Lucas 15

Qaỹaloqnaxana aso qagueta maye isomapec

(Mateo 18.10-14)

1Huo'o so na'a'q, nache anac da na'axaỹaxana So Jesús 'enauac nam ỹacootapeeguet ana nsheetenaqte ca nta'a, maye netaña ye Roma, qataq na laỹepi shiỹaxauapi maye nam chegaqaigui na fariseopi ỹamata'ac da qauem da na'aqtaguec. 2Nache nam ỹalectaigui na fariseopi qataq nam dapaxaguenataxaatapeguec na namaxasoxonaxacpi quetapeguelec Somaye, 'eeta':

–De'era ỹale, qache ỹaconeguet na 'etaxaloxoicpi qataq lquia'axaua namayepi.

3Nache So Jesús ỹauo'o so daloqnaxana, 'eeta':

4–Da huo'o ca 'oonolec da qoñiita da huo'o aca cien lalopi qagueta, qaq da isomapec aca 'oonole acamayepi, qaq ¿peta'a saisheto' da no'onaxatchigui aca noventa y nueve da no'onaxatalec ca no'onaxa, ime, qaq nmitaique aca isomapec, choche ivitta'a da ỹanata? 5Qaq da huo'otaq mashe ỹanata, nache ỹachalec na lallac, nache ỹe'eguelaxauo ỹataqta machiguiñi. 6Qaq da ivireua'a ca lma', nache lapona't ca nauochaxauapi qataq ca lauoreuapi. Nache 'enapega, 'eeta': «Ỹataqta qantoñiitapigui' qome qoñiita'am aỹem, cha'aye mashe sanata añi ilo qagueta maye isomapec.» 7Qaq Aỹem shenapec da ỹactec da ntonaxac nataqa'en na neta'ague da piguem, qom huo'otaq huo'o ca 'oonolec ne'ena shiỹaxauapi da ỹe'egueloqot Ñim Lo'onatac 'Enauacna, qaq saq 'ena'am cam noventa y nueve nam ỹaỹamaxareeta Ñim Lo'onatac 'Enauacna maye sa iuen da ỹe'eguelaxaguet Ñimaye.

Qaỹaloqnaxana asotai' anom lcatole maye deqat

8Qataq aca 'alo da huo'otaq hueto'oto caua diez anomio'ole lca'achole da huo'otaq deqat aca 'oonole, qaq ¿peta'a saisheto' da ỹegueua'a aca lcoỹaraxanaxaqui, ime, qaq ỹataqta huo'o da ltelaxa da iqueloc ca lma', choche ivitta'a da ỹanata? 9Qaq da mashe ỹanata, nache lapona't aca nauochaxauapi qataq acam lauoreuapi. Nache 'enapega, 'eeta': «Qantoñiitapigui', qoñiita'am aỹem, cha'aye mashe sanata aye aỹom lỹa maye deqat.» 10Qaq Aỹem shenapec nataqa'en da ỹataqta huo'o da ntonaxac nam lamaxashecpi piguem le'ecpi Ñim Lo'onatac 'Enauacna, da huo'otaq ỹaxaare'c naua no'onataxaco ca shiỹaxaua 'etaxaloxoic.

Qaỹaloqnaxana so ñalec maye iqataqchet da lsallaxa

11So Jesús nataqa'en 'enapeco':

«Huo'o so ỹale huo'oi soua dos llalqa. 12Nache huo'o so na'a'q so na'asa soomaye 'enapega so lta'a, 'eeta': ‹'Am taxare, aỹem 'aỹa'anem qome dam isallaxa maye 'auqataxaatapigui' da aỹem talec.› Nache, so lta'a icolaxachigui dam lsallaxa, nache ỹanoiguilo.

13Qaq co'ollaq saxanaxa da qaỹa'aguelo soua na'axa'te, nache som ñalec na'asa imen 'enauac som lalamaxat. Nache aso lasheue ỹache da nqo'ona so lỹa 'alhua, som huaña co'ollaq choche ỹe'en aso alom, qataq taigui da qauem llecỹaxac.

14Qaq co'ollaq mashe imeuo 'enauac aso alom, nache anac so lta'araic nqouaxa se'eso 'alhua. Huaña, nache somaye ỹataqta huo'o na lqouaxa. 15Nache jec da nmitaique ca lo'onatac. Nache nqo'ona so ỹale maye lma' se'eso 'alhua. Nache se'eso ỹale ỹamaxa somaye ye no'onaxa da ilo'ogue naqa'en aso lalo cos late'epi. 16Nache somaye ỹataqta huo'o da lyaxa da chec na amap maye chectac ana cos late'epi, qalaxaye qaica ca ỹanem.

17Huaña, nache deuennataxaatac, 'eeta': ¡Ỹataqta 'enauac na lo'onataxanaxanecpi ca ita'a chochaq huañi na aloq ye lma', qaq aỹem na soota'a ỹataqta aỹem ỹalauat na iqouaxa! 18Aỹem she'eguelaxa qome ye lma' ca ita'a. Ime, qaq shenapega qome, sheeta': ‹'Am taxare, aỹem huo'o da ỹasouaxashet hueto'ot Ñim Lo'onatac 'Enauacna nataqa'en 'am. 19Qaq ỹoqo'oye saq saiguet nagui da 'auamata'ac da aỹem 'aỹa'alec, qaq no'on qome da 'aue'enaxatteguet aỹem ca 'oonolec nam 'aro'onataxanaxanecpi.› 20Huaña, nache jec, ỹe'eguelaxa ye lma' so lta'a.

Qaq co'ollaq ña qaỹata'aguet, nache so lta'a ỹauaateguet somaye. Nache ỹataqta huo'o da lchoxonnataxanaxa. Nache nqalgoqta'aguet. Qaq co'ollaq ivireguet, nache nqapaltague' qataq napigoqtague'. 21Nache som llalec 'enapeco': ‹'Am taxare, aỹem huo'o da ỹasouaxashet hueto'ot Ñim Lo'onatac 'Enauacna nataqa'en 'am. Qaq ỹoqo'oye saq saiguet nagui da 'auamata'ac da aỹem 'aỹa'alec.›

22Qalaxaye so lta'a 'enapega so lamaxashecpi, 'eeta': ‹Sa qanaỹaloxoñi qome da qanqacheere'c caua no'o'n anogo. Ime, qaq qano'otaxanaxañi qataq qa'añiỹaigui ana llaxaata aca chiguishaqte qataq qauauo'oi caua lapela'ate. 23Ime, qaq qanaviquiiuo ca ỹataqta chaxaraic huaca llalec, nache qaualauache. Ime, qaq ¡sequia'aq, so'otaq ca qantonaxac! 24Cha'aye de'era ỹalcolec, damaye mashe saqca, qalaxaye qaltaq nca'alec. Damaye deqat, qalaxaye mashe sanataxa.›

Nache qaỹo'ot se'eso tonaxac.

25Qaq ñaq huetauga na no'onaxa so ỹe llalec, qaq co'ollaq mashe ñe'eguelaxauo somaye, nache co'ollaq mashe nayeetaua'a so lma', nache hua'axaỹapegueua'a aso nviquepi qataq so dasottega'tpi. 26Nache iỹaxana so 'oonolec som lo'onataxanaxanecpi so lta'a, nache inattac da chaq negue't ca huo'omshe qaỹo'ottac de'era.

27Nache som no'onataxanaxanec 'enapeco': ‹Qomye 'arqaỹa da nvi', ỹoqo'oye ñi 'arta'a damaxasoxoolec da qaỹalauat som ỹataqta chaxaraic huaca llalec, cha'aye ñimaye nvi', qataq saqca ca da.›

28Qalaxaye som lqaỹa ỹe dalemata, nache saishet da pa'auo. Qaq ỹoqo'oye so lta'a nqo'oneuga, nache nachoxoreetacot da pa'auo. 29Nache somaye 'eetega so lta'a, 'eeta': ‹'Am 'auaỹateeta da mashe qalote' naua vi'iye da 'am so'onataxaatacot, qataq sa ỹauano' da huo'otaq 'am sa salaxaguet. Qalaq sa ỹauano' da huo'otaq choche 'oonolec ca aỹem 'aỹa'anem quetaq llalec, da yaqto' so'ot ca iquia'axac da ñeuana'ai' na ñauochaxauapi. 30Qaq nagui da nvi' da 'aỹa'alec maye choche iqataqchet aso 'om souaxat ana quisheguetaxai, nache 'aualaataxanem, 'aualauat so huaca llalec maye chaxaraic.›

31Nache so lta'a 'enapeco': ‹'Am ỹalcolec, 'am, nache 'eetai' da aỹem qoneto'ot. Qaq ỹoqo'oye 'enauac nam aỹem hueto'ot 'aralamaxat. 32Qalaxaye nagui no'on da so'otaq ca qarquia'axac da ñetonaqtapigui'. Cha'aye ñi 'arqaỹa, ñimaye mashe saqca, qalaxaye qaltaq nca'alec; ñimaye deqat, qalaxaye mashe sanataxa.›»

Currently Selected:

Lucas 15: LÑLE13

Highlight

Copy