Matalikilo 24
24
Isaki mbwaakeeba
1Abulaamu wakacembela abuumbi alimwi Mwaami Lesa wakamupa coolwe mushintu shoonse nshaakalinga kucita. 2Mpeeke wakaambila musebenshi wakwe uyo wakalinga munene paboonse alimwi wakalinga kulama shintu shoonse nshaakalinga kucite ayi, “Bika lyaansa lyako pakati ka mabelo angu ushomeshe cakulumbila. 3Ndisuni kwaamba ayi ushomeshe cakulumbila muliina lya Mwaami Lesa, Lesa wa kwiculu acishi ca panshi ayi teshi ukeebele mwanaangu pabanakashi ba momuno muKenani. 4Ulyeelete kuya kumisheesu nkondakashalilwa alimwi pabamakwesu ukabwese mwanakashi uyo Isaki mwanaangu ngweshi akeebe.”
5Sombi musebenshi wakeepusha ayi, “Ino na mwanakashi akakake kwisa kokuno anebo, sa ndyeelete kuboosha mwanaanu kumishaanu nkomwakaswa?”
6Abulaamu wakakumbula ayi, “Tooelete napaceyuubo kumuboosha. 7Mwaami Lesa, Lesa wa kwiculu uyo wakankusha muŋanda ya bata mucishi cine misheesu alimwi uyo wakaamba kuli ndime wakashomesha cakulumbila ayi, ‘Bamulunyungu lwako ndaakubapa cishi ici.’ Ulaakutuma munjelo kootana kushika kulya kwaamba ayi ukakonshe kucanina mwanaangu, mwanakashi wakweeba. 8Na mwanakashi wakaka kwisa awebo kuno, webo ulaakwaanguluka kushomesha kwangu kwakulumbila uku. Sombi kuteelesha nabi caba buyani kuboosha mwanaangu kulya.” 9Mpomunyaawo musebenshi uyo wakabika lyaansa pakati ka mabelo akwe Abulaamu, mwaami wakwe, akushomesha cakulumbila ayi ulaakucita cakamusenga Abulaamu ayi acite.
10Lyalo musebenshi uyo wakabwesa ngamela shili likumi ashintu shiinji shibotu shakwe Abulaamu, akuya kundabala yakalinga kwikalaako Nawoli, kulubasu lwa kumatwa lwa Mesopotamya. 11Ndyaakashika wakalengesha ngamela isho koonaako pamukalo, pansengwe lya ndabala inene. Paciindi ico lisuba lyakookama, ono nceciindi banakashi ncebakalinga kwisa mukuteka maanshi. 12Mpeeke wakapaila ayi, “NoBaami baLesa, baLesa ba baami bangu baAbulaamu, amunengeshe kukonsha kucita ncendeendela sunu akucita kweelana ambomwakashomesha baami bangu. 13Mbulya ndi waano pamukalo banakashi bacikula bwangu ba mundabala inene iyi mpweshi banoosa mukuteka maanshi. 14Umwi ntoomwaambila ayi, ‘Teka maanshi umpe nwe.’ Na aambe ayi, ‘Amunwe angamela shanu ntooshitekela,’ aabe ngowooyo ngomwasalila musha wanu Isaki. Na ici cicitike, ntooshiba ayi mwaciita kweelana ambomwakashomesha baami bangu.”
15Kaatana kumanisha kupaila Labeka wakapola anongo pacifushi. Wakalinga mwanaakwe Betiwelo uyo wakalinga mwanaakwe Milika mukaakwe Nawoli, mukwabo Abulaamu. 16Wakalinga mwanakashi cikula bwangu mubotu abuumbi alimwi wakalinga kucilibo mooye. Wakaya kumukalo wateka maanshi akuboolela. 17Mpeeke musebenshi uyo wakaya wamwaansha akumusenga ayi, “Ntoosengaako maanshi munongo yanu, nwe.”
18Alakwe wakakumbula ayi, “Anaaya nkambo.” Cakufwambaana wakakusha nongo pacifushi akwiicatilila mumaansa ndyaakalinga kunwa musebenshi uyo. 19Ndyaakamanisha kunwa Labeka wakaamba ayi, “Angamela shanu ntooshiletela maanshi, shinwe, shikute.” 20Cakufwambaana wakapuumwita mwakalinga kunwita banyama akucicila kumukalo mukuleta aamwi, kushikila shoonse shanwa akukuta. 21Musebenshi uyo wakalinga kumulangilishabo cakutaamba kwaamba ayi abone na Mwaami Lesa wamulengesha kukonsha kucita ncaakeendeela.
22Labeka ndyaakamanisha, musankwa uyo wakabwesa ninga ya golodi ilema magilamu ali 5.5 akwiisomeka panshono yakwe, alimwi wakamufwalika makosa obilo a golodi alema magilamu ali 110 pamikono yakwe. 23Mpeeke wakeepusha ayi, “Ino baiso mbaani? Sa musena ngunene muŋanda yabo cakwaamba ayi nebo abantu bangu inga twesa toonaako?”
24Labeka wakakumbula ayi, “Bata mbaBetiwelo bana babo baNawoli muli baMilika. 25Kuli bwiisu bwakoonaawo buunji ashakulya sha banyama shiinji kuŋanda yesu alimwi musena wakwaamba ayi mwebo inga moona nkooli.”
26Mpomunyaawo musankwa uyo wakafukama akulambila Mwaami Lesa. 27Lyalo wakaamba ayi, “Aalumbwe Mwaami Lesa, Lesa wa baami bangu baAbulaamu, abo bashomeka akucita kweelana ambobakabashomesha. Mwaami Lesa wantanjilila akundulika kubeshikamukowa ba baami bangu.”
28Mwanakashi uyo wakacica waya mukulwiita bamuŋanda ya banyina makani oonse. 29Labeka wakalinga kucite nandumi yakwe wakalinga kwiitwa ayi Labani. Lakwe wakacica kuswa muŋanda waya kumukalo uko kwakalinga musebenshi wakwe Abulaamu. 30Labani wakeebona ninga ya golodi munshono yakwe Labeka, amakosa anene anene obilo kumikono yakwe, alimwi wakanyumfwa ashakaamba musankwa uyo kulwiita Labeka. Wakaya kumusebenshi wakwe Abulaamu uyo wakalinga kwiimfwi kufwaafwi angamela shakwe pamukalo 31akwaamba ayi, “Katiya kuŋanda. Webo uli musankwa wapekwa coolwe kuswa kuMwaami Lesa. Tookoonshi kunokwiimfwi kokuno. Nkocili kale cipinda cabambilwa ndiwe muŋanda yangu alimwi amusena wa ngamela shako nkooli.”
32Mpeeke wakenjila muŋanda, lyalo Labani wakaselusha shakalinga kuyumwite ngamela akushipa bwiisu bwakoonaawo ashakulya sha nshisho. Kuswawaawo wakaleta maanshi ayi musebenshi wakwe Abulaamu uyo abantu bakwe basambe kumyeendo. 33Cakulya ndicakaletwa, musankwa uyo wakaamba ayi, “Teshi ndye kaantana kwaamba makani ngoonjelete kwaamba.” Mpeeke Labani wakaamba ayi, “Anu ngaayo keesa.”
34Wakatalika kwaamba ayi, “Nebo ndimusebenshi wa baAbulaamu. 35Mwaami Lesa wakabapa coolwe abuumbi baami bangu cakwaamba ayi babila. Wakabapa matanga a mbelele, mpongo alimwi aŋombe pantu pomwi asilifa, golodi, basha basankwa abanakashi, ngamela alimwi ambongolo. 36BaSaala, bamuka baami bangu, bakashala mwaana musankwa kabali bacembela kale. Aboobo baami bangu bakapa mwanaabo shintu shoonse nshebacite. 37Alimwi baami bangu bakaŋambila ayi ndyeelete kushomesha cakulumbila kwaamba ayi, nsheelete kweebela mwanaabo pabanakashi bali mucishi ca Kenani. 38Sombi ayi ndyeelete kuya kubene Ishiwabo, pakati ka bamakwababo akumweebela nkuko. 39Mpeeke ndakeepusha baami bangu ayi, ‘Ino na mwanakashi akakake kwisa anebo kuno, cilaakuba buyani?’ 40Bakakumbula ayi, ‘Mwaami Lesa uyo ngonyumfwila lyoonse ulaakukutumina munjelo kwaamba ayi akakulengeshe kukonsha kucita ubo. Mwanakashi weelete kweeba mwanaangu ulyeelete kuswa kubene misheesu pakati ka bamulunyungu lwa bata. 41Ono ulaakukonshabo kwaanguluka kuswa kukushomesha uku na ukaye kubamakwesu alimwi bakakake kukupa mwanakashi ayi umulete kokuno.’
42“Sunu ndindashika pamukalo, ndapaila ayi, ‘NoBaami baLesa, baLesa ba baami bangu baAbulaamu, amunengeshe kukonsha kucita ncendeendela. 43Mbulya ndipamukalo pano. Na mwanakashi cikula bwangu aswe mukuteka maanshi ntoomusenga maanshi akunwa eshi anooli munongo yakwe. 44Na asumine akulyaaba kutekela angamela shangu shoonse, aabe ngowooyo ngomwasala kweebwa kumwanaabaami bangu.’ 45Kaantana kumanisha kupaila mumoyo, Labeka wakesa anongo pacifushi akuya kumukalo mukuteka maanshi. Mpeeke ndamusenga ayi, ‘Amumpewo maanshi, nwe.’ 46Cakufwambaana wakakusha nongo pacifushi akwiicatilila mumaansa akwaamba ayi, ‘Anaaya nkambo. Ono ntootekela angamela ayi shinwe.’ Aboobo ndanwa lyalo watekela angamela shanwa. 47Mpomunyaawo ndamwiipusha ayi, ‘Baiso mbaani?’ Lakwe wankumbula ayi, ‘Bata mba Betiwelo bana babo ba Nawoli abaMilika.’ Mpomunyaawo ndakamubika ninga munshono amakosa kumikono yakwe. 48Mpeeke ndafukama akulambila Mwaami Lesa. Ndalumbaisha Mwaami Lesa, Lesa wa baami bangu baAbulaamu, balengesha kwaamba ayi noolulemebo kushikamukowa wa baami bangu akucana mulokashi wabo kuli Isaki. 49Ono na mutootondesha nkumbu akushomeka kubaami bangu, nabi sobwe, mundwiite nshibe cakucita.”
50Labani aBetiwelo bakakumbula ayi, “Ici caswa kuBaami baLesa, aboobo swebo taaku mbweenga twacicita ayi citabi boobo, 51Labeka ngooyu. Mubwese umutoole akabe muka mwanaamwaami wako kweelana aMwaami Lesa mbwaamba.” 52Musebenshi wakwe Abulaamu ndyaakanyumfwa mbobakakumbula, wakafukama akulambila Mwaami Lesa. 53Kuswawaawo wakakusha makosa ashimwi sha mushobo uyo sha golodi asha silifa, alimwi ashisani ashakufwala sha mushobo amushobo akupa Labeka. Nandumi shakwe abanyina wakabapa aabalo shipo shamakwebo.
54Lyalo lakwe abasankwa mbwaakalingaabo bakalya akoona kweenka uko. Ndibakabuka macuunsa, musebenshi uyo wakaamba ayi, “Amuleke ono mboolele kuBaami bangu.”
55Sombi nandumi shakwe Labeka abanyina bakaamba ayi, “Labeka aacaale kwa nsondo na inshiku likumi lyalo inga waya.” 56Mpeeke wakakumbula ayi, “Mutatukaliki. Mwaami Lesa wanengesha kukonsha kucita ncendakeendela amunsuminishebo mboolele kubaami bangu.” 57Lyalo bakakumbula ayi, “Atumwiite anu mwanakashi tunyumfwe mbwaatooyeeya lakwe.” 58Mpomunyaawo bakamwiita akwiipusha ayi, “Sa ulisuni kuya amusankwa uyu?” Lakwe wakakumbula ayi, “Ee.”
59Aboobo Labeka bakamusuminisha ayi aye amusebenshi wakwe mwanakashi pantu pomwi amusebenshi wakwe Abulaamu abantu bakwe. 60Mpeeke bakapa coolwe Labeka mumaswi akwaamba ayi,
“Onankashi yesu, koya ukashale shuulu ashuulu.
Bana bako abakakonshe kukoma mandabala anene a balwani babo.”
61Lyalo Labeka abalindu bakwe bakalibambila, batanta ngamela shabo akutalika kuya amusebenshi wakwe Abulaamu. Mboboobo musebenshi uyo mbwaakatola Labeka.
62Isaki wakalinga wesa muluundu lwakalinga kwiitwa ayi, “Mukalo wa Wooyo Muumi Umbona” alimwi wakalinga kwikala kulubasu lwa kumalenge a Kenani. 63Wakanyamuka ca macooleshaako kaaya ceendaana mumyuunda. Mpeeke wakabonabo ngamela kashisa. 64Labeka ndyaakabona Isaki, wakaseluka pangamela 65akwiipusha musebenshi wakwe Abulaamu ayi, “Ngani musankwa ulya utoosa kokuno mumuunda mulya?” Musebenshi wakakumbula ayi, “Mbaami bangu.” Mpomunyaawo Labeka wakalifweka cisani cakwe pameenso.
66Musebenshi uyo wakalwiita Isaki shoonse nshaakacita. 67Mpeeke Isaki wakenjisha Labeka mutente yakalinga koonaamo Saala, banyina, lyalo wakamweeba. Isaki wakalinga kumusuni Labeka abuumbi, aboobo wakacileka kuyeeya banyina bakafwa.
Currently Selected:
Matalikilo 24: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
Matalikilo 24
24
Isaki mbwaakeeba
1Abulaamu wakacembela abuumbi alimwi Mwaami Lesa wakamupa coolwe mushintu shoonse nshaakalinga kucita. 2Mpeeke wakaambila musebenshi wakwe uyo wakalinga munene paboonse alimwi wakalinga kulama shintu shoonse nshaakalinga kucite ayi, “Bika lyaansa lyako pakati ka mabelo angu ushomeshe cakulumbila. 3Ndisuni kwaamba ayi ushomeshe cakulumbila muliina lya Mwaami Lesa, Lesa wa kwiculu acishi ca panshi ayi teshi ukeebele mwanaangu pabanakashi ba momuno muKenani. 4Ulyeelete kuya kumisheesu nkondakashalilwa alimwi pabamakwesu ukabwese mwanakashi uyo Isaki mwanaangu ngweshi akeebe.”
5Sombi musebenshi wakeepusha ayi, “Ino na mwanakashi akakake kwisa kokuno anebo, sa ndyeelete kuboosha mwanaanu kumishaanu nkomwakaswa?”
6Abulaamu wakakumbula ayi, “Tooelete napaceyuubo kumuboosha. 7Mwaami Lesa, Lesa wa kwiculu uyo wakankusha muŋanda ya bata mucishi cine misheesu alimwi uyo wakaamba kuli ndime wakashomesha cakulumbila ayi, ‘Bamulunyungu lwako ndaakubapa cishi ici.’ Ulaakutuma munjelo kootana kushika kulya kwaamba ayi ukakonshe kucanina mwanaangu, mwanakashi wakweeba. 8Na mwanakashi wakaka kwisa awebo kuno, webo ulaakwaanguluka kushomesha kwangu kwakulumbila uku. Sombi kuteelesha nabi caba buyani kuboosha mwanaangu kulya.” 9Mpomunyaawo musebenshi uyo wakabika lyaansa pakati ka mabelo akwe Abulaamu, mwaami wakwe, akushomesha cakulumbila ayi ulaakucita cakamusenga Abulaamu ayi acite.
10Lyalo musebenshi uyo wakabwesa ngamela shili likumi ashintu shiinji shibotu shakwe Abulaamu, akuya kundabala yakalinga kwikalaako Nawoli, kulubasu lwa kumatwa lwa Mesopotamya. 11Ndyaakashika wakalengesha ngamela isho koonaako pamukalo, pansengwe lya ndabala inene. Paciindi ico lisuba lyakookama, ono nceciindi banakashi ncebakalinga kwisa mukuteka maanshi. 12Mpeeke wakapaila ayi, “NoBaami baLesa, baLesa ba baami bangu baAbulaamu, amunengeshe kukonsha kucita ncendeendela sunu akucita kweelana ambomwakashomesha baami bangu. 13Mbulya ndi waano pamukalo banakashi bacikula bwangu ba mundabala inene iyi mpweshi banoosa mukuteka maanshi. 14Umwi ntoomwaambila ayi, ‘Teka maanshi umpe nwe.’ Na aambe ayi, ‘Amunwe angamela shanu ntooshitekela,’ aabe ngowooyo ngomwasalila musha wanu Isaki. Na ici cicitike, ntooshiba ayi mwaciita kweelana ambomwakashomesha baami bangu.”
15Kaatana kumanisha kupaila Labeka wakapola anongo pacifushi. Wakalinga mwanaakwe Betiwelo uyo wakalinga mwanaakwe Milika mukaakwe Nawoli, mukwabo Abulaamu. 16Wakalinga mwanakashi cikula bwangu mubotu abuumbi alimwi wakalinga kucilibo mooye. Wakaya kumukalo wateka maanshi akuboolela. 17Mpeeke musebenshi uyo wakaya wamwaansha akumusenga ayi, “Ntoosengaako maanshi munongo yanu, nwe.”
18Alakwe wakakumbula ayi, “Anaaya nkambo.” Cakufwambaana wakakusha nongo pacifushi akwiicatilila mumaansa ndyaakalinga kunwa musebenshi uyo. 19Ndyaakamanisha kunwa Labeka wakaamba ayi, “Angamela shanu ntooshiletela maanshi, shinwe, shikute.” 20Cakufwambaana wakapuumwita mwakalinga kunwita banyama akucicila kumukalo mukuleta aamwi, kushikila shoonse shanwa akukuta. 21Musebenshi uyo wakalinga kumulangilishabo cakutaamba kwaamba ayi abone na Mwaami Lesa wamulengesha kukonsha kucita ncaakeendeela.
22Labeka ndyaakamanisha, musankwa uyo wakabwesa ninga ya golodi ilema magilamu ali 5.5 akwiisomeka panshono yakwe, alimwi wakamufwalika makosa obilo a golodi alema magilamu ali 110 pamikono yakwe. 23Mpeeke wakeepusha ayi, “Ino baiso mbaani? Sa musena ngunene muŋanda yabo cakwaamba ayi nebo abantu bangu inga twesa toonaako?”
24Labeka wakakumbula ayi, “Bata mbaBetiwelo bana babo baNawoli muli baMilika. 25Kuli bwiisu bwakoonaawo buunji ashakulya sha banyama shiinji kuŋanda yesu alimwi musena wakwaamba ayi mwebo inga moona nkooli.”
26Mpomunyaawo musankwa uyo wakafukama akulambila Mwaami Lesa. 27Lyalo wakaamba ayi, “Aalumbwe Mwaami Lesa, Lesa wa baami bangu baAbulaamu, abo bashomeka akucita kweelana ambobakabashomesha. Mwaami Lesa wantanjilila akundulika kubeshikamukowa ba baami bangu.”
28Mwanakashi uyo wakacica waya mukulwiita bamuŋanda ya banyina makani oonse. 29Labeka wakalinga kucite nandumi yakwe wakalinga kwiitwa ayi Labani. Lakwe wakacica kuswa muŋanda waya kumukalo uko kwakalinga musebenshi wakwe Abulaamu. 30Labani wakeebona ninga ya golodi munshono yakwe Labeka, amakosa anene anene obilo kumikono yakwe, alimwi wakanyumfwa ashakaamba musankwa uyo kulwiita Labeka. Wakaya kumusebenshi wakwe Abulaamu uyo wakalinga kwiimfwi kufwaafwi angamela shakwe pamukalo 31akwaamba ayi, “Katiya kuŋanda. Webo uli musankwa wapekwa coolwe kuswa kuMwaami Lesa. Tookoonshi kunokwiimfwi kokuno. Nkocili kale cipinda cabambilwa ndiwe muŋanda yangu alimwi amusena wa ngamela shako nkooli.”
32Mpeeke wakenjila muŋanda, lyalo Labani wakaselusha shakalinga kuyumwite ngamela akushipa bwiisu bwakoonaawo ashakulya sha nshisho. Kuswawaawo wakaleta maanshi ayi musebenshi wakwe Abulaamu uyo abantu bakwe basambe kumyeendo. 33Cakulya ndicakaletwa, musankwa uyo wakaamba ayi, “Teshi ndye kaantana kwaamba makani ngoonjelete kwaamba.” Mpeeke Labani wakaamba ayi, “Anu ngaayo keesa.”
34Wakatalika kwaamba ayi, “Nebo ndimusebenshi wa baAbulaamu. 35Mwaami Lesa wakabapa coolwe abuumbi baami bangu cakwaamba ayi babila. Wakabapa matanga a mbelele, mpongo alimwi aŋombe pantu pomwi asilifa, golodi, basha basankwa abanakashi, ngamela alimwi ambongolo. 36BaSaala, bamuka baami bangu, bakashala mwaana musankwa kabali bacembela kale. Aboobo baami bangu bakapa mwanaabo shintu shoonse nshebacite. 37Alimwi baami bangu bakaŋambila ayi ndyeelete kushomesha cakulumbila kwaamba ayi, nsheelete kweebela mwanaabo pabanakashi bali mucishi ca Kenani. 38Sombi ayi ndyeelete kuya kubene Ishiwabo, pakati ka bamakwababo akumweebela nkuko. 39Mpeeke ndakeepusha baami bangu ayi, ‘Ino na mwanakashi akakake kwisa anebo kuno, cilaakuba buyani?’ 40Bakakumbula ayi, ‘Mwaami Lesa uyo ngonyumfwila lyoonse ulaakukutumina munjelo kwaamba ayi akakulengeshe kukonsha kucita ubo. Mwanakashi weelete kweeba mwanaangu ulyeelete kuswa kubene misheesu pakati ka bamulunyungu lwa bata. 41Ono ulaakukonshabo kwaanguluka kuswa kukushomesha uku na ukaye kubamakwesu alimwi bakakake kukupa mwanakashi ayi umulete kokuno.’
42“Sunu ndindashika pamukalo, ndapaila ayi, ‘NoBaami baLesa, baLesa ba baami bangu baAbulaamu, amunengeshe kukonsha kucita ncendeendela. 43Mbulya ndipamukalo pano. Na mwanakashi cikula bwangu aswe mukuteka maanshi ntoomusenga maanshi akunwa eshi anooli munongo yakwe. 44Na asumine akulyaaba kutekela angamela shangu shoonse, aabe ngowooyo ngomwasala kweebwa kumwanaabaami bangu.’ 45Kaantana kumanisha kupaila mumoyo, Labeka wakesa anongo pacifushi akuya kumukalo mukuteka maanshi. Mpeeke ndamusenga ayi, ‘Amumpewo maanshi, nwe.’ 46Cakufwambaana wakakusha nongo pacifushi akwiicatilila mumaansa akwaamba ayi, ‘Anaaya nkambo. Ono ntootekela angamela ayi shinwe.’ Aboobo ndanwa lyalo watekela angamela shanwa. 47Mpomunyaawo ndamwiipusha ayi, ‘Baiso mbaani?’ Lakwe wankumbula ayi, ‘Bata mba Betiwelo bana babo ba Nawoli abaMilika.’ Mpomunyaawo ndakamubika ninga munshono amakosa kumikono yakwe. 48Mpeeke ndafukama akulambila Mwaami Lesa. Ndalumbaisha Mwaami Lesa, Lesa wa baami bangu baAbulaamu, balengesha kwaamba ayi noolulemebo kushikamukowa wa baami bangu akucana mulokashi wabo kuli Isaki. 49Ono na mutootondesha nkumbu akushomeka kubaami bangu, nabi sobwe, mundwiite nshibe cakucita.”
50Labani aBetiwelo bakakumbula ayi, “Ici caswa kuBaami baLesa, aboobo swebo taaku mbweenga twacicita ayi citabi boobo, 51Labeka ngooyu. Mubwese umutoole akabe muka mwanaamwaami wako kweelana aMwaami Lesa mbwaamba.” 52Musebenshi wakwe Abulaamu ndyaakanyumfwa mbobakakumbula, wakafukama akulambila Mwaami Lesa. 53Kuswawaawo wakakusha makosa ashimwi sha mushobo uyo sha golodi asha silifa, alimwi ashisani ashakufwala sha mushobo amushobo akupa Labeka. Nandumi shakwe abanyina wakabapa aabalo shipo shamakwebo.
54Lyalo lakwe abasankwa mbwaakalingaabo bakalya akoona kweenka uko. Ndibakabuka macuunsa, musebenshi uyo wakaamba ayi, “Amuleke ono mboolele kuBaami bangu.”
55Sombi nandumi shakwe Labeka abanyina bakaamba ayi, “Labeka aacaale kwa nsondo na inshiku likumi lyalo inga waya.” 56Mpeeke wakakumbula ayi, “Mutatukaliki. Mwaami Lesa wanengesha kukonsha kucita ncendakeendela amunsuminishebo mboolele kubaami bangu.” 57Lyalo bakakumbula ayi, “Atumwiite anu mwanakashi tunyumfwe mbwaatooyeeya lakwe.” 58Mpomunyaawo bakamwiita akwiipusha ayi, “Sa ulisuni kuya amusankwa uyu?” Lakwe wakakumbula ayi, “Ee.”
59Aboobo Labeka bakamusuminisha ayi aye amusebenshi wakwe mwanakashi pantu pomwi amusebenshi wakwe Abulaamu abantu bakwe. 60Mpeeke bakapa coolwe Labeka mumaswi akwaamba ayi,
“Onankashi yesu, koya ukashale shuulu ashuulu.
Bana bako abakakonshe kukoma mandabala anene a balwani babo.”
61Lyalo Labeka abalindu bakwe bakalibambila, batanta ngamela shabo akutalika kuya amusebenshi wakwe Abulaamu. Mboboobo musebenshi uyo mbwaakatola Labeka.
62Isaki wakalinga wesa muluundu lwakalinga kwiitwa ayi, “Mukalo wa Wooyo Muumi Umbona” alimwi wakalinga kwikala kulubasu lwa kumalenge a Kenani. 63Wakanyamuka ca macooleshaako kaaya ceendaana mumyuunda. Mpeeke wakabonabo ngamela kashisa. 64Labeka ndyaakabona Isaki, wakaseluka pangamela 65akwiipusha musebenshi wakwe Abulaamu ayi, “Ngani musankwa ulya utoosa kokuno mumuunda mulya?” Musebenshi wakakumbula ayi, “Mbaami bangu.” Mpomunyaawo Labeka wakalifweka cisani cakwe pameenso.
66Musebenshi uyo wakalwiita Isaki shoonse nshaakacita. 67Mpeeke Isaki wakenjisha Labeka mutente yakalinga koonaamo Saala, banyina, lyalo wakamweeba. Isaki wakalinga kumusuni Labeka abuumbi, aboobo wakacileka kuyeeya banyina bakafwa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.