2 KORINTENA 3
3
1Numa hot ɗek goy kay tuwma kay tuwma su? Lebo ki sara'a nala, numa min ɗerwelda ta ɗek goy kuma'ta katgiya lebo hay ɓigi pa su? 2Nigiya ti ɗerwelda vuma'a ta ɗoy hay dikma'a, sumuna kaf wi kayni, nisi jaŋ kaynawa kaw. 3Sumun kaf wi goy haraŋ ala nigiya ti ɗerwelda vi Kristu, ta ɗoya kuɗ lop ma sunda vuma'a, ɗoy hiɗi aŋkrenɗi, may hiɗi Ŋusta vi Lawna ma irina, ɗoy hay tablena beɗaynɗi, may hay tablena vi dikgiya.
4Kayni mi va ma numa vi kuɗ Lawna kalamu hay Kristu. 5Numa kay tuwma as var var ma yali kay tuwma ɗeŋɗi, may asta vuma'a may vi Lawn pa. 6Nam ma muɗmaawa asaya kay li sunda vi bonota wulita, may kuɗ ɗotaɗi, may vi Ŋusta pa, kay ɗota ci mati, may Ŋusta vul irita.
7Kay la nam ma li lopna vi mitta#3:7 Nam ma li lopna vi mitta Kayni mi vun-ma-gatna. ma ay ɓiriy hiɗi ɗota kat hiɗiyna vuli jaraya hiɗi gajijita, ta-ta gurona vi Israyel as cuk irsi kay vok ir Musus noŋɗi, kuɗ wileta vi vokomu, wileta vi vokomu ta as kay vat goyo, 8nala nam ma li lopna vi Ŋusta#3:8 Nam ma li lopna vi Ŋusta kayni mi labara ma firina. hiɗi gajijita kuɗum ŋolo suw kayni sem gaage? 9Kay la nam ma li lopna vi kitata fi gajijit ŋolo, nam ma li lopna vi ɗigerta fi gajijita suw kayni. 10Kay gajijit na'ta kayni ti gajijit ta ɦawa'a, la ŋra' hiɗi gajijit ta ŋolda ta gasita. 11Kay la va ma vat goyna ay hiɗi gajijit kuɗumu, va ma vat goyɗina ma fi gajijit ŋol suwa.
12Kay na'ta la cubta-sle'ta vuma' ka nala, numa tuɗ vokma'a hiɗi butta-goyta ŋolo. 13Numa'a may li ki Musus naɗi, nam bar (sligar) kiramu, kay gurona vi Israyel ma cuk irsi kay va ma min vat goynɗi. 14May nisi muɗi ɗeŋ ŋolo hay varta visiya. Kay ta-ta wulini, hay li ma nisi jaŋ Testamenta busayta, sligar ma bar ira ka lak'; nam bay yaw goyo, kay nam yaw goy kayni hay Kristu tuta. 15May ta-ta hay fatta vaydita, hay li ma nisi jaŋ ɗerwelda vi Musus, sligar ma baara ka vok irsi dok-dok. 16May hay li ma nisi muɗawa tam Bum-Sumuna, sligar ma baara ma yaw goyo. 17Bum-Sumuna namu mi Ŋusta, hay li ma Ŋusta vi Bum-Sumuna ka hayna, butta-goyta ka haya kaw. 18Ki kayn nala, nay kaf, iray may baray hiɗi sligarɗi, may gajijita vi Bum-Sumuna ka ɗuw hay tuwaya ki daraŋgal nala, nay muɗi slum nam nala, gajijita vay ka tuɗ voka'a voka'a, kayni mi lop ma Ŋusta vi Bum-Sumun lumna.
Currently Selected:
2 KORINTENA 3: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001