San Marcos 12

Wita cuidaimin seitonla

1Junni Jesús yalaca micarichun itsanque cuenta polarinue:

—Diosi wita tsacumin cuwenta jochunae tinue. Aman casale casaleri ya tsachiri uba wita quisa carichunae tinue. Junni wita quisa carisi, wita awinta serica quin, uba pi larichun foro quin, witaca quirato chuchun ya quin, quisa carichunae tinue. Junni jera se quetobi, ya witaca uyan tsachilachi quitsa quitsa cachun cuwato, bareca chubi jichunae tinue. 2Junni uba cano mate peyunca erechunae tinue yape wita cuidaiminlari quitsaca cuwalaquisa. 3Junni wita cuidaiminlari ya peyun janaminca cato, sonba quito, natiya cuwatuminnan manherelaquichunae tinue. 4Junni wita tsacumiri manca peyuncaman erechunae. Junni yacaman seitonque pato, misule quito, junsi su walacachi quito, yachinan natiya cuwatuminnan manherelaquichunae tinue. 5Junni junsi manca peyuncaman erenan, yaca totelaquichunae tinue. Junsi duque peyunca erenasanan, wita cuidaiminlari weyanlaca sonba quin, weyanlaca toten, quilaquichunae tinue.

6Junni wita tsacumin nantari peyun itochunae junchi erechun. Naobesiri puraichunae. Duque munatinun nao jochunae. Junni tenca cato, ya wita cuidaiminlari lachi naoca respetailaichunae tito, yacaman erechunae yape cano jonunca casa. 7Junni wita cuidaiminlari tenpato, itsanlatichunae: Ja mosori tsacuminchi nao joe latichunae tinue. Yari ina tsacumin ichunae. Yaca totebi jisa! latichunae yape wita chiquilachi puraisa. 8Tsantisi ya naoca cato, toteto, puyacaca witabi nechi quepolaquichunae tinue. 9¿Junni wita tsacumiri jun cuidaiminlaca niyan quichunan? tinue. Tsacumiri witaca manjito, wita cuidaiminlaca jera totechunae tinue. Yalaca toteto, ya witaca uyan tsachilachi quitsa cachun mancuwachunae tinue.

10Jesús micarichun ya cuentaca polaritobi, israelita mantaminlabe itsantinue:

—¿Diosichi Pilabi itsantinunca natiya quiratuminlayun? Junbi itsanque chuteca joe:

Suca ya quiminlari su mancaca seitoe tito quepolaquichunaeque chuteca joe.

Juntonan tsanquica josanan, wanbile ya suri fe munaranun sen su jochunaeque chuteca joe tinue.

11Miya Diosi tsanhisa carichunae; junca quiraminla tsara sen joe latiyoe tilatichunaeque chuteca joe tinue.

12Junni Jesuri tsanque micarinato, israelita mantaminlari ya seiton cuidaiminla cuwenta jolajoe tito micarinaminue. Junni ya mantaminlari junca tenhito, Jesuca dochi tinaminlanue. Tsan jotonan, Jesuca dotuminnan manjinilainue tsachila pailaichunaeque jelechi.

Inpuesto cala cuwano jonunca

13Junni israelita mantaminlari tsachilaca Jesúchica erelaquinue. Aman jaminla weyanlari fariséola jominlanue; weyanlari miya Heródechi tsachila jominlanue. Yalari Jesuca palaque pasa carichique jacala jominue. 14Junni Jesúchibi féto, itsanlatinue:

—Chiquila miralarayoe latinue nu tsarasica micarimin joeque. Tsachila niyaque palaquinanunca tennatuto, Diosichi minuca tuca micarimin joe latinue.

Junni Jesube tsantisi, jerale toca mantamin romano miyaca panhato, itsantinue:

—¿Chiquilari ya uyan to miyachi inpuesto cala cuwanola join? latinue. ¿Cala cuwantsan jun, o cuwatuntsan jun? latinue.

15Junni Jesuri junca meráto, yala culpa patarichiqueri tsanlatieque tenhito, itsantinue:

—¿Nula niya jonan laca culpa patarichi latinayun? tinue. Cala manca tanjalaide! tinue quirachun.

16Junni cala manca tanjanan, Jesuri jun calaca quirato, itsanque panhanue:

—¿In calabi mochi misu, mochi mumun chun? tinue.

Jesús tsantinan, yalari ya romano miyachi joe tilatinue. 17Junni Jesús itsantinue:

—Tsan jonari, ya cobierno miyachi cosateri yaca meralaquina! Aman Diosichi cosateri Diosica meralaquina! tinue.

Junni Jesús tsantinan, yaca meráminlari duque wepanalainue tsara tenca tanque paeque.

Puyaca junlaca mansonhilaituchunae tinunca

18Junni saduseo tinun bolon israelítalari Jesúchica jalainue. Aman saduséolari tsachila puyato natiya mansonhituminlae timinla joe. Junni saduséola Jesúchica jato, yabe itsanlatinue:

19—Nuri micarimin joto, chiquilabe pade! latinue. Aman matu to Moisés Diosichi mantaca pila chutenato, itsanque chiquilachi pila chutenue latinue: Tsachi manca sona taminnan na caitonan puyanari, ya puyan ocochi acori yachi sonabe casalaino joeque chutenue latinue aco puyan ocochi tenchi na tachun. 20Aman sieteca acola jominlanue latinue. Caque acori sona cato, casalainue. Junni ya unilari na caitonan puyae latinue. 21Junnan puyan ocochi benele acoman caque aco puyan ocochi sona jominbe mancasalaie. Junni yanan na caitonan puyae latinue. Junsi nantanan benechi acoman ya sonaca mancato, yanan puyae. 22Tsanquenan sieteca acola jera depoleto, jera puyalaie tilatinue. Junni yala jera puyacala josa, ya sonaman na caitonan puyae latinue.

23Junni Saduséolari Jesube tsanque cuenta polarito, itsanlatinue:

—Aman ya sonari sieteca acolabe casalaica jomin joto, ¿puyacala mansonhino mate mochi sona jochunan? latinue. Junbe tenhintsan joe latinue puyaca junla mansonhilaituchunaeque.

24Junni Jesuri yalachi fiquica jera meráto itsantinue:

—Nulari palaque tenca calaquinae tinue. Diosichi Pilacanan miitolajoe tinue. Diosi jelecari sonba quimin joequenan miitolajoe tinue. Jun tenchi nulari palaque tenca calaquinae tinue. 25Aman puyacala mansonhito, unilala sona mancalaquituchunae. Sonalanan unila manquilaquituchunae tinue. Diosichi tobi chumin anjelila cuwenta chularachunae tinue. 26Aman puyacala mansonhilaichunaeque cuenta quilaquisa! ¿Matu to Moisés chuteca pilaca quiratuminlayun? Junbi tape cuentaca chuteca joe tinue. Tapebi nechi Diosi cuenta quito, itsantinueque chuteca joe: Lari matu to Abrahanchi, Isaachi, Jacóbochi Diosi joyoe tinue. 27Junni Jesuri ya saduséolaca tenca calaquede! tinue. Diosi puyaca junlachi Diosi itoe; sonnaminlachi Diosi joe. Junto Abraham, Isaac, Jacobo puyaca jotonan, Diosichibi casonnan chularae tinue. Nula junca tenhituto, duque palaque tenca caminla joe tinue. Jesuri saduséolabe tsantinue.

Fécari merántsan mantá

28Junni Jesús tsantinasanan, israelítala tala mantaca micarimin tsachi manca junbi féto, jera meranaminue. Aman yari Jesús seque cuenta quinaminca meráto, yabe panhato ¿Nun mantá fécari merántsan mantá jun? tinue. 29Junni Jesuri beconan pato itsantinue:

—In mantá fe merántsan mantá joe tinue: Israelítala, meralaquede! Miya Diosi chiquilachi Diosi joe. Yasiri tsa Miya joe. 30Junni nulari Diosica jera tencabi tsarasi laquiralarana! Misubinan tsaracari laquirato, sele tenca cato laquiralarana! Jera sonbabe yaca laquiralarana! tinue. 31Jun mantá fe merántsan mantá joe tinue. Junsi jun benete mantacanan manpachinayoe tinue: Nula tencachique laquiranun cuwenta, nula quiranunlacanan jun tsansinan laquiralarana! tinue. In paluca mantári jerale uyan mantáca fe merántsan mantá joe tinue.

32Junni Jesús tsantinunsi, mantá micarimin tsachi yabe itsantinue:

—Tsa tie tinue. Nuri tsarasica micarimin joe. ¿Diosi mancasiri joco? ¿Uyan Diosi itoco? 33¿Jera tencabi, misubinan, jera sele tenca cato, jerale sonbabe Diosica laquirantsan joco? ¿Tencachique laquiranun cuwenta, quiranun tsachilacanan laquirano joco? Tsanque laquiraminla seque quiminla jochunae tinue. Tsachilari Diosibe sen jochun, yachi ticatiya epe cuwalaquichunae. O ticatiya nin poto Diosichi cuwalaquichunae. Aman tsanque jera laquiramin tsachila mantimini ya epe cuwaminlaca fécari Diosibe sen jolajochunae tinue. Ya mantaca micarimin tsachi tsantinue.

34Junni Jesús yaca seque tencabe cuenta quinaminca meráto yabe itsantinue:

—Nu Diosi mantananun tsachi bolonbi case wiwiyanae tinue.

Junni Jesús tsanque micarinan, jeralela lu tito, monantiya yabe manpanhatulajonue.

Cristo tinun tsachiri matu to miya Davichi Miya jonunca

35Aman Jesuri Diosichi yabi camicarinato itsantinue:

—Israelítala tala mantaca micariminla itsantiminla joe tinue: Diosi wenteca jun Cristo tinun tsachi matu to miya Davichi alica jochunae timinla joe tinue. Junni ¿niya jonan tsantiminla jun? tinue. 36Tenca calaquede! David patsa Diosichi Tencachi mantate itsanque pila chuteca joe tinue:

Miya Diosi lachi miyaca mantachunae tinue yape yachi tsa tede nanchi chudito yabe pemantasa.

Nuca fe losa cariyanae tichunae.

Junni junte mechude! tichunae tinue nuca pa jominlaca fe lono fecári.

37Junni Jesuri Diosichi Pilabi tsanque chutecaca manpasi, itsantinue:

—Aman Cristo tinun tsachi miya Davichi alica jonari, ¿niyaito Davinan yaca Miya tinun? tinue.

Junni duque tsachilari Jesús tsanque cuenta quinaminca meráto, son tito meránaminlanue.

Mantaca micariminla fe senla joyoe timinla jonunca

38Junni Jesús micarinato itsantinue:

—Israelítala tala mantaca micariminlaca tencabe nenalarana! tinue. Yalari baren camisa pochi timinlae tinue yape tsachilari yalaca duque sen jolajoe latisa. Duque tsachila nenanunte yalaca duque respetaito saludaisa munaralarae tinue. 39Diosichi fiqui miinun yabinan, fiestatenan, fe mantá tanla chudinunbi chudichi timinlae fe jolajoyoe tito. 40Biudalachi yaca nosale josoleminla jotonan, Diosibe wanca rocaiminlae yape tsachila yalaca quirato, duque sen jolajoe latisa. Diosi yalaca fe sonba casticaquichunae tinue.

Mantaca micariminla niya jolajonunca miilaisa, Jesús tsanque micarinaminue.

Biuda jera calaca Diosichi cuwanunca

41Man nete Jesús Diosichi yabi chuminue cala ponun cajon catenle. Aman tsachila junbi cala ponaminlaca quiranaminue. Junni duque tsachila, oco joto, duque calaca ya cajonbi ponaminlanue. 42Junni cala iton biuda manca jato, paluca cala nacá ponue. Ya paluca cala natiya mica iton cala nacári jominue. 43Junni Jesús junca quirato, yabe penenaminlaca jasa tito, itsantinue:

—Nulabe tsarasica pachinayoe tinue: In popere biudari nasi nacári calaca cajonbi pototiya, duque cuwaca joe tinue. Uyan pominlaca fe cuwaca joe tinue. 44Aman uyanlari puchuica calacari cuwalaquinae tinue. In biuda mantimini jera tanun calaca poniquee tinue. Titiya cato fito sonnano jun calaca jera poniquee tinue.

Currently Selected:

San Marcos 12: cof

Highlight

Copy