Génesis 28
28
Itiancaqueri Isaac Jacobo quipatsiqui Padan-aram
1Ari icajemaqueri Isaac itomi yora Jacobo, icantacoventaqueri Tasorentsiqui. Irosati icantasanotantacari:
—Notomi, eiro pairotsi ora tsinanepee savicajeitatsiri quipatsiquica Canaán. 2Meeca nocoacaaquempi pijate quipatsiqui Padan-aram, isaviquinta picharine Betuel. Paapeerota irishinto piconquiri Labán. 3Irio Tasorentsi mayetirori paitapeerica tasoncacoventempine, intimanteari oshequi pishanincajeitajeari, nashiyetanainchaneri. 4Iriotaque tasoncaventajeitempine avirori aisati pishanincajeitajeari, irashijeitajearo oca quipatsi icantitacariri picharineni Abrahama. Irotaque asavicantajeitacari meeca aquempetacantaca pashinisati.
5Aitaque ocantari itiancaqueri Isaac yora Jacobo quipatsiqui Padan-aram. Yareetaca ivancoqui iriconquiri Labán, itomi Betuel yora arameo. Iriotaque ojariri Rebeca, iriniro Jacobo jeri Esaú.
Yaantajari pashini ijina Esaú
6Ineacotaqueri Esaú iriri icantacoventantacari irirenti, aisati itiancantacariri Padan-aramaqui iraanteari ijina anta. Aisati iquemaqueri icantasanotavaqueriri: “Eiro pairotsi tsinane canaasato.” 7Aisati ineavaqueri ijatantacari, iquemisantaquero icantasanotaqueriri iriri aisati iriniro. 8-9Ari iotanaque Esaú te irineacameetsateroji iriri tsinanepee canaasato yaaqueri, irosati ijatantaca irineeri iriritsori Ismael. Ari yaapaaji anta pashini ijina, irishinto Mahalat, iritsiro Nebaiot, ocantapaaca aisati ijinapee yaitacari.
Imishitacari Jacobo Tasorentsi
10-11Ijatantacari Jacobo nampitsiqui Harán, iponeanaca Beersebaqui. Ari imaanaque nianqui, yaapaaque aparo mapi tsantsari itiinatacari. 12Imantanacari, imishitacaro ataimentotsi. Ineaquero oatiaca quipatsiqui irosati anta inquitequi. Aisati ineaqueri inampirepee Tasorentsi yaniireapinijeitaque aisati yataitapinijeitaque. 13Aisati ineaqueri Tasorentsi icatiaca overapaacanta ataimentotsi. Iquemaqueri icantaqueri:
—Narotaque Tasorentsisanori iquemisantiri picharineni Abrahamani aisati iriori piri Isaac. Noncamantempi: ora quipatsi pimaantacarira, irotaque nompempiri pisavicanteari. Aisati irotaque irisavicajeitanteari pishanincajeitajeari coajicani. 14Oshequi catsini incarajeitanaque, inquempetearo ovane impanequi. Intsoteanaquero oca quipatsi, irisavicantajeitanaquearo catonco, quirinca, acaqueroca aisati antaqueronta. Nontasoncacoventempi aisati iriori pishanincajeitajeari, irosati nontasoncacoventajeitanteariri maaroni atiripee quipatsiquiniri. 15Quiso noanaquempi, nonquempoyeacoventempi jaocapeerica pijateri aisati noimpiajempi aca piipatsitequi. Eiro nojoquimpitsi, nomoncaratempiro maaroni nocashiacaaquempiri nocantaquempiri.
Irotaque icantaqueriri.
16Itinantanacari imainequi, iquenqueshireanaca. Icanti: “Queariotaque aitaque itimiri Tasorentsi aca. Te nioveteaji.” 17Oshequi itsaroanaque Jacobo, icanti: “Irotaque oca inashitacaari Tasorentsi, inantacari aca. Aisati irotaque quempetarori anquenanteari areetanteari inquitequi.”
18Ari oquitaiteamanaji itinaamanaja, yaaquero mapi ora itiinaitari, yoatiaquero. Inashitacaacaro, isaitaquero oja orivo. Iro isaitantacarori inquenqueshiretapinitanteariri Tasorentsi, aitaque yonijaamainetacariri. 19Anta imaanaquenta Jacobo, irotaque nampitsi pajiveitachaniri Luz. Meeca ipajitajiro Betel.
20Impoiji icantasanotaqueri Tasorentsi; icantiri. “Notasorentsite, quisorica poyena, ariorica pinquempoyeaventaquena nojatenta aisati pimpenarica noyeari jero nonquitsaateari, 21aisati nompiajerica apaqui, tecatsirica oyenane; impoijiquea niotanaque avirotaque Notasorentsite. 22Jero oca mapi noatiaqueri, meeca nompajitero Inantari Tasorentsi. Irotaque nonquenqueshiretantearori aitaque aca nomishitacariri.” Aisati icantiri: “Noncanteani nompaarantapinitempi maaroni pimpayetenari. Ariorica oncarate 10, ari nonashitacayempi aparoni.”
Currently Selected:
Génesis 28: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
