Lucas 9
9
So Jesús ỹama'q soua doce lapaxaguenataqa
(Mateo 10.5-15; Marcos 6.7-13)
1Qaq huo'o so na'a'q, nache So Jesús ỹataxana't soua doce lapaxaguenataqa, nache ỹanema da la'añaxac soomaye da yaqto' natare'n na ỹotta'a't nalolaxapi qataq ỹanema da 'ene'c da ishet da ỹo'orauec nam ỹotta'a't saqcha'a na'añaxac leguemaxaicpi. 2Ime, nache ỹama'q soomaye da ỹa'axatre'c da no'on na'axaỹaxac dam lo'onataxanaxac Ñim Lo'onatac 'Enauacna, qataq natare'n na sa no'onpi. 3Nache 'enapegalo' soomaye, 'eeta':
«Saishet qome da huo'o ca qauache na nqa'aic. Saishet da qauache caua qarashelchelli' qataq ca qarachoxonaxaqui qataq ca qo'oqoi qataq aca qo'omi. Qataq saishet qome da huo'o ca ỹache' caua logo lỹa't. 4Qaq da qaviyeeua'a ca nỹec, nache qoviỹa'a, choche ivitta'a da qoquiỹa'ai que'eca 'alhua. 5Qaq ca huaña da saishet da qami' qaỹaconegueta, qalaq qoquiỹa'ai camaye. Ime, qaq qauchegoqoiuec na namoxoỹaxa naua qarapia'achilli'. Qaq damaye la'anaxat da camayepi saq qami' ỹaconegueta.»
6Ime, nache soua napaxaguenataqa je'c da taỹa 'enauac nam saq 'amaqtaq nỹecpiolec yi'iye 'alhua, ỹa'axattrac da no'on na'axaỹaxac qataq natareetrac na saq no'onpi.
Da nalaataguec so nachelaxanataxanaq Juan
(Mateo 14.1-12; Marcos 6.14-29)
7So nta'a le'enaxat Herodes Antipas co'ollaq ỹaỹaten 'enauac nam ỹo'ottacpi So Jesús, nache ỹataqta sa ỹaỹaten ca 'eetec, cha'aye huo'o na 'eetega da qaltaq nca'alec so Juan. 8Qataq huo'o na 'eetega da nacheso som la'aqtaxanaxanec Ñim Lo'onatac 'Enauacna le'enaxat Elías#9.8 Na'aqtaxanaxanec le'enaxat Elías: Qalota na judiopi da iuatta'a so la'aqtaxanaxanec Ñim Lo'onatac 'Enauacna le'enaxat Elías da qaltaq nca'alec, da yaqto' ỹaỹamaxaañi da lviraxac ca Nca'aguishec. da qaltaq nachaxan, qataq huo'o na 'eetega da nca'alec ca 'oonolec som hua'au la'aqtaxanaxanecpi Ñim Lo'onatac 'Enauacna. 9Qalaxaye so Herodes 'enapeco': «¿Chaq negue't dam da' ỹale maye ỹataqta ỹaguec da na'aqtaguec? Damaye saishet da nachera da Juan maye nachelaxanataxanaq, cha'aye aỹem samaxasoxoolec caillaye da qaỹalauat.»
Qaq ỹoqo'oye so Herodes ỹataqta huo'o da lyaxa da ỹauatton So Jesús.
So Jesús iquia'axan so qalota shiỹaxauapi
(Mateo 14.13-21; Marcos 6.30-44; Juan 6.1-14)
10Nache soua lapaxaguenataqa co'ollaq mashe ñe'eguela'q, nache da'aqtaxaatrapeguem So Jesús 'enauac nam ỹo'otpi. Ime, nache So Jesús nnaicapegueto soomaye da nqo'onalo ye nỹecpi ye Betsaida, cha'aye huotaique da ndoteto soomaye. 11Qalaxaye so shiỹaxauapi co'ollaq ỹaỹaten da So Jesús taigue da Betsaida, nache qaicaalec Somaye.
–Nache So Jesús ỹaconeguet 'enauac so shiỹaxauapi, cha'aye ỹataqta huo'o da lauotaxanaqtaic, nache ỹachegoxottot da da'aqtaxaatapeguem dam lo'onataxanaxac Ñim Lo'onatac 'Enauacna. Nataqa'en nataren nam sa no'onpi.
12Qaq co'ollaq mashe avit, nache soua doce lapaxaguenataqa nquiguereua'a So Jesús, nache 'eetrega, 'eetra':
–Qonapega na shiỹaxauapi, da yaqto' nqo'oneua'a na saqaỹapeque nỹecpi da nmitaique ca huaña da lo'ochaqa' ne'ena pe, qataq desheenaxanaique ca aloq. ¡Cha'aye ne'ena souaqta'a ỹataqta toolec!
13Qalaxaye So Jesús 'enapeco':
–Qaỹa'añim qami' cam aloq namayepi.
Nache soomaye 'ena'apo':
–Qaica cam qonoq. Nachaqyeuate' yeua cincole nauolel qataq yeua dos nỹaxaye. Cha'aye da sauoqtaique sequia'axanaq ne'ena shiỹaxauapi, nache iuen da sesheenaxanaqaique ca nallec, 14cha'aye namayepi napacalec ca cinco mil shiỹaxauapi ye lcata.
–Qalaxaye So Jesús 'enapegalo soua lapaxaguenataqa, 'eeta':
–Qoñiỹapega namayepi da nso'ooñi, ỹottecache qanqa'eñi cincuenta na huaxaỹa't.
15Nache soua napaxaguenataqa ỹo'o't da damaxasoxoolec So Jesús.
16Nache So Jesús ỹaconalo soua cincole nauole qataq soua dos nỹaxaye. Ime, qaq ỹamato'ot na piguem, nache nqouagaxaueeleguete soomaye. Ime nache ncolaxaayiñi, nache ỹanema soua lapaxaguenataqa, da yaqto' soomaye ỹanoiguilo so shiỹaxauapi.
17Nache 'enauac somayepi deque'e, ivira'a da comaraxaicpi, nache co'ollaq ime da lquia'axac, nache qalaỹona't so ñi'iỹoxot. Nache ivi' doce soua no'oxonal maye laỹe' na nallec, soua nlaxatchiguilo.
So Pedro ỹa'axat so Jesús da nacheso so Lca'aguishec Ñim Lo'onatac 'Enauacna
(Mateo 16.13-19; Marcos 8.27-29)
18Huo'o so huaña, nache So Jesús nqouagaxaueetac 'oonolec, nache soua lapaxaguenataqa ivildeuga ca hueta'a Somaye. Nache So Jesús inatta'apo' soomaye, 'eeta':
–¿Ca 'eetec naxa ca la'aqtac na shiỹaxauapi da Aỹem na'aqtaxaatapigui?
19Nache soua napaxaguenataqa ỹasa't, 'eetra':
–Qomye huo'o na ipettega da nache 'am nachelaxanataxanaq Juan; qataq huo'o na ipettega da nache 'am Elías; qataq huo'o na 'eetega da nache 'am 'oonolec som hua'au la'aqtaxanaxanecpi Ñim Lo'onatac 'Enauacna da huo'otaq nca'alec.
20Ime, nache So Jesús ina't soomaye, 'eeta':
–Qaq qami' ¿Chaq negue't ca qaupicheetega Aỹem?
Nache so Pedro 'enapeco':
–Qomye nache 'am Lca'aguishec Ñim Lo'onatac 'Enauacna maye 'am namaq.
21Qalaxaye So Jesús 'enapegalo 'enauaque soomaye da saishet da huo'o ca da'aqtaxanema, da Somaye nacheso So Lca'aguishec Ñim Lo'onatac 'Enauacna.
So Jesús ỹa'axata'a da nalaataguec
(Mateo 16.20-28; Marcos 8.30–9.1)
22So Jesús nataqa'en 'enapegalo soua lapaxaguenataqa 'eeta': «Aỹem, maye Aỹem Shiỹaxaua Llalec, ỹataqta qalota qome da ñeque'eenaxac. Cha'aye na nataxala'pi maye ilotague' ne'ena 'alhua, qataq na ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna, qataq nam dapaxaguenataxaatapeguec na namaxasoxonaxacpi, namayepi Aỹem ỹamaqauec qataq Aỹem ỹalauat. Qalaxaye da mashe ivi' caua tres na'axa'te, nache qaltaq ñeca'alec.»
23Ime, nache So Jesús 'enapega 'enauac so hueta'a yi'iye, 'eeta':
«Ca nshetaique da ỹapaxaguenatac, nache camaye iuen da icoua'ai da ỹo'ot ca maiche 'eetapeguec. Qataq iuen da lhuotta da Aỹem ileualec qataq da ỹo'ot ca samaxalec. 24Cha'aye da huo'o ca ipettega da nachaalataxac da ỹactec da 'onaxaic, saq 'ena'am da Aỹem quegue, nache camaye da nachaalataxac deqat. Qalaxaye da huo'o ca ỹaỹamaxareeta qataq lca'aua'a da ileualec Aỹem, nache camaye nca'alec. 25Cha'aye qaica ca naigui ca shiỹaxaua da imata'a't da nauec 'enauac nam huetalec ana 'alhua, da huo'otaq da maiche nque'emaqcheela't qataq deqat da nachaalataxac.
26Da huo'o ca Aỹem ncoxolec qataq da ỹapaxaguenataxanaxac, nache Aỹem Shiỹaxaua Llalec nataqa'en ñecoxolec camaye, qom ivita da ñe'eguelaq da ñanactaigui da ỹa'añaxac qataq da la'añaxac Ñi Ita'a qataq nam qui'itta lamaxashecpi. 27Ỹataqta 'eesa de'era qami' sa'axatema, da huo'o nagui na ỹalectauo da saxanaxa qome da ileu, qom huo'otaq saxanaxa da ilogui da 'eetec qom ilo'ogue 'enauacna Ñim Lo'onatac 'Enauacna.»
So Jesús nqochen da lataxac
(Mateo 17.1-8; Marcos 9.2-8)
28Qaq co'ollaq mashe inoxoore'c soua ocho na'axa'te, nache So Jesús ỹauec so Pedro, Juan qataq so Santiago da taresheguemec aso qaỹoqotcheguemec 'alhua da yaqto' nqouagaxauen. 29Qaq co'ollaq ñaq nqouagaxaueetac, nache da lasheguiỹaxac nqochen, qataq soua alogo ỹataqta ỹapaga'q qataq qashelectrapiguiñi. 30Huaña, nache nachaxa'n so Moisés qataq so la'aqtaxanaxanec Ñim Lo'onatac 'Enauacna le'enaxat Elías, 31coleesopa so ne'eraxa ỹataqta qaica ca 'ena'am da llo'oxoyec. Qaq soomaye da'aqtaxaatrapeguema So Jesús da 'eetec da l-leuaxa, qom huaña ye Jerusalén qataq da 'eetec qom qaltaq nca'alec qataq da taigue da piguem.
32Qaq so Pedro qataq soua lỹa't napaxaguenataqa mashe do'ochete'. Qalaxaye saqaỹaloq da nlorec, nache ila'alo So Jesús da huetaigui da llo'oxoyec, huaqta'ato so Moisés qataq so Elías. 33Qaq co'ollaq so Moisés qataq so Elías da mashe huotaique da ca'aisalo Somaye, nache so Pedro 'enapego' So Jesús, 'eeta': «'Am Napaxaguenataxanaq ¡Maye saq no'on ye souaqta'a ne'ena! Da 'auaỹamaxareeta, nache aỹem so'ot caua tres qaya'axaquilli', 'oonolec ca 'arma', qataq da Moisés qataq da Elías.»
Qaq so Pedro sa ỹaỹaten ca naigui de'era la'aqtac. 34Qaq co'ollaq ña detaqtac, nache anac so lo'oc chegoqo'ot na piguem ỹataqta ipelteeleguete 'enauaque soomaye. Nache se'esoua tres napaxaguenataqa ỹataqta lta'araic da lcolanaqa'. 35Ime, nache qaỹa'axaỹa so nvilỹaxac chemaxaigui so lo'oc, 'eeta': «¡'Era da Ỹalec maye Ica'aguishec! Qaq qami' iuen da ỹataqta qaualaqaiguet.»
36Qaq co'ollaq ỹoxogue se'eso na'aqtac, nache qaltaq qaila'a So Jesús da ndotec. Nache soomaye, ỹataqta huo'oi soua na'axa'te da qaica ca da'aqtaxaarem de'era lauanaqche'c.
So Jesús nataren so nsoq maye huo'o so netaigui saqcha'a na'añaxac leguemaxaic
(Mateo 17.14-21; Marcos 9.14-29)
37Qaq so lỹa na'a'q co'ollaq So Jesús qataq soua tres lapaxaguenataqa huenotreeguesop aso qaỹoqotcheguemec 'alhua, nache nateera'aguet so qalota shiỹaxauapi. 38Nache huo'o so ỹale ỹalectaigui so shiỹaxauapi nquigueua'a So Jesús, nache 'enapego' 'eeta':
–'Am Napaxaguenataxanaq, 'am ñachoxonnot da 'autauan da 'oonolec ỹalec. 39Huo'o so saqcha'a na'añaxac leguemaxaic imattaigui, nache ỹa'alaqchettac naxa. Qataq nataqa'en iviloxolaqchet qataq anac naxa naqa'en na lcoche na alap. Qaq naxa da ca'ai, nache ỹataqta qaica naqa'en ca lyac. 40Qaq mashe sogote da ñachoxoreetacoto daua 'arapaxaguenataqa da ỹo'oldaue'c ñi'iñi saqcha'a na'añaxac leguemaxaic, qalaxaye saishe't.
41Nache So Jesús ỹamataigui so ca'attague'pi, nache 'enapeco':
–¿Peta'a ỹapac da saishet da huo'o ca qauañoxoche da saishet da qami' soota'agueta? ¡Chaq tachiguiña qome da ñeualaxaunaxac da qoñiita! Qami' ỹataqta qausomiỹapec qataq sa qaupi'iỹa'ai Ñim Lo'onatac 'Enauacna.
–Ime, nache So Jesús 'enapega se'eso ỹale 'eeta':
–Ñaq 'anaueecna'a cam 'aỹa'alec.
42Qaq co'ollaq mashe saq qaỹapeque se'eso nsoq, nache so saqcha'a na'añaxac leguemaxaic huañi naqa'en somaye, nache ỹo'otec da lta'araic lviloxolaxa na lo'oc. Ime, nache So Jesús nlaxa se'eso saqcha'a na'añaxac leguemaxaic. Nache nataren se'eso nsoq. Ime, nache ỹe'eguelaxatot so lta'a.
43Nache 'enauac se'eso shiỹaxauapi ỹataqta huo'o da la'aalaxa da lta'araic la'añaxac Ñim Lo'onatac 'Enauacna.
So Jesús qaltaq ỹa'axata'a da nalaataguec
(Mateo 17.22-23; Marcos 9.30-32)
–Qaq co'ollaq ñaq queta da qaỹa'aalatapeguec 'enauac nam ỹo'ot So Jesús, nache Somaye 'enapegalo soua lapaxaguenataqa, 'eeta': 44«Ña qana'axaỹaxañiichigui da shenapec, Aỹem Shiỹaxaua Llalec Aỹem qoỹanoigui qome nam Aỹem ipa'agueetacpi.»
45Qalaxaye soua lapaxaguenataqa saishet da ỹaỹate'n de'era la'aqtac So Jesús, cha'aye saxanaxa da ivira ye laloqo' da yaqto' ỹaỹate'n. Nataqa'en huo'o da lcolanaqa' da ina't Somaye da chaq negue't ca naigui de'era la'aqtac.
¿Negue't ca ỹactec da la'amaqchec?
(Mateo 18.1-5; Marcos 9.33-37)
46Huo'o so huaña, da soua napaxaguenataqa nqallegottrapiguilo da chaq negue't soomaye ca ỹactec da la'amaqchec.
47Qalaxaye So Jesús co'ollaq ỹaỹaten da lhuennataxac soomaye, nache iỹaxana so nogotolec, nache huaqte', 48Nache 'enapegalo' soomaye 'eeta': «Da huo'o ca ỹaconeguet ca 'eeta'am ne'ena nogotolec, nache camaye Aỹem ỹaconeguet. Qaq da huo'o ca ỹaconeguet Aỹem, nache ỹaconeguet Ñim Lo'onatac 'Enauacna maye Aỹem namaq. Cha'aye ca ỹapactec qaica ca la'amaqchec 'enauac da qoñiita, qaq nacheca ca ỹataqta 'eesa da 'amaqtaqaic.»
Ca saq qomi' mpa'aguenalo, nache camaye qartaua
(Marcos 9.38-40)
49So Juan maye 'oonolec soua doce napaxaguenataqa 'enapega So Jesús 'eeta':
–'Am Napaxaguenataxanaq, qomi' huo'o so 'oonolec ñatenaqalec da do'otaxaatega da 'are'enaxat da ỹo'otteguec na saqcha'a na'añaxac leguemaxaicpi maye netaigui na shiỹaxauapi. Qalaxaye qomi' shenaqtega somaye da saishet da, nache 'eetec de'era, cha'aye somaye saishet da qomi' ỹalectaiguilo.
50Qalaxaye So Jesús 'enapeco':
–Saishet da qaulliỹapeguem, cha'aye ca saishet da qomi' mpa'aguenalo, nache camaye qartaua.
So Jesús nlaxa so Santiago qataq so Juan
51Qaq co'ollaq mashe saqaỹapeque so laloqo' da taigue da piguem So Jesús, nache huesotec ye lavilỹaxac da taigue da Jerusalén. 52Nache ỹauo'oi soua lamaxa'she, da nqo'oora yem naña nam saq 'amaqtaq nỹecpiolec maye huaigui yem 'alhua Samaria, da yaqto' iqataxanai' cam lanataqa' se'eso pe. 53Qalaxaye nam shiỹaxauapi maye lma' yi'iye 'alhua, saishet da ỹaconeguet So Jesús, cha'aye qaila'a da tata'ague da Jerusalén.
54Nache soua lapaxaguenataqa Santiago qataq so Juan co'ollaq ilora'a de'era, nache 'eetegalo So Jesús 'eeta': «'Am Qarataxala', ¡'onaxaic da qomi' 'auasheetema da seỹaxanaqaique ca norec da chegoqo'ot na piguem, da yaqto' nmatchiguiñi 'enauac yemayepi da ỹavigaxat!»
55Qalaxaye So Jesús ỹamataiguilo soomaye, nache nlaxalo. [Nache 'eeta': Qami' sa qauaỹaañi chaq negue't cam saqcha'a maye chegoqo'ot de'era qauem qarhuennataxaqui. 56Cha'aye na Shiỹaxaua Llalec saishet da anac da nqat da nachaalataxac ca shiỹaxaua, nacherata da nca'alaxatec.] Qaq ime, nache je'c nqo'oora so nma'piolec maye saq 'amaqtaq.
Soua nshetraique da ca'atregue So Jesús
(Mateo 8.19-22)
57Qaq co'ollaq quete' soomaye, nache huo'o so shiỹaxaua 'enapega So Jesús, 'eeta':
–'Am Ỹataxala', ñeshetaique da 'am seca'ategue, maicheye cam 'auataigue.
58Nache So Jesús 'enapeco':
–Ana huaxaỹaxapi huo'o na lauac, qataq na qoỹopi 'enauac huo'o na lpata'c, qalaxaye Aỹem Shiỹaxaua Llalec, qaica ca ỹataqta ima' da so'oche.
59Ime, nache So Jesús 'enapega so lỹa, 'eeta':
–Aỹem 'auca'ategue.
Qalaxaye somaye 'enapeco':
–'Am Ỹataxala', aỹem 'aua'axaỹa'a, ña sa'auaxaañi da selayiñi ye ita'a.
60Qalaxaye So Jesús 'enapega 'eeta':
–Ỹactec da ỹaỹamaqchiguiñi da 'am qojec nagui da 'aua'axatec da no'on na'axaỹaxac da lo'onataxanaxac Ñim Lo'onatac 'Enauacna. ¡Ñaq 'aua'axaỹa'a na leuaxaicpi da maiche ilayiñi na lqatacpi!
61Ime, nache qaltaq anac so lỹa shiỹaxaua, nache 'eetega So Jesús 'eeta':
–'Am Ỹataxala', ñeshetaique da 'am seca'ategue, qalaxaye no'on da aỹem 'aua'axaỹa'a da sa'auaxaañi da ñecoyeguene' na ỹalaqpi.
62Nache So Jesús 'enapego' 'eeta':
–Saishet da ỹaỹamaxañi da qanayeetaigui da lo'onataxanaxac Ñim Lo'onatac 'Enauacna, nache qaỹe'enaxat dam qauem lataxac ca ỹale maye ỹo'ottac na 'alhua. Cha'aye ca na'ayisheguem ca na'alhua da namata'ague na l-laq, nache ca lo'onatac camaye ỹataqta namaxagui.
Currently Selected:
Lucas 9: LÑLE13
Highlight
Share
Copy
Want to have your highlights saved across all your devices? Sign up or sign in
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.
