Lukab 23
23
Jesub ge Pilatub aiǃâ ra sī-ūhe
(Mateub 27:1-2, 11-14; Markub 15:1-5; Johaneb 18:28-38)
1Hoaraga ǁanin ǀApeǀhaos din ge khâi tsî Jesuba Pilatub aiǃâ ge sī-ū. 2ǁNāpan ge ǁîba ǀhapiǂnûiǀkhātsoatsoa tsî ge mî: “Sida ge nē khoeba khoena khâikhâiǃnâs ai ǀhapixase go hō, ǁînab ra Kaesara ǁgui-aimarisa* mataresa ǂkhāse, tsîb ge ǁî-aitsama gao-aob ase tsî Xristub* ase ra ǂgaisen.”
3Ob ge Pilatuba Jesuba ge dî: “Satsa kha a Jodeǁîn di gao-ao?”
“Sats go mî” tib ge Jesuba ge ǃeream.
4Ob ge Pilatuba danapristergu tsî ǂnubis tsîn ǃoa ge mî: “ǀHapi-i xare-e ta ge nē khoeb ǃnâ hō tama hâ.”
5Xawen ge ǃaruǀî ǀgaisase ge mîhâhâ: “ǁÎb di ǁkhāǁkhās ǀkhab ge hoaraga Judeab khoena ra khâikhâiǃnâ. ǁÎb ge nēsa Galileaba xu tsoatsoa tsî nēsi ǁîs ǀkha nēpas kōse go ǀkhī.”
Jesub ge Herodeb ǁga ra sîhe
6Tsî Pilatub ge nēsa ǁnâu, ob ge ge dî: “Nēba Galileaǁîba?” 7Tsî Herodeb ǂgaeǂguis ǃnaka hâ ǀkhariba xub Jesuba hâ ǃkhaisab ge ǁnâu, ob ge Herodeb, ǁnā ǁaeb ǂûb ǃnâ ge Jerusalems ǃnâ hâ ib ǃoa ge sî bi. 8Herodeb ge Jesubab ge mûo, kaise ge ǃgâiaǂgao. ǀNaib ge Jesub xa ǂgui xūna gaxu ǁae-e ǁnâu hâ i, tsîb ge kaise ǁîbab nî mû ǃkhaisa gere ǁkhore xui-ao. ǁÎb ge ǁkhāti Jesub nî sao-e dīsa gere ǃâubasen. 9Herodeb ge Jesuba ǂgui dîna ge dî, xaweb ge xū-i xare-e ge ǃeream tama hâ i. 10Danapristergu tsî Moseb ǂhanub* di ǁkhāǁkhā-aogu ge Jesuba ǀû tamase, ǀgaisase mâ gere ǀhapiǂnûiǀkhā. 11Herodeb tsî ǁîb toroǃkhamaogu tsîn ge Jesuba ǃharaxūb ǀkha sîsenū tsî ǂamsaraba ana bi, ǃhō bi tsî ǁkhawa Pilatub ǁga ge sî-oa. 12ǁNā tsēs ǂûs ai kha ge Pilatub tsî Herodeb tsîkha ǁkhawa ge khoeǀhōgu kai, aiǃâ kha ge khākhoebagu isa xu.
Jesub ge ǁōb ǃoa ra ǀgoraǃgâhe
(Mateub 27:15-26; Markub 15:6-15; Johaneb 18:39—19:16)
13ǁNās khaoǃgâb ge Pilatuba danapristergu tsî ǁaes danaǂgaeǂgui-aogu tsî khoen tsîna ǂgaiǀhao, 14tsî ǁîn ǃoa ge mî: “Sadu ge nē khoeba khoen di ǂgaeǂhapu-aob ase tita ǃoa go hā-ū. Sadu mâ hîa ta ge ǁhōba go ôaǃgao, xawe ta ge nē khoeba ǀhapixase hō tama hâ, sadu di ǀanaǃgâdi ai. 15Herodeb on ge ǀhapixase hō bi tama tsî ǁîba sage ǃoa go sî-oa. ǁÎb ge ǁōba anu hâ xū-e dī tama hâ. 16ǁNā-amaga ta ge ǂnau kai bi tsî nî ǁnāxū bi.”#23:16 ǀNî xoaǁguigu ge 17ǁî ǁaraǃāsa ra ǀaro: Mâ Pasxaǁâudīb hoab tawab ge Pilatuba ǀgui ǃkhōsabe-e ǁîna gere ǃnoraǃnoraba. Mrk. 15:6 tawa sī kō re.
18Xawes ge hoaraga ǂnubisa ge ǃau: “ǃGam bi, î Barababa ǁnāxūba da.” 19Barabab ge ǃās ǃnâ ge ī khâikhâiǃnâs tsî ǃgams ǃaroma ǃkhō-oms ǃnâ ge ǂnôa i.
20Pilatub ge Jesubab gere ǁnāxū ǂgao amaga ǁîn ǀkha ǁkhawa ge ǃhoa. 21Xawen ge ǀûs ose “ǃGâu bi, ǃgâu bi!” ti gere ǃau.
22Pilatub ge ǁîna ǃnonaǁî ǃnāsa ge dî: “Tare-eb ǁnâi tsūdī hâ? Tita ge ǁōbab nî xū-i xare-e ǁîb ǃnâ hō tama hâ! ǁNā-amaga ta ge ǂnau kai bi tsî nî ǁnāxū bi.” 23Xawen ge ǁîna ǀû tamase gere ǃau, îb Jesuba ǃgâuhe tsîn ge ǀunis ai ǁîn di ǃaub ǀkha ge dan. 24Pilatub ge Jesuba ǁōb ǃoa ǀgoraǃgâsa ge ī kai, khoen di ǂâis nî dīǀoaǀoahese. 25ǁÎn gere ǂgan khamib ge Pilatuba khâikhâiǃnâs tsî ǃgams tsîn ǃaroma ge ǃkhō-oms ǃnâ ǂnôa i khoeba ge ǁnāxū tsî Jesuba ge māǁnâ, în ǁîb ǀkha ǂhâban ra khami dī.
Jesub ge ra ǃgâuhe
(Mateub 27:32-44; Markub 15:21-32; Johaneb 19:17-27)
26O gu ge toroǃkhamaoga Jesuba ge ǂgaeǂguibē. Tsî ǃāsa xu gu ra ǂoa hîa gu ge Simon ti ǀon hâ Sireneǁîba ǃās ǃnâb ra ǃaugaba xu ǂgâxa hîa ge hō, o gu ge ǁîba ǁgari tsî ǃgâuhaiba* ǁîb ai ǁgui tsî Jesub ǃgâb ai ge tani kai.
27Kai ǂnubis khoen ge Jesuba gere sao, ǁîn ǃnâ di ge ǁkhāti taradi Jesub ǃaroma gere ǃoa tsî āde ge hâ i. 28Ob ge Jesuba ǁîdi ǃoa ǂnan tsî ge mî: “Jerusalems taraso, tā tita ǃaroma ā re, xawe saso tsî saso ôan ǃaroma ā re. 29Tsēdi ge nî hā, ǁîdi ai du nî mîde, ‘ǀKhaehesa di ge a ǁnādi, ǀgôa-i xare-e ūhâ tama di tsî ǁnādi hîa ǀgôa-e ǁora tama tsî ǁkhāti daisi tamade!’ 30#Hos. 10:8; ǂHai. 6:16ǁNā ǁaeb ǃnân ge ǃhomgu ǃoa nî mî: ‘ǁNā-ai da re!’ tsî ǃnâugu ǃoa ‘Gaugau da re.’ 31Nēnan ra ǃam haib ai dīo, tare-e ǁnâi ǂnâsab ǀkha nî ī?”
32ǀNî ǀgam ǁkhâuǁnâ-aokha ge Jesub ǀkha ge ǂgaeǂguibēhe, ǁîb ǀkha kha nî sī ǃgamhese. 33Golgotas, danaǂkhōs ǃkhais, ǃnâus hîa danaǂkhō-i khami īs tawa gu ge sī, o gu Jesuba ǁnāpa, ǀgam ǁkhâuǁnâ-aokha ǀkha, ǀguiba amǀkhāb ai tsî nauba ǁareǀkhāb âb ai ge ǃgâu. [34#Psa. 22:18Ob ge Jesuba ge mî: “Ti Îtse, ǁîna ǀûba re, tare-en ra dīsan a ǀū xuige!”]#23:34 Nē ǁaraǃās ge ǁîgu a ǀoro Grike xoaǁguigu tamas ka io ǀoro ǂnûiǃkhunidi ǃnâ a ǀkhai.
ǁÎgu ge ǂnōgusa ao tsî ǁîb sarana ge ǀgoragu. 35#Psa. 22:7Tsî ǂnubis ge mâ tsî gere kō, xawe Jodeǁî danaǂgaeǂgui-aogu ge âiǂui bi tsî gere mî: “Naunab ge gere ore; ab aitsama oresen, Elob xa ǃkhōǂuihe hâ Xristub nîs kao.”
36 #
Psa. 69:21
Tsî toroǃkhamaogu on ge ǀkhī tsî ǁkhāti gere ǃhō bi tsî ǀkhuru ǂauxûi-e mā bi 37tsî ge mî: “Jodeǁîn di gao-aots kao, aitsama oresen.”
38Xoaǂam-i ge ǁkhāti ǁîb danaǂam ge mâihe “Nēb ge Jodeǁîn di gao-aoba” ti ra mî-e.
39ǁÎb ǀkha ge ǂgāmâihe hâ i ǁkhâuǁnâ-aokha di ǀguib tsîn ge ǃkhāǃkhā bi tsî ge mî: “Xristu tamatsa satsa? Aitsama oresen, î sikhom tsîna hui re!”
40Xaweb ge nauba ǀau bi tsî ge mî: “Elobats kha ǃao tama hâ? Sats on ge ǁkhā ǀgoraǃgâs ǃnâ mâ. 41Sakhom di ǁkharab ge a ǂhanu, ǃoaǂui khom hâ khami, xawe nē khoeb ge tsū xū-i xare-e dī tama hâ.” 42Tsîb ge ǃaruǀî ge mî: “ǂÂis ǃnâ ūhâ te re Jesutse, sa gaosib ǃnâts ga sīo.”
43Ob ge Jesuba ge ǃeream bi: “Amase ta ra mîba tsi. Nētsēts ge tita ǀkha Paradais ǃnâ nî hâ.”
Jesub di ǁōb
(Mateub 27:45-56; Markub 15:33-41; Johaneb 19:28-30)
44-45 #
Eks. 26:31-33
ǁAubexa disiǀgamǀa irs aib ge ǃkhaenaba hoaraga ǃhūb ǃnâ ge hā ǃnona irs kōse tsîb ge Tempeli di ǂgāmâisaba ǀgam ǃâra ǃnâ ge doaǃā. 46#Psa. 31:5Ob ge Jesuba ǃgari dommi ǀkha ge ǂgai: “Ti Îtse! Sa ǃomkha ǃnâ ta ge ti gagasa ra ǂgomǃgâ.” Nēsa mî tsîb ge ge ǁō.
47Tsî toroǃkhamaogu di danakhoeb ge tare-i go ī ǃkhaisab ge mû, o Eloba koa tsî ge mî: “Nē khoeb ge amase go ǀhapio i.”
48Tsî hoaraga khoen ge ī ra xūnan nî mûse ge ǀhao tsî ī gonan ge mû, on ge ǃoa hâse ǁgâudi ǁga ge ǁaru. 49#Luk. 8:2-3Hoaraga khoen Jesuba ge kaise ǃgâise ǂan in tsî Jesuba ge Galileaba xu gere sao taradi, tsîn hoan ge nē xūna ǃnūrose mâ tsî gere kō.
Jesub di ǁkhōs
(Mateub 27:57-61; Markub 15:42-47; Johaneb 19:38-42)
50-51ǁNāpab ge Josef ti ǀon hâ khoeb, Jodeǁîn ǃāros Arimateas diba ge hâ i. ǁÎb ge ǃgâi tsî ge ǂhanu-ai i khoeb, Elob Gaosib di hāsa gere ǃâubasenna. ǁÎb ge ǁkhāti Jodeǁîn di ǀApemāǃnans di ǁani ge i, xaweb ge ǁîgu di mîǁguigu tsî dīgu ǀkha ge ǀgui tama hâ i. 52Josefi ge Pilatub ǁga ǃgû tsî Jesub sorosa sī ge ǂgan. 53ǁÎb ge Jesub sorosa ǃgâuhaiba xu ūǁnâ, ǃuri lapin ǃnâ ǃgamiǂgā tsî ǀhobas, ǃhaob ǃnâ ge ǃnamǂuihe tsî khoe-e ganupe ǁkhōǃnâhe tama hâ is ǃnâ ge ǁgui bi. 54Aiǂhomisens tsēs ge ge i tsî Sabbattsēs* ge ǀnai ge ǀgūtoa hâ i.
55Jesuba ge Galileaba xu sao hâ i taradi ge Josefi ǀkha ǃgû tsî ǀhobasa sī ge mû tsî mâtis Jesub sorosa ǁîs ǃnâ ge ǁguihesa. 56#Eks. 20:10; Deu. 5:14ǁNās khaoǃgâ di ge oa tsî ǂkhauǀkhā-ūxūn tsî ǃgâihamxūn tsîna sī ge ǂhomi.
Tsî di ge Sabbattsēs ai mîmās ǃoa ge sâ.
Currently Selected:
Lukab 23: KKG20
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.
Lukab 23
23
Jesub ge Pilatub aiǃâ ra sī-ūhe
(Mateub 27:1-2, 11-14; Markub 15:1-5; Johaneb 18:28-38)
1Hoaraga ǁanin ǀApeǀhaos din ge khâi tsî Jesuba Pilatub aiǃâ ge sī-ū. 2ǁNāpan ge ǁîba ǀhapiǂnûiǀkhātsoatsoa tsî ge mî: “Sida ge nē khoeba khoena khâikhâiǃnâs ai ǀhapixase go hō, ǁînab ra Kaesara ǁgui-aimarisa* mataresa ǂkhāse, tsîb ge ǁî-aitsama gao-aob ase tsî Xristub* ase ra ǂgaisen.”
3Ob ge Pilatuba Jesuba ge dî: “Satsa kha a Jodeǁîn di gao-ao?”
“Sats go mî” tib ge Jesuba ge ǃeream.
4Ob ge Pilatuba danapristergu tsî ǂnubis tsîn ǃoa ge mî: “ǀHapi-i xare-e ta ge nē khoeb ǃnâ hō tama hâ.”
5Xawen ge ǃaruǀî ǀgaisase ge mîhâhâ: “ǁÎb di ǁkhāǁkhās ǀkhab ge hoaraga Judeab khoena ra khâikhâiǃnâ. ǁÎb ge nēsa Galileaba xu tsoatsoa tsî nēsi ǁîs ǀkha nēpas kōse go ǀkhī.”
Jesub ge Herodeb ǁga ra sîhe
6Tsî Pilatub ge nēsa ǁnâu, ob ge ge dî: “Nēba Galileaǁîba?” 7Tsî Herodeb ǂgaeǂguis ǃnaka hâ ǀkhariba xub Jesuba hâ ǃkhaisab ge ǁnâu, ob ge Herodeb, ǁnā ǁaeb ǂûb ǃnâ ge Jerusalems ǃnâ hâ ib ǃoa ge sî bi. 8Herodeb ge Jesubab ge mûo, kaise ge ǃgâiaǂgao. ǀNaib ge Jesub xa ǂgui xūna gaxu ǁae-e ǁnâu hâ i, tsîb ge kaise ǁîbab nî mû ǃkhaisa gere ǁkhore xui-ao. ǁÎb ge ǁkhāti Jesub nî sao-e dīsa gere ǃâubasen. 9Herodeb ge Jesuba ǂgui dîna ge dî, xaweb ge xū-i xare-e ge ǃeream tama hâ i. 10Danapristergu tsî Moseb ǂhanub* di ǁkhāǁkhā-aogu ge Jesuba ǀû tamase, ǀgaisase mâ gere ǀhapiǂnûiǀkhā. 11Herodeb tsî ǁîb toroǃkhamaogu tsîn ge Jesuba ǃharaxūb ǀkha sîsenū tsî ǂamsaraba ana bi, ǃhō bi tsî ǁkhawa Pilatub ǁga ge sî-oa. 12ǁNā tsēs ǂûs ai kha ge Pilatub tsî Herodeb tsîkha ǁkhawa ge khoeǀhōgu kai, aiǃâ kha ge khākhoebagu isa xu.
Jesub ge ǁōb ǃoa ra ǀgoraǃgâhe
(Mateub 27:15-26; Markub 15:6-15; Johaneb 18:39—19:16)
13ǁNās khaoǃgâb ge Pilatuba danapristergu tsî ǁaes danaǂgaeǂgui-aogu tsî khoen tsîna ǂgaiǀhao, 14tsî ǁîn ǃoa ge mî: “Sadu ge nē khoeba khoen di ǂgaeǂhapu-aob ase tita ǃoa go hā-ū. Sadu mâ hîa ta ge ǁhōba go ôaǃgao, xawe ta ge nē khoeba ǀhapixase hō tama hâ, sadu di ǀanaǃgâdi ai. 15Herodeb on ge ǀhapixase hō bi tama tsî ǁîba sage ǃoa go sî-oa. ǁÎb ge ǁōba anu hâ xū-e dī tama hâ. 16ǁNā-amaga ta ge ǂnau kai bi tsî nî ǁnāxū bi.”#23:16 ǀNî xoaǁguigu ge 17ǁî ǁaraǃāsa ra ǀaro: Mâ Pasxaǁâudīb hoab tawab ge Pilatuba ǀgui ǃkhōsabe-e ǁîna gere ǃnoraǃnoraba. Mrk. 15:6 tawa sī kō re.
18Xawes ge hoaraga ǂnubisa ge ǃau: “ǃGam bi, î Barababa ǁnāxūba da.” 19Barabab ge ǃās ǃnâ ge ī khâikhâiǃnâs tsî ǃgams ǃaroma ǃkhō-oms ǃnâ ge ǂnôa i.
20Pilatub ge Jesubab gere ǁnāxū ǂgao amaga ǁîn ǀkha ǁkhawa ge ǃhoa. 21Xawen ge ǀûs ose “ǃGâu bi, ǃgâu bi!” ti gere ǃau.
22Pilatub ge ǁîna ǃnonaǁî ǃnāsa ge dî: “Tare-eb ǁnâi tsūdī hâ? Tita ge ǁōbab nî xū-i xare-e ǁîb ǃnâ hō tama hâ! ǁNā-amaga ta ge ǂnau kai bi tsî nî ǁnāxū bi.” 23Xawen ge ǁîna ǀû tamase gere ǃau, îb Jesuba ǃgâuhe tsîn ge ǀunis ai ǁîn di ǃaub ǀkha ge dan. 24Pilatub ge Jesuba ǁōb ǃoa ǀgoraǃgâsa ge ī kai, khoen di ǂâis nî dīǀoaǀoahese. 25ǁÎn gere ǂgan khamib ge Pilatuba khâikhâiǃnâs tsî ǃgams tsîn ǃaroma ge ǃkhō-oms ǃnâ ǂnôa i khoeba ge ǁnāxū tsî Jesuba ge māǁnâ, în ǁîb ǀkha ǂhâban ra khami dī.
Jesub ge ra ǃgâuhe
(Mateub 27:32-44; Markub 15:21-32; Johaneb 19:17-27)
26O gu ge toroǃkhamaoga Jesuba ge ǂgaeǂguibē. Tsî ǃāsa xu gu ra ǂoa hîa gu ge Simon ti ǀon hâ Sireneǁîba ǃās ǃnâb ra ǃaugaba xu ǂgâxa hîa ge hō, o gu ge ǁîba ǁgari tsî ǃgâuhaiba* ǁîb ai ǁgui tsî Jesub ǃgâb ai ge tani kai.
27Kai ǂnubis khoen ge Jesuba gere sao, ǁîn ǃnâ di ge ǁkhāti taradi Jesub ǃaroma gere ǃoa tsî āde ge hâ i. 28Ob ge Jesuba ǁîdi ǃoa ǂnan tsî ge mî: “Jerusalems taraso, tā tita ǃaroma ā re, xawe saso tsî saso ôan ǃaroma ā re. 29Tsēdi ge nî hā, ǁîdi ai du nî mîde, ‘ǀKhaehesa di ge a ǁnādi, ǀgôa-i xare-e ūhâ tama di tsî ǁnādi hîa ǀgôa-e ǁora tama tsî ǁkhāti daisi tamade!’ 30#Hos. 10:8; ǂHai. 6:16ǁNā ǁaeb ǃnân ge ǃhomgu ǃoa nî mî: ‘ǁNā-ai da re!’ tsî ǃnâugu ǃoa ‘Gaugau da re.’ 31Nēnan ra ǃam haib ai dīo, tare-e ǁnâi ǂnâsab ǀkha nî ī?”
32ǀNî ǀgam ǁkhâuǁnâ-aokha ge Jesub ǀkha ge ǂgaeǂguibēhe, ǁîb ǀkha kha nî sī ǃgamhese. 33Golgotas, danaǂkhōs ǃkhais, ǃnâus hîa danaǂkhō-i khami īs tawa gu ge sī, o gu Jesuba ǁnāpa, ǀgam ǁkhâuǁnâ-aokha ǀkha, ǀguiba amǀkhāb ai tsî nauba ǁareǀkhāb âb ai ge ǃgâu. [34#Psa. 22:18Ob ge Jesuba ge mî: “Ti Îtse, ǁîna ǀûba re, tare-en ra dīsan a ǀū xuige!”]#23:34 Nē ǁaraǃās ge ǁîgu a ǀoro Grike xoaǁguigu tamas ka io ǀoro ǂnûiǃkhunidi ǃnâ a ǀkhai.
ǁÎgu ge ǂnōgusa ao tsî ǁîb sarana ge ǀgoragu. 35#Psa. 22:7Tsî ǂnubis ge mâ tsî gere kō, xawe Jodeǁî danaǂgaeǂgui-aogu ge âiǂui bi tsî gere mî: “Naunab ge gere ore; ab aitsama oresen, Elob xa ǃkhōǂuihe hâ Xristub nîs kao.”
36 #
Psa. 69:21
Tsî toroǃkhamaogu on ge ǀkhī tsî ǁkhāti gere ǃhō bi tsî ǀkhuru ǂauxûi-e mā bi 37tsî ge mî: “Jodeǁîn di gao-aots kao, aitsama oresen.”
38Xoaǂam-i ge ǁkhāti ǁîb danaǂam ge mâihe “Nēb ge Jodeǁîn di gao-aoba” ti ra mî-e.
39ǁÎb ǀkha ge ǂgāmâihe hâ i ǁkhâuǁnâ-aokha di ǀguib tsîn ge ǃkhāǃkhā bi tsî ge mî: “Xristu tamatsa satsa? Aitsama oresen, î sikhom tsîna hui re!”
40Xaweb ge nauba ǀau bi tsî ge mî: “Elobats kha ǃao tama hâ? Sats on ge ǁkhā ǀgoraǃgâs ǃnâ mâ. 41Sakhom di ǁkharab ge a ǂhanu, ǃoaǂui khom hâ khami, xawe nē khoeb ge tsū xū-i xare-e dī tama hâ.” 42Tsîb ge ǃaruǀî ge mî: “ǂÂis ǃnâ ūhâ te re Jesutse, sa gaosib ǃnâts ga sīo.”
43Ob ge Jesuba ge ǃeream bi: “Amase ta ra mîba tsi. Nētsēts ge tita ǀkha Paradais ǃnâ nî hâ.”
Jesub di ǁōb
(Mateub 27:45-56; Markub 15:33-41; Johaneb 19:28-30)
44-45 #
Eks. 26:31-33
ǁAubexa disiǀgamǀa irs aib ge ǃkhaenaba hoaraga ǃhūb ǃnâ ge hā ǃnona irs kōse tsîb ge Tempeli di ǂgāmâisaba ǀgam ǃâra ǃnâ ge doaǃā. 46#Psa. 31:5Ob ge Jesuba ǃgari dommi ǀkha ge ǂgai: “Ti Îtse! Sa ǃomkha ǃnâ ta ge ti gagasa ra ǂgomǃgâ.” Nēsa mî tsîb ge ge ǁō.
47Tsî toroǃkhamaogu di danakhoeb ge tare-i go ī ǃkhaisab ge mû, o Eloba koa tsî ge mî: “Nē khoeb ge amase go ǀhapio i.”
48Tsî hoaraga khoen ge ī ra xūnan nî mûse ge ǀhao tsî ī gonan ge mû, on ge ǃoa hâse ǁgâudi ǁga ge ǁaru. 49#Luk. 8:2-3Hoaraga khoen Jesuba ge kaise ǃgâise ǂan in tsî Jesuba ge Galileaba xu gere sao taradi, tsîn hoan ge nē xūna ǃnūrose mâ tsî gere kō.
Jesub di ǁkhōs
(Mateub 27:57-61; Markub 15:42-47; Johaneb 19:38-42)
50-51ǁNāpab ge Josef ti ǀon hâ khoeb, Jodeǁîn ǃāros Arimateas diba ge hâ i. ǁÎb ge ǃgâi tsî ge ǂhanu-ai i khoeb, Elob Gaosib di hāsa gere ǃâubasenna. ǁÎb ge ǁkhāti Jodeǁîn di ǀApemāǃnans di ǁani ge i, xaweb ge ǁîgu di mîǁguigu tsî dīgu ǀkha ge ǀgui tama hâ i. 52Josefi ge Pilatub ǁga ǃgû tsî Jesub sorosa sī ge ǂgan. 53ǁÎb ge Jesub sorosa ǃgâuhaiba xu ūǁnâ, ǃuri lapin ǃnâ ǃgamiǂgā tsî ǀhobas, ǃhaob ǃnâ ge ǃnamǂuihe tsî khoe-e ganupe ǁkhōǃnâhe tama hâ is ǃnâ ge ǁgui bi. 54Aiǂhomisens tsēs ge ge i tsî Sabbattsēs* ge ǀnai ge ǀgūtoa hâ i.
55Jesuba ge Galileaba xu sao hâ i taradi ge Josefi ǀkha ǃgû tsî ǀhobasa sī ge mû tsî mâtis Jesub sorosa ǁîs ǃnâ ge ǁguihesa. 56#Eks. 20:10; Deu. 5:14ǁNās khaoǃgâ di ge oa tsî ǂkhauǀkhā-ūxūn tsî ǃgâihamxūn tsîna sī ge ǂhomi.
Tsî di ge Sabbattsēs ai mîmās ǃoa ge sâ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Khoekhoegowab Elobmîs © Bible Society in Namibia, 2020.