Apraan tënirinsoꞌ
1Ina piquëran Yosëri: “¿Tëhuënchachin taꞌma Apraan natërinco to?” taꞌton, tënicaso marëꞌ përarin:
—Apraan, itërin.
—Maꞌta Sinioro yaꞌhuëarahuë, tënin Apraan. 2Naporoꞌ Yosëri itapon:
—Huiꞌnan Isaco itëransoꞌ, aꞌnaíchin niꞌton, nosoromiatëran. Ina nipirinhuëꞌ, masahuaton Moria parti quëpaquëꞌ. Inaquë canconpatan, aꞌna motopi aꞌnotaranquën. Inaquë chinotancoso marëꞌ ina tëparahuaton, yaꞌipi ahuiquitëquëꞌ, itërin.
3Tahuëririnquë Apraansoꞌ, tashiramiachin huënsëintarahuaton, tapatarin huachi. Ihuë Yosë chinotaton ahuiquitacaso marëꞌ pëꞌshitërinsoꞌ, moranënquë aꞌmitërin. Ina quëran huiꞌnin, cato piyapinënpita, inapita quëparin. Yosëri shaꞌhuitërinquë paꞌnin huachi.
4Cara tahuëri quëran Apraansoꞌ, Yosëri shaꞌhuitërinsoꞌ noꞌpaꞌ notërin. 5Naporoꞌ piyapinënpita itapon:
—Isëquë ninatacoi. Moranta isëquë patarahuë. Quiyasoꞌ amasha aquëcha paꞌsahuatoi, Yosë chinotarai. Nani chinotohuatoi oꞌmantarai, itërin. 6Ihuë Yosë chinotaton ahuiquitacasoꞌ, Isaco apitëntërin. Inaoranta cosoroaꞌhua, pëꞌto raꞌpi, inapita manin. Ina quëran paꞌpi huachi.
7Papon pochin Isacori, Apraan itapon:
—¡Tata! itërin.
—¿Maꞌta conpaaꞌhuaꞌ? itërin paꞌpini.
—Niꞌquë tata, nani ihuë yaꞌhuërin. Pëꞌto raꞌpinta yaꞌhuërin. Carniroaꞌhua yaꞌipi ahuiquitacaso marësoꞌ: ¿Intoparanta manëꞌ? itërin Isacori.
8—Yosë nohuanton conpa yaꞌhuapon, itërin paꞌpini. Ina quëran, paantapi.
9Yosëri shaꞌhuitërinquë canconpachinara, Apraanso aꞌnara artaro ninin. Tënirahuaton, ina aipi ihuë acorin. Ina quëran huiꞌnin tonporahuaton, ihuë aipi acorin. 10Inaquë acorahuaton tëpacaso marëꞌ cosoroaꞌhua manantërin. 11Naporo chachin Sinioro anquëninëni, inápa quëran përarin:
—¡Apraan! ¡Apraan! itërin.
—Maꞌta Sinioro yaꞌhuëarahuë, itërin Apraani. 12Sinioro anquëninënisoꞌ, itapon:
—Ama huiꞌnan tëpaquësohuëꞌ. Tëniponquën napotopiranquënhuëꞌ, iporasoꞌ nani nitotërahuë. Yaꞌipi cancanën quëran huarëꞌ imaranco tënahuë. Huiꞌnan aꞌnaíchin nipirinhuëꞌ, co apiratërancohuë niꞌton, nitotërahuë, itërin. 13Naporoꞌ Apraan tahuërërahuaton niꞌpirinhuëꞌ, aꞌnara carniro quënanin. Yosë nohuanton pomonën quëran, naraꞌhuaya sëꞌpaquënquë aꞌtënin. Ina masahuaton huiꞌnin yaꞌhuërënamën tëparin. Inapotaton, Yosë chinotacaso marëꞌ yaꞌipi ahuiquitërin. 14Ina quëran Apraani ina roꞌtë aninihuanin. “Pahuantërinpoasoꞌ Sinioro quëtërinpoaquë,” itërin. Napoaton, iporahuanta ina pochin nohuitapi. “Motopiquësoꞌ, pahuantërinpoasopita Sinioro quëtërinpoaꞌ,” topi nonatonaꞌ.
15-16Sinioro anquëninëni, naquëranchin inápa quëran Apraan përaton itapon:
—Sinioro naporin: “Yaꞌipi cancanën quëran huarëꞌ natëtonco, aꞌnaíchin huiꞌnan nipirinhuëꞌ co apiratërancohuëꞌ. Inaporanso marëꞌ noya niꞌnanquën. Caso Yosëco niꞌto, noꞌtëquën shaꞌhuitaranquën. 17Noya nicatënquën catahuamiataranquën. Ca nohuanto shiparinpita, tayoraroꞌsa nápo naꞌaponaꞌ. Marë yonsanquë inotëraꞌhuaya nápo, naꞌamiataponaꞌ. Naporahuaton, inapitaso inimiconëna minsëraꞌpiaponaꞌ. 18Quëma natëranco niꞌton, yaꞌipi isoroꞌpaquë nacionoꞌsa yaꞌhuërinsopita, shiparinpita quëran catahuararahuë,” itërin.
19Nani Yosë chinotahuatonaꞌ, Apraanso huiꞌninë chachin piyapinënpita quëparitopiquë, paꞌmantapi. Ina quëran yaꞌipi chachin, Piirsipaquë panantapi. Inaquë Apraan huaꞌqui yaꞌhuërin.
Nacoro huiꞌninpita nipisoꞌ
20Huaꞌquimiachin yaꞌhuapona pochin, Apraanso natantërin. “Miricantaꞌ, Nacoro saꞌin nininsoꞌ, Sara pochachin huaꞌhuanin antaꞌ,” itopi. 21Paninansoꞌ, Os itopi. Ina quëran niantarinsoꞌ, Pos itopi. Ina quëran aꞌnanta niantarinsoꞌ, Quimoino itopi. (Quimoinonta huiꞌnahuanpachina, Aramo itopi.) 22Quimoino quëran nasitaantapi: Quisito, Aso, Piritasi, Itarapi, Pitoiro, inapita. 23Ina Pitoiro mini, Nipica paꞌpin. Nacorosoꞌ, Apraan iyaꞌhuain. Yaꞌipiya quëran Miricasoꞌ, posa huaꞌhuinpita yaꞌhuëtërin. Ina nápo Nacorosoꞌ, saꞌinquë chachin huiꞌnahuanin. 24Naporahuaton aꞌna saꞌinquënta huiꞌnahuanin. Ina saꞌinsoꞌ, Nioma itopi. Inaquë huiꞌnahuaninsopitasoꞌ: Tipa, Caamo, Taas, Maaca, inapita.
Currently Selected:
Génesis 22: cbt
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
