Matiyew 14

Memətsey ma Zaŋ Batist

(Mk 6.14-29; Lk 9.7-9; 3.19-20)

1Da har ana ŋga na, Erod Tetrark ma tsənada a hikadama ha Yezu, 2ŋga ma ləvatar a ndaw ma 'ay ŋga hay: «Ndaw a neney na, Zaŋ Batist aŋga na ma mbəlawa da walaŋ ma ndaw ma mətsa na hay ana; nəkafama gədaŋ ma slafa me key ɗeɗew, a key mber da vaw ŋga na, hərwuiya.» 3Akwa na Erod ma zəga Zaŋ, ma dzuwa ta tsalalaw, ma kəlada a daŋgay na ma vəday ma Erodiyad, ŋgwas ma malam aŋga Filip. 4Hərway Zaŋ a ləvar na: «Slam har aɗek ma zəga ka ŋgwas aha dakay.» 5Akwa Erod a wuɗey na ma kəɗa ba vagay aha, amana a wesey ta ndaw ana ma kusa na hay, hərway a nəkafama ka Zaŋ na, andza ndaw sek aha. 6Arka ta pas ma magurlam ma vurhwada ma yawa ma Erod na, dem ma Erodiyad me gərvey ka slam dey ma ndaw ma wuna na hay, ma mbafa ka Erod. 7Arka tsana ŋga ma mbəɗar a dem ana, ma da vəladara tek aŋga ma da tsəhey tabiyaha na. 8May ŋga ma pafərawa wuiya ba na, ma ləvar: «Ma saya na vəladiyawa 'ar ma Zaŋ Batist, ka sləna ɗey, da kwatama.» 9A ndalar a bay ɗuhwa na; amana hərway ma me mbəɗey ŋga ka slam dey ma ndaw ma wuna na hay na, ŋga me vəley slam har ma da vəladara. 10Arka ŋga me slərey ka da rətsərawa 'ar ma Zaŋ da daŋgay ana. 11Ma sadəmərawa 'ar aŋga na da kwatama, ma vəladəmara a dem ana, ma dadara a may ŋga. 12Gawla ma Zaŋ ana hay ma səmawa, ma zəgama vagay ana, ma tuɗama, ma padama a tsəvay. Arka ma dam ma da ɓadəmara a Yezu.

Yezu a vəlatar tek me zəmey a ndaw hay gabal zlam

(Mk 6.30-44; Lk 9.10-17; Zŋ 6.1-15)

13Andza Yezu ma tsənada mey a neney na, ŋga me tesey təŋga ta kombiwal 'ar a slam palah aha gədzah a tsakay. Andza ndaw ana ma kusa na hay ma səradama slam aŋga na ba na, taya ma bəmawa da wuraw ata hay, ma səpamar bəzay ta sek. 14Andza ma hərɗawa ŋga ba da kwambiwal na, ŋga ma nəkadata ndaw hay haɗadzidzay, ma kusa hiya, a kamar da vaw, ŋga ma ndaladata ndaw ata ma təra na hay. 15Ma hakwaɗ me key na, gawla ŋga hay ma gurafama, ma ləvamar: «Eheŋ dəvaɗ a key aha, slam ana palah aha satsa tok na, ləvatar a ndaw ana ma kusa na hay, ka dawam a wurow hay ka da haɗəkəmawa tek me zəmey kwa. 16Ama Yezu ma ləvatar: «Ha dam dzay na, kuray ana vələmatar tek me zəmey ana kwa.» 17Arka taya ma ləvamar: «A rafandar ka sləna daha na, peŋ zlam ta kəlef tsew.» 18Ŋga ma ləvatar: «Sadəmatiyawa ka sləna ɗagay.» 19Andza Yezu ma ləvatar ba a ndaw ana ma kusa na hay ka ndzam ka 'ar ma guzer na, ŋga ma həlata peŋ a hana hay zlam ana ta kəlef tsew ana, ma tsakafada dey a 'ərlam ŋga ma pəsafa mey, arka ŋga ma tsada peŋ a hana hay, ma vəladatara a gawla ŋga hay, taya tey ma wanəkadəmatara a ndaw ana ma kusa na hay. 20Taya ma zəmam tobiya ta ha, ma rəham; ma tsakalama sa na ma zawa na na; me rəhey tsakarak kurow kava tsew! 21Ama ndaw ma zəmam peŋ ana hay na, a kam gabal zlam. Mandzara ka mbəsləmata ŋgwas hay ta bəza hay.

Yezu a heley ka 'ar ma yam

(Mk 6.45-52; Zŋ 6.16-21)

22Arka tsana, Yezu ma təkatar ɗay a gawla ŋga hay, ka tsəlam a kombiwal, ka tasam tafəɗa ha a diya naŋgar. Da har ana na, a ləvatar aha a ndaw ana ma kusa na hay ka dawam tek a ta. 23A dəba ma ma ləvatar a ndaw ana ma kusa hiya na hay ka dawam tek a ta na, ŋga me tsəley a mamba, ma da ɗulawa mey gədzah. Ma hakwaɗ me key na, ŋga re ma ndza ha makəraŋga. 24Kombiwal na kendzey tsoy a key miter temere haɗadzidzay ta ɗakal; a tembeley aha ta ɗuŋgwala ma yam, hərway memeɗ a madata ta dəba. 25Andza ma lamɗa na, Yezu ma sawa ka tsakay ta ta sek, ka 'ar ma bəlay. 26Andza gawla ŋga hay ma nəkadama a sawa ha ka tsakay ta, ta sek ka 'ar ma bəlay na, a mbəɗatar ’ar, ka taya na, waya tek ma tərafata; ta zluwer ata na, ma kəlamar a mewudey. 27Arka tsana, Yezu ma tsatar guma: «Pam 'ar, ka wasam zlay, neney na yah seŋgey!» 28Piyer ma tsar guma ma ləvar: «Bay’ərlam, haɗaw azlakwa kah dərka na na, vəlaya slam har i daɓa ka tsakay ɗek ta 'ar ma yam ana tey» 29Yezu ma ləvar: «Sawa.» Piyer na ma harɗawa da kombiwal, ma daw ka 'ar ma yam ka tsakay ma Yezu. 30Ama andza ma nəkada memeɗ na, ŋga me wesey ka vaw, ma zlar me hərɗey a bəzay yam, ŋga me wudey ka vaw: «Haya Bay’ərlam, buwaya!» 31Arka tsana, Yezu ma ɓar har, ma zəgərawa, ta ma ləvar aha: «Ndaw ta me pey 'ar nekəɗey ana, ɗagay ka kəɗey waway na ka mey?» 32Arka andza taya ma tsəlam ba a kombiwal na, memeɗ me rey ba ɗeɗek. 33Sa ma ndaw da kombiwal ana hay ma gərdam ka mey dey ŋga, arka ma ləvamar: «Dərka na, kah na Bəzey ma Bay ma Bəla.»

Yezu a ndeley ndaw hay da Zenezaret

(Mk 6.53-56)

34Andza taya ma tasam ba na, ma husam a diya ma Zenezaret. 35Ndaw ma wuraw ana hay ma səradama Yezu. Taya ma ɓadəmatara a sa ma ndaw hay tabiyaha da dala na, ma hələmatərawa ndaw dzedzey ana hay tabiyaha. 36Ma kamar amboh na, ma ka ləmamar na, a mey ma zana ŋga na tsa na, arka ndaw ma ləmamar ana hay na, ma ndalam tabiyaha.

Currently Selected:

Matiyew 14: MOF

Highlight

Copy