1 KORINTENA 1
1
Ɗek-tuwta hiɗi gi-deɓta
1Paulus, yumi kay li lop Apostolla vi Yesu Kristu kuɗ minda vi Lawna, hiɗi ɓasuyna Sostenes. 2Tam sa tapna vi Lawna hay Korinte sa liy goy peldete hay Yesu Kristu, sa yiyay kay muɗ goy peldete, hiɗi nisi kaf, sa hay liyn pet, yi sem Bum-Sumuna vaya Yesu Kristu, Bum-Sumuna vaya hiɗi fisin kaw. 3Slugota hiɗi toyta vi Lawna Buya hiɗi Bum-Sumuna Yesu Kristu ma vulis tigi vulge.
4Nan gi deɓ mi Lawna van kigi dok-doko kay slugota vi Lawna ta vuli tigiya hay Yesu. 5Kay nigi fi asta ŋolo hay namu, hay slen kaf, hay yoboyna hiɗi wida kaf kaw, 6kay di-goyta vi Kristu viy hay dikgi dono ŋolo. 7Vulda-slugota vi Kristu ta hini bay vul tigi tayɗi, nigi sa ka cub buur ma Bum-Sumuna vaya Yesu Kristu ma vul tuwam goy haraŋi. 8Nam ma vulgi dono'o ta-ta hay dabaŋ-gu'ta, kay nigi ma lak bay lawta joot kigiya hay fatta vi Bum-Sumuna vaya Yesu Kristu. 9Lawna mi gasina, namu mi ma yigiyawa kay tap hiɗi goora valamu Yesu Kristu Bum-Sumuna vaya.
ƁURAW-VUNDA HIƊI VA MA dab SEMNA
Ɓuraw-vunda hay Eglista vi Korinte
10Wulini ɓosiyonna, nan min siɗawgiya hay semda vi Bum-Sumuna vaya Yesu Kristu, kay nigi kaf vungi ma tap kepe, hin ɓurawta kal jargiɗi. May nigi ma tap tuwgiya hay dikga kepta hiɗi varta kepta kaw. 11Kay ɓosiyonna, sumuna vi Klowas dan kigi ala ci-wayta ka jargiya. 12Nisi dan kayn ala, gigekaw di valamu valamu: Hen ala nan kuɗ Paulus, hen ala nan kuɗ Apolos, hen lo ala nan kuɗ Kefas, hena lo ala nan kuɗ Kristu. 13Kristu ɓuraw tak-tak su? Paulus ɓalay kat gu-ma-grakŋa kigi su? Lebo nigi fi baptisma hay sem Paulus su?
14Nan gi deɓ mi Lawna kay nan li baptisma mi sa mara'a jargiɗi, may Krispus hiɗi Gayus tuta. 15Nala sa as di ala nigi fi baptisma hay semda vanuɗi. 16Nan li baptisma mi ziyna vi Stefanas kaw. Bugol kayni la nan li baptisma mi sa mara'a kla nan wiɗi.
Yalda vi sa nagatna hiɗi yalda vi Lawna
1 Kor 3:18-20; Mat 11:25-27
17Kay Kristu gan kayni kay li baptismaɗi, may kay kus labara ma firina, kayni may hiɗi yoboy ma yallaɗi kaw, kay a grakŋa vi Yesu Kristu ma muɗ goy waaɗi.
18Kay yoboyna vi grakŋa kayni mi va ma ɦay-ɦayna kay nisi sa ba goyo, may kay nay sa suɗawa, namu mi donota vi Lawna. 19Ki ɗo'ay nala kaw:
Nan min ɓulak yalla vi sa yalla,
Nan min ɓulak wida vi sum sa wida kaw.#1:19 Fi kayni hay Es 29:14.
20Sa ma yalla ma arige? Sa ma wi ɗota ka arige? Sa ma var yali hay nagat tani ka arige? Kay Lawna muɗ yalla vi sum sa kay nagatawa goy ɦay-ɦaya ɗi su?
21Kay sa nagatna hay yalla visiya, may wi Lawna hay yalla vi Lawnɗi, Lawn ɗuw kayni kiram ŋaa'a kay suɗ san ma min vina kuɗ ɦay-ɦayta vi kusta-yoboyna. 22Sa Yudiyana gar kay wi ɗekka, may sa Grekŋa gar yalla. 23May numa'a, numa'a kus kay Kristu ma ɓalay kat gu-ma-grakŋa, kayni mi va ma dab-semna kay sa Yudiyana, va ma ɦay-ɦayna kay sa waana kaw. 24May tam sa yiyna, la Yudiyana, la Grekŋa kaw, Kristu mi donota vi Lawna hiɗi yalda vi Lawna. 25Kay ɦay-ɦayta vi Lawna yalla va' suw sumuna, maŋayta vi Lawna donota va' suw sumuna kaw.
26Ɓosiyonna, ɗuwgi tam yita vigi tige. Sum sa yalla kuɗ sliwna may jargi ŋolɗi, sum sa gaŋeraŋa say ŋolɗi, sum sa hay jafna vi mulda say ŋolɗi kaw. 27May Lawna vilek sle ma ɦay-ɦayna vi nagata, kay muɗ sa yalla zulo'o. Sle ma maŋayna hay nagata Lawna vilekemu kay muɗ sa donona zulo'o. 28Lawna vilek sle ma waa ɗaara vi nagata, sle ma sumun ɗuwum birek-ceke, sle ma mayɗina nam vilekemu kay muɗ sle ma ka'ana goy waa'a. 29Kay san ɦawa fi subur tuwam vok Lawnɗi. 30May kuɗum namu nigi ka hay Yesu Kristu, namu ma Lawn muɗum goy yalla kaya, muɗum goy lita-peldetta hiɗi butta-goyta kay naya. 31Kay ki ɗo'ay nala:
Sa ma subur tuwamu nam ma subur tuwam hay Bum-Sumuna.#1:31 Fi kayni hay Yer 9:23.
Currently Selected:
1 KORINTENA 1: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001