Juan 5

So Jesús nataren so ỹale maye sa da'añiigue

1Qaq co'ollaq qaỹata'ague de'era, nache So Jesús ỹe'eguelaxa ye Jerusalén, da yaqto' ỹalegueua'a so laponaxac na judiopi. 2Qaq se'eso lpaqtaxat ye nỹecpi ye Jerusalén, huo'o som lasom maye qaỹamata'ac «Nasom ana Qagueta.» Somaye, nache saqaỹapeque asom laỹe' na 'etaxat maye huo'oi soua cinco ñeguereuo maye nataqa'en ishet da qanayeeto'ot na lpaqal, qaq na la'aqtac na hebreo da iỹaxana qalaq Betzatá. 3Qaq asomaye, nache hueta'a so qalota sa no'onpi, huo'o na tagoxoicpi, qataq huo'o na ñe'eerauo naua lchel qataq na sa da'añiiguepi [maye choche iuatta'a da ndaxanataguec na le'ec 'etaxat asomaye, 4cha'aye som namaxashec piguem le'ec huo'o naxa ye na'a'q da naỹa asa'aso laỹe' na 'etaxat da iraxan na le'ec. Nache cam hua'auchiguiñi da tangui asomaye da ime da qairaxan na le'ec, nache camaye ishet da no'oita na'aictaxa cam 'eetec ca lalolaxa.]#5.3 Qalota aso togoshe lerepi na griegopi da ỹalecneuo so na'aqtac: Qaq namayepi choche iuatta'a ca ndaxanataguec na le'ec 'etaxat asomaye, cha'aye huo'o' naxa ye na'a'q nache anac som lamaxashec Ñim Lo'onatac 'Enauacna da naỹa asa'aso laỹe' na 'etaxat da iraxan na le'ec. Nache cam la'auaxanec da tangui asomaye da huo'otaq ime da qairaxan na le'ec, nache camaye ishet da no'oita, na'aictaxa ca 'eetec ca lalolaxa. 5Qaq huo'o so ỹale, nache hueta'asop asomaye. Somaye mashe ivi' naua treinta y ocho vi'iye da lalolaxa. 6Qaq So Jesús co'ollaq ila'a somaye da nnaatai', qataq qaỹa'aqtaxanem da mashe qaỹoqteguelo naua vi'iye da nache 'eeta'ac de'era somaye. Nache inat, 'eeta':

–¿Peta'a 'anshetaique da 'am no'oita?

7Nache se'eso sa no'on 'enapeco':

–'Am Nataxala', qaica ca aỹem itauan da sangui añi laỹe' na 'etaxat naxa da ivita da qairaxan na le'ec. Cha'aye naxa da ñeshetaique da sangui añimaye, nache mashe sogote naxa da huo'o na hua'auñigui da tangui.

8Nache So Jesús 'enapega somaye, 'eeta':

–Qoñisheguem, 'auacona na 'aracanec, ime, nache 'auqueuoỹapigui' nagui.

9Huaña, nache se'eso ỹale no'oita, inana't so lacanec, nache queuoỹapigui'. Qaq se'eso na'a'q maye huetoigui de'era, somaye mataxaqui, se'eso na'a'q ỹataqta saishetapec na judiopi. 10Ỹoqo'oye huo'o so lataxala'pi na judiopi 'eetega som ỹale maye qanataren, 'eeta':

–Na na'a'q, namaye mataxaqui, qaq ỹoqo'oye saishet da qaỹashen da 'am 'analleguisheetac na 'aracanec.

11Nache somaye 'enapeco':

–Som aỹem nataren maye aỹem 'enapega, 'eeta': «Qoñisheguem, 'auacona na 'aracanec ime, nache 'auqueuoỹapigui'.»

12Nache so lataxala' na judiopi inattaco' somaye, 'eeta':

–¿Negue't ca 'am 'enapega co'ollaxa da 'auo'ot de'era?

13Qalaxaye se'eso ỹale sa ỹauatton co'ollaxa cam nataren somaye, cha'aye So Jesús sa naỹaloxon da taigui se'eso qalota shiỹaxauapi maye hueta'a yemaye. 14Qaỹata'ague co'ollaxa de'era, nache So Jesús ilalec somaye huaigui aso no'onaxanaxaqui late'erai, nache 'enapego', 'eeta':

–Nagui da mashe 'am no'oita, qaq no'on da saishet da qaltaq huo'o 'anqa'en ca 'arasouaxashet, yaqto' saishet da 'avira'aguet ca ỹapac qauem.

15Nache se'eso ỹale jec da da'aqtaxanema soua lataxala'ate so judiopi da, nacheso So Jesús som nataren somaye co'ollaxa. 16Qaq ỹoqo'oye soomaye icaatrac So Jesús, souaxat Somaye da datannaxangui so na'a'q mataxaqui. 17Qalaxaye So Jesús 'enapegalo soomaye, 'eeta':

–Ñi Ita'a, saishet da ỹaxaañi da lo'onataxanaxac, qaq nache 'eetec nataqa'en Aỹem.

18Qaq ỹoqo'oye na lataxala'pi na judiopi nquictec da lyaxa da ỹalauat So Jesús, cha'aye saishet da nachaqrata da sa ỹalaxalec da lataxac ye na'a'q mataxaqui, cha'aye nataqa'en 'eetega da ỹataqta Lta'a Ñim Lo'onatac 'Enauacna, qaq ỹoqo'oye da lataxac 'eeta'am Ñimaye.

Da 'enec So Llalec Ñim Lo'onatac 'Enauacna

19Nache So Jesús 'enapega somayepi, 'eeta':

–Ỹataqta 'eesa de'era qami' sa'axatema, da ne'ena Llalec Ñim Lo'onatac 'Enauacna, namaye saishet da huo'o ca ỹo'ot da huo'otaq maiche ndotelec, cha'aye namaye ỹo'ot cam ỹauaachigui da ỹo'ot Ñim Lta'a. Qaq ỹoqo'oye 'enauac nam ỹo'otpi Ñim Ita'a, qaq nataqa'en Aỹem so'ot. 20Ñimaye ỹataqta Aỹem ỹauotec, ỹoqo'oye Aỹem ỹachaxana nam ỹo'otpi. Qataq Aỹem ỹachaxana na lta'araic ỹo'otpi, nam qami' ỹo'oteque da lta'araic da qara'aalaqai. 21Cha'aye de'era 'eetec da Ñi Ita'a da ishet da qaltaq nca'alaxatec ca leuaxaic, qaq nache 'eetec nataqa'en nam Llalec, da ishet da ỹanem da lca'alaxa cam taalec da ỹanem. 22Qataq Ñi Ita'a, saishet da nmit na shiỹaxauapi, chaqrata da ỹanem na Llalec 'enauac da la'añaxac da nmit namayepi, 23yaqto' 'enauac na shiỹaxauapi ishet da ỹo'oxoren na Llalec, 'eeta'am naqa'en da 'eetec da ỹo'oxoren Ñim Lta'a. Qaq cam saishet da ỹo'oxoren na Llalec, qaq camaye saishet nataqa'en da ỹo'oxoren Ñim Lta'a maye namaq Namaye.

24Qaq ỹataqta 'eesa de'era qami' sa'axatema, da ca na'axaỹaxana de'era sa'axattac, qataq ỹa'amaqten Ñim Aỹem namaq, nache camaye mashe inoxoneua'a da lataxac da nca'alaxa maye qaica ca loga't. Qaq camaye nataqa'en saishet da qaỹauo'o qome ca nhuaxanaguec, cha'aye mashe sogote da ca'ai da nleuaxa da inoxoneua'a da nca'alaxa. 25Qaq huo'o nataqa'en da ỹataqta 'eesa 'eeta': nagui nam ỹataqta qaỹoqta naqa'en Ñim Lo'onatac 'Enauacna, Aỹem hua'aqtague', Aỹem maye Aỹem Llalec Ñimaye. Qaq da ỹalaxalec 'enauac nam shenapec, nache huo'o ca lca'alaxa chochaq tatec. 26Cha'aye Ñim Lo'onatac 'Enauacna maye Ita'a, huo'o da la'añaxac da ỹan da nca'alaxa. Qaq de'era na'añaxac, damaye mashe Aỹem ỹanem. 27Qataq nataqa'en Aỹem ỹanem da ỹa'añaxac da ishet da ñimit na shiỹaxauapi, cha'aye Aỹem maye Aỹem Shiỹaxaua Llalec. 28Qaq saishet qome da qami' ỹe'elaqche't de'era qami' sa'aqtaxanema, cha'aye ivita ca na'a'q qome da nataqa'en na leuaxaicpi, hua'axaỹa da ivilỹaxac, 29nache chegoqchiguingui ana nhuachiquipi da ñesheguem. Nache nam ỹo'ottac ca ỹaỹamaqchiguiñi qaltaq nca'alec, da yaqto' chochaq tatec da hueta'aguet Ñim Lo'onatac 'Enauacna. Qaq nam ỹo'ottac ca sa ỹaỹamaxañi qalaq nca'alec, da yaqto' qaỹauo'o ca nhuaxanaguec.

Dam ỹoqta yo'oq naqa'en da la'añaxac So Jesús

30Aỹem saishet da maiche ñerotelec da huo'o ca so'ot. Ñim Ita'a maye Aỹem namaq, Ñimaye Aỹem da'aqtaxanem da lataxac da ñimit 'enauac na shiỹaxauapi. Ỹoqo'oye da huo'o ca ñimit qalaq ỹaỹamaqchiguiñi, cha'aye saishet da so'ot ca maiche sheetapeguec, nachaqrata da ỹataqta salaxaguet Ñim Ita'a. 31Cha'aye da huo'otaq Aỹem da no'on ca ỹa'aqtaxanaxac da maiche ña'axattapeguela't, nache qami' qoñiitega da satenataxaatac. 32Qalaxaye sauattoota Ñim Aỹem ỹa'axattac, qaq Aỹem saỹaten da ca 'enapec ñimaye ỹataqta 'eesa. 33Qami' huo'o co'ollaxa so qaramaxashequi da inat so Juan, qaq da la'aqtaxanaxac so Juan ỹataqta 'eesa. 34-35Da lapaxaguenataxanaxac so Juan, damaye ỹataqta 'onaxaic, 'eeta'am na le'eraxa aca ncoỹaraxanaxaqui da 'ettaigui da huetaigui na napalaxa, qaq qami' ỹataqta sa qaỹauec da qantonaxaqui co'ollaq qaua'aqaichigui. Qalaxaye Aỹem saishet da seuen da huo'o ca no'on ltaxaỹaxac ca yo'oqchigui shiỹaxaua da Aỹem detaqlec. Sa'axattac so Juan da yaqto' qami' qaua'amqaanataxañi, yaqto' Ñim Lo'onatac 'Enauacna qami' nca'alaxatre'c. 36Qalaxaye Aỹem huo'o da ña'aqtaguec maye ỹataqta napacalec da la'aqtaxanaxac so Juan. Cha'aye nam so'ot, nachena na Aỹem ỹamaxalec Ñim Ita'a. Qaq nachena na ỹoqta ichoxot da 'eesa da Aỹem namaq Ñimaye. 37Nataqa'en Ñim Ita'a maye Aỹem namaq, Ñimaye ỹataqta 'eesa naqa'en de'era ña'aqtaguec. Qaq na'aictaxa da qami' sa qauauañiỹapega da qaua'aqaichigui ca lavilỹaxac Ñimaye, qataq saishet da qauauattoñi ca lasheguiỹaxac. 38Qaq naua nanettrañi la'aqtaqa Ñimaye nataqa'en saishet da qami' taiguilo, cha'aye qami' saishet da qaua'amaqchiñi Aỹem maye Aỹem namaq Ñimaye. 39Qami' ỹataqta huo'o da qanaquitaxaqui da qanapaxaguiñeetegalo naua nanettrañi la'aqtaqa Ñim Lo'onatac 'Enauacna, cha'aye qaua'amaqchiñi da nache qoñiitec de'era, nache qami' taỹoto da nca'alaxa maye chochaq tatec. Qalaxaye ne'enaua na'aqtaqa maye nanettrañi, naamaye Aỹem ỹa'axatta'ape, 40qalaxaye qami' saishet da huotaique da Aỹem qaua'amaqchiñi, da yaqto' qami' taỹoto de'era nca'alaxa maye chochaq tatec.

41Aỹem saishet da choche ñaquitta'a da Aỹem ỹo'oxoren na shiỹaxauapi. 42Qataq da lỹa, ye ỹataqta qami' sauattoote' qataq saỹateeta da saishet da qauauochec Ñim Lo'onatac 'Enauacna. 43Ñimaye maiche Ita'a, qaltaq Aỹem namaq, qalaxaye qami' saishet da Aỹem qauacoñiiguet. Qalaxaye da huo'o ca anac da maiche ỹacoolec ca maiche 'eetapeguec, nache camaye qami' qauacoñiiguet. 44Qaq ¡Ca 'eeteco' da qami' Aỹem qaua'amaqchiñi, ye qami' qarqopitaxache da qami' ỹo'oxoreeta'ape na shiỹaxauapi, qaq saishet da ỹo'oxoren Ñim Lo'onatac 'Enauacna maye 'oonolec! 45Saishet qome da qaupi'itaxañiitega da Nachaỹem da sa'aqtaxanem Ñim Ita'a ca qarasouaxashechi. Cha'aye qami' qauacheeto'ot da qarpi'iỹaxaqui naua leregui'she so Moisés, qaq nacheso somaye da ỹa'axat ca qarasouaxashechi. 46Cha'ayectaxa da qami' qaua'amaqchiñi cam 'enapec so Moisés, nache nataqa'en taxa Aỹem qaua'amaqchiñi, cha'aye so Moisés Nachaỹem maye Aỹem ỹiyiñi co'ollaxa. 47Qalaxaye da qami' saishet da qaua'amaqchiñi dam ỹiyiñi co'ollaxa somaye, qaq ¿ca 'eeteco' da ishet da qaua'amaqchiñi cam shenapec?

Currently Selected:

Juan 5: LÑLE13

Highlight

Copy