Génesis 11
11
Ipashinitantacarori Tasorentsi irineanepee atiri
1Ari yoshequiajeitantanajari atiripee, otimaveitani aparoni irineane iquemavacaajeitantaniri ineanajeiti. Irotaque quiso yoavacaajeitantaniri. 2Iponeajeitantanajari anta iquenapainta catsirincaiteri, ari ineajeitapaaquero antearoite opampaiteti quipatsiquiniri Sinar. Aitaque isavicajeitapaajiri. 3Ari aparo quitaiteri icantavacaajeita: “Tsame avetsiquero quipatsi ladriyopee, impoiji antaaquero paamariqui.” Ari imajeitaquero yovetsicayetaquero ladriyopee pinaajirori mapipee, aisati yaaque tsineri pinaajirori tsiretatsiri, onquisotantanaqueari. 4Impoiji icantajeiti aisati: “Tsame avetsiquero antearoite anampi aisati avetsique antearo pancotsi jatatsiri jenoqui, areetachaneri anta inquitequi. Irineajeitantearori ashanincajeitajeari coajicani oca amateri meeca, impoiji irineacameetsajeitee, aisati eiroquea avaraajeitantatsi pashinipeequi quipatsi, quiso avavacaajeitea.” Ari imajeivetacaro.
5Iro cantaincha ineaquero Tasorentsi yantajeitaqueri; te onimoteriji iriori. 6Iquenqueshireaca icanti: “Yoca atiripee yapatojeitaca maaroni aparoni inampi. Aisati aparoni irineane iquemavacaajeitantari ineanajeiti. Irotaque yantajeitantacarori oca yovetsicaqueri, eiro meeca icoajeititsi irojocajero. 7Tsame ajate ampashiniteneri irineane; eiroquea iquemavacaajeitantanajatsi, irojocajeitantanajearori.”
8Ari imataquero; irosati opashiniyetantanaca irineanepee, te inquemavacaajeitanajeaji. Irosati yojocajeitantanajaro yovetsicajeivetacari, yovaraajeitanaca itimayetanaque jaocapeerica quipatsipeequi. 9Irotaque opajitantacari oca nampitsi Babel; tempa aitaque peerani ipashinijeitaqueneriri Tasorentsi irineanepee atiri.
Jero ivajiro ishanincapeeni Sem
(1 Crón. 1.24-27)
10Jeri yoca ishanincapeeni iriori Sem. Ari avisanaji apite osarentsi incajaretantacaniri. Ocarataque 100 irosarentsite Sem, itimantacari itomi iriori, ipajitaqueri Arfaxad. 11Impoiji ocaratanaque aisati 500 irosarentsite, itimayetanaji aisati itomipee jero irishintopee.
12Ari ocarataque 35 irosarentsite Arfaxad, itimantacari itomi iriori, ipajitaqueri SÉlah. 13Impoiji ocaratanaque aisati 403 irosarentsite, itimayetanaji aisati itomipee jero irishintopee.
14Ari ocarataque 30 irosarentsite SÉlah, itimantacari itomi iriori, ipajitaqueri Éber. 15Impoiji ocaratanaque aisati 403 irosarentsite, itimayetanaji aisati itomipee jero irishintopee.
16Ari ocarataque 34 irosarentsite Éber, itimantacari itomi iriori, ipajitaqueri PÉleg. 17Impoiji ocaratanaque aisati 430 irosarentsite, itimayetanaji aisati itomipee jero irishintopee.
18Ari ocarataque 30 irosarentsite PÉleg, itimantacari itomi iriori, ipajitaqueri Reú. 19Impoiji ocaratanaque aisati 209 irosarentsite, itimayetanaji aisati itomipee jero irishintopee.
20Ari ocarataque 32 irosarentsite Reú, itimantacari itomi iriori, ipajitaqueri Serug. 21Impoiji ocaratanaque aisati 207 irosarentsite, itimayetanaji aisati itomipee jero irishintopee.
22Ari ocarataque 30 irosarentsite Serug, itimantacari itomi iriori, ipajitaqueri Nahor. 23Impoiji ocaratanaque aisati 200 irosarentsite, itimayetanaji aisati itomipee jero irishintopee.
24Ari ocarataque 29 irosarentsite Nahor, itimantacari itomi iriori, ipajitaqueri TÉrah. 25Impoiji ocaratanaque aisati 119 irosarentsite, itimayetanaji aisati itomipee jero irishintopee.
26Ari ocarataque 70 irosarentsite TÉrah, itimantayetacari itomipee iriori, ipajiyetaqueri: Abrama, Nahor jeri Harán.
Jero ivajiropee ishanincapeeni iriori TÉrah.
27Jeri ishanincapeeni iriori TÉrah, iririni Abrama, Nahor jeri Harán. Yora Harán iririni Lot 28icamitaca anta nampitsiqui Ur, otiminta quipatsi Caldea itimaquenta, tequeratsita incameni TÉrah iririni.
29Impoiji yaaquero Abrama Sarai, ijinantacaro. Aisati iriori Nahor ijinantacaro Milcá, irotaque irishintoni Harán, ora ireento Iscá. 30Ora Sarai shiravaro oni, te intimeji otomi.
31Ari yojocanaquero TÉrah inampini ora Ur, caldeaquiniri, irijatanteameri anta quipatsiqui pajitachari Canaán. Icarajeitanaqueri itomi Abrama jero ijina Sarai jeri icharine Lot. Ari ijajeitanaque, yareejeitapaacaro nampitsi pajitachari Harán. Aitaque isavicajeitapaaqueri. 32Ari ocaratapaaque 205 irosarentsite TÉrah, irosati icamantaca.
Currently Selected:
Génesis 11: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
