Lucas 4

So Jesús nauec so pa'aguenataxanaxaic

(Mateo 4.1-11; Marcos 1.12-13)

1Nache So Jesús ỹataqta nlaqchigui So Saqcha'a Na'añaxac Qui'itta, co'ollaq chegaqaama so tala Jordán, nache So Saqcha'a Na'añaxac ỹauec Somaye da taỹa naqa'en ye toolec 'alhua.

2Huaña yemaye, nache hueta'a cuarenta na'axa'te, nache anac so pa'aguenataxanaxaic da ỹe'eguen. Qaq ỹataqta qaica ca chec Somaye#4.2 Qaq ỹataqta qaica ca chec: Huo'oi naua laloxoqui', da na judiopi saishet da deque'e qataq saishet da nỹomgui na 'etaxat, qaq damaye, la'anaxat naqa'en da lauoche qataq da lo'onataxanaxac Ñim Lo'onatac 'Enauacna. se'esoua na'axa'te. Qaq co'ollaq, ime, nache nomteguet na lqouaxa.

3Nache so pa'aguenataxanaxaic 'enapego' somaye, 'eeta':

–Qom ỹataqta 'eesa da 'am Llalec Ñim Lo'onatac 'Enauacna, qaq no'on da qonapega ne'ena coma' da nañigui ana nauole.

4Nache So Jesús 'enapeco':

–Ana nere maye huetalec na la'aqtacpi Ñim Lo'onatac 'Enauacna, 'eeta': «Saishet da nachaqacata aca nauole da ỹa'añaqchet ca shiỹaxaua.»

5Ime, nache so pa'aguenataxanaxaic qaltaq ỹaviguisheguema So Jesús aso qaỹoqotcheguemec 'alhua. Nache hualec asomaye da ỹachaxana, 'enauac na 'alhuapi maye hueta'a na sallaxanecpi qataq 'añaxaicpi. 6Nache so pa'aguenataxanaxaic 'enapeco':

–Aỹem 'am sanem qome 'enauac de'era na'añaxac qataq da llo'oxoyec 'enauac na 'alhuapi, cha'aye aỹem mashe aỹem qoỹanem 'enauac damaye. Qaq ỹoqo'oye aỹem ishet da sami' cam taalec da sami'. 7Qaq qom aỹem 'aua'aroto naua 'arllectel da aỹem 'anatamnot, nache aỹem 'am sami' da 'aralamaxat qome 'enauac namayepi.

8Qalaxaye So Jesús 'enapeco':

Ana nere maye huetalec na la'aqtacpi Ñim Lo'onatac 'Enauacna, 'eeta': «'Avio'oxoren Ñim Nataxala' maye Lo'onatac 'Enauacna, qataq nachaqñita Ñimaye 'aualaxaguet.»

9Qaq co'ollaq ime, nache so pa'aguenataxanaxaic qaltaq ỹauec Somaye, ỹauega ye nỹecpi le'enaxat Jerusalén, nache ỹaviguisheguemec na pa'asheguem aso no'onaxanaxaqui late'erai, nache 'enapego', 'eeta':

–Qom ỹataqta 'eesa da 'am Llalec Ñim Lo'onatac 'Enauacna, qaq 'auachegoqcheena'a qome da 'auparenaxanec, 10cha'aye ana nere maye huetalec na la'aqtacpi Ñim Lo'onatac 'Enauacna, 'eeta':

«Ñimaye qome namaq na lamaxashecpi

da yaqto' 'am ntela'a,

11namayepi 'am ỹachaleguete naqa'en naua lhua'q da yaqto',

saishet da 'am iuaxaneguet na coma'.»

12Nache So Jesús 'enapeco':

–Nataqa'en ana nere maye huetalec na la'aqtacpi Ñim Lo'onatac 'Enauacna, 'eeta': «Saishet da 'avi'iguen Ñim Nataxala' maye Lo'onatac 'Enauacna.»

13Nache so pa'aguenataxanaxaic co'ollaq saishet da ỹanata ca lỹa lataxac da ỹe'eguen So Jesús, nache cara'acolec da loiguilo naua na'axa'te da ca'ai Somaye.

So Jesús ỹacoolec da lo'onataxanaxac

(Mateo 4.12-17; Marcos 1.14-15)

14-15So Jesús ỹe'eguelaxa ye 'alhua Galilea, ỹataqta nlaqchigui So Saqcha'a La'añaxac Ñim Lo'onatac 'Enauacna. Nache quetagui na lma'pi na shiỹaxauapi qataq dapaxaguenataxaatapoigui ana napaxaguenaxaquipi na judiopi, qaq 'enauac na shiỹaxauapi ỹataqta 'onaxaic da na'aqtaguec da detaqtega Somaye. Nache saqaỹaloq da 'enauac qaỹauatton Somaye yi'iye 'alhua.

So Jesús hueta'a ye Nazaret

(Mateo 13.53-58; Marcos 6.1-6)

16Ime, nache ỹe'eguelaxague da Nazaret yem ỹataqta lañaxataqa'. Qaq co'ollaq ivireuga so na'a'q mataxaqui, nache inoxoneua'a aso napaxaguenaxaqui na judiopi, cha'aye maiche lataxac Somaye. Qaq co'ollaq nachaañi da detaxaỹaxanataxan, 17nache qoỹami' asom lereguishe so la'aqtaxanaxanec Ñim Lo'onatac 'Enauacna le'enaxat Isaías. Nache So Jesús ỹauachigui, ime, nache itaxaỹaxan som huetaña so nerec maye, 'eeta':

18«So Saqcha'a La'añaxac Ñim Lo'onatac

'Enauacna Aỹem netanguit,

cha'aye Aỹem Lca'aguishec qataq Aỹem namaq

da sa'axatem da no'on la'axaỹaxac nam choxoraqpi,

qataq da sa'axatem da qaisouec na ncoñeteguishecpi,

qataq she'eguelaxatem da nauaañi na sa nauaañipi,

qataq da yaqto' ñeca'alaxatec nam sa qaiyacnapec,

19qataq sa'axatem 'enauac na shiỹaxauapi da:

¡Nachena ne'ena na'a'q maye lca'aguishec

Ñim Lo'onatac 'Enauacna

da qomi' ỹanema da qarca'alaxa!»

20Ime, nache So Jesús lapaxa't aso nere, nache ỹami' som ilotague' asom napaxaguenaxaqui na judiopi. Ime, nache nso'ooñi, nache 'enauac nam huetaigui asom paxaguenaxaqui ỹataqta ilochigui Somaye. 21Nache So Jesús detaqa, 'eeta':

«Nagui mashe ivita ye laloqo' da ipacchigui se'eso setaxaỹaxaatac maye qana'axaỹaxañeetega.»

22Nache 'enauac qaỹo'oxoreetac So Jesús, qataq ỹataqta qaỹa'aalatapeguec souaxat naua la'aqtaqa ỹataqta ỹaguec da ỹaỹamaqchiyiñi. Nache nnattega't somayepi, 'eeta':

–De'era, ¿peta'a sa nachero' da llalec so José?

23Nache So Jesús 'enapeco':

–Qami' yo'oqta qome da Aỹem qauroilec da na'aqtac naxa maye 'eeta': «¡'Am natannaxanaq, hua'auñi da maiche 'anatareela't!» Qami' qauaỹachiñiita nam so'otpi co'ollaq huaña ye Cafarnaúm, qaq ỹoqo'oye nagui Aỹem qauỹaxañiitacot da so'ot nataqa'en da huaña ne'ena. 24Qalaxaye ỹoqta 'eesa de'era qami' sa'aqtaxanema da qaica ca la'aqtaxanaxanec Ñim Lo'onatac 'Enauacna da qaỹa'amaqten, qataq qaỹaconeguet da hueta'a ca maiche lalamaxat lma'. 25Soua qaỹoqteguelo vi'iye co'ollaq ñaq nca'altauec so la'aqtaxanaxanec Ñim Lo'onatac 'Enauacna le'enaxat Elías, nache qaica ca auot soua tres vi'iye qataq soua seis ca'agoxoiqa, qaq na shiỹaxauapi, ilem na lqouaxa. Qaq na lma' na Israel le'ecpi qalota ana pa'aipi, 26qalaxaye Ñim Lo'onatac 'Enauacna saishet da ỹamaq so Elías, da 'enauac itauan asomayepi. Nachaqasota aso 'oonole pa'ai maye lma' ye Sarepta, maye saqaỹapeque ye Sidón. 27Se'eso na'a'q, nataqa'en na lma' na Israel le'ecpi ỹataqta qalota na sa no'on maye nchega na lo'oc, qalaxaye so Eliseo ndotec da nataren so Naamán maye lma' ye 'alhua le'enaxat Siria.

28Nache co'ollaq qaỹa'aqchigui de'era ỹa'axattac, nache 'enauac nam huetaigui asom paxaguenaxaqui ỹataqta dalemata. 29Ime, nache qanqateeguesop yi'iye So Jesús, nache qaỹaviguisheguema som loga't asom qaỹoqotcheguemec 'alhua maye netalec so nỹecpi, cha'aye qaỹauotaique da qaỹamaxauec Somaye da huaña yemaye. 30Qalaxaye So Jesús ñe'eguelqot, nache tachiguingui na laiñi somayepi. Ime, nache ca'ai ye Nazaret.

So ỹale maye huo'o so netaigui saqcha'a na'añaxac leguemaxaic

(Marcos 1.21-28)

31Ime, nache So Jesús nqo'ona ye nỹecpi le'enaxat Cafarnaúm, yem huaigui ye 'alhua Galilea. Qaq co'ollaq huaña yemaye, nache ỹapaxagueetac so shiỹaxauapi so na'a'q mataxaqui. 32Nache na shiỹaxauapi ỹataqta huo'o da la'aalaxa da lapaxaguenataxanaxac Somaye, cha'aye da detaqa, qalaq ỹataqta huo'o da 'ene'c naua la'aqtaqa.

33Nache aso napaxaguenaxaqui nam judiopi, huo'o so ỹale maye huo'o so netaigui saqcha'a na'añaxac leguemaxaic. Qaq se'eso saqcha'a na'añaxac ỹa'alaxalec So Jesús, 'eeta':

34–¡'Am Jesús Nazaret le'ec! ¿Negue't ca 'auauotaique da qomi' 'auo'oteque? ¿Qomi' 'auanaỹalo peta'a da qomi' 'aulaxachiguilo? Aỹem 'am sauatton. ¡'Am nache 'am Llalec#4.34 Llalec: De'era la'aqtac na griego 'eeta' Qui'itta, qaq damaye, nache naigui da So Jesús ỹataqta lalamaxat Ñim Lo'onatac 'Enauacna. Ñim Lo'onatac 'Enauacna!

35Nache So Jesús nlaxa so saqcha'a na'añaxac leguemaxaic, 'eeta':

–¡'Aue'enaxaatai'! ¡Qoca'ai ne'ena ỹale!

Nache se'eso saqcha'a na'añaxac leguemaxaic, huañi naqa'en so ỹale, taqtoigui naqa'en somayepi. Ime, nache ca'ai so ỹale, qalaxaye saishet da ỹañoxot da huo'o ca 'ena'ac.

36Nache 'enauac so shiỹaxauapi ỹataqta huo'o da lcolanaxa, nache detaqtega't, 'eeta':

«¿Negue't de'era na'añaxac maye hueto'ot de'era ỹale? Ye dam da' ỹale ỹataqta huo'o naq 'enec, qataq huo'o da la'añaxa'c naua la'aqtaqa da ỹamaq so saqcha'a na'añaxac leguemaxaicpi, nache somayepi ỹalaq da jec.»

37Nache qana'aqtaxaatapigui So Jesús qataq na ỹo'otpi 'enauaque naua laỹel yi'iye 'alhua.

So Jesús nataren aso lachoro so Simón Pedro

(Mateo 8.14-15; Marcos 1.29-31)

38Huaña, nache So Jesús ca'ai aso napaxaguenaxaqui na judiopi, nache taua'a so lma' so Simón. Qaq co'ollaq pa'aigui so nỹec, nache qaỹa'aqtaxanem da aso lachoro so Simón sa no'on ỹataqta ỹaguec na le'eraxa. 39Nache So Jesús nqo'oneua'a asomaye, nache 'enapega se'eso ne'eraxa da jec. Nache se'eso ne'eraxa jec. Ime, nache saqaỹaloq da ñesheguem asomaye, nache iquia'axan 'enauac so hueta'a se'eso lma'.

So Jesús nataren so qalota sa no'onpi

(Mateo 8.16-17; Marcos 1.32-34)

40Qaq co'ollaq mashe inoxooñi aso nala', nache 'enauac na shiỹaxauapi maye ỹotta'a't na lalolaxapi, qandoua'a So Jesús. Qaq So Jesús ỹashel-lec ñi 'oonolec somayepi, nache no'oita naqa'en. 41Qaq nam saqcha'a na'añaxacpi maye ca'ai na shiỹaxauapi ỹa'alaqtagui, 'eeta':

–¡Nache 'am maye 'am Llalec Ñim Lo'onatac 'Enauacna!

Qalaxaye So Jesús nlaxa ne'ena saqcha'a na'añaxac leguemaxaicpi, qataq sa ỹashenem da detaqa, cha'aye namayepi ỹaỹaten da Somaye, nacheso So Lca'aguishec Ñim Lo'onatac 'Enauacna.

So Jesús ỹa'axatteguec da no'on na'axaỹaxac

(Marcos 1.35-39)

42Qaq co'ollaq mashe yaqta'a da yo'oxoñi, nache So Jesús tauga ca pa'auec so nỹecpi da nqo'oneuga som toolec 'alhua. Qalaxaye na shiỹaxauapi nmittaique, choche ivittauga ca hueta'a Somaye. Nache qaỹauotaique da qanllañi, da yaqto' saishet da jec. 43Qalaxaye So Jesús 'enapeco':

«Ñim Lo'onatac 'Enauacna Aỹem namaq da sa'axatem 'enauac na shiỹaxauapi ne'ena 'alhua da no'on na'axaỹaxac maye ỹa'axat da lo'onataxanaxac Ñimaye. Qaq ỹoqo'oye Aỹem, iuen da ñeqo'ona na laỹepi lma'pi na shiỹaxauapi.»

44Nache So Jesús jec da nqo'ona ana napaxaguenaxaquipi na judiopi 'enauac yi'iye 'alhua, ỹa'axattac da no'on na'axaỹaxac.

Currently Selected:

Lucas 4: LÑLE13

Highlight

Copy