Lucas 17
17
Da ivireguet ca shiỹaxaua da ỹo'otec da ca'ai da lpi'iỹaxac ca lỹa
(Mateo 18.6-7, 21-22; Marcos 9.42)
1Nache So Jesús 'enapegalo soua lapaxaguenataqa, 'eeta':
–Qalota na lataxacpi ana 'alhua, da ỹo'oteguet da na shiỹaxauapi sa ỹalaxaguet Ñim Lo'onatac 'Enauacna. Qaq damaye, nache 'eetai' qome. Qalaxaye, ¡ỹataqta qauem da taỹa'ague ca shiỹaxaua maye ỹo'oteguet da huo'o ca lasouaxashet ca lỹa! 2Da huo'o ca ỹo'oteguet ca 'oonolec nam saq 'amaqtaqpiolec maye Aỹem ca'attague' da saq ỹalaxaguet naqa'en Ñim Lo'onatac 'Enauacna, nache camaye ỹataqta ỹactec da nque'eenaxac, saq 'ena'am da qaicoñero'ot na lqosot ca coma'. Ime, nache qaỹasaxangui aso auaxai. 3Qaq ỹoqo'oye, ¡qanchelỹañi qome da huo'o ca qauo'oche!
Ca 'anauochaxaua qom huo'o ca 'am ỹo'otec sa ỹaỹamaxañi, qaq no'on da 'auachaxana cam 'am ỹo'otec camaye. Qaq da 'am iỹaxanot da 'auchoxoren, nache 'am no'on da 'auchoxoren. 4Qaq na'aictaxa da ivi' ye 'oonolec na'a'q da qalota na 'am ỹo'otec sa ỹaỹamaxañi, qaq camaye da 'am iỹaxanot da 'auchoxoren, qaq 'am no'on da 'auchoxoren.»
Da 'enec da npi'iỹaxac
5Nache soua lamaxa'she 'enapegalo' So Jesús, 'eetra':
–'Am Qarataxala', 'anquigaxatsheguem qome da qarpi'iỹaxac.
6Nache So Qarataxala' 'enapegalo' soomaye, 'eeta':
–Qami' da huo'o ca qarpi'iỹaxaqui, na'aictaxa da lcatam acatai' ala maye ỹataqta qapio'ole ana le'enaxat mostaza, qalaxaye ishet da qoñiỹapega ara'ara qo'oipaq late'erai, qoñiita': «Qoca'ai ne'ena qonetaña, ime, qaq qonangui aso auaxai», qaq ara'ara qo'oipaq ishet da qami' ỹalaxagueta.
Da lo'onataxanaxac cam qaỹamaqtac
7Da huo'o ca 'oonolec da qoñiita da huo'o ca l-latac, qaq camaye da huo'otaq chegaqauga na no'onaxa da huo'otaq mashe imat da na'attapiguisheguem na 'alhua, huo'otaq da ilotague' cam 'atetpi, qaq ¿'am peta'a ishet da qonapega da qoneta': «'Aỹala, 'anso'ooñi, 'auque'e?» 8'A'i, saishet, nda'a't da qonapega, qoneta': «Ña 'anaỹamaxat qome, aỹem qouapegue', 'auo'ot ca anoq. Nato' qom ime da iquia'axac qataq da ñeỹomaxac, nache ishet da 'am 'auque'e.» 9Qaq ¿peta'a ishet da 'aỹa'anem da 'ana'achec que'eca 'arlatac qom mashe imat cam 'auamaxalec? 'A'i, saishet. 10Qaq nache 'eetec qami' da qaumache 'enauac nam qami' ỹamaxaleguete Ñim Lo'onatac 'Enauacna, nache saishet da qauacheetaique da qami' ỹanema ca na'achec. Nachaqrata da qoñiita': «Qomi' choche qomi' namaxa'she, nachaqrata da so'otaq qataq sepagaqtelec dam qanamaxasaguec.»
So Jesús natare'n soua diez ỹale't maye nchega na lo'oc
11Qaq co'ollaq mashe jec So Jesús da taigue da Jerusalén, nache taalec yem 'alhua maye huaigui ye Samaria qataq ye 'alhua Galilea. 12Qaq co'ollaq ivita som naña som saq 'amaqtaq nỹecpiolec, nache ỹa'axasoxootegueta Somaye soua diez ỹale't, maye nchega na lo'oc, qalaxaye qaỹata'a ca huetra'a soomaye, 13co'ollaq ỹa'ala'q, 'eetra':
–¡'Am Jesús maye 'Am Napaxaguenataxanaq, qomi' 'auchoxore'n qome qomi' 'anatare'n!
14Nache So Jesús co'ollaq ila'alo soomaye, nache 'enapegalo, 'eeta':
–Qauesomiỹa, qanachaxañeeua'a cam ltaxaỹaxanaxanecpi nam shiỹaxauapi da qaitaxaỹapegue' Ñim Lo'onatac 'Enauacna.
Qaq co'ollaq quetrague' soomaye ca nqa'aic, nache maiche no'oite'. 15Nache so 'oonolec soomaye co'ollaq ila'a da mashe no'oita na lo'oc, nache ñe'eguelaq, nache ỹo'oxoreetac Ñim Lo'onatac 'Enauacna, ỹataqta ỹa'alaqtai'. 16Nache ỹa'aroto naua l-llectel So Jesús, ỹataqta iviraxata'aguet naqa'en na latap na 'alhua, nache ỹaatacot da na'achec Somaye. Qaq se'eso ỹale, somaye lma' ye Samaria. 17Nache So Jesús 'enapeco':
–¿Saisheto' da diez soua no'oite' qanqa'en na lo'oc? ¿Ca huetra'ague caua lỹa't? 18Cha'aye yem ya' chegaqa'a ca lỹa 'alhua, ¿peta'a yemaye 'oonolec da ñe'eguelaq da ỹanot da llo'oxonnataxanaxac Ñim Lo'onatac 'Enauacna?
19Nache 'enapega so ỹale, 'eeta':
–Qoñisheguem qojec. Mashe 'am no'oita, cha'aye 'aua'amqaanataxan.
Da lviraxac da lo'onataxanaxac Ñim Lo'onatac 'Enauacna
(Mateo 24.23-28, 36-41)
20Nache nam chegaqaigui na fariseopi inattac So Jesús, da chaq lagui qaq ivita ca laloqo' da Ñim Lo'onatac 'Enauacna da do'onataxan. Nache Somaye ỹasat, 'eeta':
–Ca lviraxac da lo'onataxanaxac Ñim Lo'onatac 'Enauacna, camaye saishet da qaila'a. 21Qataq saishet da qoỹeeta': «¡'Ena namaye!» huo'otaq da qoỹeeta': «¡'Era cha'a!» Cha'aye da lo'onataxanaxac Ñim Lo'onatac 'Enauacna mashe qami' huetanguilo.
22Nache 'enapegalo soua lapaxaguenataqa, 'eeta':
«Huo'o qome ca na'a'q, qaq qami' huo'o da qaryaqai da qauloỹa'a ca laloxoqui maye huetoigui da Aỹem, maye Aỹem Shiỹaxaua Llalec ñachaxan, qalaxaye saishet qome da qauloỹa'a. 23Huaña qome, nache huo'o ca 'eeta': ‹¡'Ena namaye, hueta'a ne'ena!› huo'otaq 'eeta': ‹¡'Era damaye, hueta'ague de'era!› Qalaxaye saishet qome da qoqui da qauca'acheegue. 24Cha'aye Aỹem Shiỹaxaua Llalec qom ñe'eguelaq, nache 'enauac da Aỹem qaila'a, 'eeta'am na nqashelgaxa da nqashilliguiñi, nache imata 'enauac na piguem. 25Qalaxaye hua'auñi qome da saigui na qalota ñeque'eenaxaguesat, qataq saishet qome da Aỹem qaỹaconeguet, saishet da Aỹem ỹaconeguet nam shiỹaxauapi maye huetaigui nagui ne'ena na'a'q.
26Qaq Aỹem Shiỹaxaua Llalec qom ñe'eguelaq, nache na shiỹaxauapi da lataxac, 'eeta'am co'ollaq so na'a'q maye huetaigui so Noé. 27Somayepi deque'etac qataq nỹomtac, qataq huarootega't qataq huetapegue' da laronaxac na llalpi, choche ivitta'a so na'a'q co'ollaq so Noé inoxonoigui aso nnotaxaqui maye quiguingui na 'etaxat. Nache anac so auot, huaña, nache ileu 'enauac somayepi. 28Qaq nache 'eetec nataqa'en soua vi'iye maye huetaiguilo co'ollaxa so Lot: so shiỹaxauapi deque'etac qataq nỹomtac qataq maiche nmeetega't, danaxaatac qataq ỹo'otta'ape naua lma'ate. 29Qalaxaye co'ollaq ca'ai so Lot ye Sodoma, nache anac so norec qataq so quiquiaxaraic chegoqo'ot na piguem, nache ỹalauat 'enauac somayepi.
30Qaq 'era qome da sheetec Aỹem Shiỹaxaua Llalec, qom ivita que'eca na'a'q da ñachaxan. 31Nache que'eca na'a'q da huo'otaq huo'o ca pa'atasheguema na l-laq ca lma',#17.31 L-laq ca lma': Se'eso na'a'q, na l-laq na nỹecpi saishet da 'eeta'am da lataxac na l-laq na nỹecpi nagui, nachaqrata da nalochiguiñi. Ỹoqo'oye na shiỹaxauapi ishet da huenoolec na l-laq na nỹecpi, cha'aye nataqa'en huo'o so ñiguisheguem taỹasheguema na pa'asheguem. Qaq ye pe da ỹataqta napaxaỹañi, nache na shiỹaxauapi da do'oche qalaq talec na l-laq na lma'pi. qaq saishet da huenotec da nqatec na logoxotpi maye pa'ataigui ca lma'. Qataq da huo'otaq huo'o ca huetauga na no'onaxa, qaq camaye saishet da ỹe'eguelaxaua'a ca lma'. 32Qaq qauennache qome da 'eetec co'ollaxa aso lhua so Lot. 33Cha'aye ca nshetaique da maiche nca'alaxatec da nachaalataxac, nache camaye deqat. Qalaxaye cam iqataqchet da nachaalataxac souaxat Aỹem, nache camaye qanca'alaxatec.#17.33 Da yaqto' qaỹaỹateeta ca naigui de'era na'aqtaxanaxac, nache iuen da qaimeten ye 9.24.
34Qaq que'eca pe maye huetoigui da ñevi', nache huo'oi qome caua nauataña't, qaq 'oonolec qome ca sauec caamaye, qaq ca lỹa qalaq ño'onaxatañi. 35Qataq huo'oi qome caua dos 'alol da'araxaata'ape, nache 'oonole qome aca sauec, qaq aca lỹa qalaq ño'onaxatañi. 36Qataq huo'oi qome caua dos shiỹaxau' huetrauga na no'onaxa, nache 'oonolec qome ca qaỹauec, qaq ca lỹa qalaq qano'onaxatañi.»
37Nache co'ollaq hua'axaỹa de'era soua napaxaguenataqa, nache inattrac, 'eetra':
–«'Am Napaxaguenataxanaq, ¿chaq hua'ague qome de'era?»
Nache Somaye 'eeta':
–«Qomye cam hueta'ague ca leuaxaic, qaq nacheca ca huaña da lapona't na teguesanpi.»
Currently Selected:
Lucas 17: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
