Lucas 5
5
So ña'acoxoc maye sa qaỹauanapega
(Mateo 4.18-22; Marcos 1.16-20)
1Qaq huo'o so na'a'q So Jesús hueto'ot na loigue aso lapel late'erai ye Galilea, nache ỹataqta qalota so shiỹaxauapi laponeua'a Somaye da yaqto' na'axaỹaxana da la'aqtac Ñim Lo'onatac 'Enauacna. 2Nache So Jesús ila'alo soua dos nllocta qui'itchiguilo, neto'oto na loigue asa'aso lapel late'erai, cha'aye som ya'acoxoicpi huenoteeguesopa soomaye. Qataq iỹota'ape soua lalegue'c. 3Aso 'oonole se'esoua nllocta lalamaqte so Simón Pedro, nache So Jesús huenooñigui asomaye, ime, nache iỹaxanot so Pedro da cara'ac da nquigaxattaxaasom asomaye. Ime, nache So Jesús nso'ooñi#5.3 Qaimeten ye Marcos 4.1. netangui aso nllocta, nache cot da ỹapaxaguen so shiỹaxauapi.
4Qaq So Jesús co'ollaq ime da lapaxaguenataxanaxac, nache 'enapega so Pedro, 'eeta':
–'Auauegaxaama ye laiñi ana lapel ana 'al-llocta. Ime, nache 'aualliguiñi na 'araleguec.
5Nache so Pedro 'enapeco':
–'Am Napaxaguenataxanaq, qomi' imauec so pe da sha'acoqtac, qalaq qaica ca qaralliiguishec. Qalaxaye 'am da aỹem 'auamaq, nache nagui sasaxañi na ỹaleguec.
6Qaq co'ollaq qaỹo'ot da 'enapec So Jesús, nache ỹataqta qalota so nalliiguishecpi nỹaq. Qaq ỹoqo'oye huotaique da colaqa'ague so lalegue'c. 7Nache soomaye ỹatecapeguetalo soua lỹa't maye netanguilo aso lỹa nllocta, da yaqto' je'c da itaua'n soomaye. Nache se'esoua lỹa't je'c, nache ỹataqta qanlaxatchiguilo soua dos nllocta. Qaq ỹoqo'oye ỹataqta huotaique da iyiiyiñi. 8Qaq co'ollaq ila'a de'era so Pedro, nache ỹa'aroto naua l-llectel So Jesús, nache 'enapega, 'eeta':
¡'Am Ỹataxala' aỹem qoca'ai, cha'aye aỹem ỹataqta aỹem 'etaxaloxoic!
9-10So Pedro Santiago qataq so Juan maye llalqa so Zebedeo qataq 'enauac so laỹepi ỹataqta ỹaguec da lcolanaxa, souaxat se'eso qaica ca 'ena'am lla'acoxo'c maye ỹo'o't. Qalaxaye So Jesús 'enapega so Pedro, 'eeta':
–Saishet qome da 'añi'i, cha'aye nache chegoqchiguiña nagui da qaỹa'axañiiñi da qaya'acoxoqui, nache Aỹem qami' sapaxagueneque da lataxac da yaqto' Aỹem qanaviquiiua'a na shiỹaxauapi da yaqto' Aỹem quegue.
11Ime, nache ỹaueguetra so loigue soua l-llocta', nache no'onaxatchiguilo 'enauac nam ỹachetacpi, nache ca'atregue So Jesús.
So Jesús nataren so nchega na lo'oc
(Mateo 8.1-4; Marcos 1.40-45)
12Qaq huo'o so na'a'q co'ollaq hueta'a so nỹecpi So Jesús. Nache nvireuo so 'oonolec ỹale maye sa no'on, somaye nchega na lo'oc; nache ỹa'aroto naua l-llectel So Jesús iviraxata'aguet na latap naqa'en na 'alhua. Nache nachoxoreetacot, 'eeta':
–'Am Ỹataxala' aỹem saỹaten da 'aushet da aỹem 'anataren. ¿'Auo'ot peta'a de'era?
13Nache So Jesús ipoteua'a somaye, nache 'enapega, 'eeta':
–¡Aja', seshet! ¡Nagui 'am no'oita!
Nache saqaỹaloq da qaica so lalolaxa se'eso sa no'on. 14Ime, nache So Jesús 'enapega somaye, 'eeta':
–Saishet qome da huo'o ca 'aua'aqtaxanem de'era. Nachaqrata da 'am qojec, 'anachaxaneua'a ñi ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna. Ime, qaq 'aỹa'aneuo aca 'arachetaqtaxanaqte maye damaxasoxoolec co'ollaxa so Moisés, yaqto' na ntaxaỹaxanaxanecpi ỹaỹaten da mashe qaica so 'aralolaxa.
15Nache So Jesús ỹataqta nquictauec da na'aqtaguec. Nache ỹataqta qalota na shiỹaxauapi anac da ỹauotaique da na'axaỹaxana qataq huo'o na anac da huotaique da qanataren. 16Qalaxaye So Jesús, nache 'eetai' naxa da nmittaique cam huaña da ishet da 'oonolec da yaqto' nqouagaxauen.
So Jesús nataren so ỹale maye sa da'añiigue
(Mateo 9.1-8; Marcos 2.1-12)
17Qaq huo'o so na'a'q So Jesús dapaxaguenataxaatac hueta'a so nỹec. Qaq huo'o na ỹalectauo nso'ootañi nam ỹalectaigui na fariseopi qataq nam dapaxaguenataxaatapeguec na namaxasoxonaxacpi. Somayepi chegaqa'alo naua 'aleu' yem 'alhua ye Galilea, qataq ye 'alhua Judea qataq ye nỹecpi ye Jerusalén, da yaqto' na'axaỹaxana So Jesús.
–Qaq souaxat da So Jesús hueto'ot da la'añaxac Ñim Lo'onatac 'Enauacna da yaqto' nataren na sa no'onpi, 18nache nvildeuo soua shiỹaxau' npeetragui so mala' huetalec so ỹale maye saishet da queuoỹapigui'. Nache se'eso sa no'on qaỹauotaique da qairoua'a So Jesús, 19qalaxaye saishet da ỹanatra cam tateua'a naqa'e'n se'eso nỹec, cha'aye so ñegueuo ỹataqta qalota na shiỹaxauapi. Huaña, nache huenoldesheguemec na l-laq so nỹec,#5.19 Qaimeten ye Marcos 2.4. nache ỹauo'o so lauata'c. Nache tachiguingui naqa'e'n so lmala' so sa no'on da ỹasaxaña cam laiñi som lapoota'a't shiỹaxauapi qataq ỹataxaatrelec So Jesús.
20Nache So Jesús co'ollaq ila'a da lta'araic lpi'iỹaxa'c soomaye, nache 'enapega so sa no'on, 'eeta':
«¡'Am ñauochaxaua, nagui sapalaxat na 'arasouaxashetpi!»
21Nache nam dapaxaguenataxaatapeguec na namaxasoxonaxacpi maye chegoqo'ot so Moisés qataq na fariseopi deuennataxaatac, 'eeta': «¿Negue't cam ipettega dam da'? ¡Da nasaxauec la'aqtac ỹataqta dataỹa'aguet Ñim Lo'onatac 'Enauacna! ¡Nachaqñita Ñimaye da ishet da ỹapalaxat ca nasouaxashet!»
22Qalaxaye So Jesús ỹaỹaten da lhuennataxa somayepi, nache denataxan 'eeta':
«¿Ta'ainco' ye qarhuennataxaqui de'era? 23Ñaq Aỹem qaua'aqtaxañim: ¿negue't ca ỹoqta saqalaq da qoỹenapec, peta'a da qaỹapalaxa't naua lasouaxashe'ete ne'ena sa no'on, huo'otaq da qanataren? 24Qalaxaye nagui qami' sachaxanalo da Aỹem, maye Aỹem Shiỹaxaua Llalec huo'o da ỹa'añaxac ana'ana 'alhua da sapalaxat na nasouaxashetpi.»
Huaña, nache 'enapega som ỹale maye sa da'añiigue, 'eeta':
«Qoñisheguem, 'auacona na 'armala'. Ime, qaq qojec, 'anqo'ona ca 'arma'.»
25Nache saqaỹaloq da ñesheguem som sa da'añiigue, ỹauaachigui 'enauac somayepi. Ime, nache ỹacona so lmala' maye nnaatalec co'ollaxa, nache nqo'ona ca lma', ỹataqta ỹo'oxoreetac Ñim Lo'onatac 'Enauacna.
26Nache 'enauac so shiỹaxauapi ỹataqta huo'o da la'aalaxa, qataq nlaqchigui da lcolanaxa, ime, nache ỹo'oxoreetac Ñim Lo'onatac 'Enauacna, 'eeta':
«¡Ỹataqta qaica ca 'ena'am da llo'oxoyec da sauanaqchigui ne'ena na'a'q!»
So Jesús iỹaxana so Mateo
(Mateo 9.9-13; Marcos 2.13-17)
27Qaq co'ollaq ime de'era, nache So Jesús ca'ai yi'iye hueta'a. Qaq co'ollaq queta, nache ila'a so ỹale le'enaxat Mateo do'onataxaatac ỹacootapeeguet ana nsheetenaqte ca nta'a maye netaña ye Roma. Nache So Jesús 'enapego' somaye, 'eeta':
«Aỹem 'auca'ategue.»
28Nache so Mateo ñesheguem, no'onaxatchigui 'enauac nam hueto'otpi, nache ca'ategue So Jesús.
29Qaq nacheso se'eso na'a'q da so Mateo ỹo'ot so lta'araic lquia'axac, souaxat da huo'o naq 'enec naqa'en So Jesús. Nache iỹaxana da lquia'axaua so qalota nam ỹacootapeeguet ana nsheetenaqte ca nta'a maye netaña ye Roma, qataq qalota so laỹepi. 30Qalaxaye huo'o na fariseopi qataq huo'o na dapaxaguenataxaatapeguec na namaxasoxonaxacpi da quetrapegueleguete soua lapaxaguenataqa So Jesús. Nache 'eetregalo, 'eetra':
–¿Ta'ainco' qami' ye qarquia'axauai nam ỹacootapeeguet ana nsheetenaqte ca nta'a qataq nam shiỹaxauapi maye qauem da lataxac?
31Nache So Jesús 'enapeco':
–Nam iuen ca natannaxanaq nachena nam sa no'onpi, qaq saishet da nachena nam no'oitapi. 32Aỹem ñanac da seỹaxana nam 'etaxaloxoicpi da yaqto' ỹe'eguelaqot Ñim Lo'onatac 'Enauacna, qaq saishet da nachena nam 'eetega da no'on da lataxac.
Qainat So Jesús da chaq 'eetec ca lataxac ca shiỹaxaua da nqouaqchet
(Mateo 9.14-17; Marcos 2.18-22)
33Nache huo'oi soua 'enapegalo So Jesús, 'eetra':
–Na lapaxaguenatacpi so Juan maye nachelaxanataxanaq qataq nam quetague' na fariseopi ỹataqta ỹaguec da nqouagaxaunaxac qataq nqouaqchetaxac. Qaq naua 'arapaxaguenataqa qalaq nda'a't da lquia'axac qataq da nỹomaxac.
34Nache So Jesús 'enapeco':
–Ca ncoyeguenatacpi da ỹalectaua'a ca naronaxac, camayepi saishet da nqouaqchet da ña ỹalecta'aguet ca auonaxaua. 35Qalaxaye qom ivita ca laloqo' da qaỹauec que'eca aronaq, huaña, nache ishet da nqouaqchet cam ncoyeguenatacpi.
36So Jesús nataqa'en ỹauo'o da daloqnaxana, 'eeta':
«Da huo'otaq huo'o aca togoshe npoto da huo'otaq colaqa'ague, nache qaica ca icheguec ca laỹe aca npoto maye dalaxaale da naparen aca togoshe. Cha'aye da nache 'eetec, nache na'axat aca dalaxaale. Qataq nataqa'en ca dalaxaicolec napannaxanaxat saq taiguet aca togoshe npoto.
37Qataq nataqa'en saishet da qaicoyigui aca shiguiỹac lo'oc ltoxoi ca lataxa maye dalaxaicolec. Cha'aye ca dalaxaicolec lataxa da ỹashiiyigui, nache ishet da ỹachipiaxata'ague aca lo'oc, nache ca lataxa qataq aca lo'oc caamaye deqa't. 38Qaq ỹoqo'oye que'eca dalaxaicolec lataxa, camaye iuen da qaicoyigui aca dalaxaale lo'oc ca shiguiỹac.
39Qataq nataqa'en da huo'o ca ỹe'eguen ca togoshec lataxa, nache camaye saishet da huotaique da qaltaq ỹe'eguelaxa da nỹomgui ca dalaxaicolec lataxa, cha'aye mashe ỹaỹaten da ca togoshec lataxa nacheca ca ỹataqta 'onaxaic.»
Currently Selected:
Lucas 5: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
Lucas 5
5
So ña'acoxoc maye sa qaỹauanapega
(Mateo 4.18-22; Marcos 1.16-20)
1Qaq huo'o so na'a'q So Jesús hueto'ot na loigue aso lapel late'erai ye Galilea, nache ỹataqta qalota so shiỹaxauapi laponeua'a Somaye da yaqto' na'axaỹaxana da la'aqtac Ñim Lo'onatac 'Enauacna. 2Nache So Jesús ila'alo soua dos nllocta qui'itchiguilo, neto'oto na loigue asa'aso lapel late'erai, cha'aye som ya'acoxoicpi huenoteeguesopa soomaye. Qataq iỹota'ape soua lalegue'c. 3Aso 'oonole se'esoua nllocta lalamaqte so Simón Pedro, nache So Jesús huenooñigui asomaye, ime, nache iỹaxanot so Pedro da cara'ac da nquigaxattaxaasom asomaye. Ime, nache So Jesús nso'ooñi#5.3 Qaimeten ye Marcos 4.1. netangui aso nllocta, nache cot da ỹapaxaguen so shiỹaxauapi.
4Qaq So Jesús co'ollaq ime da lapaxaguenataxanaxac, nache 'enapega so Pedro, 'eeta':
–'Auauegaxaama ye laiñi ana lapel ana 'al-llocta. Ime, nache 'aualliguiñi na 'araleguec.
5Nache so Pedro 'enapeco':
–'Am Napaxaguenataxanaq, qomi' imauec so pe da sha'acoqtac, qalaq qaica ca qaralliiguishec. Qalaxaye 'am da aỹem 'auamaq, nache nagui sasaxañi na ỹaleguec.
6Qaq co'ollaq qaỹo'ot da 'enapec So Jesús, nache ỹataqta qalota so nalliiguishecpi nỹaq. Qaq ỹoqo'oye huotaique da colaqa'ague so lalegue'c. 7Nache soomaye ỹatecapeguetalo soua lỹa't maye netanguilo aso lỹa nllocta, da yaqto' je'c da itaua'n soomaye. Nache se'esoua lỹa't je'c, nache ỹataqta qanlaxatchiguilo soua dos nllocta. Qaq ỹoqo'oye ỹataqta huotaique da iyiiyiñi. 8Qaq co'ollaq ila'a de'era so Pedro, nache ỹa'aroto naua l-llectel So Jesús, nache 'enapega, 'eeta':
¡'Am Ỹataxala' aỹem qoca'ai, cha'aye aỹem ỹataqta aỹem 'etaxaloxoic!
9-10So Pedro Santiago qataq so Juan maye llalqa so Zebedeo qataq 'enauac so laỹepi ỹataqta ỹaguec da lcolanaxa, souaxat se'eso qaica ca 'ena'am lla'acoxo'c maye ỹo'o't. Qalaxaye So Jesús 'enapega so Pedro, 'eeta':
–Saishet qome da 'añi'i, cha'aye nache chegoqchiguiña nagui da qaỹa'axañiiñi da qaya'acoxoqui, nache Aỹem qami' sapaxagueneque da lataxac da yaqto' Aỹem qanaviquiiua'a na shiỹaxauapi da yaqto' Aỹem quegue.
11Ime, nache ỹaueguetra so loigue soua l-llocta', nache no'onaxatchiguilo 'enauac nam ỹachetacpi, nache ca'atregue So Jesús.
So Jesús nataren so nchega na lo'oc
(Mateo 8.1-4; Marcos 1.40-45)
12Qaq huo'o so na'a'q co'ollaq hueta'a so nỹecpi So Jesús. Nache nvireuo so 'oonolec ỹale maye sa no'on, somaye nchega na lo'oc; nache ỹa'aroto naua l-llectel So Jesús iviraxata'aguet na latap naqa'en na 'alhua. Nache nachoxoreetacot, 'eeta':
–'Am Ỹataxala' aỹem saỹaten da 'aushet da aỹem 'anataren. ¿'Auo'ot peta'a de'era?
13Nache So Jesús ipoteua'a somaye, nache 'enapega, 'eeta':
–¡Aja', seshet! ¡Nagui 'am no'oita!
Nache saqaỹaloq da qaica so lalolaxa se'eso sa no'on. 14Ime, nache So Jesús 'enapega somaye, 'eeta':
–Saishet qome da huo'o ca 'aua'aqtaxanem de'era. Nachaqrata da 'am qojec, 'anachaxaneua'a ñi ltaxaỹaxanaxanec na shiỹaxauapi da qaitaxaỹapegue' Ñim Lo'onatac 'Enauacna. Ime, qaq 'aỹa'aneuo aca 'arachetaqtaxanaqte maye damaxasoxoolec co'ollaxa so Moisés, yaqto' na ntaxaỹaxanaxanecpi ỹaỹaten da mashe qaica so 'aralolaxa.
15Nache So Jesús ỹataqta nquictauec da na'aqtaguec. Nache ỹataqta qalota na shiỹaxauapi anac da ỹauotaique da na'axaỹaxana qataq huo'o na anac da huotaique da qanataren. 16Qalaxaye So Jesús, nache 'eetai' naxa da nmittaique cam huaña da ishet da 'oonolec da yaqto' nqouagaxauen.
So Jesús nataren so ỹale maye sa da'añiigue
(Mateo 9.1-8; Marcos 2.1-12)
17Qaq huo'o so na'a'q So Jesús dapaxaguenataxaatac hueta'a so nỹec. Qaq huo'o na ỹalectauo nso'ootañi nam ỹalectaigui na fariseopi qataq nam dapaxaguenataxaatapeguec na namaxasoxonaxacpi. Somayepi chegaqa'alo naua 'aleu' yem 'alhua ye Galilea, qataq ye 'alhua Judea qataq ye nỹecpi ye Jerusalén, da yaqto' na'axaỹaxana So Jesús.
–Qaq souaxat da So Jesús hueto'ot da la'añaxac Ñim Lo'onatac 'Enauacna da yaqto' nataren na sa no'onpi, 18nache nvildeuo soua shiỹaxau' npeetragui so mala' huetalec so ỹale maye saishet da queuoỹapigui'. Nache se'eso sa no'on qaỹauotaique da qairoua'a So Jesús, 19qalaxaye saishet da ỹanatra cam tateua'a naqa'e'n se'eso nỹec, cha'aye so ñegueuo ỹataqta qalota na shiỹaxauapi. Huaña, nache huenoldesheguemec na l-laq so nỹec,#5.19 Qaimeten ye Marcos 2.4. nache ỹauo'o so lauata'c. Nache tachiguingui naqa'e'n so lmala' so sa no'on da ỹasaxaña cam laiñi som lapoota'a't shiỹaxauapi qataq ỹataxaatrelec So Jesús.
20Nache So Jesús co'ollaq ila'a da lta'araic lpi'iỹaxa'c soomaye, nache 'enapega so sa no'on, 'eeta':
«¡'Am ñauochaxaua, nagui sapalaxat na 'arasouaxashetpi!»
21Nache nam dapaxaguenataxaatapeguec na namaxasoxonaxacpi maye chegoqo'ot so Moisés qataq na fariseopi deuennataxaatac, 'eeta': «¿Negue't cam ipettega dam da'? ¡Da nasaxauec la'aqtac ỹataqta dataỹa'aguet Ñim Lo'onatac 'Enauacna! ¡Nachaqñita Ñimaye da ishet da ỹapalaxat ca nasouaxashet!»
22Qalaxaye So Jesús ỹaỹaten da lhuennataxa somayepi, nache denataxan 'eeta':
«¿Ta'ainco' ye qarhuennataxaqui de'era? 23Ñaq Aỹem qaua'aqtaxañim: ¿negue't ca ỹoqta saqalaq da qoỹenapec, peta'a da qaỹapalaxa't naua lasouaxashe'ete ne'ena sa no'on, huo'otaq da qanataren? 24Qalaxaye nagui qami' sachaxanalo da Aỹem, maye Aỹem Shiỹaxaua Llalec huo'o da ỹa'añaxac ana'ana 'alhua da sapalaxat na nasouaxashetpi.»
Huaña, nache 'enapega som ỹale maye sa da'añiigue, 'eeta':
«Qoñisheguem, 'auacona na 'armala'. Ime, qaq qojec, 'anqo'ona ca 'arma'.»
25Nache saqaỹaloq da ñesheguem som sa da'añiigue, ỹauaachigui 'enauac somayepi. Ime, nache ỹacona so lmala' maye nnaatalec co'ollaxa, nache nqo'ona ca lma', ỹataqta ỹo'oxoreetac Ñim Lo'onatac 'Enauacna.
26Nache 'enauac so shiỹaxauapi ỹataqta huo'o da la'aalaxa, qataq nlaqchigui da lcolanaxa, ime, nache ỹo'oxoreetac Ñim Lo'onatac 'Enauacna, 'eeta':
«¡Ỹataqta qaica ca 'ena'am da llo'oxoyec da sauanaqchigui ne'ena na'a'q!»
So Jesús iỹaxana so Mateo
(Mateo 9.9-13; Marcos 2.13-17)
27Qaq co'ollaq ime de'era, nache So Jesús ca'ai yi'iye hueta'a. Qaq co'ollaq queta, nache ila'a so ỹale le'enaxat Mateo do'onataxaatac ỹacootapeeguet ana nsheetenaqte ca nta'a maye netaña ye Roma. Nache So Jesús 'enapego' somaye, 'eeta':
«Aỹem 'auca'ategue.»
28Nache so Mateo ñesheguem, no'onaxatchigui 'enauac nam hueto'otpi, nache ca'ategue So Jesús.
29Qaq nacheso se'eso na'a'q da so Mateo ỹo'ot so lta'araic lquia'axac, souaxat da huo'o naq 'enec naqa'en So Jesús. Nache iỹaxana da lquia'axaua so qalota nam ỹacootapeeguet ana nsheetenaqte ca nta'a maye netaña ye Roma, qataq qalota so laỹepi. 30Qalaxaye huo'o na fariseopi qataq huo'o na dapaxaguenataxaatapeguec na namaxasoxonaxacpi da quetrapegueleguete soua lapaxaguenataqa So Jesús. Nache 'eetregalo, 'eetra':
–¿Ta'ainco' qami' ye qarquia'axauai nam ỹacootapeeguet ana nsheetenaqte ca nta'a qataq nam shiỹaxauapi maye qauem da lataxac?
31Nache So Jesús 'enapeco':
–Nam iuen ca natannaxanaq nachena nam sa no'onpi, qaq saishet da nachena nam no'oitapi. 32Aỹem ñanac da seỹaxana nam 'etaxaloxoicpi da yaqto' ỹe'eguelaqot Ñim Lo'onatac 'Enauacna, qaq saishet da nachena nam 'eetega da no'on da lataxac.
Qainat So Jesús da chaq 'eetec ca lataxac ca shiỹaxaua da nqouaqchet
(Mateo 9.14-17; Marcos 2.18-22)
33Nache huo'oi soua 'enapegalo So Jesús, 'eetra':
–Na lapaxaguenatacpi so Juan maye nachelaxanataxanaq qataq nam quetague' na fariseopi ỹataqta ỹaguec da nqouagaxaunaxac qataq nqouaqchetaxac. Qaq naua 'arapaxaguenataqa qalaq nda'a't da lquia'axac qataq da nỹomaxac.
34Nache So Jesús 'enapeco':
–Ca ncoyeguenatacpi da ỹalectaua'a ca naronaxac, camayepi saishet da nqouaqchet da ña ỹalecta'aguet ca auonaxaua. 35Qalaxaye qom ivita ca laloqo' da qaỹauec que'eca aronaq, huaña, nache ishet da nqouaqchet cam ncoyeguenatacpi.
36So Jesús nataqa'en ỹauo'o da daloqnaxana, 'eeta':
«Da huo'otaq huo'o aca togoshe npoto da huo'otaq colaqa'ague, nache qaica ca icheguec ca laỹe aca npoto maye dalaxaale da naparen aca togoshe. Cha'aye da nache 'eetec, nache na'axat aca dalaxaale. Qataq nataqa'en ca dalaxaicolec napannaxanaxat saq taiguet aca togoshe npoto.
37Qataq nataqa'en saishet da qaicoyigui aca shiguiỹac lo'oc ltoxoi ca lataxa maye dalaxaicolec. Cha'aye ca dalaxaicolec lataxa da ỹashiiyigui, nache ishet da ỹachipiaxata'ague aca lo'oc, nache ca lataxa qataq aca lo'oc caamaye deqa't. 38Qaq ỹoqo'oye que'eca dalaxaicolec lataxa, camaye iuen da qaicoyigui aca dalaxaale lo'oc ca shiguiỹac.
39Qataq nataqa'en da huo'o ca ỹe'eguen ca togoshec lataxa, nache camaye saishet da huotaique da qaltaq ỹe'eguelaxa da nỹomgui ca dalaxaicolec lataxa, cha'aye mashe ỹaỹaten da ca togoshec lataxa nacheca ca ỹataqta 'onaxaic.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.