Génesis 26
26
Isavicaque Isaac nampitsiqui Guerar
1Ari antearoite otashentsiiteanaque. Te ontimajeji iroajeitajeari maaroni savicajeitatsiri nampitsipeequi, oquempetajaro peerani itimantaveitaniri iririni Abrahamani. Irotaque ijatantacari Isaac nampitsiqui Guerar, isaviquinta AbimÉlec pincatsariventiriri filisteopee. 2Yareetantacari anta, inijaacari Tasorentsi icantaqueri: “Eiro pijatitsi Egiptoqui. Ocameetsati pisavicaque jaocarica noncantaquempi. 3Aitaque meeca pisaviqueri aca quipatsiqui. Noncanteani quiso noyempi nontasoncacoventempi. Nompempiro maaroni oca quipatsi pisavicanteari, jeri iriori impoijeitajempineri timajeitajantsine coajica. Impoiji nomoncaratero maaroni nocantitacariri pirini Abrahama. 4Noshequiacaasanojeitajeri catsini, inquempeteari impoquiropee. Nompajeiteri maaroni oca quipatsi. Nontasoncacoventajeiteri, irosati nontasoncacoventajeitanteariri maaroni atiripee. 5Nomatantearori oca; tempa iquemisantasanotaquena peerani pirini, imoncarataquenaro maaroni nocantiriri.” Irotaque icantaqueriri.
6Ari isavicapaaji Isaac nampitsiqui Guerar. 7Yora savicajeitatsiri nampitsiqui ineavaquero Rebeca ocameetsavorotaque, irosati isampitacoventajeitantacaro. Yora Isaac itsaroanaque incante: “Irotaque nojina.” Yaamaacari iroimentaqueri, irotaque icantashitantanacariri: “Irointi tsio.”
8Ari osamanitanaque isavicaque anta. Aparo quitaiteri yora AbimÉlec yamenacoyeti anta ivancoqui omorojaniquiqui. Ari ineaqueri Isaac yavitsanotiro Rebeca. 9Irosati icajemacantantacari. Icantiri:
—¡Irotaquempa oca pijina! ¡Paitaquea picantashitantacari chapinqui: ‘Irointi tsio!’
Icantanaqueri iriori:
—Naamaacari savicajeitatsiri aca iroimentavaquenaro, irotaque nocantashitantacari.
10Icantanajiri aisati:
—¿Paitaquea pamatavitantaquenari? Ariome yoonaitaquempirome noshanincapee, meeca pantacaajeitaquenarome caari cameetsatatsi.
11Impoiji icantajeitiri maaroni ishanincapee:
—Jaanicarica antanaterine yoca shirampari aisati ijina, ontimatiye incame.
Itasoncaventaqueri Tasorentsi Isaac anta nampitsiquinta Guerar.
12Ora osarentsiqui ipanquiveetapaaque Isaac, oshequi catsini itasoncacoventaqueneri Tasorentsi otimasanotanaque oitsoqui ivanquiveerepee. 13Oshequi catsini yashitaarantapaaca. 14Yora filisteopee ineajeitaqueri oshequi irovishatepee, ivacatepee aisati inampirepee. Irotaque iquisanentacojeitantacariri. 15Itijapitsajeitaqueri quipatsi nija iquianatacaajeitiriniri inampirepee iririni. 16Impoiji icantiri AbimÉlec Isaac:
—Eiro meeca pisaviquimotajanatsi aca. Pijataje povaanajea jaocarica. Oshequi panaacojeitapaaquena, pashitaarantasanotapaaca avinti.
17Irosati yovantanaja anta oirincaiteacotapai Guerar, aitaque isavicajeitapaajiri. 18Iquianayetapaajiro aisati nija iquianayetiniri iririni tequeratani incame, ora itijapitsayetaqueriri peerani filisteopee, aisati ipajiyetapaajiro ipajiyetironi iririni. 19Ari aparo quitaiteri yora inampirepee Isaac iquianajeivetaja pashini oirincaiteapai. Irosati ineantacaro amotoaajati nija. 20Iro cantaincha yora Gerarisati amenajeitiriri irovishatepee anta, yantimentajeitaqueri amenajeitiriri irashipee Isaac. Icantajeitiri: “Irointi nashi.” Irosati ipajitantacaro Isaac nija Esec. (Ocanti ovajiro: Yantavacaimenteetari.) 21Impoiji iquianavetaja pashini, yantimentajiri aisati. Irosati ipajitantajaro Sitna. (Ocanti ovajiro: Iquisavacaimenteetari.)
22Irosati yovantanaja aisati Isaac areejiqui, iquianatapaaji. Ari cameetsa isavicapaaji, tecatsi antimentajerine. Irotaque ipajitantacarori Rehobot. (Ocanti ovajiro: Tecatsi antimentajeerone.) Tempa icanti: “Meeca itasoncaventaquee Tasorentsi asavicajeitanteari cameetsa, amatanteari antaveete aca.”
23Impoiji yovaajeitanaja aisati Beersebaqui. 24Ari tsiteniriqui yonijaajari Tasorentsi. Icantiri: “Narotaque Tasorentsi iquemisantiri piri Abrahamani, yora antaveetapinitananiri; eiro pitsaroitsi, quiso noaquempi. Notasoncacoventaqueri pirini; tempa iriotaque antayetanarori nocoacairiri, irosati nontasoncacoventantempiri avirori, noshequiacaasanojeitajeri pishanincajeitajeari coajicani.”
25Impoiji yovetsicaque altar yaventacari Tasorentsi iquenquetsatacaaqueri. Aitaque isavicajeitapaajiri. Yora inampirepee iquianatapaaji aisati nija.
Yora AbimÉlec jeri Isaac, icantasanotiri: “Tsame aacameetsatavacaajeitea”
26Aparo quitaiteri yora AbimÉlec ijatashitajiri Isaac inquenquetsatacaajeri. Itsipatanacari itsipatapinitari, ipajita Ahuzat, jeri aisati Ficol, yora jivatacairiri manajeitachari. 27Yareejeitantapaacari, icantavaqueri Isaac:
—¡Paita pipocashijeitantanari pineajena! Chapinqui nosaviquimovetapaaquempi pinampiqui, iro cantaincha pitiancajana, te pincoyeji nosaviquimotempi.
28Yacanajeitaqueri iriori, icantiri:
—Iro nopocantajeitacari aca, niojeitaque itsipataquempi Tasorentsi. Noquenqueshireajeitanaja meeca, nocoajeitaque noncantajempi: ‘Tsame aacameetsatavacaajeitajea, eiro pantanajeitanatsi.’ 29Noquempetaca narori naacameetsajeitaquempi, tecatsi noncantajeitempi, aisati cameetsa notiancajeitajimpi. Meeca itasoncaventasanotaquempi Tasorentsi.
30Irosati yantantaca Isaac fieshita antearoite, yaacameetsatavacantajari. Yoajeitaca, irajeitaque, iquimoshireventajeitaquero. 31Ari oquitaiteamanaji itinaajeitamanaja, icatiajeitaca icantavacaasanojeitaca: “Tsame amoncarajeitero acantavacaajeitacari, eiro meeca antanatavacaajeitajatsi.” Impoiji Isaac yovetsatavajari cameetsa, iquempetacantaqueri itsipavintsatari, irosati ipiantajeitanaja AbimÉlec jeri tsipajeitariri inampiqui.
32Irosati ipocajeitantapaaja inampirepee Isaac iquianaiti nija, icantapaaqueri: “Nomataqueroyea noquianataqueri, contejatanaque oni.” 33Ari ipajitaquero iquianataqueri inampirepee Sebá. (Ocanti ovajiro: Yaacameetsatavacanteetari.) Irotaque meeca opajitantari nampitsi Beerseba.
Yaantacari Esaú ijinapee
34Ari ocarataque 40 irosarentsite Esaú, yaantacari ijina pajitachari Judit, irishinto Beerí yora hitita. Aisati yaaque otsipa, opajita Basemat, irishinto Elón, irisati iriori hitita.
35Oca apitetatsiri tsinane, te onimoteriji iriri aisati iriniro, oshequi oshemashireacari.
Currently Selected:
Génesis 26: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
