Lucas 18

Qaỹaloqnaxana aso 'alo pa'ai qataq som nmit ca nasouaxashet

1So Jesús huo'o da daloqnaxana co'ollaq huotaique da ỹapaxaguenec da nache 'eetai' da nqouagaxaueetrac soua lapaxaguenataqa, qataq saishet da nasamyiñi. 2Nache 'enapeco':

«Huo'o so nmit na nasouaxashetpi maye netaña so 'oonolec so saq 'amaqtaq nỹecpiolec. Somaye ỹataqta qaica ca 'enec naqa'en Ñim Lo'onatac 'Enauacna qataq 'enauac nam shiỹaxauapi. 3Qaq se'eso saq 'amaqtaq nỹecpiolec, nataqa'en netaña aso 'alo pa'ai. Qaq asomaye ỹe'eguelaqtaua'a se'eso ỹale, iỹaxaatacot da ña iueelec asomaye, souaxat so npa'aguenaxaua. 4Qalaxaye se'eso ỹale ỹataqta huo'oi soua na'axa'te da saishet da ilo'oguet asomaye. Qalaxaye co'ollaq qaỹoqtegue, nache somaye deuennataxaatac, 'eeta': ‹Aỹem na'aictoxo' da saishet da huo'o ca 'enec ñaqa'en Ñim Lo'onatac 'Enauacna qataq 'enauac nam shiỹaxauapi, 5qalaxaye asom pa'ai ye ỹapactec da aỹem sa ỹalemaxat. Qaq no'on da aỹem seueelec asomaye. Cha'aye da saishet da seueelec, nache asomaye saishet da ỹaxaañi da aỹem ñe'eguelaqtaua'a.›»

6Nache So Jesús 'enapeco':

«Qaq 'era da 'enapec som nmit na nasouaxashet maye qauemaic. 7Qaq Ñim Lo'onatac 'Enauacna ¿peta'a saq 'eeteco' nataqa'en de'era, da iueelec cam lca'aguishec maye nachoxoreetacot Ñimaye naua na'axa'tesa'ache qataq naua pe'? Qaq ¿peta'a huo'o ca ỹectega? 'A'i saishet. 8Qaq Aỹem shenapec da ỹataqta qaica ca ỹega Ñimaye da iueelec ca lca'aguishec. Qalaxaye Aỹem Shiỹaxaua Llalec qom ñe'eguelaq, qaq ¿peta'a ñaq huo'o qome nam ỹa'amaqteetac Ñim Lo'onatac 'Enauacna nam huetalec ana 'alhua?»

Qaỹaloqnaxana so fariseo qataq som ỹacootapeeguet anam nsheetenaqte ca nta'a

9Qaq souaxat nam ipi'itaxaatega da no'on shiỹaxauapi qataq ỹo'otan ca lỹa, nache So Jesús qaltaq ỹauo'o da daloqnaxana, 'eeta':

10«Huo'oi soua dos ỹale't tareua'a aso no'onaxanaxaqui late'erai da nqouagaxaue'n. Qaq so 'oonolec soomaye chegaqaigui na fariseopi, qaq so lỹa chegaqaigui nam ỹacootapeeguet ana lsheetenaxanaqte nam shiỹaxauapi da isheeten ca nta'a maye netaña ye Roma.

11Nache se'eso fariseo nachattañi co'ollaq nqouagaxaueetac, 'eeta': ‹'Am maye 'Aro'onatac 'Enauacna, 'am sanot da ña'achec, cha'aye aỹem saishet da shena'am ca camachaqca shiỹaxaua, maye cachaxaic, qauemaic, qataq lauatapiguiñi' aca sa lhua. Qataq saishet da sheeta'am de'era ỹacootapeeguet ana nsheetenaqte ca nta'a. 12Aỹem dos da she'eguelaxalec da ñeqouaqcheela't naua siete na'axa'te, qataq aỹem seỹotauga ana ñediezmo maye ỹaueque da 'Am sanot.›

13Qaq som ỹacootapeeguet ana nsheetenaqte ca nta'a, somaye qaỹata'a ca hueta'a, qataq saishet da ỹamato'ot na piguem. Chaqrata da naqchiguiñi, nache 'eeta': ‹¡'Am maye 'Aro'onatac 'Enauacna, aỹem 'auchoxoren, cha'aye aỹem huo'oi naua sasouaxa't!› 14Qaq Aỹem shenapec da se'eso shiỹaxaua co'ollaq ỹe'eguelaxa ca lma', qalaq ỹataqta ỹaỹamaxareeta Ñim Lo'onatac 'Enauacna, qaq saishet da 'eeta'am so chegaqaigui na fariseopi. Cha'aye ca maiche na'amaqten, qaq Ñim Lo'onatac 'Enauacna nacheca cam qaica ca la'amaqchec naqa'en; qaq cam sa lateela't, qalaq Ñimaye nacheca cam 'amaqtaq naqa'en.»

So Jesús ỹaalec da no'on la'aqtac so ñaqpiolec

(Mateo 19.13-15; Marcos 10.13-16)

15Qaq nataqa'en qanauegueua'a na ñaqpiolec So Jesús, da yaqto' Somaye ishet da ỹashel-lec. Qalaxaye soua lapaxaguenataqa co'ollaq ỹauaachigui de'era, nache nlaqtega nam nauectegueuo na ñaqpiolec. 16Qalaxaye So Jesús damaxasoxoneuga so ñaqpiolec, qataq 'enapegalo soua lapaxaguenataqa, 'eeta':

–Ña qauaqaỹa'a qome na ñaqpiolec da Aỹem naua'a, saishet da sa qanashiñiiguet, cha'aye ca 'eeta'am ca 'oonolec namayepi, nache ishet da inoxoneua'a da lo'onataxanaxac Ñim Lo'onatac 'Enauacna. 17Cha'aye Aỹem shenapec na ỹaconeguet da lo'onataxanaxac Ñim Lo'onatac 'Enauacna da ilo'ogue 'enauacna, da huo'otaq saishet da 'eeta'am ca nogotolec, nache camaye saishet da ỹañoxot da inoxoneuo.

So ỹale maye sallaxanec detaqtague' So Jesús

(Mateo 19.16-30; Marcos 10.17-31)

18Nache anac som 'oonolec nam lataxala'pi na judiopi. Nache inat So Jesús, 'eeta':

–'Am soxoraic Napaxaguenataxanaq, ¿chaq hua'ague ca sheetec, da yaqto' aỹem taỹot ca nca'alaxa maye qaica ca loga't?

19Nache So Jesús 'enapeco':

–¿Ta'ainco' ye qonetega da Aỹem soxoraic? Ye qaica ca lỹa soxoraic, 'oonolec Ñim Lo'onatac 'Enauacna maye soxoraic. 20'Am peta'a 'auaỹaten nam namaxasoxonaxacpi maye 'eeta': «Saishet da 'arauañi' aca sa 'arhua; saishet da 'aualaataxan; saishet da 'aucache; qataq saishet da 'anasaxauec ca saq 'en maye ishet da na'axat ca 'arỹa; huo'o da 'enec 'anqa'en ca 'arta'a qataq aca 'arate'e.»

21Nache somaye 'enapeco':

–Aja', 'enauac namayepi ỹataqta salaxaguet, chegoqchiguiña co'ollaq ñaq aỹem nogotolec.

22Nache co'ollaq hua'aqchigui de'era So Jesús, nache 'eeta':

–Huo'o da 'oonolec ña deqaptauec, 'eeta': 'Aumen qome 'enauac na 'am hueto'ot, ime, qaq 'aỹa'anoigui nam choxoraqpi, yaqto' huo'o ca 'arsallaxa hua'ague da piguem. Qaq qom ime, nache 'auanac da Aỹem 'auca'ategue.

23Qalaxaye se'eso ỹale co'ollaq hua'axaỹa de'era, nache ỹataqta daquicota, cha'aye somaye ỹataqta sallaxanec. 24Nache So Jesús co'ollaq ila'a somaye da ỹataqta daquicota, nache 'enapeco':

–¡Ỹataqta huo'o da lta'araic lqalaic nam hueto'ot da nsallaxa da inoxoneua'a dam lo'onataxanaxac Ñim Lo'onatac 'Enauacna! 25'Eesa da huo'o da lqalaic aca shiguiỹac le'enaxat nauanaxanaxa da taigui qanqoỹen ca lauac aca qana, qalaxaye ỹapactec da lqalaic ca sallaxanec da inoxoneua'a da lo'onataxanaxac Ñim Lo'onatac 'Enauacna.

26Nache nam na'axaỹaxaatacpi, 'eeta':

–Qaq ¿negue'to' cam ishet da nca'alec?

27Nache So Jesús 'enapeco':

–Cam saishet da ỹañoxot na shiỹaxauapi, qalaxaye Ñim Lo'onatac 'Enauacna ishet da ỹo'ot.

28Nache so Pedro 'enapeco':

–Qomi' mashe ño'onaxataqchigui 'enauac nam qomi' hueto'oto, nache 'am seca'ataxague.

29Nache So Jesús 'enapeco':

–Ỹataqta 'eesa de'era qami' sa'axatema, da nagui ca ca'ai ca lma', huo'otaq caua lta'al, huo'otaq ca lqaỹañecpi, huo'otaq aca lhua, huo'otaq ca llalaqpi, souaxat da lo'onataxanaxac Ñim Lo'onatac 'Enauacna, 30qaq camaye ỹapactec qalota qome ca taỹot nagui ne'enaua souaqtaiguilo na'axa'te, nataqa'en cam nca'alaxa maye qaica ca loga't maye ñaq natauo.

So Jesús qaltaq ỹa'axata'a da l-leuaxa

(Mateo 20.17-19; Marcos 10.32-34)

31Nache So Jesús iỹaxanalo soua doce lapaxaguenataqa da iỹotaugalo, nache 'enapegalo, 'eeta':

–Nagui qomi' saxague da Jerusalén, nache huaña qome yemaye da ipacchigui 'enauac dam na'aqtaguec na Shiỹaxaua Llalec, maye ỹiyiñi co'ollaxa som la'aqtaxanaxanecpi Ñim Lo'onatac 'Enauacna. 32Qataq Aỹem qoỹanoigui qome nam chegaqauec shiỹaxauapi, da yaqto' Aỹem ỹe'enai', qataq Aỹem isheueetac, qataq Aỹem nqaigoqto'ot. 33Qataq Aỹem iuaxaatac qome. Qaq qom ime, nache Aỹem ỹalauat. Qalaxaye qom mashe ivi' caua tres na'axa'te, nache qaltaq ñeca'alec.

34Qalaxaye soomaye saishet da ỹaỹaanegueta de'era, sa ỹaỹaten negue'to'ca cam qoỹeetega. Cha'aye dam qaỹa'axattac saishet da nqat cam naigui.

So Jesús nauaañi naqa'en so qanamaic huaña ye Jericó

(Mateo 20.29-34; Marcos 10.46-52)

35Qaq So Jesús co'ollaq mashe nayeetaua'a ye Jericó, nache huo'o so qanamaic nso'ootañi, netaua'a na laỹe so nqa'aic. Somaye dashelaxaatac. 36Qaq somaye co'ollaq hua'aqtague' so qalota shiỹaxauapi, nache denataxaatac, da chaq negue't cam huo'o. 37Nache qaỹa'aqtaxanem somaye da Jesús Nazaret le'ec, som nateuga yem hueta'a somaye. 38Nache se'eso qanamaic deỹaxan, 'eeta':

–¡Jesús, 'am maye 'am Lca'aguishec Ñim Lo'onatac 'Enauacna, aỹem 'auchoxoren! ¡Aỹem 'autauan!

39Nache som hua'autapi nhuogoqtega somaye, da yaqto' de'enaxaatai', qalaxaye somaye qaltaq nquigaxattec da lỹaxanaxac, 'eeta':

–¡'Am maye 'am Lca'aguishec Ñim Lo'onatac 'Enauacna, Aỹem 'auchoxoren! ¡Aỹem 'autauan!

40Nache So Jesús vi'iiguet, nache damaxasoxona somaye da qanavigui'. Qaq co'ollaq mashe saqaỹapeque somaye, nache inat, 'eeta':

41–¿Negue't ca 'anshetaique da 'am so'otec?

Nache somaye 'enapeco':

–'Am Nataxala', qomye ñeshetaique da aỹem ỹe'egueloqot da imeenaxanaxac.

42Nache So Jesús 'enapeco':

–¡Nagui 'anauaañi! 'Am no'oita, cha'aye Aỹem 'aua'amaqten.

43Huaña, nache se'eso qanamaic ishet da nauaañi, nache ca'ategue So Jesús, ỹo'oxoreetac Ñim Lo'onatac 'Enauacna. Qataq 'enauac so shiỹaxauapi maye ỹauaachigui de'era, nataqa'en somayepi ỹo'oxoreetac Ñimaye.

Currently Selected:

Lucas 18: LÑLE13

Highlight

Copy