Marcos 16

Qaỹa'axat So Jesús da qaltaq nca'alec

(Mateo 28.1-10; Lucas 24.1-12; Juan 20.1-10)

1Qaq co'ollaq mashe inoxonec so na'a'q mataxaqui maye saishetapec na judiopi, nache aso María maye lma' ye Magdala, Salomé qataq aso María maye late'e so Santiago, soomaye desheenaxara so coraxat da yaqto' icorelec da lo'ocỹaxac So Jesús. 2Qaq ña nte'etom som la'auaxanec na'a'q co'ollaq tareuga aso huachiqui, qaq mashe nnoxotcheguem aso nala' co'ollaq ivilde'c. 3-4Qaq co'ollaq ñaq quete', nache na'aqtaxaatega't 'eetra': «¿Negue't ca nqat ñi coma' lta'araic maye lapoxot añi huachiqui? ¡Ye ñimaye ỹataqta ỹaguec da lta'araic!» Qalaxaye co'ollaq ỹamatraua'a se'eso coma' lta'araic maye lapoxot aso huachiqui, nache mashe saishet da hueta'a so ñegueuo.

5Qaq co'ollaq inoxooroiguilo aso huachiqui, nache ilora'a so nsoq nso'ootañi, hueta'ague da aloic aso nhuachiqui So Jesús, logoraiqa soua alogo qataq lapagaxaiqa. Nache soomaye ỹataqta ñi'i', 6qalaxaye so nsoq 'enapegalo' soomaye, 'eeta':

«Saishet da qayi'i. Qami' qanmichiitaique So Jesús som ỹale maye Nazaret le'ec, som ileu qaiuaxaata'aguet so npe'enaxala' soua na'axa'te lỹa't. Somaye saishet da hueta'a ne'ena. Somaye qaltaq nca'alec. Ñaq qaumichiñi yem qaỹachaña co'ollaxa so lo'ocỹaxac. 7Qaq nagui qoqui qaua'aqtaxañima caua lapaxaguenataqa, qataq ca Pedro da So Jesús taigue da 'alhua Galilea da hua'auta'ague. Huaña yemaye, nache qanauañi', ipacchigui da 'enapec Somaye co'ollaq ỹa'axatta'a da l-leuaxa.»

8Nache se'esoua 'alol ỹataqta iviloxolaqche't da lcolanaqa', nache datare'c quera'ai aso huachiqui. Nache ỹataqta qaica ca da'aqtaxaarem nam natena'aguet na nqa'aic souaxat da ỹataqta ñi'i'.

So Jesús nachaxana aso María maye lma' ye Magdala

(Juan 20.11-18)

9[Qaq so nte'etom so la'auaxanec na'a'q co'ollaq mashe qaltaq nca'alec So Jesús, nache hua'auchiguiñi da nachaxana aso María maye lma' ye Magdala. Soua hua'au' na'axa'te nataren So Jesús asomaye ỹo'oldauec soua siete saq cha'alo na'añaxaco leguemaxaiqa maye netaigui co'ollaxa asomaye.

10Qaq soua lapaxaguenataqa ñaq daquicota'ape qataq nỹeeta'ape souaxat da l-leuaxa So Jesús, nache ivireuo asomaye, nache da'aqtaxanema soomaye da So Jesús nca'altauec. 11Qalaxaye soomaye sa ỹa'amaqte'n da So Jesús ỹoltaq nca'alec, qataq da nauane' aso María.

So Jesús nachaxanalo soua dos lapaxaguenataqa

(Lucas 24.13-35)

12Ime co'ollaxa, nache So Jesús qaltaq nachaxanalo soua dos lapaxaguenataqa maye taỹaugalo so no'onaxa. 13Nache soua dos lapaxaguenataqa je'c da icoyegue'n soua lỹa't, qalaxaye nataqa'en sa qaỹa'amaqte'n soomaye.

Da namaxasague'c soua napaxaguenataqa

(Mateo 28.16-20; Lucas 24.36-49; Juan 20.19-23)

14Ime, nache So Jesús nachaxanalo soua once lapaxaguenataqa co'ollaq soomaye ñaq deque'eta'ape. Nache nlaqtegalo soomaye souaxat da qaica ca lpi'iỹaxa'c, qataq da ỹataqta qaramchiguilo naua lquiyaqtel, cha'aye soomaye saishet da ỹa'amaqte'n soua nauaneto Somaye da mashe qaltaq qanca'alaxatec. 15Nache So Jesús 'enapegalo soomaye, 'eeta':

«Qanqo'oñiỹa qome 'enauac na ỹotta'a't shiỹaxauapi ana 'alhua, nache qaua'aqtaxañim dam no'on na'axaỹaxac. 16Qaq ca Aỹem ỹa'amaqten, nache qanachelaxan, yaqto' camaye nca'alec. Qalaxaye ca saishet da Aỹem ỹa'amaqten, nache camaye saishet da saconeguet. 17Qaq nam Aỹem pi'iỹa'a qataq do'onataxana da ỹe'enaxat, nache ishet da huo'o ca ỹo'ot na'anec maye sa qaỹauanapega, cam ỹo'ot da na'aalaxa: Ishet da ỹo'orauec na saqcha'a na'añaxac leguemaxaicpi, qataq ishet da da'aqtaxanguilo naua dalaxaiqa na'aqtaqa qataq sa qaỹauanapegalo, 18qataq ishet da ỹacongui na na'araxanaq, qataq nỹomgui na deshenataxan, qalaxaye qaica ca 'eetec. Nataqa'en da ỹashel-lec na sa no'onpi, nache no'oita.»

So Jesús taigue da piguem

(Lucas 24.50-53)

19Qaq co'ollaq so Qarataxala' Jesús imat da na'aqtaxaategueto soua lapaxaguenataqa, nache Ñim Lo'onatac 'Enauacna ỹaueegue da piguem. Huaña, nache Somaye nso'oota'ague da aloic Ñim Lo'onatac 'Enauacna, yem huaña da qaica ca 'ena'am da llo'oxoyec.

20Nache soua lapaxaguenataqa je'c da ỹa'axatre'c da no'on na'axaỹaxac dam lo'onataxanaxac Ñim Lo'onatac 'Enauacna. Nache so Qarataxala' Jesús nnaictagueto qataq itauaata'ape soomaye, ỹachegoxotchigui nam na'anec maye sa qaỹauanapega, qaq nache 'eetec de'era Ñim Lo'onatac 'Enauacna da ỹachaxan da soua lapaxaguenataqa da la'aqtaxanaxa'c ỹataqta 'eesa. Aja', nache 'eetec.]

Currently Selected:

Marcos 16: LÑLE13

Highlight

Copy