Génesis 43
43
Ijataque Benjamín Egiptoqui
1Aiquero ojatatii otashentsiiteasanotanaque catsini maaroni nampitsipeequi. 2Ari itsoncajeitaquero tirico yaajeivetaitari Egiptoqui. Icantajiri Jacobo itomipee:
—Pijajeitajante aisati pamanantajante tirico avajeitajeari.
3Iro cantaincha icantanaqueri Judá:
—Eiro nomajeitirotsi nojajeite. Tempa icantasanotavaquena shirampari pimantirori tirico: ‘Eirorica pamiritsi pirenti impoitatsiri itimi, eiroyea pipocajeitajitsi aisati.’ 4Ariorica meeca pishinetaquenari naanaqueri Benjamín, impoijiquea nojajeitajante namanantajante aisati. 5Irompa eirorica pishinetiritsi, eiro nojajeititsi; tempa eiro yaacameetsatavajanatsi shirampari.
6Icantanajiri iriori iriri:
—¡Paitaquea picamantajeitantacariri timatsi pashini iye, picoajeitaque poashinoncaasanotena catsini!
7Yacajeitanaqueri:
—Iro cantaincha irisati sampitaquena, icantana: ‘¿Aneatsimpa piri? ¿Aisati timatsimpa pashinipee pirenti?’ Irotaque nocamantajeitantacariri. Te niojeiteji narori incantatiyenayeata: ‘Pamaquenari pashini pirenti.’
8Icantanajiri aisati Judá:
—Picoaquerica eiro aajeiteetsi atashe, ontimatiye pishineteri Benjamín naanaquerita. Intsipaitequea nojajeite namanantajante avajeitajeari, eiroquea acamajeitantatsi maaroni. 9Arionea namenaqueri anta, narotaquequea apaniro pincantapinitanaque paitarica avishimotaquerine, eirorica noipiajiritsi aca. Narotaque cantacayearone irosati noncamantaquea. 10Ariome pishinetitaquearime naanaqueri, eiro osamanitime jajeitaquename chapinqui namanantajanteme aisati tirico. Meeca apitetanaqueme nojataiteme.
11Ari yacanaqueri iriori iriri:
—Aitaquerica oncanteari pimateroqueti. Paanaqueyea aisati timimoyeteeri aca cameetsayetatsiri: casancajayetatsiri icanteetiri bálsamo aisati mirra, aisati ija pitsi jero oitsoquipee icanteetiri almendra. Ocameetsati paayetanaque coshitaaripeequi pimpashiyetapempariri shirampari pimantirori tirico. 12Paanaqueyea oshequi quireequi aisati paanajeri yora yoipiavetavajimpiri chapinqui, pimpasanotapaajeri pimantirori tirico. Aamaaca ipeacotaca, irotaque yoipiantavajariri 13Pijatequeti meeca pamanantajante, paanaqueri pirenti. 14Irio Tasorentsi mayetirori maaroni cantashireacayearine pimantirori tirico, incavintsaajeitempi iroimisoquijacantajeri Simeón aisati irishinetajeri Benjamín impiantajeari aca. Oncantaveteata, eirorica itimajitsi notomipee, aitanaji.
15-16Irosati ijajeitantanaca, yaanaqueri Benjamín aisati oshequi quireequi jero impashiyetapempariri shirampari. Yareejeitantapaacariri JosÉ, ineavajiri irirentisanori. Ari icantaqueri yora amenacantirori maaroni yashiyetari.
—Paajeitanaqueri yoca anta novancoqui. Poapeeyea aparoni vaca. Pivetsique oshequi oanarontsi, noacaajeiteariri intampaticatapaaquerica catsirincaiteri.
17-18Ari iquemisantaquero icantaqueriri, yaajeitanaqueri. Iro cantaincha itsaroajeitanaque irirentipee, icantavacaajeitanaca nianqui: “Manayeata yamatavitaquee, yamantaqueeri aca. Yamimentaqueeri quireequi yoipiavajeeneri chapinqui. Icoaque iroisavicajeitee iromperanajeitanteeri aisati iraitanteeriri avirapee.”
19Yareetacaajeitantacariri ivancoqui JosÉ, isavicajeitapaaque saiteriqui. Ari iquempejijeitacari amenacantirori yashiyetari JosÉ. 20-22Icantajeitiri:
—Novincatsarite, chapinqui nopocajeitantaitari namanantaiti tirico, nopiantanajari. Ari nianqui avotsi nomaajeitanajinta nashireajeitapaaquero noyoshitaaritepee, noneajeitajatiiri aparopeeni noireequite. Te nioteji jaanicarica oipiavajanariri. Irosati icanta te iraarantempaji, meeca noipiajeitajiri. Aisati namaji oshequi quireequi namanantantajeari tirico.
23Ari icantajeitiri:
—Pimajerejeite. Eiro pitsaroitsi. Yora Tasorentsi piquemisantiri aisati iquemisantiri piri, iriotaque oajeitajimpiriri quireequi piyoshitaaritepeequi. Tempa naaqueri pipinaventanaquerori tirico.
Impoiji ijatanaque anta yoiminqueaquerinta Simeón, yoimisoquijapaajiri. Yaanajiri isavicajeitaquenta irirentipee. 24Impoiji yaajeitanaqueri maaroni tsompoinaqui pancotsi, ipajeitaqueri nija iquivajeitantapaacarori iitipee. Aisati ipajeitaqueri yoari iraashinotepee. 25Ari yovetsicajeitaquero yamajeitaqueneriri JosÉ. Yoyeajeitaqueri impocaje intampaticatapaaquerica catsirincaiteri; tempa iojeitaque aitaque iroacaajeiteariri.
26Yareetantapaajari JosÉ ivancoqui, yoivotashijeitavacari ipincatsajeitavaqueri. Impoiji ipajeitavaqueri yamajeitaqueneriri. 27Ari isampitapaaqueri JosÉ:
—¿Jaoca picantajeitari? Aisati ¿jaoca icantari piri, yora anteashipatanaintsiri picantaquenari chapinqui? ¿Aneatsimpa ini?
28Ari yoivotashijeitanajari aisati, icantajeitiri:
—Jee, ainirotatsi apa, aneatsiquera ini. Tecatsi oyerine.
29Impoiji yamenaqueri maaroni irirentipee. Irosati ineantajari Benjamín, irirentisanori iriori. Isampijeitaqueri:
—¿Iriompa yoca pirenti impoitatsiri itimi, picantajeitaquenari chapinqui?
Yacajeitanaqueri:
—Jee, iriotaque.
Ari icantiri Benjamín:
—Notomi, irio Tasorentsi tasoncacoventempine.
30Icantantacariri, ocantimonentanacari catsini irirayempa; tempa ineavajiri irirentisanori. Intsipaite iqueanaque tsompoina imainta, iraasanotapaaca. 31Ari icaratanaji iraaca, iquivavorotaja. Irosati ipiantapaaja isavicajeitaquenta irirentipee. Icantiri inampirepee: “Pinquijeiteroqueti meeca oanarontsi.” Ari iquijeitaquero.
32Yoashitacanari JosÉ imeesatequi yoantapinitari apaniro. Aisati iquempejeitaqueneri irirentipee, yoashijeitacanari iriori otsipaqui meesa. Aisati inashijeitaca iriori egiptosati. Tempa yora egiptosati ipiincajeitiri hebreopee, te incoyeji incarajeiteri iroajeitea. 33Irosati yoisavicajeitantacari JosÉ irirentipee, yoveshintsaquiajeitaqueri cameetsa meesaqui. Ijivataqueri yora jivatatsiri itimi, irosati yoverantapaaca impoitatsiri itimi. Ari yamenavacaajeitanaca, yoajeitanaque cavaco. 34Yora JosÉ yaaquero yoari imeesatequiniri ipajeitaqueri irirentipee. Iro cantaincha ipasanotaqueri quimota irinti Benjamín, yanaacojeitaqueri itsipapee irirenti. Ari yoajeitaca aisati irajeitaque cameetsa, iquimoshiretasanojeitaque.
Currently Selected:
Génesis 43: cni
Highlight
Share
Copy
Want to have your highlights saved across all your devices? Sign up or sign in
© 2008, 2015, Wycliffe Bible Translators, Inc. All rights reserved.
